ʻOku haʻu ʻa e ongoongo leleí meia Sihova, ko e ʻOtua fiefia, ʻa ia ʻokú ne fiemaʻu ʻa e ngaahi fāmilí ke nau fiefia. (1 Tīmote 1:11) Naʻá ne fokotuʻu ʻa e nofo malí. ʻOku mātuʻaki mahuʻinga ʻa e nofo mali fakalaó ki he fiefia ʻa e fāmilí koeʻuhí ʻoku tokonaki mai ai ha ʻātakai malu ki hono ʻohake ʻa e fānaú. ʻOku totonu ke tokaʻi ʻe he kau Kalisitiané ʻa e ngaahi lao fakalotofonua fekauʻaki mo e lēsisita ʻo e nofo malí.​—Lau ʻa e Luke 2:1, 4, 5.

 ʻOku anga-fēfē ʻa e vakai ʻa e ʻOtuá ki he nofo malí? ʻOkú ne fiemaʻu mai ke hoko ia ko ha haʻi tuʻuloa ʻi he vahaʻa ʻo ha tangata mo ha fefine. ʻOku fiemaʻu ʻe Sihova ʻa e ngaahi husepānití mo e ngaahi uaifí ke nau femateakiʻaki. (Hepelū 13:4) ʻOkú ne fakaliliʻa ʻi he vete malí. (Malakai 2:16) Ka ʻokú ne fakaʻatā ʻa e kau Kalisitiané ke nau vete pea toe mali kapau ʻoku fai ha tono ʻe honau hoá.​—Lau ʻa e Mātiu 19:3-6, 9.

 Naʻe fakatupu ʻe Sihova ʻa e kakai tangatá mo e kakai fefiné ke nau fakalato ʻa e ngaahi ngafa fefakakakatoʻaki ʻi he nofo malí. (Sēnesi 2:18) ʻI he tuʻunga ko e ʻulu ʻo e fāmilí, ʻoku totonu ai ki ha husepāniti ke ne takimuʻa ʻi he tokonaki fakamatelie maʻa hono fāmilí pea ʻi hono akoʻi kinautolu fekauʻaki mo e ʻOtuá. ʻOku totonu ke ne hoko ʻo feilaulauʻi-kita ʻi heʻene ʻofa ki hono uaifí. ʻOku totonu ki he ngaahi husepānití mo e ngaahi uaifí ke nau feʻofaʻaki mo fefakaʻapaʻapaʻaki. Koeʻuhi ʻoku taʻehaohaoa ʻa e ngaahi husepānití mo e ngaahi uaifí kotoa, ko e ako ke fakamolemolé ko ha kī ia ki he fiefia ʻi he nofo malí.​—Lau ʻa e ʻEfesō 4:31, 32; 5:22-25, 33; 1 Pita 3:7.

 Kapau ʻokú mo hokosia ha ngaahi faingataʻa ʻi hoʻomo nofo malí, ko kimoua fakatouʻosi ʻoku totonu ke mo ngāue ke fefakafeangaiʻaki ʻi he ʻofa. (1 Kolinitō 13:4, 5) ʻOku ʻikai ke poupouʻi mai ʻe he Folofola ʻa e ʻOtuá ʻa e māvaé ko ha founga  ia ke fakaleleiʻiʻaki ʻa e ngaahi palopalema ʻoku hoko lahi ʻi he nofo malí.​—Lau ʻa e 1 Kolinitō 7:10-13.

 ʻOku fiemaʻu ʻe Sihova ke mou fiefia. ʻOkú ne ʻoatu kiate kimoutolu ʻa e faleʻi lelei taha ki he founga ke mou fiefia ai ʻi hoʻomou talavoú. ʻOkú ne fiemaʻu mai ke mou maʻu ʻaonga mei he poto mo e taukei ʻa hoʻomou ongo mātuʻá. (Kolose 3:20) ʻOku toe fiemaʻu mai ʻe Sihova ke mou maʻu ʻa e fiefia ʻi hono fai ʻa e ngaahi meʻa maʻa homou Tokotaha-Fakatupú mo hono ʻAló.​—Lau ʻa e Tangata Malanga 11:9–12:1; Mātiu 19:13-15; 21:15, 16.

 ʻOku totonu ke mou ngāue mālohi ke tokonaki ha meʻakai, nofoʻanga, mo ha vala maʻa hoʻomou fānaú. (1 Tīmote 5:8) Ka ke maʻu ʻe hoʻomou fānaú ʻa e fiefiá, ʻoku toe fiemaʻu ke mou akoʻi kinautolu ke nau ʻofa ki he ʻOtuá pea ke nau ako meiate ia. (ʻEfesō 6:4) Ko hoʻomou faʻifaʻitakiʻanga ʻi hono fakahāhā ʻa e ʻofa ki he ʻOtuá ʻe lava ke ne tākiekina lahi ʻa e loto ʻo hoʻomou kiʻi tamá. ʻI he taimi ʻoku fakatuʻunga ai hoʻomou fakahinohinó ʻi he Folofola ʻa e ʻOtuá, ʻe lava ai ʻo fakafuo ʻa e fakakaukau ʻa hoʻomou kiʻi tamá ʻi ha founga lelei.​—Lau ʻa e Teutalōnome 6:4-7; Palōveepi 22:6.

 ʻOku maʻu ʻaonga ʻa e fānaú ʻi he taimi ʻoku mou fakalototoʻaʻi mo fakaongoongoleleiʻi ai kinautolú. ʻOku toe fiemaʻu kiate kinautolu ʻa e fakatonutonu mo e akonekina. ʻOku hanga ʻe he ako peheé ʻo maluʻi kinautolu mei he tōʻonga ʻoku lava ke ne kaihaʻasia meiate kinautolu ʻa e fiefiá. (Palōveepi 22:15) Neongo ia, ʻoku totonu ke ʻoua ʻaupito naʻa hoko ʻa e akonekiná ʻo kakaha pe anga-fakamamahi.​—Lau ʻa e Kolose 3:21.

 ʻOku pulusi ʻe he Kau Fakamoʻoni ʻa Sihová ʻa e ngaahi tohi kuo hiki ʻo tautefito ke tokoniʻi ʻa e ngaahi mātuʻá mo e fānaú. ʻOku fakatuʻunga ʻa e ngaahi tohí ni ʻi he Tohi Tapú.​—Lau ʻa e Saame 19:7, 11.