Ko e akonaki Fakatohitapu tefito ʻoku lāulea ki ai ʻi he Fale Fakatahaʻangá ʻoku fakahangataha ia ki he Puleʻanga ʻo e ʻOtuá​—ʻa e kaveinga ʻo e ngāue fakafaifekau ʻa Sīsuú.​—Luke 8:1.

Ko e ngaahi senitā ia ʻo e lotu moʻoní ʻi he koló. ʻOku fakahoko mei he feituʻu ko iá hono malangaʻi ʻa e ongoongo lelei ʻo e Puleʻangá. (Mātiu 24:14) ʻOku kehekehe ʻa e lahi mo e sīpinga ʻo e ngaahi Fale Fakatahaʻangá, ka ko e kotoa ʻo kinautolú ko e ngaahi langa lahi feʻunga pē, ʻa ia ʻe lava ke ngāueʻaki ʻe he fakatahaʻanga ʻe taha pe lahi ange. ʻI he ngaahi taʻu ki mui ní, kuo mau langa ai ʻa e ngaahi Fale Fakatahaʻanga foʻou ʻe laui mano (ko ha ʻavalisi ʻo e nima he ʻaho taki taha) koeʻuhí ke ʻalu fakataha mo e tupulaki ʻi heʻemau ngaahi fakatahaʻangá. ʻOku malava fēfē ʻa e meʻá ni?​—Mātiu 19:26.

ʻOku langa ia ʻaki ʻa e ngaahi tokoni kuo ʻai ki ha paʻanga tefito. Ko e ngaahi tokoni ko ení ʻoku ʻave ia ki he ʻōfisi vaʻá koeʻuhí ke lava ʻo ʻai ke ala maʻu ʻe he ngaahi fakatahaʻanga ʻoku nau fiemaʻu ke langa pe fulihi ʻa e sīpinga ʻo ha Fale Fakatahaʻanga.

ʻOku langa ia ʻe he kau ngāue pole taʻetotongi mei he ngaahi tuʻunga kehekehe ʻo e moʻuí. ʻI he ngaahi fonua lahi, kuo fokotuʻutuʻu maau ai ʻa e Ngaahi Kulupu Langa Fale Fakatahaʻanga. Ko e ngaahi timi langa ʻo e kau sevāniti mo e kau ngāue pole ʻoku nau hiki mei he fakatahaʻanga ʻe taha ki hono hokó ʻi loto ʻi ha fonua, naʻa mo e ngaahi feituʻu mamaʻo, ke tokoni ki he ngaahi fakatahaʻanga fakalotofonuá ʻi hono langa honau ngaahi Fale Fakatahaʻangá. ʻI he ngaahi fonua kehé, kuo fakanofo ʻa e Kau Fakamoʻoni taau ke nau tokangaʻi ʻa hono langa mo hono fakaleleiʻi ʻo e ngaahi Fale Fakatahaʻanga ʻi ha feituʻu kuo ʻosi vaheʻi ki ai. Neongo ʻoku pole ha kau tangata pōtoʻi ngāue tokolahi mei he feituʻú ke nau fai ʻa e ngāué ʻi he feituʻu langa kotoa pē, ko e ngaahi mēmipa ʻo e fakatahaʻanga fakalotofonuá ʻoku nau kau ʻi he konga lahi taha ʻo e kau ngāue polé. Ko e laumālie ʻo Sihová pea mo e ngaahi feinga ʻaufuatō ʻa hono kakaí ʻoku ʻai ai ke malava ʻa e meʻa kotoa ko ení.​—Saame 127:1; Kolose 3:23.

• ʻOku malava fēfē ke langa ʻa e ngaahi Fale Fakatahaʻanga takatakai ʻi he māmaní kotoa?