‘OKÚ KE ‘ilo ‘a e ‘uluaki me‘a na‘e fai ‘e Noa ‘i he‘ene hū ki tu‘a mo hono fāmilí mei he ‘a‘aké? Na‘á ne fai ha feilaulau pe foaki-‘ofa ki he ‘Otuá. ‘Okú ke lava ‘o sio ki hono fai ‘a e me‘á ni ‘i he fakatātā ‘i laló. Na‘e foaki atu ‘e Noa ‘a e me‘a‘ofa ko eni ko e fanga manu ko e fakamālō ki he ‘Otuá ‘i he‘ene fakahaofi hono fāmilí mei he fu‘u lōmakí.

‘Okú ke pehē na‘e fiemālie ‘a Sihova ‘i he me‘a‘ofa ko ‘ení? ‘Io, na‘e pehē. Pea ko ia ai, na‘á ne tala‘ofa kia Noa he‘ikai te ne toe faka‘auha ‘a e māmaní ‘aki ha lōmaki.

Na‘e vave ‘a e mōmoa ‘a e funga fonuá, pea kamata leva ‘a Noa mo hono fāmilí ha mo‘ui fo‘ou ‘i tu‘a mei he ‘a‘aké. Na‘e tāpuaki‘i kinautolu ‘e he ‘Otuá peá ne tala kiate kinautolu: ‘⁠Kuo pau ke mou ma‘u ha fānau tokolahi. Kuo pau ke mou tupu ‘o tokolahi kae‘oua ke nofo‘i ‘e he tangatá ‘a māmani kātoa.’

Ka ki mui mai, ‘i he taimi ‘e fanongo ai ‘a e kakaí ‘o fekau‘aki mo e fu‘u lōmakí, te nau ilifia nai na‘a toe hoko mai ha lōmaki pehē. Ko ia na‘e ‘omai ‘e he ‘Otuá ha me‘a te ne fakamanatu ki he kakaí ‘ene tala‘ofa ‘o pehē he‘ikai ke toe ‘ai ha lōmaki pehē ki he māmaní kotoa. ‘Okú ke ‘ilo pe ko e hā na‘á ne ‘ai ke fakamanatu ‘aki kiate kinautolú? Ko e ‘ūmata.

‘Oku tau fa‘a sio ki he ‘ūmata ‘i he langí ‘i he ulo mai ‘a e la‘aá ‘i he toki ‘osi ha ‘uha. ‘Oku lahi ‘a e ngaahi lanu faka‘ofo‘ofa ‘i he ‘ūmatá. Kuó ke ‘osi sio ki he ‘ūmatá? ‘Okú ke sio ki ai ‘i he fakatātaá?

Ko e me‘a eni na‘e tala ‘e he ‘Otuá: ‘ ‘Oku ou tala‘ofa ‘e ‘ikai ‘aupito toe faka‘auha‘aki ha lōmaki ‘a e kakaí mo e fanga manú. Te u ‘ai ‘eku ‘ūmata ‘i he ‘aó. Pea ‘i he ‘asi ‘a e ‘ūmatá, te u mamata ki ai pea manatu‘i ‘a ‘eku tala‘ofa ko ení.’

Ko ia ‘i ha‘o sio ki ha ‘ūmata, ko e hā ‘oku totonu ke ne fakamanatu kiate koé? ‘Io, ko e tala‘ofa ‘a e ‘Otuá ‘o pehē he‘ikai ‘aupito te ne toe faka‘auha ‘a e māmaní ‘aki ha fu‘u lōmaki.