1, 2. Ko e hā ʻokú ke pehē ai ko ha meʻaʻofa mahuʻinga ʻa e lotú, pea ko e hā ʻoku fiemaʻu ai ke tau ʻiloʻi ʻa e meʻa ʻoku akoʻi ʻe he Tohi Tapú fekauʻaki mo iá?

 ʻI HONO fakahoa ki he ʻunivēsí, ʻoku siʻisiʻi ʻaupito ʻa e māmaní. ʻI he vakai mai ʻa Sihova ki he māmaní, ko e kakai kotoa ʻi he kotoa ʻo e ngaahi puleʻangá ʻoku nau hangē ha tulutā vai valevale mei ha kané. (Saame 115:15; ʻAisea 40:15) Neongo ʻoku tau mātuʻaki siʻisiʻi ʻi hono fakahoa ki he ʻunivēsí, ʻoku pehē ʻi he Saame 145:18, 19: “ʻOku ofi ʻa Sihova ki he faʻahinga kotoa ʻoku ui kiate iá, ki he faʻahinga kotoa ʻoku ui kiate ia ʻi he moʻoní. ʻOkú ne fakatōliʻa ʻa e holi ʻa e faʻahinga ʻoku manavahē kiate iá; ʻokú ne fanongo ki heʻenau tangi ki ha tokoní, peá ne fakahaofi kinautolu.” He monū fakaofo ē ʻoku tau maʻú! Ko Sihova, ʻa e Tokotaha-Fakatupu māfimafi-aoniú, ʻoku loto ke ofi kiate kitautolu, pea ʻokú ne loto ke fanongo ki heʻetau lotú. ʻIo, ko e lotú ko ha monū, ko ha meʻaʻofa mahuʻinga ia kuo ʻomai ʻe Sihova kiate kitautolu taki taha.

² Ka ʻe toki fanongo mai pē ʻa Sihová kapau te tau talanoa kiate ia ʻi he founga ʻokú ne hōifua aí. ʻE lava fēfē ke tau fai iá? Tau sio angé ki he meʻa ʻoku leaʻaki ʻe he Tohi Tapú fekauʻaki mo e lotú.

3. Ko e hā ʻoku totonu ai ke ke lotu kia Sihová?

³ ʻOku fiemaʻu ʻe Sihova ke ke lotu, pe talanoa kiate ia. ʻOku anga-fēfē ʻetau ʻiloʻi iá? Kātaki ʻo lau ʻa e Filipai  4:6, 7. Fakakaukau ki he fakaafe anga-ʻofa ko iá. Ko e Pule ʻo e ʻunivēsí ʻokú ne mahuʻingaʻia lahi ʻiate koe pea ʻokú ne loto ke ke talanoa kiate ia fekauʻaki mo e anga hoʻo ongoʻí pea mo hoʻo ngaahi palopalemá.

4. ʻOku anga-fēfē hono ʻai ʻe hoʻo lotu maʻu pē kia Sihová ke mālohi ʻa hoʻo kaumeʻa mo iá?

⁴ ʻOku tokoniʻi kitautolu ʻe he lotú ke tau kaumeʻa ofi mo Sihova. ʻI he fetalanoaʻaki maʻu pē ʻa e ngaahi kaumeʻá fekauʻaki mo ʻenau fakakaukaú, hohaʻá, mo e ongoʻí, ʻoku tupu ʻo toe mālohi ange ai ʻenau kaumeʻá. ʻOku meimei tatau pē ia mo e lotu kia Sihová. ʻI he Tohi Tapú, kuó ne vahevahe mai ai ʻene fakakaukaú mo ʻene ongoʻí kiate koe, pea ʻokú ne tala atu ai ʻa e meʻa te ne fai ʻi he kahaʻú. ʻE lava ke ke vahevahe kiate ia naʻa mo hoʻo ngaahi ongoʻi lolotó ʻaki ʻa e talanoa maʻu pē kiate ia. ʻI hoʻo fai ení, ʻe tupu ai ʻo toe mālohi ange ʻa hoʻo kaumeʻa mo Sihová.​—Sēmisi 4:8.

5. ʻOku anga-fēfē ʻetau ʻiloʻi ʻoku ʻikai ke fanongo mai ʻa Sihova ki he lotu kotoa pē?

⁵ ʻOku fanongo mai ʻa Sihova ki he lotu kotoa pē? ʻIkai, ʻoku ʻikai ke pehē. ʻI he taimi ʻo e palōfita ko ʻAiseá, naʻe tala ai ʻe Sihova ki he kau ʻIsilelí: “Neongo hoʻomou fai hake ha ngaahi lotu lahi, heʻikai te u fanongo atu; ko homou nimá na ʻoku totoʻia.” (ʻAisea 1:15) Ko ia kapau heʻikai ke tau tokanga, ʻe lava ke tau fai ha meʻa te tau mamaʻo ai meia Sihova, ʻo ʻai ai ia ke ne tukunoaʻi ʻetau lotú.

6. Ko e hā ʻoku mātuʻaki mahuʻinga ai ʻa e tuí? ʻOku anga-fēfē hoʻo fakahāhā ʻokú ke tui?

⁶ Kapau ʻoku tau loto ke fanongo ʻa Sihova ki heʻetau  lotú, kuo pau ke tau tui kiate ia. (Maʻake 11:24) ʻOku fakamatala ʻa e ʻapositolo ko Paulá: “ʻI he ʻikai ha tuí ʻoku ʻikai malava ke fakahōifuaʻi ʻa e ʻOtuá, he ʻilonga ʻa ia ʻokú ne fakaofiofi ki he ʻOtuá kuo pau ke ne tui ʻoku ʻi ai ia pea ko ia te ne fakapaleʻi ʻa e faʻahinga ʻoku nau kumi tōtōivi kiate iá.” (Hepelū 11:6) Ka ʻoku ʻikai feʻunga pē ke pehē ʻoku tau tui. ʻOku fiemaʻu ke tau fakamoʻoniʻi mahino ʻetau tuí ʻaki ʻa e talangofua kia Sihova ʻi he ʻaho kotoa pē.​—Lau ʻa e Sēmisi 2:26.

7. (a) Ko e hā ʻoku totonu ai ke tau anga-fakatōkilalo mo anga-ʻapaʻapa ʻi heʻetau lotu kia Sihová? (e) ʻE lava fēfē ke tau fakahāhā ʻoku tau loto-moʻoni ʻi he taimi ʻoku tau lotu aí?

⁷ ʻOku totonu ke tau anga-fakatōkilalo mo anga-fakaʻapaʻapa ʻi heʻetau lotu kia Sihová. Ko e hā hono ʻuhingá? Kapau te tau lea ki ha tuʻi pe ko ha palesiteni, te tau fai ia ʻi ha founga fakaʻapaʻapa. Ko Sihova ʻa e ʻOtua Māfimafi-Aoniú, ko ia ʻikai ʻoku totonu ke tau anga-fakaʻapaʻapa mo anga-fakatōkilalo lahi ange ʻi heʻetau lea kiate iá? (Sēnesi 17:1; Saame 138:6) ʻOku  totonu ke tau loto-moʻoni foki pea lotu kia Sihova mei hotau lotó, ʻo ʻikai ko hono toutou leaʻaki pē ʻa e lea tatau.​—Mātiu 6:7, 8.

8. ʻI heʻetau lotu ʻo fekauʻaki mo ha meʻa, ko e hā ha toe meʻa ʻoku fiemaʻu ke tau fai?

⁸ Fakaʻosí, ʻi heʻetau lotu fekauʻaki mo ha meʻa, kuo pau ke tau fai ʻa e meʻa kotoa pē te tau malavá ke ngāue ki he meʻa ʻoku tau lotu ki aí. Ko e fakatātaá, kapau ʻoku tau lotu kia Sihova fekauʻaki mo ʻetau fiemaʻu fakaʻahó, heʻikai leva ke tau fakapikopiko pea ʻamanekina ke foaki mai ʻe Sihova ʻa e meʻa kotoa pē neongo ʻoku tau malava ʻo ngāue ke maʻu ia. Kuo pau ke tau ngāue mālohi pea tali ha ngāue pē ʻoku malava ke tau fai. (Mātiu 6:11; 2 Tesalonaika 3:10) Pe kapau ʻoku tau lotu kia Sihova ki ha tokoni ke tuku ʻetau fai ha meʻa ʻoku hala, kuo pau ke tau fakaʻehiʻehi mei ha tuʻunga pē ʻe lava ke fakataueleʻi ai kitautolu. (Kolose 3:5) Tau sivisiviʻi angé ha ngaahi fehuʻi anga-maheni ʻo fekauʻaki mo e lotú.

9. Ko hai ʻoku totonu ke tau lotu ki aí? Ko e hā ʻoku akoʻi mai ʻi he Sione 14:6 fekauʻaki mo e lotú?

⁹ Ko hai ʻoku totonu ke tau lotu ki aí? Naʻe akoʻi ʻe Sīsū hono kau muimuí ke nau lotu ki he “Tamai ʻoku ʻi hēvani.” (Mātiu 6:9) Naʻá ne toe pehē: “Ko au ʻa e halá pea mo e moʻoní pea mo e moʻuí. ʻOku ʻikai haʻu ha taha ki he Tamaí ka ʻi heʻene fou pē ʻiate au.” (Sione 14:6) Ko ia ʻoku totonu ke tau lotu pē kia Sihova fakafou ʻia Sīsū. ʻOku ʻuhinga ki he hā ʻa e lotu fakafou ʻia Sīsuú? Ke tali ʻe Sihova ʻetau lotú, ʻoku fiemaʻu ke tau fakaʻapaʻapaʻi ʻa e ngafa makehe naʻe ʻoange ʻe  Sihova kia Sīsuú. Hangē ko ia kuo tau akó, naʻe haʻu ʻa Sīsū ki māmaní ke fakahaofi kitautolu mei he angahalá mo e maté. (Sione 3:16; Loma 5:12) Kuo fakanofo foki ʻe Sihova ʻa Sīsū ko e Taulaʻeiki Lahi mo e Fakamaau.​—Sione 5:22; Hepelū 6:20.

10. ʻOku fiemaʻu ke tau ʻi ha tuʻunga makehe ʻi he taimi ʻoku tau lotu aí? Fakamatalaʻi.

¹⁰ ʻOku fiemaʻu ke tau ʻi ha tuʻunga makehe ʻi he taimi ʻoku tau lotu aí? ʻIkai, ʻoku ʻikai fiemaʻu mai ʻe Sihova ia ke tau tūʻulutui, tangutu, pe tuʻu ʻi heʻetau lotú. ʻOku akoʻi mai ʻe he Tohi Tapú ʻe lava ke tau talanoa kia Sihova ʻi ha tuʻunga fakaʻapaʻapa. (1 Kalonikali 17:16; Nehemaia 8:6; Taniela 6:10; Maʻake 11:25) Ko e meʻa ʻoku mahuʻinga taha kia Sihová, ʻoku ʻikai ko hotau tuʻungá ʻi he taimi ʻoku tau lotu aí, ka ke tau talanoa kiate ia ʻi he fakakaukau totonu. ʻE lava ke tau lotu leʻo-lahi pe fakalongolongo ʻi ha feituʻu pē pea ʻi ha taimi pē lolotonga ʻa e ʻahó pe poʻulí. ʻI heʻetau lotu kia Sihová, ʻoku lava ke tau falala te ne fanongo mai naʻa mo e taimi ʻoku ʻikai ke fanongo mai ai ha tahá.​—Nehemaia 2:1-6.

11. Ko e hā ha ngaahi meʻa ʻe lava ke tau talanoa kia Sihova fekauʻaki mo iá?

¹¹ Ko e hā ʻe lava ke tau lotu fekauʻaki mo iá? ʻE lava ke tau lotu ʻo fekauʻaki mo ha meʻa pē ʻoku fakahōifua kia Sihova. ʻOku pehē ʻe he Tohi Tapú: “ʻIlonga ha meʻa ʻoku tau kole ʻo fakatatau ki hono finangaló, ʻokú ne fanongo mai kiate kitautolu.” (1 Sione 5:14) ʻE lava ke tau lotu fekauʻaki mo ha meʻa fakafoʻituitui? ʻIo. Ko e lotu kia Sihová ʻoku totonu ke hangē ko e talanoa ki ha kaumeʻa ofí. ʻE lava ke tau tala kia Sihova ha meʻa pē ʻoku ʻi hotau ʻatamaí mo hotau lotó. (Saame 62:8) ʻE  lava ke tau lotu ke ne ʻomi hono laumālie māʻoniʻoni mālohí ke tokoniʻi kitautolu ke tau fai ʻa e meʻa ʻoku totonú. (Luke 11:13) ʻE lava ke tau kole foki kia Sihova ki ha poto ke tau fai ha ngaahi fili lelei, pea ʻe lava ke tau lotu ʻo kole ha mālohi ke fekuki mo e faingataʻá. (Sēmisi 1:5) ʻOku totonu ke tau kole kia Sihova ke fakamolemoleʻi ʻetau angahalá. (ʻEfesō 1:3, 7) ʻOku totonu foki ke tau lotu maʻá e niʻihi kehé, ʻo kau ai hotau fāmilí mo hotau fanga tokoua mo e fanga tuofāfine ʻi he fakatahaʻangá.​—Ngāue 12:5; Kolose 4:12.

12. Ko e hā ʻoku totonu ke mahuʻinga taha ʻi heʻetau lotú?

¹² Ko e hā ʻoku totonu ke mahuʻinga taha ʻi heʻetau lotú? Ko Sihova mo hono finangaló. ʻOku totonu ke tau fakamālō kiate ia mei hotau lotó ʻi he meʻa kotoa kuó ne fai maʻatautolú. (1 Kalonikali 29:10-13) ʻOku tau ʻiloʻi ení he ʻi he taimi naʻe ʻi māmani ai ʻa Sīsuú, naʻá ne akoʻi ʻene kau ākongá ki he founga ʻo e lotú. (Lau ʻa e Mātiu 6:9-13.) Naʻá ne pehē ʻoku totonu ke nau ʻuluaki lotu ke fakamāʻoniʻoniʻi ʻa e huafa ʻo e ʻOtuá, ʻa ia, ke ʻai ia ke toputapu pe māʻoniʻoni. Hili iá naʻe fakahaaʻi ʻe Sīsū ke tau lotu ke hoko mai ʻa e Puleʻanga ʻo e ʻOtuá pea ke fai ʻa e finangalo ʻo Sihová ʻi he māmaní kotoa. ʻI he toki ʻosi pē ʻa e lotu ʻo kole ʻa e ngaahi meʻa mahuʻinga ko iá naʻe pehē ʻe Sīsū ke tau lotu ʻo kole ʻa ʻetau fiemaʻu fakafoʻituituí. ʻI heʻetau fakamuʻomuʻa ʻa Sihova mo hono finangaló ʻi heʻetau lotú, ʻoku tau fakahaaʻi ai ʻa e meʻa ʻoku mahuʻinga taha kiate kitautolú.

13. ʻOku totonu ke lōloa fēfē ʻetau lotú?

¹³ ʻOku totonu ke lōloa fēfē ʻetau lotú? ʻOku ʻikai ke tala mai ia ʻe he Tohi Tapú. ʻE lava ke nounou pe lōloa ʻetau lotú, ʻo fakatuʻunga pē ʻi he tuʻungá. Ko e fakatātaá,  te tau leaʻaki nai ha lotu nounou ki muʻa ke tau kaí kae leaʻaki ha lotu lōloa ange ʻi heʻetau fai ʻa e fakamālō kia Sihová pe tala kiate ia ʻetau loto-hohaʻá. (1 Sāmiuela 1:12, 15) ʻOku ʻikai fiemaʻu ke tau leaʻaki ha lotu lōloa koeʻuhí pē ke maongo ki he niʻihi kehé, ʻo hangē ko ia naʻe fai ʻe he niʻihi ʻi he taimi ʻo Sīsuú. (Luke 20:46, 47) ʻOku ʻikai ke maongo kia Sihova ʻa e lotu hangē ko iá. Ko e meʻa ʻoku mahuʻinga kia Sihová ke tau lotu mei hotau lotó.

14. ʻOku totonu ke tuʻo lahi fēfē ʻetau lotú, pea ko e hā ʻoku akoʻi mai ʻe he meʻá ni fekauʻaki mo Sihová?

 ¹⁴ ʻOku totonu ke tuʻo lahi fēfē ʻetau lotú? ʻOku fakaafeʻi mai ʻe Sihova ke tau talanoa maʻu pē kiate ia. ʻOku pehē ʻe he Tohi Tapú ke tau lotu “maʻu ai pē,” “kītaki ʻi he lotu,” pea “lotu maʻu pē.” (Mātiu 26:41; Loma 12:12; 1 Tesalonaika 5:17) ʻOku mateuteu maʻu pē ʻa Sihova ke fanongo mai. ʻOku lava ke tau fakamālō kiate ia ʻi he ʻaho kotoa pē ʻi heʻene ʻofá mo ʻene nima-homó. ʻE lava foki ke tau kole kiate ia ki ha tataki, mālohi, mo e fakafiemālie. Kapau ʻoku tau fakamahuʻingaʻi moʻoni ʻa e monū ke lotu kia Sihová, te tau ngāueʻaki ʻa e faingamālie kotoa pē ke talanoa ai kiate ia.

15. Ko e hā ke tau lea “ʻēmeni” ai ʻi he ngataʻanga ʻo ha lotu?

¹⁵ Ko e hā ke tau lea “ʻēmeni” ai ʻi he ngataʻanga  ʻo ha lotu? Ko e foʻi lea “ʻēmeni” ʻoku ʻuhinga iá ko e “moʻoni” pe “ʻofa ke pehē.” Ko ha founga ia ʻo hono fakahāhā ʻoku tau ʻuhingaʻi ʻa e meʻa ʻoku tau leaʻaki ʻi heʻetau lotú, ʻa ia, ʻoku tau loto-moʻoni. (Saame 41:13) ʻOku akoʻi mai ʻe he Tohi Tapú ʻoku toe lelei ke lea “ʻēmeni,” fakalongolongo pe leʻo-lahi, ʻi he ngataʻanga ʻo ha lotu maʻá e kakaí ke fakahāhā ʻoku tau loto-tatau mo e meʻa naʻe leaʻakí.​—1 Kalonikali 16:36; 1 Kolinitō 14:16.

16. ʻOku tali moʻoni ʻe Sihova ʻetau lotú? Fakamatalaʻi.

¹⁶ ʻOku tali moʻoni ʻe Sihova ʻetau lotú? ʻIo, ʻokú ne tali. ʻOku ui ia ʻe he Tohi Tapú ko e “Tokotaha-Fanongo ki he lotú.” (Saame 65:2) ʻOku fanongo mo tali ʻe Sihova ʻa e lotu loto-moʻoni ʻa e laui miliona ʻo e faʻahinga ʻo e tangatá, pea ʻokú ne fai pehē ʻi he founga lahi kehekehe.

17. ʻOku anga-fēfē hono ngāueʻaki ʻe Sihova ʻa e kau ʻāngeló mo ʻene kau sevāniti ʻi he māmaní ke tali ʻetau lotú?

¹⁷ ʻOku ngāueʻaki ʻe Sihova ʻa e kau ʻāngeló mo ʻene kau sevāniti ʻi he māmaní ke ʻomi ai ʻa e tali ki heʻetau lotú. (Hepelū 1:13, 14) ʻOku lahi ʻa e fakatātā fekauʻaki mo e kakai naʻa nau lotu ki ha tokoni ke mahinoʻi ʻa e Tohi Tapú pea taimi nounou pē mei ai naʻe ʻaʻahi atu ha taha ʻo e Kau Fakamoʻoni ʻa Sihová. ʻOku fakahaaʻi ʻe he Tohi Tapú ʻoku kau ʻa e kau ʻāngeló ʻi hono talaki ʻa e “ongoongo lelei” ʻi he kotoa ʻo e māmaní. (Lau ʻa e Fakahā 14:6.) Kuo lotu foki ʻa e tokolahi ʻo kitautolu kia Sihova fekauʻaki mo ha palopalema pe fiemaʻu pau pea hili iá naʻa tau maʻu ʻa e tokoni naʻe fiemaʻú mei ha tokoua pe tuofefine Kalisitiane.​—Palōveepi 12:25; Sēmisi 2:16.

18. ʻOku anga-fēfē hono ngāueʻaki ʻe Sihova ʻa hono laumālie māʻoniʻoní mo e Tohi Tapú ke tali ʻaki ha lotu?

 ¹⁸ ʻOku ngāueʻaki ʻe Sihova hono laumālie māʻoniʻoní ke tali ʻetau lotú. ʻI heʻetau lotu ki ha tokoni ke fekuki mo ha palopalema, te ne ngāueʻaki nai ʻa hono laumālie māʻoniʻoní ke ʻomai ha tataki mo e mālohi. (2 Kolinitō 4:7) ʻOku toe ngāueʻaki ʻe Sihova ʻa e Tohi Tapú ke tali ʻetau lotú pea tokoniʻi kitautolu ke fai ha fili fakapotopoto. ʻI heʻetau lau ʻa e Tohi Tapú, te tau maʻu nai ai ha potu folofola ʻe tokoni kiate kitautolu. ʻE lava foki ke ueʻi ʻe Sihova ha taha ʻokú ne tali ʻi ha fakataha ke ne leaʻaki ʻa e meʻa ʻoku fiemaʻu ke tau fanongo ki aí pe ko ha mātuʻa ʻi he fakatahaʻangá ke ne vahevahe mai ha poini mei he Tohi Tapú.​—Kalētia 6:1.

19. Ko e hā ʻoku hā ngali ʻikai tali ai ʻe Sihova ʻetau lotú?

¹⁹ Kae kehe, ʻi he taimi ʻe niʻihi, te tau fifili nai, ‘Ko e hā kuo teʻeki ke tali mai ai ʻe Sihova ʻeku lotú?’ Manatuʻi, ʻokú ne ʻiloʻi ʻa e taimi mo e founga ke tali ai ʻetau lotú. ʻOkú ne ʻiloʻi ʻa e meʻa ʻoku tau fiemaʻú. Kuo pau nai ke tau hanganaki lotu ʻi ha taimi ke fakahaaʻi ai ʻoku tau ʻuhingaʻi moʻoni ʻa e meʻa ʻoku tau leaʻaki kiate iá pea fakahaaʻi ai ʻoku tau tui moʻoni kiate ia. (Luke 11:5-10) ʻI he taimi ʻe niʻihi ʻoku tali ʻe Sihova ʻetau lotú ʻi ha founga heʻikai nai te tau ʻamanekina. Ko e fakatātaá, te tau lotu nai fekauʻaki mo ha tuʻunga faingataʻa, ka ʻi he ʻikai toʻo ʻa e palopalemá, te ne ʻomai nai ʻa e mālohi ke tau kātekina ia.​—Lau ʻa e Filipai 4:13.

20. Ko e hā ʻoku totonu ai ke tau toutou lotu kia Sihová?

²⁰ He monū fakaofo ē ʻoku tau maʻu ke lotu kia Sihová! ʻOku lava ke tau fakapapauʻi te ne fanongo mai. (Saame 145:18) Pea ko e lahi ange ʻetau lotu kia Sihova mei hotau lotó, ko e mālohi ange ia ʻetau kaumeʻa mo iá.