SIO ki he māmaní ‘i he fakatātā ko ení! ‘Oku faka‘ofo‘ofa hono me‘a kotoa pē! Sio ki he musie mo e ngaahi ‘akau, ko e ngaahi matala‘i‘akau pea mo e fanga manu kotoa pē. Te ke lava ‘o tala ‘a e ‘elefānité mo e fanga laioné?

Na‘e hoko fēfē mai ‘a e fu‘u ngoue faka‘ofo‘ofá ni? Tau vakai ange ki he anga hono teuteu ‘e he ‘Otuá ‘a māmani ma‘atautolu.

‘Uluaki, na‘e ngaohi ‘e he ‘Otuá ‘a e musie lanu mata ke ne ‘ufi‘ufi ‘a e funga ‘o e fonuá. Peá ne ngaohi leva ‘a e fa‘ahinga kehekehe ‘o e ngaahi ‘akau iiki mo e vao mo e ngaahi ‘akau. ‘Oku tokoni ‘a e ngaahi me‘a ‘oku tupu ko ‘ení ki hono ‘ai ke faka‘ofo‘ofa ‘a e māmaní. Ka ‘oku lahi ange ‘a e me‘a ‘oku nau faí. Ko e lahi ‘o e ngaahi me‘á ni ‘oku nau ‘omai ma‘atautolu ha ngaahi me‘akai ‘oku mātu‘aki ifo mo‘oni.

Na‘e ngaohi ki mui mai ai ‘e he ‘Otuá ha ika ke lele holo ‘i he vaí pea mo e fanga manupuna ke puna holo ‘i he ‘ataá. Na‘á ne ngaohi ‘a e fanga kulī, mo e fanga pusi mo e fanga hoosi; ko e fanga manu lalahi mo e fanga manu iiki. Ko e hā ‘a e fa‘ahinga fanga manu ‘oku nofo ofi atu ki homou ‘apí? ‘Ikai ‘oku totonu ke tau fiefia ‘i hono ngaohi ‘e he ‘Otuá ‘a e ngaahi me‘a kotoa ko ‘ení ma‘atautolu?

Faifai atu, na‘e ngaohi ‘e he ‘Otuá ‘a e konga ‘e taha ‘o e māmaní ko e feitu‘u mātu‘aki makehe. Na‘á ne ui ‘a e feitu‘u ko ‘ení ko e ngoue ko ‘Īteni. Na‘e mātu‘aki haohaoa ia. Na‘e faka‘ofo‘ofa ‘a e me‘a kotoa pē ‘o fekau‘aki mo ia. Pea na‘e fiema‘u ‘e he ‘Otuá ke hoko ‘a e māmaní kotoa ‘o hangē ko e ngoue faka‘ofo‘ofa ko eni na‘á ne ngaohí.

Kae toe sio ange ki he fakatātā ‘o e ngoué ni. ‘Okú ke ‘ilo ‘a e me‘a na‘e vakai ki ai ‘e he ‘Otuá ‘oku ‘ikai ke ‘i he ngoué ni? Tau sio ange.