Ko e hoko ko e kaume‘a ‘o e ‘Otuá ‘a e me‘a lelei taha ‘e lava ke hoko kiate koé. ‘E ako‘i koe ‘e he ‘Otuá ki he founga ke ke hoko ai ‘o fiefia mo malú; te ne fakatau‘atāina‘i koe mei he ngaahi tui fehālaaki lahi mo e ngaahi tō‘onga fakatupu maumaú. Te ne fanongo mai ki ho‘o ngaahi lotú. Te ne tokoni‘i koe ke ke ma‘u ‘a e nonga mo e tuipau ‘i loto. (Sāme 71:5; 73:28) ‘E poupou‘i koe ‘e he ‘Otuá ‘i he lolotonga ‘o e ngaahi taimi faingata‘á. (Sāme 18:18) Pea ‘oku tuku atu kiate koe ‘e he ‘Otuá ‘a ‘ene me‘a‘ofa ko e mo‘ui ta‘engatá.​—Loma 6:23.

‘I ho‘o ‘unu‘unu ofi ki he ‘Otuá, te ke ‘unu‘unu ofi ai ki he ngaahi kaume‘a ‘o e ‘Otuá. Te nau hoko foki ko ho ngaahi kaume‘a. Ko hono mo‘oní, te nau hoko ‘o hangē ha fanga tokoua mo e fanga tuofāfine kiate koé. Te nau fiefia ke ako‘i koe ‘o fekau‘aki mo e ‘Otuá pea te nau tokoni‘i koe mo fakalototo‘a‘i koe.

‘Oku ‘ikai ke tau tatau mo e ‘Otuá. ‘I ho‘o kumi ke kaume‘a mo e ‘Otuá, kuo pau ke ke mahino‘i ha fo‘i mo‘oni mahu‘inga. Ko e kaume‘a mo e ‘Otuá ‘oku ‘ikai ko ha kaume‘a ia ‘a ha ongo me‘a ‘okú na faitatau. ‘Oku ta‘umotu‘a mama‘o ange mo poto mama‘o ange mo mālohi mama‘o ange ia ‘iate kitautolu. Ko hotau Tokotaha-Pule totonú ia. Ko ia, kapau ‘oku tau loto ke hoko ko hono kaume‘a, kuo pau ke tau fanongo kiate ia pea fai ki he me‘a ‘okú ne tala mai ke tau faí. ‘E ngāue ma‘u pē ‘a e me‘á ni ki he‘etau leleí.​—Aisea 48:18 (Isaia, PM).