‘Oku finangalo ‘a e ‘Otuá ke tau nofo melino mo fiefia ‘i ha māmani palataisi ‘o ta‘engata!

Kae kehe, te ke fifili nai, ‘‘E lava fēfē ke faifai ange pea hoko ia?’ ‘Oku pehē ‘e he Tohi Tapú ‘e ‘ai ‘e he Pule‘anga ‘o e ‘Otuá ke malava ia, pea ko e finangalo ia ‘o e ‘Otuá ke ako ‘a e kakai kotoa pē ‘o fekau‘aki mo e Pule‘anga ko iá pea mo ‘Ene taumu‘a kiate kitautolú.—Saame 37:11, 29; ‘Aisea 9:7.

‘Oku finangalo ‘a e ‘Otuá ke tau ma‘u ‘aonga.

Hangē pē ko e faka‘amua ‘e ha tamai lelei ‘a e lelei tahá ki he‘ene fānaú, ‘oku faka‘amu ‘etau Tamai fakahēvaní ke tau ma‘u ‘a e fiefia ta‘engatá. (‘Aisea 48:17, 18) Kuó ne tala‘ofa ‘o pehē “ko e tokotaha ‘okú ne fai ‘a e finangalo ‘o e ‘Otuá ‘okú ne nofo ma‘u ‘o ta‘engata.”—1 Sione 2:17.

‘Oku finangalo ‘a e ‘Otuá ke tau ‘a‘eva ‘i hono ngaahi halá.

‘Oku pehē ‘e he Tohi Tapú ‘oku finangalo hotau Tokotaha-Fakatupú ke ne ‘omai ha “fakahinohino kiate kitautolu ‘o fekau‘aki mo ‘ene ngaahi foungá,” koe‘uhí ke tau lava ai ‘o “‘a‘eva ‘i hono ngaahi halá.” (‘Aisea 2:2, 3) Kuó ne fokotu‘utu‘u maau “ha kakai ma‘a hono huafá” ke ‘ai hono finangaló ke ‘iloa ‘i he māmaní kotoa.—Ngāue 15:14.

‘Oku finangalo ‘a e ‘Otuá ke tau fā‘ūtaha ‘i he lotu kiate iá.

‘I he ‘ikai fakamavahevahe‘i ‘a e kakaí, ko e lotu ma‘a ‘a Sihová ‘okú ne fakafā‘ūtaha‘i kinautolu ‘i he ‘ofa mo‘oní. (Sione 13:35) Ko hai he ‘ahó ni ‘oku nau ako‘i ‘a e kakai tangata mo e kakai fefine ‘i he feitu‘u kotoa pē ki he founga ke tauhi fā‘ūtaha ai ki he ‘Otuá? ‘Oku mau fakaafe‘i atu koe ke ke kumi ki ai fakafou ‘i he polosiua ko ení.