‘Oku fiema‘u mai ‘e he ‘Otuá ke fiefia ‘a e kakaí ‘i he mo‘ui ‘i he māmaní. Na‘á ne fakatupu ‘a e fo‘i māmaní mo e me‘a kotoa ‘oku ‘i aí koe‘uhí ko ‘ene ‘ofa ‘i he fa‘ahinga ‘o e tangatá. Kuo vavé ni ke ne ngāue ke tokonaki mai ha kaha‘u lelei ange ma‘á e kakai ‘i he fonua kotoa pē. Te ne to‘o atu mei he fa‘ahinga ‘o e tangatá ‘a e ngaahi tupu‘anga ‘o e faingata‘á.​—Lau ‘a e Selemaia 29:11.

‘Oku ‘ikai ha founga-pule kuo faifai ange pea lavame‘a ‘i hano to‘o atu ‘a e fakamālohí, mahamahakí, pe maté. Ka ‘oku ‘i ai ha ongoongo lelei. ‘Oku vavé ni ke fetongi ‘e he ‘Otuá ‘a e ngaahi founga-pule fakaetangata kotoa pē ‘aki ‘ene founga-pule pē ‘a‘aná. Ko e fa‘ahinga ‘i he malumalu ‘o e founga-pule ko iá te nau fiefia ‘i he melino mo e mo‘ui lelei.​—Lau ‘a e ‘Aisea 25:8; 33:24; Taniela 2:44.

‘E toki ngata pē ‘a e faingata‘á ‘i hano tafi‘i atu ‘e he ‘Otuá mei he fo‘i māmaní ‘a e kakai koví. (Sēfanaia 2:3) ‘E hoko ia ‘afē? Na‘e tomu‘a tala ‘e he Folofola ‘a e ‘Otuá ‘a e ngaahi tu‘unga ko ia ‘okú ne fakamanamana‘i he taimí ni ‘a e fa‘ahinga ‘o e tangatá. ‘Oku fakahaa‘i ‘e he ngaahi me‘a ‘oku lolotonga hokó ‘oku ofí ni ‘a e taimi ke ngāue mai ai ‘a e ‘Otuá.​—Lau ‘a e 2 Tīmote 3:1-5.

‘Oku totonu ke tau ako fekau‘aki mo e ‘Otuá mei he‘ene Folofolá, ko e Tohi Tapú. ‘Oku hangē ia ha faitohi mai kiate kitautolu mei ha tamai ‘ofá. ‘Oku tala mai ai kiate kitautolu ‘a e founga ke ma‘u ai ha founga mo‘ui lelei ange he taimí ni pea mo e founga ke ma‘u ai ‘a e mo‘ui ta‘engata ‘i he māmaní ‘i he kaha‘ú. Ko e mo‘oni, ‘e ‘i ai nai ha ni‘ihi he‘ikai te nau sai‘ia ke ke ma‘u ha tokoni ke mahino‘i ‘a e Tohi Tapú. Ka ko e faingamālie ki ha kaha‘u lelei angé ‘oku ‘ikai tuha ia ke li‘aki.​—Lau ‘a e Palōveepi 29:25; Fakahā 14:6, 7.