KONGA 2
Hoko ʻo Femateakiʻaki
“Ko e meʻa kuo haʻi fakatahaʻi ʻe he ʻOtuá, tuku ke ʻoua naʻa fakamāvae ia ʻe ha tangata.”—Maʻake 10:9
ʻOku fiemaʻu ʻe Sihova ke tau ‘koloaʻaki ʻa e mateakí.’ (Maika 6:8) ʻOku mahuʻinga eni tautefito ʻi hoʻo nofo malí, koeʻuhí ʻi he ʻikai ha mateakí ʻoku ʻikai ʻi ai ha falala. Pea ʻoku mātuʻaki mahuʻinga ʻa e falalá ke tupulaki ai ʻa e ʻofá.
ʻI he ʻahó ni, ʻoku lahi ʻa e palopalema ʻo e mateaki ʻi he nofo malí. Ke maluʻi hoʻo nofo malí, kuo pau ke ke fakapapauʻi ke fai ʻa e meʻa ʻe ua ko ení.
1 FAKAMUʻOMUʻA ʻA HOʻO NOFO MALÍ
MEʻA ʻOKU LEAʻAKI ʻE HE TOHI TAPÚ: ‘Fakapapauʻi ʻa e ngaahi meʻa ʻoku mahuʻinga angé.’ (Filipai 1:10) Ko hoʻo nofo malí ko e taha ia ʻo e ngaahi meʻa mahuʻinga taha ʻi hoʻo moʻuí. ʻOku tuha ia ke fakamuʻomuʻa.
ʻOku finangalo ʻa Sihova ke ke tokangataha ki ho hoá pea mo “moui fiefia” fakataha. (Koheleti 9:9, PM) Naʻá ne fakahaaʻi mahino ʻa e totonu ko ia ke ʻoua ʻaupito te ke tukunoaʻi ho hoá, ka ʻi hono kehé ʻoku totonu ke mo vakaiʻi fakatouʻosi ha ngaahi founga ʻe lava ke mo fakatou fiefia aí. (1 Kolinitō 10:24) ʻAi ke ongoʻi ho hoá ʻoku fakamahuʻingaʻi mo fakahoungaʻi ia.
MEʻA ʻE LAVA KE KE FAÍ:
-
Fakapapauʻi ʻokú ke fakamoleki maʻu pē ʻa e taimi mo ho hoá, pea tuku tāfataha hoʻo tokangá kiate ia
-
Fakakaukau ko e “kitaua” kae ʻikai ko e “ko au”
2 LAMA HO LOTÓ
MEʻA ʻOKU LEAʻAKI ʻE HE TOHI TAPÚ: “Ko e tokotaha kotoa ʻoku hanganaki fakasio ki ha fefine ke tafunaki ki ai ʻene holí kuó ne ʻosi tonoʻi ia ʻi hono lotó.” (Mātiu 5:28) Kapau ʻoku hanganaki fakakaukau ha taha fekauʻaki mo ha ngaahi meʻa taʻetaau, ʻi he ʻuhinga ko iá ʻokú ne hoko ai ʻo taʻefaitōnunga ki hono hoá.
ʻOku pehē ʻe Sihova ʻoku fiemaʻu ke ke ‘lama ho loto.’ (Palōveepi 4:23; Selemaia 17:9) Ke fai ení, kuo pau ke ke maluʻi ho matá. (Mātiu 5:29, 30) Muimui ʻi he faʻifaʻitakiʻanga ʻa e pēteliake ko Siopé, ʻa ia naʻá ne fuakava mo hono matá ke ʻoua ʻaupito ʻe sio mo holi ki ha fefine kehe. (Siope 31:1) Fakapapauʻi ke ʻoua ʻaupito ʻe sio ʻi he ʻata fakalieliá. Pea fakapapauʻi ke fakaʻehiʻehi mei ha faʻahinga fepikitaki fakaemanako ki ha taha kehe mei ho hoá.
MEʻA ʻE LAVA KE KE FAÍ:
-
Fakahaaʻi mahino ki he niʻihi kehé ʻokú ke tukupā kakato ki ho hoá
-
Fakakaukau ki he ngaahi ongoʻi ho hoá, pea fakangata leva ha faʻahinga vahaʻangatae ʻa ia te ne ʻai ai ho hoá ke taʻefiemālie
