Ko Sihová ko e ʻOtua fiefia. (1 Tīmote 1:11) ʻOkú ne loto ke tau maʻu ʻa e fiefia ʻi he moʻuí. ʻOkú ne fiefia ʻi heʻetau vaheʻi ha taimi mei he ngāué ke mālōlō. ʻI he lēsoni ko ení, te tau sio ai ki he founga te tau ngāueʻaki hotau taimi mālōloó ʻi he ngaahi founga ke tau fiefia, fakafiemālie pea ʻoku toe fakahōifua kia Sihova.

1. Ko e hā ʻoku totonu ke tau manatuʻí ʻi hono fili ʻa e fakafiefiá?

Ko e hā ʻokú ke saiʻia ke fai ʻi hoʻo mālōloó? ʻOku saiʻia ʻa e niʻihi ke nofo pē ʻi ʻapi. ʻOku nau saiʻia ke lau ha tohi, fanongo ki ha hiva, sio ʻi ha faiva pe vakaiʻi ʻa e ngaahi meʻa ʻi he ʻInitanetí. Ko e niʻihi, ʻoku nau saiʻia ke feohi mo e ngaahi kaumeʻá ʻo luelue, kaukau tahi pe pele. Pe ko e hā pē ʻoku tau saiʻia aí, ʻoku fiemaʻu ke tau fakapapauʻi ko ʻetau fili ʻo e fakafiefiá “ʻoku fakahōifua ki he ʻEikí.” (ʻEfesō 5:10) ʻOku mahuʻinga ke tau mahinoʻi lelei eni koeʻuhí ʻoku lahi ʻa e ngaahi fakafiefia anga-maheni ʻoku hā ai ʻa e ngaahi meʻa ʻoku fehiʻa ai ʻa Sihová, hangē ko e fakamālohí, fehokotaki fakasino taʻetāú pe fakahaʻele fakafaʻahikehé. (Lau ʻa e Saame 11:5.) Ko e hā te ne tokoniʻi kitautolu ke fai ʻa e ngaahi fili fakapotopoto ki heʻetau fakafiefiá?

Kapau ʻoku tau fili ʻa e ngaahi kaumeʻa ʻoku nau ʻofa kia Sihová, ʻoku lava ke nau tākiekina lelei kitautolu pea mo ʻetau fili ʻo e fakafiefiá. Hangē ko ia naʻa tau ako ki ai ʻi he Lēsoni 48, “ko e tokotaha ʻoku ʻaʻeva mo e potó ʻe hoko ai ʻo poto.” ʻI he tafaʻaki ʻe tahá, kapau ʻoku tau feohi maʻu pē mo e kakai ʻoku ʻikai ke ʻofa ki he ngaahi tuʻunga ʻa e ʻOtuá, “ʻe hoko ai ʻa e kovi” kiate kitautolu.​—Palōveepi 13:20.

2. Ko e hā ʻoku mahuʻinga ai ke mapuleʻi ʻa e lahi ʻo e taimi ʻoku tau ngāueʻaki ʻi he fakafiefiá?

Neongo kapau ko e fakafiefia ʻoku tau filí ʻoku lelei, ʻoku fiemaʻu ke tau tokanga ki he lahi ʻo e taimi ʻoku tau fakamoleki ki aí. He ka ʻikai, ʻe ʻikai ke tau maʻu nai ha taimi feʻunga ke ngāueʻaki ki he ngaahi meʻa mahuʻinga angé. ʻOku tala mai ʻe he Tohi Tapú kiate kitautolu ke ngāue lelei taha ʻaki hotau taimí.​—Lau ʻa e ʻEfesō 5:15, 16.

 4. Ngāueʻaki fakapotopoto ho taimí

5. Fili ʻa e fakafiefia ʻoku lelei

Neongo ʻoku ʻi ai ʻa e ngaahi fakafiefia ʻe niʻihi ʻoku taʻefakahōifua kia Sihova, ʻoku lahi ʻa e ngaahi fakafiefia lelei. Lau ʻa e Tangata Malanga 8:15 mo e Filipai 4:8, pea lāulea leva ki he fehuʻi ko ení:

• Ko e hā ʻa e fakafiefia lelei ʻokú ke saiʻia aí?

 FAKANOUNOU

ʻOku loto mai ʻa Sihova ke tau fili pea fiefia ʻi he ngaahi fakafiefia leleí.

Fakamanatu

• Ko e hā ʻa e fakafiefia ʻoku totonu ke fakaʻehiʻehi mei ai ʻa e kau Kalisitiané?

• Ko e hā ʻoku totonu ai ke tau tokanga fekauʻaki mo e lahi ʻo e taimi ʻoku tau fakamoleki ʻi he fakafiefiá?

• Ko e hā ʻokú ke loto ai ke fili ʻa e fakafiefia ʻoku fakahōifua kia Sihová?