Lolotonga ʻa e hoko ʻa e ʻapositolo ko Sioné ko ha pōpula ʻi he motu ko Pātimosí, naʻe fakahaaʻi ange ʻe Sīsū kiate ia ha vīsone pe ko ha ngaahi fakatātā hokohoko ʻe 16 ʻo fekauʻaki mo e kahaʻú. Naʻe fakahaaʻi ʻi he ngaahi vīsone ko ení ʻa e founga ʻe fakamāʻoniʻoniʻi ai ʻa e huafa ʻo Sihová, ʻe hoko mai hono Puleʻangá, pea ʻe fai hono finangaló ʻi māmani ʻo hangē ko ia ʻi hēvaní.

ʻI ha vīsone ʻe taha, ʻoku sio ai ʻa Sione kia Sihova ʻi hono taloni lāngilangiʻiá ʻi hēvani, ʻoku takatakai ʻiate ia ʻa e kau mātuʻa ʻe toko 24 ʻoku nau kofu hinehina pea ʻoku ʻi ai ʻa e ngaahi kalauni koula ʻi honau ʻulú. ʻOku tapa ʻa e ʻuhila pea ongo mai ha mana mei he taloní. ʻOku punou ʻa e kau mātuʻa ʻe toko 24 ʻi muʻa ʻia Sihova ʻo lotu kiate ia. ʻI ha toe vīsone ʻe taha, ʻoku sio ai ʻa Sione ki ha fuʻu kakai lahi mei he puleʻanga, kakai, mo e ngaahi lea kotoa pē ʻoku nau lotu kia Sihova. Ko e Lamí, ʻa ia ko Sīsū, ʻokú ne tauhi kinautolu pea ʻave kinautolu ki he vai ʻo e moʻuí. Ki mui ai, ʻi he vīsone ʻe taha, ʻoku kamata pule ʻa Sīsū ko e Tuʻi ʻi hēvani, fakataha mo e kau mātuʻa ʻe toko 24. ʻI he vīsone hono hokó, ʻoku sio ai ʻa Sione kia Sīsū ʻokú ne tau mo e talākoní, ʻa ia ko Sētane, pea mo ʻene fanga tēmenioó. ʻOku lī hifo ʻe Sīsū kinautolu mei hēvani, ki he māmaní.

 ʻOku sio leva ʻa Sione ki ha fakatātā fakaʻofoʻofa ʻo e Lamí mo e toko 144,000 ʻoku nau tuʻu ʻi Moʻunga Saione. ʻOkú ne toe sio ki ha ʻāngelo ʻoku puna takai ʻi he māmaní, ʻo tala ki he kakaí ke nau manavahē ki he ʻOtuá pea ʻoange ʻa e lāngilangí kiate Ia.

ʻI he vīsone hono hokó, ʻoku fai ai ʻa e tau ʻo ʻĀmaketoné. Lolotonga ʻa e tau ko iá, ʻoku ikunaʻi ai ʻe Sīsū mo ʻene kau taú ʻa e fokotuʻutuʻu kovi ʻa Sētané. ʻI he vīsone fakaʻosí, ʻoku sio ai ʻa Sione ki he fāitaha haohaoa ʻi hēvani pea ʻi māmani. ʻOku fakaʻauha ʻosi ai ʻa Sētane mo hono hakó. Ko e tokotaha kotoa ʻi hēvani pea ʻi māmani ʻokú ne fakafeangai ki he huafa ʻo Sihová ʻoku māʻoniʻoni pea lotu kiate ia tokotaha pē.