KAMATAʻI HA FETALANOAʻAKI
LĒSONI 3
Anga-Lelei
Tefitoʻi Moʻoní: “Ko e ʻofá ʻoku . . . anga-lelei.”—1 Kol. 13:4.
Meʻa Naʻe Fai ʻe Sīsuú
1. Sio ʻi he VITIOÓ, pe lau ʻa e Sione 9:1-7. Fakakaukau leva ki he ongo fehuʻi ko ení:
-
a. Ko e hā ʻa e ʻuluaki meʻa naʻe fai ʻe Sīsuú—ko hono fakamoʻui ʻa e tangata kuí pe ko hono vahevahe kiate ia ʻa e ongoongo leleí?—Sio ki he Sione 9:35-38.
-
e. Ko e hā nai ʻa e ʻuhinga naʻe loto-lelei ai ʻa e tangatá ke fanongo kia Sīsuú?
Ko e Hā ʻOku Tau Ako meia Sīsuú?
2. ʻOku ngalingali ange ʻe fie fanongo ha tokotaha ki heʻetau pōpoakí kapau ʻokú ne ongoʻi ʻoku tau tokanga ange kiate ia.
Faʻifaʻitaki kia Sīsū
3. Fakahāhā ʻa e kaungāongoʻi ki he tokotahá. Feinga ke sioloto atu ki he anga ʻene ongoʻí.
-
a. ʻEke hifo: ‘Ko e hā nai ʻa e meʻa ʻokú ne hohaʻa ki aí? Ko e hā nai ʻa e meʻa ʻe tokoni mo fakamānako kiate iá?’ Ko e fai peheé te ne tokoniʻi koe ke ke fakahāhā ʻa e anga-leleí ʻi ha founga fakanatula mo loto-moʻoni.
-
e. Fakahaaʻi ʻokú ke tokanga ki he meʻa ʻoku mahuʻingaʻia ai ha tokotaha ʻaki hoʻo fanongo. Kapau ʻokú ne talanoa atu ʻa e anga ʻene ongoʻi fekauʻaki mo ha meʻa pe lave ki ha palopalema ʻokú ne fehangahangai mo ia, ʻoua ʻe afeʻi ʻa e talanoá.
4. Lea ʻi he anga-lelei mo e anga-fakaʻapaʻapa. ʻI he taimi ʻokú ke ongoʻi manavaʻofa ai ki he tokotahá pea loto moʻoni ke tokoniʻi iá, ʻe hā atu ia ʻi he anga hoʻo leá. Filifili lelei hoʻo ngaahi leá mo e tō hoʻo leʻó pea fakaʻehiʻehi mei hono leaʻaki ha ngaahi meʻa ʻe fakatupu ʻita.
5. Loto-lelei ke tokoni. Kumi ki ha ngaahi faingamālie feʻungamālie ke tokoniʻi ʻa e tokotahá ʻi ha ngaahi founga ʻaonga. Ko hono fakahāhā ʻa e ngaahi ngāue anga-leleí ʻoku lava ke ne fakaava ʻa e matapā ki ha fetalanoaʻaki.
