Kuo ʻi he toafá ʻa e kau ʻIsilelí ʻi he meimei taʻu ʻe 40. Naʻa nau ikunaʻi ʻa e ngaahi kolo mālohi. ʻI heʻenau ʻapitanga ko eni ʻi he tokalelei ʻo Mōapé ʻi he hahake ʻo e Vaitafe Sioataní, naʻe taimi ke nau hū ki he Fonua ʻo e Talaʻofá. Naʻe ilifia ʻa Pēlaki ko e tuʻi ʻo Mōapé naʻa mole hono fonuá kiate kinautolu. Ko ia naʻá ne fakaafeʻi ha tangata ko Pēlami ke ne haʻu ki Mōape ʻo talatukiʻi ʻa e kau ʻIsilelí.

Ka naʻe tala ʻe Sihova kia Pēlami: ‘Kuo pau ke ʻoua naʻá ke talatukiʻi ʻa e kau ʻIsilelí.’ Ko ia naʻe ʻikai ai ke ʻalu ʻa Pēlami. Naʻe fakaafeʻi tuʻo ua ia ʻe Tuʻi Pēlaki peá ne palōmesi te ne ʻoange maʻana ha meʻa pē te ne fiemaʻu. Ka naʻe ʻikai pē ke ʻalu ʻa Pēlami. Naʻe pehē ange leva ʻa e ʻOtuá: ‘ʻE lava ke ke ʻalu, ka te ke leaʻaki pē ʻa e meʻa te u tala atu ke ke leaʻakí.’

Naʻe heka ʻa Pēlami ʻi heʻene ʻasí ʻo ne ʻalu ki he fakatonga ʻo Mōapé. Naʻá ne palani ke talatukiʻi ʻa e kau ʻIsilelí, neongo naʻe tala ange ʻe Sihova ke ʻoua. Naʻe hā tuʻo tolu ʻa e ʻāngelo ʻa Sihová ʻi he halá. Naʻe ʻikai lava ke sio ʻa Pēlami ki he ʻāngeló, ka naʻe lava ke sio ki ai ʻa ʻene ʻasí. Naʻe ʻuluaki afe ʻa e ʻasí ki ha ngoue. Pea naʻe ʻunu ʻa e ʻasí ki ha ʻā maka, ʻo tau ai ʻa e vaʻe ʻo Pēlamí. Naʻe faifai pē ʻo tokoto ʻa e ʻasí ʻi he loto halá. Naʻe taaʻi ʻi he taimi taki taha ʻe Pēlami ʻa e ʻasí ʻaki ha vaʻakau.

Hili ʻene taaʻi hono tolú, naʻe ʻai ʻe Sihova ʻa e ʻasí ke ne lea. Naʻe ʻeke ange ʻe he ʻasí kia Pēlami: ‘Ko e hā ʻokú ke toutou taaʻi ai aú?’ Naʻe pehē ange ʻe Pēlami: ‘ʻOkú ke ʻai au ke u ngalivale. Kapau naʻe ʻi ai haʻaku heletā naʻá ku tāmateʻi koe.’ Naʻe pehē ʻe he ʻasí: ‘Kuó ke heka ʻiate au ʻi ha ngaahi taʻu. Kuó u fai pehē kiate koe ki muʻa?’

Naʻe ʻai leva ʻe Sihova ʻa Pēlami ke ne sio ki he ʻāngeló. Naʻe pehē ange ʻe he ʻāngeló: ‘Naʻe ʻosi fakatokanga atu ʻa Sihova ke ʻoua te ke talatukiʻi ʻa ʻIsileli.’ Naʻe pehē ange ʻe Pēlami: ‘Kuó u faihala. Te u foki ki ʻapi.’ Ka naʻe tala ange ʻe he ʻāngeló: ‘ʻE lava ke ke ʻalu ki Mōape, ka te ke leaʻaki pē ʻa e meʻa ʻe tala atu ʻe Sihova ke ke leaʻakí.’

 Naʻe ako ʻe Pēlami ha lēsoni? ʻIkai. Hili iá, naʻe feinga ʻa Pēlami ke ne talatukiʻi tuʻo tolu ʻa ʻIsileli, ka ʻi he taimi taki taha naʻe ʻai ia ʻe Sihova ke ne tāpuakiʻi ʻa ʻIsileli. Naʻe faifai pē ʻo ʻohofi ʻe he kau ʻIsilelí ʻa Mōape, pea naʻe mate ai ʻa Pēlami. ʻIkai naʻe mei lelei ange kapau naʻe fanongo ʻa Pēlami kia Sihova ʻi he ʻuluaki taimí?