LĒSONI 6
Ko e Hā ʻa e ʻAmanaki ki he Kau Maté?
1. Ko e hā ʻa e ongoongo lelei fekauʻaki mo e kau maté?
ʻI he taimi naʻe aʻu atu ai ʻa Sīsū ki Pētani ofi ki Selusalemá, ne ʻosi mate hono kaumeʻa ko Lāsalosí ʻo ʻosi ʻa e ʻaho ʻe fā. Naʻe ʻalu ʻa Sīsū ki he feituʻu naʻe tanu aí fakataha mo Māʻata mo Mele, ko e ongo tuofāfine ʻo e tangata naʻe maté. Tuaiekemo, naʻe fakatahataha atu ha fuʻu kakai. ʻE lava ke ke sioloto atu ki he fiefia ʻa Māʻata mo Mele ʻi hono toe fokotuʻu mai ʻe Sīsū ʻa Lāsalosi ke moʻuí?—Lau ʻa e Sione 11:21-24, 38-44.
Naʻe ʻosi lāuʻilo ʻa Māʻata ia ki he ongoongo lelei fekauʻaki mo e kau maté. Naʻá ne ʻilo ʻe fokotuʻu hake ʻe Sihova ʻa e kau maté ke nau toe moʻui ʻi he māmaní.—Lau ʻa e Siope 14:14, 15.
2. Ko e hā ʻa e tuʻunga ʻoku ʻi ai ʻa e kau maté?
Naʻe tala ʻe he ʻOtuá kia ʻĀtama: “Ko e efu koe pea ko e efu te ke foki ki aí.”—SĒNESI 3:19.
Ko e ngaohi ʻa e faʻahinga ʻo e tangatá mei he efú. (Sēnesi 2:7; 3:19) ʻOku ʻikai ko ha ngaahi laumālie kitautolu ʻoku nofo ʻi ha sino kakano. Ko kitautolú ko ha ngaahi meʻamoʻui fakaesino, ko ia ʻoku ʻikai ha konga ʻo kitautolu ʻoku moʻui atu ʻi he maté. ʻI he taimi ʻoku tau mate aí, ʻoku mate foki mo hotau ʻatamaí, pea ʻoku ngata ai mo ʻetau fakakaukaú. Ko ia ai, naʻe halaʻatā ke leaʻaki ʻe Lāsalosi ia ha meʻa ʻo fekauʻaki mo haʻane hokosia ʻi he maté koeʻuhí ʻoku ʻikai ʻilo ʻe he kau maté ia ha meʻa.—Lau ʻa e Saame 146:4; Tangata Malanga 9:5, 6, 10.
ʻOku fakamamahiʻi ʻe he ʻOtuá ʻa e kakaí ʻaki ha afi he hili ʻa e maté? Koeʻuhi ʻoku fakahaaʻi ʻe he Tohi Tapú ʻoku ʻikai ke ʻilo ʻe he kau maté ha meʻa, ʻoku hā mahino ai ko e afi ʻo helí ko ha akonaki loi ia ʻoku lauʻikovi loi ai ʻa e ʻOtuá. Ko e foʻi fakakaukau tofu pē ko ia ʻo hono fakamamahiʻi ʻa e kakaí ʻaki ʻa e afí ʻoku fakalielia ia kiate ia.—Lau ʻa e Selemaia 7:31.
Sio ʻi he vitiō Ko e Hā ʻa e Tuʻunga ʻOku ʻI Ai ʻa e Kau Maté?
3. ʻOku lava ʻa e kau maté ʻo lea mai kiate kitautolu?
ʻOku ʻikai lava ʻa e kau maté ʻo lea pe fanongo. (Saame 115:17) Ka ko ha kau ʻāngelo ʻe niʻihi ʻoku nau fulikivanu, pea ʻoku malava ke nau lea ki he kakaí ʻo fakangalingali ko e faʻahinga kinautolu kuo maté. (2 Pita 2:4) ʻOku tapui ʻe Sihova ʻa e feinga ke kumi faleʻi ki he kau maté.—Lau ʻa e Teutalōnome 18:10, 11.
4. Ko hai ʻe fokotuʻu mai ke moʻuí?
Ko e laulaui miliona ʻo e kakai ʻoku nau mate ʻi he faʻitoká te nau toetuʻu mai ke moʻui ʻi he māmaní. Naʻa mo e niʻihi naʻe ʻikai te nau ʻilo ʻa e ʻOtuá pea naʻa nau angaʻaki hono fai ʻa e ngaahi meʻa naʻe koví te nau toetuʻu.—Lau ʻa e Luke 23:43; Ngāue 24:15.
ʻE lava ʻa e faʻahinga ʻe toetuʻú ke ako ʻa e moʻoni fekauʻaki mo e ʻOtuá mo fakahāhaaʻi ʻa e tui kia Sīsū ʻaki ʻa e talangofua kiate ia. (Fakahā 20:11-13) Ko e faʻahinga ko ia ʻe fokotuʻu mai ki he moʻuí pea nau fai ʻa e ngaahi meʻa ʻoku leleí te nau malava ke maʻu ʻa e moʻui taʻengata ʻi he māmaní.—Lau ʻa e Sione 5:28, 29.
5. Ko e hā ʻoku fakahaaʻi mai ʻe he toetuʻú kiate kitautolu ʻo fekauʻaki mo Sihová?
Naʻe ʻai ʻe he ʻOtuá ke malava ʻa e ʻamanaki ki he kau maté ʻaki hono fekauʻi mai hono ʻAló ke ne pekia maʻatautolu. Ko ia ʻoku fakahaaʻi mai ʻe he toetuʻú kiate kitautolu ʻa e ʻofa pea mo e ʻofa maʻataʻatā ʻa Sihová. ʻI he taimi ʻe toetuʻu mai ai ʻa e kau maté, ko hai ʻokú ke fiemaʻu lahi taha ke sio ki aí?—Lau ʻa e Sione 3:16; Loma 6:23.
