1, 2. Ko e hā ʻa e fehuʻi kuo pau ke ke ʻeke hifo kiate koé, pea ko e hā ʻoku mātuʻaki mahuʻinga ai ení?

 ʻI HOʻO ako ʻa e Tohi Tapú, kuó ke ʻilo ai ko e kakai tokolahi ʻoku nau taukaveʻi ʻoku nau lotu ki he ʻOtuá ʻoku nau akoʻi pe tōʻongaʻaki ʻa e meʻa ʻoku fehiʻa ai ʻa e ʻOtuá. (2 Kolinitō 6:17) Ko e ʻuhinga ia ʻoku fekauʻi mai ai ʻe Sihova ke tau mavahe mei he lotu loí, ʻa “Pāpilone ko e Lahi.” (Fakahā 18:2, 4) Ko e hā te ke faí? ʻOku ʻi ai ʻa e fili ke tau taki taha fai, pea kuo pau ke tau ʻeke hifo, ‘ʻOku ou loto ke lotu ki he ʻOtuá ʻi he founga ʻokú ne finangalo ki aí, pe ʻoku ou loto ke lotu maʻu pē kiate ia ʻi heʻeku foungá?’

² Kapau kuó ke ʻosi mavahe pe fakafisi mei ha lotu loi, ʻoku lelei ia. Ka ʻoku kei ʻi ho lotó nai ha tōʻonga mo e founga ʻa e lotu loí ʻokú ke kei saiʻia ai. Tau lāulea angé ki he niʻihi ʻo e ngaahi tōʻonga mo e founga ko iá pea sio ki he ʻuhinga ʻoku mātuʻaki mahuʻinga ai ke tau vakai ki ai ʻo hangē ko e vakai ki ai ʻa Sihová.

3. (a) Ko e hā nai ʻe faingataʻa ai ki he niʻihi ke tuku hono ngāueʻaki ʻa e ʻīmisí ʻi heʻenau lotú? (e) Ko e hā ʻa e lau ʻa e Tohi Tapú fekauʻaki mo hono ngāueʻaki ʻa e ʻīmisí ʻi he lotu ki he ʻOtuá?

³ Kuo ngāueʻaki ʻe he niʻihi ʻa e ʻīmisi pe ngaahi feituʻu toputapu ʻi honau ʻapí ke lotu ai ki he ʻOtuá ʻi he ngaahi taʻu lahi. Kapau ko e meʻa ia ʻokú ke  faí, te ke ongoʻi faikehe nai mo ongoʻi hala ke lotu ki he ʻOtuá ʻo taʻekau ai ʻa e ngaahi meʻa ko iá. Kae manatuʻi, ʻoku akoʻi mai ʻe Sihova ʻa e founga ke lotu ai kiate iá. Pea ʻoku tala mahino mai ʻe he Tohi Tapú ʻoku ʻikai fiemaʻu ʻe Sihova ke tau ngāueʻaki ʻa e ʻīmisí ʻi heʻetau lotú.​—Lau ʻa e ʻEkisoto 20:4, 5; Saame 115:4-8; ʻAisea 42:8; 1 Sione 5:21.

4. (a) Ko e hā ʻoku ʻikai totonu ai ke tau lotu ki heʻetau fanga kuí? (e) Ko e hā naʻe tala ai ʻe Sihova ki hono kakaí ke ʻoua te nau feinga ke talanoa mo e kau maté?

⁴ ʻOku fakamoleki nai ʻe he niʻihi ʻa e taimi mo e ivi lahi ʻi he feinga ke fakafiemālieʻi ʻenau fanga kui kuo maté. ʻOku aʻu nai ʻo nau lotu ki ai. Ka kuo tau ako ko e faʻahinga kuo nau maté heʻikai lava ke nau tokoniʻi pe fakamamahiʻi kitautolu. ʻOku ʻikai te nau moʻui ʻi ha toe feituʻu. Ko e moʻoni, ʻoku fakatuʻutāmaki ʻa e feinga ke fetuʻutaki mo kinautolú koeʻuhí ko ha pōpoaki pē ʻoku hā ko e haʻu mei ha kāinga kuo mate ko hono moʻoní ko e haʻu ia mei he fanga tēmenioó. Ko e ʻuhinga ia naʻe fekauʻi ai ʻe Sihova ʻa e kau ʻIsilelí ke ʻoua te nau feinga ke talanoa mo e kau maté pe kau ʻi ha founga kehe pē ʻo e tōʻonga fakatēmenioó.​—Teutalōnome 18:10-12; sio ki he Fakamatala ʻi he Ngataʻanga 26 mo e 31.

5. Ko e hā ʻe lava ke ne tokoniʻi koe ke tuku hoʻo ngāueʻaki ʻa e ʻīmisí ʻi he lotu ki he ʻOtuá pea tuku ʻa e lotu ki hoʻo fanga kuí?

⁵ Ko e hā ʻe lava ke ne tokoniʻi koe ke tuku hoʻo ngāueʻaki ʻa e ʻīmisí ʻi he lotu ki he ʻOtuá pe tuku ʻa e lotu ki hoʻo fanga kuí? ʻOku fiemaʻu ke ke lau ʻa e Tohi Tapú pea fakakaukau fakalelei fekauʻaki mo e anga ʻo e vakai ʻa Sihova ki he ngaahi meʻa ko iá.  ʻOkú ne vakai ki ai ko ha ngaahi “meʻa fakalielia,” pe palakū. (Teutalōnome 27:15) Lotu kia Sihova ʻi he ʻaho kotoa pē ki ha tokoni ke ke vakai ki he ngaahi meʻá ʻo hangē ko ʻene vakaí pea ki ha tokoni ke lotu kiate ia ʻi he founga ʻokú ne fiemaʻú. (ʻAisea 55:9) ʻE lava ke ke fakapapauʻi ʻe ʻoatu ʻe Sihova ʻa e mālohi ʻoku fiemaʻú ke toʻo ai mei hoʻo moʻuí ha meʻa pē ʻoku felāveʻi mo e lotu loí.

6. Ko e hā naʻe fili ai ʻa e ʻaho 25 ʻo Tīsemá ke kātoangaʻi ai ʻa e ʻaloʻi ʻo Sīsuú?

⁶ ʻI he māmaní takatakai, ko e Kilisimasí ʻa e taha ʻo e ngaahi ʻaho mālōlō manakoa tahá, pea ko e tokolahi taha ʻo e kakaí ʻoku nau fakakaukau ko hano kātoangaʻi ia ʻo e ʻaloʻi ʻo Sīsuú. Ka ko e Kilisimasí ʻoku fehokotaki moʻoni ia mo e lotu loí. ʻOku fakamatala ʻi he ʻenisaikolopētia ʻe taha naʻe kātoangaʻi ʻe he kau pangani Lomá ʻa e ʻaho fāʻeleʻi ʻo e laʻaá ʻi he ʻaho 25 ʻo Tīsemá. Naʻe fiemaʻu ʻe he kau taki lotú ke hoko ʻa e kau pangani tokolahi ange ko e kau Kalisitiane, ko ia neongo naʻe ʻikai ke ʻaloʻi ʻa Sīsū he ʻaho 25 ʻo Tīsemá, naʻa nau fili ke kātoangaʻi ʻa e ʻaloʻi ʻo Sīsuú ʻi he ʻaho ko iá. (Luke 2:8-12) Naʻe ʻikai ke kātoangaʻi ʻe he kau ākonga ʻa Sīsuú ʻa e Kilisimasí. ʻOku fakamatala ʻi he tohi maʻuʻanga fakamatala ʻe taha ʻo pehē ʻi he taʻu ʻe 200 hili ʻa e ʻaloʻi ʻo Sīsuú, “naʻe ʻikai ha taha te ne ʻiloʻi, pea ko e kakai tokosiʻi pē naʻa nau tokanga, ki he taimi tonu naʻe ʻaloʻi ai iá.” (Sacred Origins of Profound Things) Naʻe  toki kamata ʻa e kātoanga Kilisimasí ʻi he taʻu ʻe lauingeau hili ʻa e moʻui ʻa Sīsū ʻi he māmaní.

7. Ko e hā ʻoku ʻikai ke kātoangaʻi ai ʻe he kau Kalisitiane moʻoní ʻa e Kilisimasí?

⁷ ʻOku ʻilo ʻa e kakai tokolahi fekauʻaki mo e tupuʻanga fakapangani ʻo e Kilisimasí mo hono talatukufakaholó, hangē ko hono fai ʻo e ngaahi pātí mo e foaki meʻaʻofá. Ko e fakatātaá, ʻi ʻIngilani mo e ngaahi feituʻu ʻi ʻAmelika, naʻe tapui ai ʻi ha taimi ʻa hono kātoangaʻi ʻo e Kilisimasí koeʻuhi ko hono tupuʻanga fakapanganí. Naʻe tautea ha taha pē naʻá ne kātoangaʻi ia. Ka naʻe faai mai pē ʻo kamata ke toe kātoangaʻi ʻe he kakaí ʻa e Kilisimasí. Ko e hā ʻoku ʻikai ke kātoangaʻi ai ʻa e Kilisimasí ʻe he kau Kalisitiane moʻoní? Koeʻuhí ʻoku nau loto ke fakahōifuaʻi ʻa e ʻOtuá ʻi he meʻa kotoa pē ʻoku nau faí.

8, 9. Ko e hā naʻe ʻikai ke kātoangaʻi ai ʻa e faiʻahó ʻe he muʻaki kau Kalisitiané?

⁸ Ko ha toe kātoanga manakoa ʻe taha ki he kakai tokolahi ko e faiʻahó. ʻOku totonu ke kātoangaʻi ʻe he kau Kalisitiané ʻa e faiʻahó? Ko e kātoanga faiʻaho pē ʻoku lave ki ai ʻi he Tohi Tapú naʻe fai ia ʻe he faʻahinga naʻe ʻikai te nau lotu kia Sihova. (Sēnesi 40:20; Maʻake 6:21) Naʻe ngāueʻaki ʻa e kātoanga faiʻahó ke fakalāngilangiʻi ai ʻa e ngaahi ʻotua loí. Ko e ʻuhinga ia naʻe vakai ai ʻa e muʻaki kau Kalisitiané “ki he kātoanga faiʻaho ʻo ha taha pē ko ha tōʻonga fakapangani.”​—The World Book Encyclopedia.

 ⁹ Ko e kau Loma mo e kau Kalisi ʻi he kuonga muʻá naʻa nau tui naʻe ʻi ai ha laumālie ʻi he fāʻeleʻi ʻo e tokotaha taki taha pea ko e laumālie ko ení te ne maluʻi ʻa e tokotaha ko iá lolotonga ʻene moʻuí. “Ko e laumālie ko iá naʻe ʻi ai ʻene fekauʻaki fakafaimana mo e ʻotua ʻa ia ko hono ʻaho fāʻeleʻí ē naʻe fāʻeleʻi ai ʻa e tokotaha ko iá,” ko e fakamatala ia ʻa e tohi The Lore of Birthdays.

10. Ko e hā ʻoku ʻikai totonu ai ke kātoangaʻi ʻe he kau Kalisitiane he ʻaho ní ʻa e faiʻahó?

¹⁰ ʻOkú ke fakakaukau ʻe tali ʻe Sihova ʻa e ngaahi kātoanga ʻoku fehokotaki mo e lotu loí? (ʻAisea 65:11, 12) ʻIkai, ʻoku ʻikai te ne tali. Ko e ʻuhinga ia ʻoku ʻikai ai te tau kātoangaʻi ʻa e faiʻahó pe ko ha ʻaho mālōlō pē ʻoku fehokotaki mo e lotu loí.

11. Ko e hā ʻoku kātoangaʻi ai ʻe he kakai ʻe niʻihi ʻa e ngaahi ʻaho mālōloó? Ko e hā ʻoku totonu ke mahuʻinga taha kiate koé?

¹¹ ʻOku ʻiloʻi ʻe he kakai ʻe niʻihi ʻa e tupuʻanga ʻo e Kilisimasí mo e ngaahi ʻaho mālōlō kehé, ka ʻoku hokohoko atu pē ʻenau kātoangaʻí. ʻOku nau fakakaukau ko e ngaahi ʻaho mālōloó ko ha faingamālie lelei pē ia ke feohi ai mo honau fāmilí. ʻOku pehē ʻa e anga hoʻo fakakaukaú? ʻOku ʻikai hala ʻa e fiemaʻu ke feohi mo ho fāmilí. Naʻe fakatupu ʻe Sihova ʻa e fāmilí, pea ʻokú ne loto ke tau maʻu ha vahaʻangatae lelei mo kinautolu. (ʻEfesō 3:14, 15) Kae kehe, ʻoku fiemaʻu ke tau tokangataha ki hono maʻu ha vahaʻangatae lelei mo Sihova kae ʻikai ki hono fakahōhōʻiaʻi hotau ngaahi kāingá ʻaki hono  kātoangaʻi ha ʻaho mālōlō fakalotu loi. Ko e ʻuhinga ia naʻe pehē ai ʻe he ʻapositolo ko Paulá: “Hanganaki fakapapauʻi ʻa e meʻa ʻoku fakahōifua ki he ʻEikí.”​—ʻEfesō 5:10.

12. Ko e hā te ne ʻai ha ʻaho mālōlō ke ʻikai tali ʻe Sihová?

¹² ʻOku fakakaukau ʻa e kakai tokolahi ʻoku ʻikai mahuʻinga pe ko e tupu mei fē ha ʻaho mālōlō, ka ʻoku ʻikai ke fakakaukau pehē ʻa Sihova. ʻOku ʻikai te ne tali ha ʻaho mālōlō ko e tupu mei he lotu loí pe hakeakiʻi ai ʻa e tangatá pe ko e fakaʻilonga fakafonuá. Ko e fakatātaá, naʻe lahi ʻa e ngaahi kātoanga ʻa e kau ʻIsipité ki honau ngaahi ʻotua loí. ʻI he hili ʻa e mavahe ʻa e kau ʻIsilelí mei ʻIsipité, naʻa nau faʻifaʻitaki ki he taha ʻo ʻenau ngaahi kātoanga fakapanganí pea ui ia ko ha “kātoanga kia Sihova.” Ka naʻe tauteaʻi kinautolu ʻe Sihova ʻi hono fai iá. (ʻEkisoto 32:2-10) Hangē ko ia naʻe leaʻaki ʻe he palōfita ko ʻAiseá, ʻoku totonu ke ʻoua te tau “ala ki ha meʻa taʻemaʻa!”​—Lau ʻa e ʻAisea 52:11.

13. Ko e hā nai haʻo ngaahi fehuʻi ʻi hoʻo fili ke tuku hono kātoangaʻi ha ʻaho mālōloó?

¹³ ʻI hoʻo fili ke tuku hono kātoangaʻi ha ʻaho mālōloó, ʻe lahi nai ai hoʻo ngaahi fehuʻí. Ko e fakatātaá: Ko e hā te u fai kapau ʻe ʻeke mai ʻe hoku kaungāngāué ʻa e ʻuhinga ʻoku ʻikai te u kātoangaʻi ai mo kinautolu ʻa e Kilisimasí? Ko e hā te u fai kapau ʻe ʻomai ʻe ha taha haʻaku meʻaʻofa Kilisimasi? Ko e hā te u fai kapau ʻoku ʻamanekina ʻe hoku hoá ke u  kātoangaʻi ha ʻaho mālōlō? ʻE lava fēfē ke u tokoniʻi ʻeku fānaú ke ʻoua te nau ongoʻi mamahi ʻi he ʻikai ke kātoangaʻi ha ʻaho mālōlō pe ko honau ʻaho fāʻeleʻí?

14, 15. Ko e hā te ke fai kapau ʻe talamonū atu ha taha ke ke maʻu ha ʻaho mālōlō fiefia pe ʻoatu haʻo meʻaʻofa?

¹⁴ ʻOku mahuʻinga ke ngāueʻaki ʻa e fakakaukau leleí ʻi hoʻo fili ʻa e meʻa ke leaʻaki mo fai ʻi he tuʻunga taki taha. Ko e fakatātaá, kapau ʻe talamonū atu ha kakai ke ke maʻu ha ʻaho mālōlō fiefia, ʻoku ʻikai fiemaʻu ke ke tukunoaʻi kinautolu. ʻE lava pē ke ke pehē, “Mālō.” Ka ʻi he saiʻia ha taha ke ʻilo lahi angé, te ke fili nai ai ke fakamatalaʻi ʻa e ʻuhinga ʻoku ʻikai ai te ke kātoangaʻi ha ʻaho mālōloó. Kae kehe, anga-lelei maʻu pē, fakapotopoto, mo anga-fakaʻapaʻapa. ʻOku pehē ʻe he Tohi Tapú: “Tuku ke hoko maʻu pē hoʻomou leá ʻo anga-ʻofa, ʻo fakaifoifo ʻaki ha māsima, koeʻuhi ke mou ʻilo ai ʻa e founga ʻoku totonu ke mou taliʻaki ki he tokotaha taki taha.” (Kolose 4:6) ʻE lava nai ke ke fakamatalaʻi ʻokú ke fiefia ʻi he feohi mo e niʻihi kehé mo e foaki meʻaʻofá ka ʻokú ke fili pē ke ʻoua ʻe fai ia ʻo fehokotaki mo e ʻaho mālōlō ko ení.

¹⁵ Ko e hā ʻoku totonu ke ke faí kapau ʻe ʻoatu ʻe ha taha haʻo meʻaʻofa? ʻOku ʻikai ke ʻomai ʻe he Tohi Tapú ia ha lisi ʻo ha ngaahi tuʻutuʻuni, ka ʻoku pehē ai ʻoku totonu ke tau maʻu ha konisēnisi lelei. (1 Tīmote 1:18, 19) ʻOku ʻikai nai ke ʻiloʻi ʻe he tokotaha ʻokú ne ʻoatu ʻa e meʻaʻofá ʻoku ʻikai ke ke kātoangaʻi ʻa e ʻaho mālōloó. Pe te ne pehē nai, “ʻOku  ou ʻiloʻi ʻoku ʻikai te ke kātoangaʻi ʻa e ʻaho mālōloó, ka ʻoku ou loto pē ke ʻoatu eni maʻau.” Ko e hā pē ʻa e tuʻungá, ʻe lava ke ke fili pe te ke tali ʻa e meʻaʻofá pe ʻikai. Kae ʻilonga ha fili te ke fai, fakapapauʻi ke kei maʻu ha konisēnisi lelei. Heʻikai te tau loto ke fai ha meʻa te ne uesia hotau vahaʻangatae mo Sihová.

16. Ko e hā te ke faí kapau ʻoku loto ho fāmilí ke kātoangaʻi ha ʻaho mālōlō?

¹⁶ Ko e hā te ke faí kapau ʻoku loto ho fāmilí ke kātoangaʻi ha ʻaho mālōlō? ʻOku ʻikai fiemaʻu ia ke ke kē mo kinautolu. Manatuʻi, ʻoku ʻi ai ʻenau totonu ke fili ʻa e meʻa ʻoku nau loto ke faí. Anga-lelei pea fakaʻapaʻapaʻi ʻenau filí ʻo hangē pē ko hoʻo loto ke nau fakaʻapaʻapaʻi hoʻo filí. (Lau ʻa e Mātiu 7:12.) Ka ʻo kapau ʻe loto ho fāmilí ke ke feohi mo kinautolu ʻi he ʻaho mālōloó, ko e hā te ke faí? Ki muʻa ke ke fili ʻa e meʻa ke faí, lotu kia Sihova ki ha tokoni ke ke fai ʻa e fili totonú. Fakakaukau ki he tuʻungá, pea fai ha fekumi fekauʻaki mo ia. Manatuʻi, ʻokú ke loto maʻu pē ke fakahōifuaʻi ʻa Sihova.

17. Ko e hā te ke fai ke tokoniʻi hoʻo fānaú ke ʻoua te nau ongoʻi ʻoku nau tō mei ha meʻa ʻi hono kātoangaʻi ʻe he niʻihi kehé ha ʻaho mālōlō?

¹⁷ Ko e hā te ke fai ke tokoniʻi hoʻo fānaú ʻi heʻenau sio ki hono kātoangaʻi ʻe he niʻihi kehé ha ʻaho mālōlō? Sai, ʻi he taimi ki he taimi, ʻe lava ke ke fokotuʻutuʻu ai ha meʻa makehe maʻanautolu. ʻE lava foki ke ke fakaʻohovaleʻi kinautolu ʻaki hono ʻoange haʻanau meʻaʻofa. Pea ko e taha ʻo e meʻaʻofa lelei taha ʻe  lava ke ke foaki ki hoʻo fānaú ko ho taimí mo hoʻo ʻofá.

18. Ko e hā ʻoku totonu ai ke tau maʻu ʻa e ngaahi fakataha faka-Kalisitiané?

¹⁸ Ke fakahōifuaʻi ʻa Sihová, ʻoku fiemaʻu ke tau liʻaki ʻa e lotu loí mo e ngaahi tōʻonga mo e ngaahi ʻaho mālōlō ʻoku felāveʻi mo iá. Ka ʻoku toe fiemaʻu ke tau tōʻongaʻaki ʻa e lotu moʻoní. Anga-fēfē? Ko e founga ʻe taha ko hono maʻu maʻu pē ʻa e ngaahi fakataha faka-Kalisitiané. (Lau ʻa e Hepelū 10:24, 25.) Ko e ngaahi fakatahá ko ha tafaʻaki mātuʻaki mahuʻinga ia ʻo e lotu moʻoní. (Saame 22:22; 122:1) ʻE lava ke tau fefakalototoʻaʻaki ʻi he taimi ʻoku tau fakataha aí.​—Loma 1:12.

19. Ko e hā ʻoku mahuʻinga ai ke talanoa ki he niʻihi kehé fekauʻaki mo e ngaahi moʻoni ʻi he Tohi Tapú kuó ke akó?

¹⁹ Ko e tafaʻaki ʻe taha ʻo hono fili ʻa e lotu moʻoní ko e lea ki he niʻihi kehé fekauʻaki mo e meʻa kuó ke ako mei he Tohi Tapú. ʻOku ongoʻi mamahi ʻa e tokolahi ʻi he ngaahi meʻa fulikivanu ʻoku hoko ʻi he māmaní. Mahalo pē ʻokú ke ʻiloʻi ha niʻihi ʻoku nau ongoʻi pehē. Talanoa ki ai fekauʻaki mo hoʻo ʻamanaki fisifisimuʻa ki he kahaʻú. ʻI hoʻo maʻu ʻa e fakataha faka-Kalisitiané pea talanoa ki he niʻihi kehé fekauʻaki mo e moʻoni ʻi he Tohi Tapú, te ke ʻilo ai ʻoku ʻikai te ke kei ongoʻi ʻa e holi ke hoko ko ha konga ʻo e lotu loí mo ʻene ngaahi tōʻongá. ʻE lava ke ke fakapapauʻi te ke fiefia pea ʻe tāpuakiʻi lahi ʻe Sihova hoʻo feingá ʻi hoʻo fili ke lotu kiate ia ʻi he founga totonú.​—Malakai 3:10.