ʻOku ʻikai loto ʻa Sētane mo ʻene kau tē­menioó ke ke tauhi ʻa e ʻOtuá. ʻOku nau loto ke fakatafokiʻi ʻa e tokotaha kotoa mei he ʻOtuá ʻo kapau te nau malava. ʻOku anga-fēfē ʻenau feinga ke fai ení? Ko e founga ʻe tahá ʻoku fakafou ia ʻi he lotu loí. (2 Kolinito 11:13-15) ʻOku loi ha lotu kapau ʻoku ʻikai te ne akoʻi ʻa e moʻoni mei he Tohitapú. ʻOku hangē ʻa e lotu loí ko e paʻanga loí​—ʻe hangē nai ko e meʻa moʻoní, ka ʻoku taʻeʻaonga ia. ʻE lava ke ne fakatupunga ha faingataʻa lahi kiate koe.

Ko e loi fakalotú ʻoku ʻikai ʻaupito lava ke ne fakahōifuaʻi ʻa Sihova, ko e ʻOtua ʻo e moʻoní. ʻI he taimi naʻe ʻi māmani ai ʻa Sīsuú, naʻe ʻi ai ha kulupu fakalotu naʻa nau loto ke tāmateʻi ia. Naʻa nau fakakaukau ko ʻenau founga lotú ko e founga totonú ia. Naʻa nau pehē: “ʻOku taha pē ʻemau tamai, ko e ʻOtua.” Naʻe loto-tatau mo ia ʻa Sīsū? ʻIkai! Naʻá ne pehē kiate kinautolu: “Ko e tamai kuo mou tupu mei ai ko e Tevolo.” (Sione 8:41, 44) ʻI he ʻahó ni ʻoku tui ʻa e kakai tokolahi ʻoku nau lotu ki he ʻOtuá, ka ʻoku nau tauhi moʻoni pē ʻenautolu ʻa Sētane mo ʻene kau tēmenioó!​—1 Kolinito 10:20.

 Hangē pē ko e ʻomai ʻa e fua koví ʻe ha fuʻu ʻakau kovi, ʻoku ʻomai ʻe he lotu loí ʻa e kakai ʻoku nau fai ʻa e ngaahi meʻa ʻoku kovi. ʻOku fonu ʻa e māmaní ʻi he faingataʻa koeʻuhi ko e ngaahi meʻa kovi ʻoku fai ʻe he kakaí. ʻOku ʻi ai ʻa e ʻulungaanga taʻetaau, ko e tau, kaihaʻa, fakafeʻātungia, fakapō, mo e tohotoho. Ko e tokolahi ʻoku nau fai ʻa e ngaahi meʻa kovi ko ení ʻoku ʻi ai ʻenau lotu, ka ʻoku ʻikai ueʻi kinautolu ʻe heʻenau lotú ke nau fai ʻa e meʻa ʻoku leleí. ʻOku ʻikai lava ke nau hoko ko e ngaahi kaumeʻa ʻo e ʻOtuá kae ʻoua kuo tuku ʻenau fai ʻa e ngaahi meʻa ʻoku koví.​—Mātiu 7:17, 18.

ʻOku akoʻi ʻe he lotu loí ʻa e kakaí ke nau lotu ki he ngaahi ʻaitolí. ʻOku folofola mai ʻa e ʻOtuá ke ʻoua ʻe lotu ki he ngaahi ʻaitolí. ʻOku ʻuhinga lelei eni. Te ke saiʻia ʻo kapau ʻoku ʻikai ʻaupito talanoa atu ha tokotaha ia kiate koe kae talanoa pē ia ki ho fakatātaá? ʻE lava ke hoko ʻa e tokotaha ko iá ko ho kaumeʻa moʻoni? ʻIkai, ʻe ʻikai malava. ʻOku fiemaʻu ʻe Sihova ʻa e kakaí ke nau talanoa ange kiate ia, ʻo ʻikai ki ha maka fakamanatu pe ko ha fakatātā, ʻa ia ʻoku ʻikai haʻane moʻui.​—Ekisoto 20:4, 5.

ʻOku akoʻi ʻe he lotu loí ʻoku sai pē ke tāmateʻi ʻa e niʻihi kehé ʻi he taimi ʻo e taú. Naʻe pehē ʻe Sīsū ko e ngaahi kaumeʻa ʻo e ʻOtuá te nau feʻofaʻaki. ʻOku ʻikai ke tau tāmateʻi ʻa e kakai ʻoku tau ʻofa aí. (Sione 13:35) ʻOku aʻu ʻo hala ke tau tāmateʻi ʻa e kakai koví. ʻI he taimi naʻe haʻu ai ʻa e ngaahi fili ʻo Sīsuú ke puke iá, naʻe ʻikai te ne tuku ʻa ʻene kau ākongá ke nau faitau ke maluʻi ia.​—Mātiu 26:51, 52.

ʻOku akoʻi ʻe he lotu loí ʻe mamahi ʻa e fulikivanú ʻi ha afi ʻo heli. Neongo ia, ʻoku akoʻi ʻe he Tohitapú ʻoku iku ʻa e angahalá ki he mate. (Loma 6:23) Ko Sihová ko ha ʻOtua ia ʻo e ʻofa. ʻE fakamamahiʻi ʻe ha ʻOtua ʻofa ʻa e kakaí ʻo taʻengata? Ko e moʻoni, ʻe ʻikai! ʻI Palataisi, ʻe ʻi ai ʻa e lotu pē ʻe taha, ʻa e taha ko ia ʻoku hōifua ki ai ʻa Sihová. (Fakahā 15:4) Ko e lotu kotoa pē ʻoku makatuʻunga ʻi he ngaahi loi ʻa Sētané ʻe mole atu ia.