1-4. Ko e hā ʻa e tuʻunga faingataʻa ʻoku fehangahangai mo Pitá, pea ʻe fēfē hoʻo ongoʻí kapau naʻá ke ʻi hono tuʻungá?

 ʻI HA fuʻu patō leʻo-lahi, ʻoku maleʻei mai ʻa e fuʻu matapā lahi ukameá ʻo ne tāpuniʻi mai ʻa Pita. ʻI hono haʻi sēiniʻi ʻi he vahaʻa ʻo ha ongo kaʻate Loma ʻe toko ua, ʻoku taki atu ia ki hono loki pilīsoné. ʻOkú ne kātekina leva ha ngaahi houa lahi, ko ha ngaahi ʻaho nai, ʻi he tatali ke ʻilo pe ko e hā ʻa e meʻa ʻe fai kiate iá. ʻOku ʻikai ha meʻa ia te ne sio ki ai ka ko e holisi pē mo e ngaahi pā ukamea ʻo hono pilīsoné, ko hono ongo sēiní pea mo e ongo kaʻaté.

² Ko e ongoongó, ʻi heʻene aʻu maí, ʻoku mafatukituki. ʻOku fakapapauʻi ʻe Tuʻi Hēlota ʻAkilipa I ke tāmateʻi ʻa Pita. a Ko hono moʻoní, ʻe fakahaaʻi atu ʻa Pita ki he kakaí ʻi he hili ʻa e Pāsová, ko hono tautea maté ko ha meʻaʻofa ia ke fakafiefiaʻi ʻaki ʻa e fuʻu kakaí. ʻOku ʻikai ko ha foʻi fakamanamana ʻataʻatā pē eni. Ko e taha ʻo e ngaahi kaungāʻapositolo ʻo Pitá​—ʻa Sēmisi​—naʻe toki ʻosí ni atu pē hono tāmateʻi ʻe he tokotaha pule tatau pē ko ení.

³ Ko e efiafi eni ki muʻa ʻi he taimi ne ʻosi fokotuʻutuʻu ke fakahoko ai ʻa e tauteá. Ko e hā ʻoku fakakaukau ki ai ʻa Pita ʻi hono loki pilīsone fakapoʻulí? ʻOkú ne manatu nai ko e ngaahi taʻu ki muʻá, naʻe fakahaaʻi ai ʻe Sīsū ko Pitá ʻe ʻi ai e ʻaho ʻe haʻi ai pea taki atu ʻo ʻikai te ne loto ki ai​—ki hono mateʻangá? (Sione 21:18, 19) Mahalo pē ʻoku fifili ʻa Pita naʻa kuo aʻu mai koā ʻa e taimi ia ko iá.

⁴ Kapau naʻá ke ʻi he tuʻunga ʻo Pitá, ʻe fēfē hoʻo ongoʻí? ʻE siva ʻa e ʻamanaki ʻa e tokolahi, ʻo fakakaukau kuo mole ʻa e ʻamanaki kotoa pē. Kae kehe, ki ha tokotaha muimui moʻoni ʻo Sīsū Kalaisi, ʻoku ʻi ai nai ha faʻahinga tuʻunga ʻe ʻikai moʻoni pē ke toe ʻi ai ha ʻamanaki ia? Ko e hā ʻe lava ke tau ako mei he anga ʻo e tali ʻa Pita mo hono ngaahi kaungā-Kalisitiané ki he fakatanga naʻa nau tofanga aí? Tau sio angé ki aí.

5, 6. (a) Ko e hā pea naʻe anga-fēfē hono ʻohofi ʻe Tuʻi Hēlota ʻAkilipa I ʻa e fakatahaʻanga Kalisitiané? (e) Ko e hā naʻe hoko ai ʻa e mate ʻa Sēmisí ko ha ʻahiʻahi ia ki he fakatahaʻangá?

⁵ Hangē ko ia naʻa tau ako ki ai ʻi he vahe naʻe toki ʻosi atu ʻo e tohí ni, ko e tafoki mai ʻa e Senitaile ko Koliniusí pea mo hono fāmilí ko ha meʻa ia naʻe fakafiefia ʻaupito ki he fakatahaʻanga Kalisitiané. Ka kuo pau pē naʻe ʻohovale ʻa e kau Siu taʻetuí ʻi he ʻiloʻi ko e kau Kalisitiane Siu tokolahi naʻa nau lotu tauʻatāina fakataha ʻi he taimi ko ení pea mo e faʻahinga naʻe ʻikai ko e kau Siú.

⁶ Ko Hēlota, ko ha tokotaha politiki poto, naʻá ne sio ki he meʻá ni ko ha faingamālie ia ke ne fakahekeheke ai ki he kau Siú, ko ia naʻe kamata ai ke ne ngaohikoviʻi ʻa e kau Kalisitiané. ʻOku ʻikai ha veiveiua, naʻá ne ʻiloʻi ko e ʻapositolo ko Sēmisí naʻe fuʻu vāofi ʻaupito mo Sīsū Kalaisi. Ko ia ai, naʻe hanga ʻe Hēlota ʻo “fakapoongi ʻa Sēmisi ko e tokoua ʻo Sioné ʻaki ʻa e heletā.” (Ngā. 12:2) Ko ha ʻahiʻahi moʻoni ē ki he fakatahaʻangá! Ko Sēmisi ko e taha ia ʻo e toko tolu naʻa nau fakamoʻoni sio tonu ʻi he fakasinokehe ʻa Sīsuú pea mo e ngaahi mana kehe ʻa ia naʻe ʻikai ke fakahāhā ia ki he kau ʻapositolo kehé. (Māt. 17:1, 2; Mk. 5:37-42) Naʻe ui ʻe Sīsū ʻa Sēmisi mo hono tokoua ko Sioné ko e “Ongo Foha ʻo Fatulisi” koeʻuhí ko ʻena fuʻu loto-māfana tōtuʻá. (Mk. 3:17) Ko ia naʻe mole mei he fakatahaʻangá ha tokotaha fakamoʻoni loto-toʻa, faitōnunga pea ko ha ʻapositolo ʻofeina.

7, 8. Naʻe anga-fēfē ʻa e fakafeangai ʻa e fakatahaʻangá ki hono tuku pilīsone ʻo Pitá?

⁷ Ko hono tāmateʻi ʻo Sēmisí naʻe fiefia ai ʻa e kau Siú, ʻo hangē tofu pē ko ia naʻe ʻamanaki ki ai ʻa ʻAkilipá. ʻI hono ueʻi mālohi ai iá, naʻá ne hoko atu leva kia Pita. Hangē ko ia naʻe fakamatalaʻi ʻi he kamatá, naʻá ne tuʻutuʻuni  ke puke pōpula ʻa Pita. Kae kehe, ʻoku ngalingali naʻe manatuʻi ʻe ʻAkilipa naʻe ʻikai ke hoko maʻu pē ʻo ola lelei ʻa hono tuku ʻa e kau ʻapositoló ʻi he pilīsoné, ʻo hangē ko ia naʻe hā ʻi he Vahe 5 ʻo e tohí ni. ʻI he ʻikai toe tuku ha faingamālié, naʻe tuʻutuʻuni ʻe Hēlota ke haʻi sēini ʻa Pita ʻi he vahaʻa ʻo ha ongo kaʻate ʻe toko 2, fakataha mo ha kau kaʻate ʻe toko 16 ke nau ngāue taufetongi ʻi he ʻaho mo e pō ke fakapapauʻi heʻikai hola ʻa e ʻapositoló ni. Kapau te ne hola, ʻe fehangahangai tonu ai ʻa e kau kaʻate ko iá pea mo e tautea ʻo Pitá. ʻI he malumalu ʻo e ngaahi tuʻunga mafatukituki peheé, ko e hā ʻe lava ke fai ʻe he ngaahi kaungā-Kalisitiane ʻo Pitá?

⁸ Naʻe ʻiloʻi lelei ʻe he fakatahaʻangá ʻa e meʻa ke faí. ʻOku pehē ʻe he Ngāue 12:5: “Lolotonga hono tauhi ʻa Pita ʻi he pilīsoné, naʻe fai ʻe he fakatahaʻangá ha lotu lahi maʻana.” ʻIo, ko ʻenau ngaahi lotu maʻa honau tokoua ʻofeiná ni, ko ha ngaahi kōlenga ia naʻe lahi mo fai loto-moʻoni. Ko e mate ʻa Sēmisí naʻe ʻikai te nau tō ai ki ha siva ʻa e ʻamanakí; pea naʻe ʻikai te ne ʻai kinautolu ke nau vakai ai ki he lotú ʻoku ʻikai hano mahuʻinga. ʻOku mahuʻinga ʻaupito ʻa e lotú kia Sihova. Kapau ʻoku fehoanaki ia mo hono finangaló, te ne tali mai. (Hep. 13:18, 19; Sēm. 5:16) Ko ha lēsoni eni ʻe loto ʻa e kau Kalisitiane ʻi he ʻaho ní ke nau fakamahuʻingaʻi ʻi honau lotó.

9. Ko e hā ʻe lava ke tau ako mei he faʻifaʻitakiʻanga naʻe fokotuʻu ʻe he ngaahi kaungā-Kalisitiane ʻo Pitá ʻi he fekauʻaki mo e lotú?

⁹ ʻOkú ke ʻiloʻi ha ngaahi kaungātui ʻoku nau tofanga ʻi ha ngaahi ʻahiʻahi lahi? ʻOku nau kātekina nai ha fakatanga, ngaahi fakataputapui fakapuleʻanga, pe ngaahi fakatamaki fakanatula. Fēfē ke ke fai hoʻo ngaahi lotu loto-moʻoní maʻa kinautolu? ʻOkú ke toe ʻiloʻi foki nai ha niʻihi ʻoku nau fuesia ha ngaahi faʻahinga  faingataʻa ʻoku ʻikai ke loko fakatokangaʻi, ʻo hangē ko e ngaahi palopalema fakafāmilí, ko ha fakalotosiʻi, pe ko ha meʻa ʻoku hoko ko ha pole ki heʻenau tuí. Kapau te ke fakakaukauloto ki muʻa ke ke lotú, ʻe lava ai ke ke fakakaukau ki ha kakai tokolahi ke fakakau honau hingoá ʻi hoʻo lea kia Sihová, ʻa e “Tokotaha-Fanongo ki he lotú.” (Saame 65:2, NW) He ko ē, ʻoku fiemaʻu kiate koe ke fai atu ʻe ho fanga tokouá mo ho fanga tuofāfiné ʻa e meʻa tatau maʻau, kapau te ke hokosia ha ngaahi taimi faingataʻa.

10, 11. Fakamatalaʻi ʻa e anga hono fakahaofi ʻe he ʻāngelo ʻa Sihová ʻa Pita mei hono tuku pilīsoné.

¹⁰ Naʻe loto-moʻua nai ʻa Pita ʻo fekauʻaki mo e fakatuʻutāmaki naʻá ne fehangahangai mo iá? ʻE ʻikai lava ke tau fakapapauʻi ia, ka ʻi he lolotonga ʻa e pō fakaʻosi ko ia ʻi he pilīsoné, naʻá ne māʻumohe ʻi he vahaʻa ʻo ha ongo kaʻate mātuʻaki tokanga ʻe toko ua. Ko e tangata ko eni ʻo e tuí naʻá ne ʻiloʻi fakapapau ʻe tatau ai pē pe ko e hā ʻe ʻomai ʻe he ʻapongipongí, naʻá ne malu pē ʻia Sihova. (Loma 14:7, 8) Pe ko e hā pē ʻa e tuʻungá, naʻe ʻikai lava ke fakaʻuta atu ʻa Pita ia ki he ngaahi meʻa fakaofo naʻe ʻamanaki ke hokó. Fakafokifā pē, naʻe hulungia ʻa hono loki pilīsoné ʻe ha maama ngingila. Naʻe tuʻu mai ai ha ʻāngelo, ʻoku hā mahino naʻe ʻikai lava ke sio ki ai ʻa e ongo kaʻaté, peá ne fafangu fakavave ʻa Pita. Pea ko e ongo sēini ko ia naʻá ne haʻi fakataha hono ongo nimá​—ko ha ongo sēini ia naʻe hā ngali motungataʻa ʻaupito​—naʻe homo hifo pē ia!

¹¹ Naʻe ʻoange ʻe he ʻāngeló kia Pita ha ngaahi holongā fekau nounou: “Tuʻu ke vave! . . . Teuteu pea tui ho senitoló. . . . Tui ho kofu tuʻá.” Naʻe talangofua loto-lelei ki ai ʻa Pita. Fakaʻosí, naʻe pehē ange ʻe he ʻāngeló: “Muimui mai ai pē ʻiate au,” pea naʻe fai pehē ʻa Pita. Naʻá na mavahe mei he loki pilīsoné, ʻo na lue tonu atu ʻo fakalaka ʻi he kau kaʻate leʻo naʻe tuʻu ʻi tuʻá, peá na moulu fakalongolongo atu ki he fuʻu matapā lahi ukameá. ʻE malava fēfē ke na hū atu aí? Kapau naʻe aʻu ʻo ʻi ai ha fifili pehē ʻi he ʻatamai ʻo Pitá, naʻe taimi nounou pē ia. ʻI heʻena fakaofiofi atu ki he matapaá, “naʻe ava mai eni ʻiate ia pē kiate kinaua.” Ki muʻa ke fakatokangaʻi ia ʻe Pitá, naʻá na hū atu ʻo fakalaka ʻi he matapaá ʻo aʻu ki he halá, pea pulia leva ʻa e ʻāngeló ia. Naʻe tuʻu pē ai ʻa Pita, pea naʻá ne toki fakatokangaʻi hake tā ko e kotoa ʻo e ngaahi meʻá ni naʻe hoko moʻoni ia. Naʻe ʻikai ko ha vīsone eni. Naʻá ne tauʻatāina!​—Ngā. 12:7-11.

12. Ko e hā ʻe fakafiemālie nai ai kiate kitautolu ke fakakaukauloto atu ki hono fakahaofi ʻe Sihova ʻa Pitá?

¹² ʻIkai ʻoku fakafiemālie ke fakakaukauloto atu ki he mālohi taʻefakangatangata ʻo Sihova ke ne fakahaofi ʻa ʻene kau sevānití? Naʻe tauhi pōpula ʻa Pita ʻe ha tuʻi ʻa ia naʻe poupouʻi ʻe he mafai fakapuleʻanga mālohi taha kuo faifai ange pea mātā ʻe he māmaní. Neongo ia, naʻe luelue mai pē ʻa Pita ia ki tuʻa mei he pilīsoné! Ko e moʻoni, ʻoku ʻikai ke fakahoko ʻe Sihova ia ha ngaahi mana pehē maʻá e kotoa ʻo ʻene kau sevānití. Naʻe ʻikai te ne fai pehē kia Sēmisi; pe  ko Haʻane fai pehē kia Pita ki mui ai, ʻi he taimi naʻe faai atu pē ʻo fakahoko ai ʻa e ngaahi lea ʻa Sīsū ʻo fekauʻaki mo e ʻapositoló ni. ʻOku ʻikai ke ʻamanekina ʻe he kau Kalisitiane ʻi he ʻaho ní ha fakahaofi fakaemana. Kae kehe, ʻoku tau manatuʻi kuo ʻikai ke liliu ʻa Sihova ia. (Mal. 3:6) Pea ʻe vavé ni ke ne ngāueʻaki ʻa hono ʻAló ke ne fakatauʻatāinaʻi ʻa e laui miliona taʻefaʻalaua mei he pilīsone taʻeʻunua lahi tahá, ʻa mate. (Sione 5:28, 29) ʻE lava ke tau maʻu ʻa e loto-toʻa lahi fakaʻulia mei he ngaahi talaʻofa peheé ʻi he taimi ʻoku tau fehangahangai ai he ʻahó ni mo e ngaahi ʻahiʻahí.

13-15. (a) Naʻe fēfē ʻa e fakafeangai ʻa e ngaahi mēmipa ʻo e fakatahaʻanga naʻe fakataha ʻi he fale ʻo Melé ʻi he aʻu atu ʻa Pitá? (e) ʻOku hiki ʻa e tokanga ʻa e tohi ʻa Ngāué ki he hā, ka ko e hā ʻa e tākiekina naʻe hokohoko atu hono fai ʻe Pita ki hono fanga tokoua mo hono fanga tuofāfine fakalaumālié?

¹³ Naʻe tuʻu ʻa Pita ʻi he hala fakapoʻulí, ʻo ne fakakaukau pe te ne ʻalu mei aí ki fē. Naʻe fai leva ʻene filí. Naʻe nofo ofi ai ha fefine Kalisitiane ko hono hingoá ko Mele. ʻOku hā mai ko ha uitou ia naʻe ʻi ai ʻene meʻa naʻe maʻu, he ko Melé naʻe ʻi ai hono fale ʻa ia naʻe lahi feʻunga ke hao ai ha fakatahaʻanga. Ko e faʻē ia ʻa Sione Maʻaké, ʻa ia ko e fuofua taimi eni ʻoku fai ai ha lave kia Sione Maʻake ʻi he fakamatala ʻo e tohi ʻa Ngāué pea naʻe faai atu pē ʻo ne hoko ʻo hangē ha foha kia Pitá. (1 Pita 5:13) ʻI he pō ko ení, naʻe tokolahi ʻa e faʻahinga ʻi he fakatahaʻanga ko iá naʻa nau ʻi he fale ʻo Melé neongo ʻene fuʻu poʻuliá, ʻo nau lotu tōtōivi. ʻOku ʻikai ha veiveiua naʻa nau lotú ki hano tukuange mai ʻo Pita​—ka naʻe ʻikai te nau ʻamanekina ʻa e tali ʻa Sihová!

¹⁴ Naʻe tukituki ʻa Pita ʻi he matapā ʻo e hūʻangá, ʻa ia ʻoku fakaava atu ia ki ha lotoʻā ʻi muʻa ʻi he falé. Ko ha taʻahine kaunanga ko hono hingoá ko Lota​—ko ha hingoa faka-Kalisi anga-maheni ia ʻoku ʻuhingá ko e “Lose”​—naʻá ne haʻu ki he matapaá. Naʻe ʻikai ke ne faʻafaʻa lava ke tui ki he meʻa naʻá ne fanongo ki aí. Ko e leʻo ʻo Pitá! ʻI he ʻikai ke ne fakaava ʻa e matapaá, naʻe hākahaka ʻa e taʻahiné ʻo ne tuku pē ʻa Pita ke tuʻu ʻi he halá kae lele ia ʻo foki ki he falé, ʻo ne feinga ke fakatuipauʻi ʻa e fakatahaʻangá ko Pita ē ʻoku ʻi ai. Naʻa nau tala ange kiate ia ko iá ʻokú ne sesele, ka naʻe ʻikai ko ha faʻahinga tokotaha eni ia naʻe ueʻingofua ʻa e meʻa ʻokú ne tui fakapapau ki aí. Naʻá ne kei fakamatematē atu pē ʻoku moʻoni ʻa e meʻa naʻá ne ʻiló. ʻI heʻenau kiʻi lolou hifó, naʻe pehē atu ai ʻe ha niʻihi mahalo ko ha ʻāngelo ia naʻá ne fakafofongaʻi mai ʻa Pita. (Ngā. 12:12-15) Lolotonga ʻa e meʻa kotoa ko iá, naʻe hanganaki tukituki mai pē ʻa Pita ʻo faifai pē pea nau ʻalu atu ki he matapaá ʻo fakaava hake.

¹⁵ ʻI he matapaá, “naʻa nau sio kiate ia pea nau ofoofo”! (Ngā. 12:16) Naʻe pau kia Pita ke ne ʻai ke nau kiʻi fakalongolongo hifo mei heʻenau longoaʻa fiefiá kae lava ke ne fakamatala ange ki he meʻa naʻe hokó, peá ne fekau ke fakahā ia ki he ākonga ko Sēmisí mo e fanga tokouá, pea naʻá ne mavahe leva ki muʻa ke lava ke maʻu ia ʻe he kau sōtia ʻa Hēlotá. Naʻe ʻalu atu ʻa Pita ke hoko atu ʻene ngāue faitōnungá ʻi ha feituʻu naʻe malu angé. Tuku kehe ʻa ʻene tokoni ki hono  solova ʻa e ʻīsiu ʻo e kamú, ʻa ia ʻoku hā ʻi he Ngāue vahe 15, ʻoku ʻikai ke toe fai ha lave kiate ia ʻi he toenga ʻo e tohi ʻa Ngāué. ʻOku fakahanga leva ʻa e tokanga ia ʻa e tohi ʻa Ngāué ki he ngāue pea mo e ngaahi fononga ʻa e ʻapositolo ko Paulá. Kae kehe, ʻe lava ke tau fakapapauʻi naʻe fakaivimālohiʻi ʻe Pita ʻa e tui ʻa hono fanga tokouá mo hono fanga tuofāfiné ʻi ha faʻahinga feituʻu pē naʻá ne ʻalu ki ai. ʻI heʻene mavahe ko ia mei he kulupu naʻe ʻi he fale ʻo Melé, ko e moʻoni naʻa nau ʻi ha tūkunga fakaefakakaukau fiefia.

16. Ko e hā ʻoku pau ai ʻe ʻomai ʻe he kahaʻú kiate kitautolu ha ngaahi tuʻunga lahi ke tau fiefia aí?

¹⁶ ʻI he taimi ʻe niʻihi ʻoku fai ai ʻe Sihova ha foaki ki heʻene kau sevānití ʻo mahulu atu ia ʻi he meʻa ʻoku ala lava ke nau ʻamanekiná, ʻo nau maʻu ai ha fiefia ʻoku ʻikai te nau meimei faʻa lava ke tui ki ai. Naʻe pehē ʻa e anga ʻo e ongoʻi ʻa e fanga tokoua mo e fanga tuofāfine fakalaumālie ʻo Pitá ʻi he pō ko iá. Ko e anga nai ia ʻo ʻetau ongoʻí ʻi he taimi ʻe niʻihi ʻi he taimi ʻoku tau hokosia ai he ʻahó ni ʻa e tāpuaki fakakoloa ʻa Sihová. (Pal. 10:22) ʻI he kahaʻú, te tau sio ai ki hono fakahoko ʻa e kotoa ʻo e ngaahi talaʻofa ʻa Sihová ʻi ha tuʻunga fakamāmani lahi. Ko e ngaahi meʻa moʻoni lāngilangiʻia ko ia ʻe hokó, ko e moʻoni ʻe laka mamaʻo ia ʻi ha faʻahinga meʻa pē ʻe lava ke tau fakaʻuta atu ki ai he ʻahó ni. Ko ia, kapau te tau nofoʻaki faitōnunga ai pē, ʻe lava ke tau ʻamanaki atu ki ha ngaahi taimi fakafiefia lahi ʻoku toka mai mei muʻa.

17, 18. Ko e hā naʻe taki atu ki hono vikiʻi fakahekeheke ʻo Hēlotá?

¹⁷ Ko e hola ʻa Pitá naʻe toe fakatumutumu foki ai mo Hēlota​—ka naʻe ʻikai ko ha fakaʻohovale lelei ia kiate ia. Naʻe tuʻutuʻuni fakavave ʻe Hēlota ke fai ha kumi fakaʻāuliliki, pea fakafehuʻi leva mo e kau kaʻate naʻa nau leʻohi ʻa Pitá. Naʻe “taki atu kinautolu ʻo tautea,” ngalingali ko hano tāmateʻi. (Ngā. 12:19) Ko Hēlota ʻAkilipa ʻe ʻikai ke manatua ia ko ha tokotaha manavaʻofa pe faimeesi. Ne faifai ange pea tauteaʻi ʻa e tangata anga-fakamamahi ko ení?

¹⁸ ʻOku pau pē naʻe ongoʻi mā ʻa ʻAkilipa ʻi he ʻikai lava ke ne tāmateʻi ʻa Pitá, ka naʻe vave ʻene maʻu ha fakanonga ki heʻene loto-hīkisia ne tōlaló. Naʻe malanga hake ha tuʻunga fakapuleʻanga ʻa ia naʻe pau ai ki he niʻihi ʻo hono ngaahi filí ke nau fai ha feinga fakamelino, pea ʻoku pau pē naʻá ne vēkeveke ai ke fai ha lea ʻi he ʻao ʻo ha fuʻu kau fanongo tokolahi. Naʻe fakamatala ʻa Luke ʻo pehē ʻi he teuteu atu ki aí, “naʻe tui ʻe Hēlota ʻa hono kofu fakatuʻí.” Naʻe hiki ʻe he faihisitōlia Siu ko Siosifasí ʻo pehē ko e kofu ʻo Hēlotá naʻe ngaohiʻaki ʻa e siliva, ko ia ʻi he taimi naʻe ulo atu ai ʻa e māmá ki he tuʻí, naʻá ne hā mai ʻo hangē ʻokú ne uloulo ʻi he lāngilangiʻiá. Naʻe fai leva ʻe he tokotaha politiki fakafuofuolahí ni ha lea. Naʻe kalanga atu ai ʻa e fuʻu kakai fakalaí: “Ko e leʻo ʻo ha ʻotua, ʻo ʻikai ʻo ha tangata!”​—Ngā. 12:20-22.

19, 20. (a) Ko e hā naʻe tauteaʻi ai ʻe Sihova ʻa Hēlotá? (e) Ko e hā ʻa e fakafiemālie ʻe lava ke tau maʻu ʻi he fakamatala fekauʻaki mo e mate mutukia ʻa Hēlota ʻAkilipá?

¹⁹ Ko e lāngilangi ko iá naʻe ʻa e ʻOtuá ia, pea naʻe lolotonga ʻafio hifo pē ʻa e  ʻOtuá! Naʻe maʻu ʻe Hēlota ʻa e faingamālie ke ne kalofi ai ʻa e fakatamakí. Naʻe mei malava pē ke ne valokiʻi ʻa e fuʻu kakaí pe ko haʻane fakahaaʻi pē ā naʻe ʻikai te ne loto-tatau mo kinautolu. ʻI hono kehé, naʻá ne hoko ko ha fakatātā maeʻeeʻa ia ʻo e palōveepi: “Ko e fieʻeiki ko e fakamelomelo ʻo e haveʻi.” (Pal. 16:18) “ʻI he taimi pē ko iá naʻe taaʻi ia ʻe he ʻāngelo ʻa Sihová,” ʻo ne fakatupunga ai ʻa e tangata siokita fakafuofuolahi ko iá ke ne hokosia ha mate palakū. Ko Hēlotá “naʻe keina ia ʻe he ponú ʻo ne mate.” (Ngā. 12:23) Naʻe toe fakahaaʻi foki ʻe Siosifasi ko ʻAkilipá naʻe taaʻi fakafokifā ia peá ne toe tānaki mai naʻe fakaʻosiʻaki ʻe he tuʻí ʻo pehē ko ʻene tei maté koeʻuhí ko ʻene tali ʻa e viki fakahekeheke ʻa e fuʻu kakaí. Naʻe tohi ʻe Siosifasi ko ʻAkilipá naʻá ne fuesia ʻa e tuʻunga ko ení ʻi ha ʻaho ʻe nima ki muʻa peá ne maté. b

²⁰ ʻI he taimi ʻe niʻihi ʻe hā ngali hao pē nai ʻa e kakai anga-taʻefakaʻotuá ia ʻi heʻenau fai ko ia ʻa e ngaahi tōʻonga fulikivanu kotoa pē. ʻOku ʻikai totonu ke tau ʻohovale ʻi he meʻa ko iá, koeʻuhí “ko e māmaní kotoa ʻoku tokoto ia ʻi he mafai ʻo e tokotaha fulikivanú.” (1 Sio. 5:19) Neongo ia, ʻi he taimi ʻe niʻihi ʻoku hohaʻa ʻa e kau sevāniti faitōnunga ʻa e ʻOtuá ʻi he taimi ʻoku hā ngali hao ai ʻa e kakai koví ʻo ʻikai fakamāuʻi totonú. Ko e ʻuhinga ia ʻe taha ʻoku hoko ai ʻa e ngaahi fakamatala hangē ko ení ʻo fakafiemālié. Ko e moʻoni, ʻoku tau sio ʻoku kau mai ʻa Sihova, ʻo fakamanatu ai ki he kotoa ʻo ʻene kau sevānití ko ha tokotaha ia ʻoku ʻofa ki he fakamaau totonú. (Saame 33:5) Faai atu pē, ʻe ikuna ʻa ʻene fakamaau totonú.

21. Ko e hā ʻa e lēsoni tefito ʻoku hā ʻi he Ngāue vahe 12, pea ko e hā nai ʻe fakafiemālie ai ia kiate kitautolu he ʻaho ní?

²¹ ʻOku fakaʻosiʻaki ʻe he fakamatalá ni ha lēsoni ʻoku toe fakalototoʻa ange: “Ko e folofola ʻa Sihová naʻe fakautuutu ai pē ʻene tupú mo ʻene mafola atú.” (Ngā. 12:24) Ko e fakamatala ko eni ki he fakalakalaka ʻi he tupu ʻa e ngāue fakamalangá te ne fakamanatu mai nai kiate kitautolu ʻa e anga hono tāpuakiʻi ʻe Sihova ʻa e ngāue tatau ʻi onopooni. ʻOku hā mahino, ko e lēkooti ʻoku hā ʻi he Ngāue vahe 12 ʻoku ʻikai fekauʻaki tefito pē ia mo e mate ʻa ha ʻapositolo ʻe taha pea mo e hao ʻa ha ʻapositolo ʻe taha. ʻOku fekauʻaki ia mo Sihova pea mo ʻene taʻofi ʻa e ngaahi feinga ʻa Sētane ke laiki ʻa e fakatahaʻanga Kalisitiané mo lōmia ʻene ngāue fakamalanga faivelengá. Naʻe ʻikai lavameʻa ʻa e ngaahi ʻoho ko iá, hangē tofu pē ko e pau ke taʻelavameʻa ʻa e ngaahi faʻufaʻu peheé kotoa. (ʻAi. 54:17) ʻI he tafaʻaki ʻe tahá, ko e faʻahinga ʻoku kau mo Sihova mo Sīsū Kalaisí ko ha konga kinautolu ʻo ha ngāue ʻa ia ʻe ʻikai ʻaupito ke taʻelavameʻa. ʻIkai nai ko ha fakakaukau fakalototoʻa ia? Ko ha monū lahi ē ʻoku tau maʻú ke tau tokoni ki hono fakamafola ʻa e “folofola ʻa Sihová” he ʻahó ni!