KAU FAKANOFONOFO ‘Oku vahe‘i ‘a e kau fakanofonofó ke nau tokoni‘i koe. Kātaki ‘o fengāue‘aki kakato mo kinautolu ‘aki ‘a e muimui ki he‘enau fakahinohino fekau‘aki mo e tau‘anga me‘alelé, ko hono mapule‘i lelei ‘a e fu‘u kakaí, ta‘ofi nofo‘angá mo ha toe ngaahi me‘a kehe.

PAPITAISO Ko e ngaahi nofo‘anga kuo ta‘ofi ki he kau teu papitaisó ‘e ‘i he nofo‘anga tefitó ia ‘i mu‘a ‘i he siteisí tuku kehe ‘o ka toki fakahaa‘i atu. Ko e kau teu papitaisó ‘oku totonu ke nau nofo ai ki mu‘a ke kamata ‘a e malanga papitaisó ‘i he pongipongi Tokonakí. ‘Oku totonu ke ‘omai ‘e he tokotaha taki taha ha tauveli mo ha teunga kaukau taau.

NGAAHI TOKONI ‘I ha fu‘u fakamole lahi, kuo fai ai ha ngaahi fokotu‘utu‘u ke tokonaki ha nofo‘anga fe‘unga, ko ha me‘a-fakale‘olahi, naunau vitiō, pea mo e ngaahi sēvesi kehe, ‘a ia ‘oku nau ‘ai ke fakafiefia ‘a hono ma‘u ‘a e fakataha-lahí pea tokoni‘i kitautolu ke ‘unu‘unu ofi ange kia Sihova. Ko ho‘omou ngaahi tokoni loto-fiefoakí ‘oku tokoni ia ke totongi‘aki ‘a e ngaahi fakamole ko ‘ení mo poupou‘i‘aki foki ‘a e ngāue ‘i māmani lahí. Ke faingamālie kiate kimoutolú, ‘oku ‘i ai ha ngaahi puha tokoni ‘oku faka‘ilonga‘i mahino ‘oku fokotu‘u takai ‘i he fai‘anga fakatahá. ‘Oku mātu‘aki fakahounga‘i ‘a e ngaahi tokoni kotoa pē. ‘Oku fie fakamālō atu ‘a e Kulupu Pulé ki ho‘omou poupou nima-homo ki he ngaahi me‘a ‘o e Pule‘angá.

‘ULUAKI FUOFUA TOKONI Kātaki ‘o manatu‘i, ko e me‘a eni ia ki he NGAAHI ME‘A FAKAVAVEVAVÉ PĒ.

KOLOA MOLE Ko e koloa mole kotoa pē ‘oku totonu ke ‘ave ia ki he Potungāue Koloa Molé. Kapau kuo mole ha‘o me‘a, ‘alu ki he potungāue ko ‘ení ‘o vakai‘i ho‘o koloá. Ko e fānau kuo nau hē mei he‘enau ngaahi mātu‘á ‘o nau pulí ‘oku totonu ke ‘ave ki he potungāue ko ‘ení. Kae kehe, ke faka‘ehi‘ehi mei he loto-mafasia ‘oku ‘ikai fiema‘u ki he fa‘ahinga kotoa ‘oku kau ki aí, kātaki ‘o tokanga‘i ho‘o fānaú pea ‘ai ke nau nofo ma‘u mo koe.

NOFO‘ANGA Kātaki ‘o faka‘atu‘i ‘a e ni‘ihi kehé. Manatu‘i, ‘oku lava ke ta‘ofi ha ngaahi nofo‘anga ki he fa‘ahinga pē ‘i he fāmilí, mo e fa‘ahinga ‘oku fononga mai mo koe ‘i he me‘alele tatau, nofo mo koe ‘i he ‘api tatau, pe lolotonga ako Tohi Tapu mo koe. Kātaki ‘oua ‘e tuku ha ngaahi me‘a ‘i he ngaahi nofo‘anga ‘oku ‘ikai te ke ta‘ofí.

NGĀUE POLE Kapau ‘okú ke fie pole ke tokoni ki he ngāue ‘o fekau‘aki mo e fokotu‘utu‘u ‘o e fakataha-lahí, kātaki ‘o fakahā ia ki he Potungāue Fakamatalá mo e Ngāue Polé.

AKO MA‘Á E KAU ‘EVANGELIŌ ‘O E PULE‘ANGÁ Ko e kau tāimu‘a ‘i he vaha‘a ‘o e ta‘u 23 mo e 65 ‘a ia ‘oku nau mahu‘inga‘ia ‘i hono fakalahi ‘enau ngāue fakafaifekaú ‘oku fakaafe‘i atu ke nau kau ki he fakataha ma‘á e kau tohi kole ki he Ako Ma‘á e Kau ‘Evangeliō ‘o e Pule‘angá ‘i he ho‘atā Sāpaté. Ko e taimi mo e feitu‘u totonu ki he fakataha ko ení ‘e fanongonongo atu ia.