Ka ko e hā ʻoku ngāue mālohi pehē fau ai ʻa Sētane mo ʻene kau tēmenioó ke kākaaʻi ʻa e kakaí? Koeʻuhi ʻoku nau loto ke tau kau mo kinautolu ʻi heʻenau angatuʻú. ʻOku nau loto ke tau lotu ange kiate kinautolu. ʻOku nau loto ke tau tui ki heʻenau ngaahi loí pea ke tau fai ʻa e ngaahi meʻa ʻoku ʻikai ke fakahōifua kia Sihová. ʻOku kau ki he ngaahi meʻá ni ʻa e ngaahi ʻulungaanga fakafonua ʻo fekauʻaki mo e kau maté.

Ko e mate ʻa ha tokotaha ʻofeiná ʻoku fakamamahi fakaeongo ia, pea ʻoku fakaenatula mo totonu ke fakahāhā ʻa e loto-mamahí. ʻI he hili ʻa e mate ʻa hono kaumeʻa ko Lāsalosí, naʻe “tagi” ʻa Sīsū.—Sione 11:​35, PM.

ʻOku lahi ʻa e ngaahi ʻulungaanga fakafonua ʻoku fekauʻaki mo e maté, pea ʻoku nau kehekehe ʻaupito ʻi he ngaahi feituʻu kehe ʻi māmani. Ko e konga lahi ʻoku ʻikai ke fepaki ia mo e ngaahi tefitoʻi moʻoni mei he Tohitapú. Kae kehe, ʻoku ʻi ai ʻa e ngaahi tōʻonga ʻe niʻihi ʻoku makatuʻunga ʻi he tui ʻoku moʻui ʻa e kau maté pea ʻoku malava ke nau sio mai ki he kau moʻuí. Ko e ngaahi ʻā-pō, tangi taʻemapuleʻi mo e ngaahi ouau lahi fau ki he putú ʻoku tupu kotoa ia mei he manavahē ki hono fakaʻitaʻi ʻa e laumālie ʻo e kau maté. Ka koeʻuhi ko e kau maté “ʻoku ʻikai te nau ʻilo ha momoʻi meʻa,” ko kinautolu ʻoku nau fai ʻa e ngaahi meʻa peheé ʻoku nau poupouʻi ʻa e loi ʻa Sētané.​—Koheleti 9:5.

 ʻOku tupu ʻa e ngaahi ʻulungaanga fakafonua pe ngaahi ouau kehe mei he tui ʻoku fiemaʻu ki he kau maté ʻa e tokoni ʻa e kau moʻuí pea te nau uesia ʻa e kau moʻuí ʻo kapau he ʻikai ke fakafiemālieʻi kinautolu. ʻI he ngaahi fonua ʻe niʻihi ʻoku fai ʻa e kai mo e ngaahi feilaulau ʻi he hili ʻa e ʻaho ʻe 40 pe taʻu ʻe taha mei he mate ʻa e tokotahá. ʻOku taku ʻo pehē ʻoku tokoniʻi heni ʻa e tokotaha kuo maté ke ‘hiki atu’ ki he nofoʻanga laumālié. Ko e toe meʻa ʻe taha ʻoku angaʻakí ko hono foaki atu ʻa e meʻakai mo e inu ki he tokotaha maté.

ʻOku hala ʻa e ngaahi meʻá ni he ʻoku nau poupouʻi ʻa e ngaahi loi ʻa Sētane ʻo fekauʻaki mo e kau maté. ʻE hōifua ʻa Sihova ʻi heʻetau kau ʻi ha faʻahinga founga ʻi he ngaahi ʻulungaanga fakafonua ʻoku makatuʻunga ʻi he ngaahi akonaki ʻa e kau tēmenioó? ʻIkai ʻaupito!​—2 Kolinitō 6:14-18.

ʻOku ʻikai ke kau ʻa e kau sevāniti ʻa e ʻOtua moʻoní ʻi ha faʻahinga tōʻonga ʻa ia ʻokú ne poupouʻi ʻa e ngaahi loi ʻa Sētané. Ka, ʻoku nau anga-ʻofa ʻo fakahanga ʻenau tokangá ke tokoniʻi ʻa e kau moʻuí pea fakafiemālieʻi kinautolu. ʻOku nau ʻilo ʻi he mālōlō ʻa ha taha, ko Sihova pē ʻoku malava ke ne tokoniʻi ʻa e tokotaha ko iá.​—Siope 14:14, 15.

ʻOku fetuʻutaki ʻa e kakai ʻe niʻihi mo e kau tēmenioó ʻo fakahangatonu pe fakafou ʻi ha tokotaha fetuʻutaki. ʻOku ui ʻa e meʻá ni ko e fakahaʻele faʻahikehe. Ko e vūtū, fai sausau, mēsiki, ko e fakahā monū ʻo kau ki he kahaʻú pea mo e fakaʻekeʻeke ʻo kau ki he kau maté ko e ngaahi founga kotoa ia ʻo e fakahaʻele faʻahikehé.

ʻOku fakahalaiaʻi ʻe he Tohitapú ʻa e ngaahi meʻá ni, ʻo ne pehē: “ʻE ʻikai ʻilo ʻiate koe ha taha . . . ʻoku fai meʻa tongafisi, ha taha ʻoku fai ʻa e talotalo kovi, pe ha fai tuki, pe fiemana, pe ha fai sausau, pe ha fakahaʻele faʻahikehe, pe ha maki, pe ha fakahaʻele mate. He ko e meʻa fakalielia kia Sihova ʻa ia fua pē ʻoku fai meʻa pehe.”​—Teutalōnome 18:10-12.

Ko e hā ʻoku fakatokanga mālohi pehē fau mai ai ʻa Sihova kiate kitautolu ʻo kau ki he ngaahi meʻá ni?

ʻOku fakatokanga mai ʻa Sihova kiate kitautolu ʻo kau ki he ngaahi founga kehekehe kotoa ʻo e fakahaʻele faʻahikehé koeʻuhi ko e lelei  pē maʻatautolu. ʻOkú ne ʻofa mo tokanga ki he kakaí, pea ʻokú ne ʻiloʻi ʻe pau ke mamahi ʻa e faʻahinga ʻoku nau hoko ʻo kau mo e kau tēmenioó.

Ko ha tokotaha pehē ko Nilda, ʻa ia ko e tokotaha fetuʻutaki mo e laumālié ʻi Pelēsila. Naʻe ʻai ʻe he kau tēmenioó ʻa e moʻui ʻa e fefine ko ʻení ke mātuʻaki mamahi. ʻOkú ne fakamatala: “Ko e ngaahi laumālié . . . naʻa nau puleʻi au, ʻo fekauʻi ʻa e meʻa ke u faí. Naʻá ku taufetongi ʻi he tuʻunga ko hono kei ʻiloʻi ha meʻa mo e tuʻunga ko e ʻikai te u toe ʻiloʻi ha meʻa pea naʻe fakatokoto au he fale mahakí koeʻuhi ko e ngaahi palopalema fakaʻatamai. Naʻe fakatangaʻi lahi ʻaupito au ʻe he kau tēmenioó ʻo uesia ai hoku ngaahi neavé. Naʻá ku folo ʻa e faitoʻo fakanonga peá u kamata ke u inu mo ifi maʻu pē. Naʻe hoko ʻeni ʻi he ngaahi taʻu lahi.”

Naʻe faifai atu pē pea naʻe malava ke tauʻatāina ʻa Nilda mei he tākiekina ʻa e kau tēmenioó ʻi he tokoni ʻa Sihova pea mo ʻene Kau Fakamoʻoni ʻi māmaní, pea ʻokú ne lolotonga moʻuiʻaki ha founga moʻui lelei. ʻOkú ne pehē: “ʻOku ou fakalototoʻaʻi kotoa atu ke ʻoua ʻaupito ʻe hoko ʻo kau ki ha meʻa fekauʻaki mo e ngaahi laumālie [anga-fulikivanú].”