KUO fai atu nai ʻe ha taha ha meʻa ʻoku hala kia koe?— Naʻá ne fakalotomamahiʻi koe pe leaʻaki ha meʻa taʻeʻofa kia koe?— ʻOku totonu ke ke fai kiate ia ʻi he founga taʻeʻofa tatau naʻá ne fai kia koé?—

Kapau ʻe fakalotomamahiʻi ʻe ha taha ʻa e kakaí, ko e tokolahi ʻo kinautolu te nau fakalotomamahiʻi ʻa e tokotaha ko iá ke fetongi ʻa e meʻa naʻá ne faí. Ka naʻe akoʻi ʻe Sīsū ʻoku totonu ke ta fakamolemoleʻi ʻa e faʻahinga ʻoku faihala mai kia kitauá. (Mātiu 6:12) Fēfē kapau ʻoku tuʻo lahi ʻa e faitaʻeʻofa mai ʻa ha taha kia kitaua? Ko e hā hono lahi ʻoku totonu ke ta fakamolemoleʻi ai iá?—

Ko e meʻa ia naʻe fiemaʻu ʻe Pita ke ne ʻiloʻí. Ko ia, ʻi he ʻaho ʻe taha naʻá ne ʻeke kia Sīsū: ‘ʻOku totonu ke u fakamolemoleʻi ia ʻo tuʻo fitu?’ ʻOku ʻikai ke feʻunga ʻa e tuʻo fitú. Naʻe pehē ʻe Sīsū: ‘Ke ke fakamolemoleʻi ʻo tuʻo fitufitu’ kapau ʻoku faiangahala ʻa e tokotahá kia koe ʻi he tuʻo lahi ko iá.

Ko ha taimi lahi ia! ʻE ʻikai nai te ta manatuʻi ʻa e lahi ʻo e ngaahi hala pe ngaahi meʻa kovi naʻe fai mai ʻe ha taha kia kitaua, ʻikai ko ia? Pea ko e meʻa eni naʻe tala mai ʻe Sīsū kia kitauá: ʻOku ʻikai totonu ke ta feinga ke fakamanatu ʻa e lahi ʻo e ngaahi hala ʻoku fai mai nai kia kitaua ʻe he niʻihi kehé. Kapau ʻoku nau kole ki ha fakamolemole, ʻoku totonu ke ta fakamolemoleʻi kinautolu.

 Naʻe fiemaʻu ʻe Sīsū ke fakahā ki heʻene kau ākongá ʻa e mātuʻaki mahuʻinga ko ia ke fakamolemolé. Ko ia, ʻi he hili ʻene tali ʻa e fehuʻi ʻa Pitá, naʻá ne fai ki heʻene kau ākongá ha talanoa. Te ke fie fanongo ki ai?—

Tokua naʻe ʻi ai ha tuʻi lelei. Naʻá ne fuʻu anga-lelei ʻaupito. Naʻe aʻu ʻo ne ʻoange ha paʻanga ki heʻene kau tamaioʻeikí ʻi heʻenau fiemaʻu ha tokoní. Ka naʻe aʻu ki he ʻaho ʻa ia naʻe fiemaʻu ai ʻe he tuʻí ʻa ʻene kau tamaioʻeiki naʻe moʻua paʻanga kiate iá ke totongi fakafoki ange ia. Sai,  naʻe ʻomi ha tamaioʻeiki ʻe taha ʻa ia naʻá ne moʻuaʻaki ki he tuʻí ʻa e ngaahi foʻi paʻanga ʻe 60 miliona. Ko ha fuʻu paʻanga lahi ia!

Ka naʻe ʻosi ngāueʻaki kotoa ʻe he tamaioʻeikí ʻa e paʻanga ʻa e tuʻí pea naʻe ʻikai lava ke ne totongi fakafoki ia ki he tuʻí. Ko ia, naʻe fai leva ʻe he tuʻí ha tuʻutuʻuni ke fakatau atu ia. Naʻe toe pehē ʻe he tuʻí ke fakatau atu mo e uaifi ʻo e tamaioʻeikí mo ʻene fānaú pea mo e meʻa kotoa pē naʻá ne maʻú. Pea ko e paʻanga leva ʻe maʻu mei aí, ke totongi ia ki he tuʻí. ʻOkú ke pehē naʻe fēfē ʻa e ongoʻi ʻa e tamaioʻeikí ʻi he meʻá ni?—

Naʻá ne tūʻulutui hifo ʻi he ʻao ʻo e tuʻí ʻo ne kole: ‘Fakamolemole, ke ke toe tuku mai ha taimi, pea te u totongi fakafoki ʻa e meʻa kotoa pē ʻoku ou moʻuaʻakí.’ Kapau naʻa ko koe ʻa e tuʻí, ko e hā naʻá ke mei fai ki he tamaioʻeikí?⁠— Naʻe fakaʻofaʻia ʻa e tuʻí ʻi heʻene tamaioʻeikí. Ko ia, naʻe fakamolemoleʻi ia ʻe he tuʻí. Naʻá ne tala ki he tamaioʻeikí ʻoku ʻikai fiemaʻu ke ne totongi ha konga ʻo e paʻangá, ʻo ʻikai naʻa mo ha taha ʻo e ngaahi foʻi paʻanga ʻe 60 milioná. He fiefia moʻoni kuo pau naʻe ʻi ai ʻa e tamaioʻeikí!

Ka ko e hā leva ʻa e meʻa naʻe fai ʻe he tamaioʻeiki ko iá? Naʻá ne ʻalu ʻo ne ʻilo ha tamaioʻeiki ʻe taha, ko e tokotaha naʻá ne moʻuaʻaki kiate ia ʻa e foʻi paʻanga pē ʻe teau. Naʻá ne puke ʻa e kaungā tamaioʻeiki ko ení ʻi he kiá ʻo ne kamata fakasisina ia, ʻo ne pehē: ‘Totongi fakafoki mai ʻa e foʻi paʻanga ʻe teau ʻokú ke moʻua mai ʻakí!’ ʻE lava ke ke fakakaukauloto atu ki ha taha ʻokú ne fai ha meʻa pehē, tautefito ʻi he hili hono fakamolemoleʻi lahi ia ʻe he tuʻí?—

Sai, ko e tamaioʻeiki naʻá ne moʻuaʻaki ʻa e foʻi paʻanga pē ʻe teaú naʻe masiva. Naʻe ʻikai malava ke ne totongi fakafoki ʻa e paʻangá ʻi he taimi pē ko iá. Ko ia, naʻá ne tō ki lalo ʻi he vaʻe ʻo hono kaungā tamaioʻeikí ʻo ne kole: ‘Fakamolemole, ke ke toe tuku mai ha taimi, pea te u totongi fakafoki ʻa e meʻa ʻoku ou moʻuaʻakí.’ Naʻe totonu nai ke tuku ʻe he tangatá ki hono kaungā tamaioʻeikí ha taimi lahi ange?— Ko e hā naʻá ke mei faí?—

Ko e tangata ko ení naʻe ʻikai ke anga-lelei, ʻo hangē ko e tuʻí. Naʻá ne fiemaʻu ʻene paʻangá ʻi he taimi pē ko iá. Pea koeʻuhí naʻe ʻikai lava ke totongi ia ʻe hono kaungā tamaioʻeikí, naʻá ne ʻai ia ke lī ki he pilīsoné. Naʻe mamata ʻa e kau tamaioʻeiki kehé ki he meʻa kotoa ko eni naʻe hokó, pea  naʻe ʻikai te nau saiʻia ai. Naʻa nau ongoʻi fakaʻofaʻia ʻi he tamaioʻeiki naʻe ʻi he pilīsoné. Ko ia, naʻa nau ʻalu leva ʻo tala ia ki he tuʻí.

Naʻe ʻikai foki ke saiʻia ʻa e tuʻí ʻi he meʻa naʻe hokó. Naʻá ne hoko ʻo ʻita lahi ʻaupito ki he tamaioʻeiki taʻefakamolemolé. Ko ia, naʻá ne ui mai ia ʻo ne pehē: ‘ʻA e tamaioʻeiki kovi, ʻikai naʻá ku fakamolemoleʻi ʻa e meʻa naʻá ke moʻua mai ʻakí? Ko ia ʻikai naʻe totonu ke ke fakamolemoleʻi ho kaungā tamaioʻeikí?’

Naʻe totonu ke ako ʻe he tamaioʻeiki taʻefakamolemolé ha lēsoni mei he tuʻi leleí. Ka naʻe ʻikai ke pehē. Ko ia, naʻe ʻai leva ʻe he tuʻí ʻa e tamaioʻeiki ko iá ke lī ki he pilīsoné kae ʻoua kuó ne lava ʻo totongi fakafoki ʻa e ngaahi foʻi paʻanga ʻe 60 milioná. Pea ko e moʻoni, ʻi he pilīsoné ʻe ʻikai ʻaupito lava ke ne maʻu ai ʻa e paʻanga ke totongi fakafoki ki he tuʻí. Ko ia, te ne nofo pē ai kae ʻoua kuó ne mate.

ʻI he fakaʻosi ʻe Sīsū ʻa ʻene talanoá, naʻá ne pehē ki hono kau muimuí: “ʻE pehe foki mo e fai ʻa ʻeku Tamai fakalangi kiate kimoutolu, ʻo kapau ʻe ʻikai te mou fakamolemole taki taha hono tokoua, ʻo fai ʻaki homou loto.”—Mātiu 18:​21-35.

 ʻOkú ke sio ai, ko kitautolu kotoa ʻoku tau moʻua lahi ʻaupito ki he ʻOtuá. Ko hono moʻoní, ko ʻeta moʻuí tonu ʻoku haʻu mei he ʻOtuá! Ko ia, ʻi hono fakahoa mo e meʻa ʻokú ta moʻuaʻaki ki he ʻOtuá, ʻoku siʻi ʻa e meʻa ʻoku moʻua mai ʻaki ʻe he kakai kehé kia kitauá. Ko e meʻa ʻoku nau moʻua mai ʻakí ʻoku hangē ia ko e foʻi paʻanga ʻe teau naʻe moʻuaʻaki ʻe he tamaioʻeikí ki he tamaioʻeiki ʻe tahá. Ka ko e meʻa ʻokú ta moʻuaʻaki ki he ʻOtuá koeʻuhi ko e ngaahi fehālaaki ʻokú ta faí ʻoku hangē ia ko e ngaahi foʻi paʻanga ʻe 60 miliona naʻe moʻuaʻaki ʻe he tamaioʻeikí ki he tuʻí.

Ko e ʻOtuá ʻoku anga-lelei ʻaupito. Neongo kuó ta fai ʻa e ngaahi fehālaaki, ʻokú ne fakamolemoleʻi kitaua. ʻOku ʻikai te ne ʻai kitaua ke ta totongi ia ʻaki hono toʻo meiate kitaua ʻeta moʻuí ʻo taʻengata. Ka ko e lēsoni eni ʻoku fiemaʻu ke ta manatuʻí: ʻOku fakamolemoleʻi kitaua ʻe he ʻOtuá ʻo kapau pē ʻokú ta fakamolemoleʻi ʻa e kakai ʻoku faihala mai kia kitauá. Ko ha meʻa mahuʻinga ia ke ta fakakaukau ki ai, ʻikai ko ia?—

Ko ia, kapau ʻe fai atu ʻe ha taha ha meʻa taʻeʻofa kia koe ka ʻokú ne kole fakamolemole leva, ko e hā te ke faí? Te ke fakamolemoleʻi ia?— Fēfē kapau ʻoku tuʻo lahi ʻene hokó? Te ke kei fakamolemoleʻi ia?—

Kapau ko kitaua ʻokú ta kole ke fakamolemoleʻí, te ta fiemaʻu ʻa e tokotaha kehé ke ne fakamolemoleʻi kitaua, ʻikai ko ia?— Ko ia, ʻoku totonu ke ta fai ʻa e meʻa tatau kiate ia. ʻOku ʻikai ngata pē ʻi he totonu ke ta pehē ʻokú ta fakamolemoleʻi iá ka ʻoku totonu ke ta fakamolemoleʻi moʻoni ia mei hota lotó. ʻI heʻeta fai iá, ʻokú ta fakahā ai ʻokú ta fiemaʻu moʻoni ke ta hoko ko e ongo muimui ʻo e Faiako Lahí.