ʻOKÚ KE saiʻia ke ʻalu ki ha ngaahi paati?— Ko ha ngaahi taimi fakafiefia ia. ʻOkú ke fakakaukau ʻe loto ʻa e Faiako Lahí ke ta ʻalu ki he ngaahi pātí?— Sai, naʻá ne ʻalu ki ha meʻa ʻe malava ke ui ko ha paati ʻi he mali ʻa ha taha naʻe fai, pea naʻe ʻalu mo ia ha niʻihi ʻo ʻene kau ākongá. Ko Sihová ko e ‘ʻOtua fiefia,’ ko ia, ʻokú ne leleiʻia ʻi heʻeta fiefia ʻi he ngaahi paati ʻoku leleí.—1 Timote 1:11; Sione 2:​1-11.

ʻI he peesi 29 ʻo e tohí ni, ʻoku tala mai ai kia kitaua naʻe fakamavaeua ʻe Sihova ʻa e Tahi Kulokulá ke fakaʻatā ʻa e kau ʻIsilelí ke nau hū atu ai. ʻOkú ke manatuʻi ʻa hono lau ʻa e talanoa ko iá?— ʻI he hili iá, naʻe hiva mo tauʻolunga ʻa e kakaí mo fakamālō kia Sihova. Naʻe hangē ia ha pātí. Naʻe fiefia ʻaupito ʻa e kakaí, pea ʻoku lava ke ta fakapapauʻi naʻe fiefia foki mo e ʻOtuá.—Ekisoto 15:​1, 20, 21.

ʻI he meimei taʻu ʻe 40 ki mui ai, naʻe ʻalu ʻa e kau ʻIsilelí ki ha toe paati lahi ʻe taha. ʻI he taimi ko ení, ko e kakai naʻa nau fakaafeʻi kinautolú naʻe ʻikai te nau teitei lotu kia Sihova. Ko hono moʻoní, ko e kakai naʻa nau fakaafeʻi kinautolú naʻe aʻu ʻo nau punou hifo ke lotu ki he ngaahi ʻotua kehé pea fehokotaki fakasino mo e kakai naʻe ʻikai te nau mali mo iá. ʻOkú ke fakakaukau naʻe lelei ke ʻalu ki ha paati pehē?—  Sai, naʻe ʻikai ke leleiʻia ʻa Sihova ai, pea naʻá ne tautea ʻa e kau ʻIsilelí.—Nomipa 25:​1-9; 1 Kolinito 10:⁠8.

ʻOku toe fakamatala ʻa e Tohitapú ʻo fekauʻaki mo ha ongo paati faiʻaho ʻe ua. Ko e taha ai ke fakamanatu ʻa e ʻaho fāʻeleʻi ʻo e Faiako Lahí?— ʻIkai. Ko e ongo paati faiʻaho ko ení fakatouʻosi naʻe fai ia maʻá e ongo tangata naʻe ʻikai te na tauhi ʻa Sihova. Ko e taha, ko e paati faiʻaho ia ʻo Tuʻi Hēlota ʻAnitipasá. Ko ia naʻe pule ʻi he vahefonua ʻo Kālelí ʻi he taimi naʻe nofo ai ʻa Sīsū ʻi aí.

Naʻe fai ʻe Tuʻi Hēlota ʻa e ngaahi meʻa lahi naʻe kovi. Naʻá ne ʻave ʻa e uaifi ʻo hono tokouá moʻona. Ko hono hingoá ko Helotiasi. Naʻe tala ange ʻe he sevāniti ʻa e ʻOtuá ko Sione Papitaisó kia Hēlota ʻoku hala ke fai ʻa e meʻa ko iá. Naʻe ʻikai ke saiʻia ai ʻa Hēlota ia. Ko ia, naʻá ne fakahū ʻa Sione ki he pilīsoné.—Luke 3:​19, 20.

Lolotonga ʻa e nofo ʻa Sione ʻi he pilīsoné, naʻe hoko mai ai ʻa e ʻaho ke fakamanatu ʻa e ʻaho fāʻeleʻi ʻo Hēlotá. Naʻe fai ʻe Hēlota ha paati lahi. Naʻá ne fakaafeʻi ha kakai mahuʻinga tokolahi. Naʻa nau kai mo inu mo fiefia kotoa. Naʻe hū mai leva ʻa e taʻahine ʻa Helotiasí ʻo hula maʻanautolu. Naʻe mālieʻia ʻaupito ʻa e tokotaha kotoa ʻi heʻene hulá ʻo loto ai ʻa Tuʻi Hēlota ke ʻoange kiate ia ha meʻaʻofa makehe. Naʻá ne  pehē kiate ia: “Neongo pe ko e ha te ke kole, te u ʻatu; io, ʻo aʻu ki he vaeua ʻo hoku puleʻanga.”

Ko e hā te ne kolé? Ko ha paʻanga? vala fakaʻofoʻofa? ko ha palasi pē ʻoʻona? Naʻe ʻikai ke ʻilo ʻe he taʻahiné ʻa e meʻa ke leaʻakí. Ko ia, naʻá ne ʻalu ki heʻene faʻeé, kia Helotiasi, ʻo ne pehē: ‘Ko e hā ha meʻa te u kole?’

Sai, naʻe fehiʻa lahi foki ʻa Helotiasi ʻia Sione Papitaiso. Ko ia, naʻá ne tala ange ki heʻene tamá ke kole ʻa hono ʻulú. Naʻe foki atu ʻa e taʻahiné ki he tuʻí ʻo ne pehē: ‘Ko hoku lotó ke ke ʻomi he taimí ni kiate au ʻi ha peleti ʻa e ʻulu ʻo Sione Papitaisó.’

Naʻe ʻikai ke loto ʻa Tuʻi Hēlota ke tāmateʻi ʻa Sione koeʻuhí he naʻá ne ʻilo ko Sioné ko ha tangata lelei. Ka naʻe ʻosi fai ʻe Hēlota ia ha palōmesi, pea naʻá ne ilifia ki he meʻa ʻe fakakaukau ki ai ʻa e faʻahinga naʻe ʻi he pātí kapau ʻe liliu ʻene fakakaukaú. Ko ia, naʻá ne fekau atu ha tangata ki he pilīsoné ke tuʻusi ʻa e ʻulu ʻo Sioné. Naʻe ʻikai fuoloa kuo foki mai ʻa e tangatá. Naʻá ne haʻu mo e ʻulu ʻo Sioné ʻi ha peleti, pea naʻá ne ʻave ia ki he taʻahiné. Naʻe ʻave leva ia ʻe he taʻahiné ki heʻene faʻeé.—Maake 6:​17-29.

Ko e paati faiʻaho ʻe taha ʻoku fakamatala ki ai ʻa e Tohitapú naʻe ʻikai ke sai ange ia. Naʻe fai ia ki ha tuʻi ʻo ʻIsipite. Lolotonga foki ʻa e  pātí ni, naʻe ʻai ai ʻe he tuʻí ke tuʻusi ʻa e ʻulu ʻo ha taha. ʻI he hili leva iá, naʻá ne tautau ʻa e tangatá ke kai ʻe he fanga manupuná! (Senesi 40:​19-22) ʻOkú ke fakakaukau naʻe leleiʻia ʻa e ʻOtuá ʻi he ongo paati ko iá?— Naʻá ke mei loto ke ʻi he paati ko iá?—

ʻOkú ta ʻiloʻi ko e meʻa kotoa pē ʻi he Tohitapú ʻoku ʻi ai hono ʻuhinga. ʻOku fakamatala ai ki ha ongo paati faiʻaho pē ʻe ua. Pea ʻi he ongo pātí ni fakatouʻosi, naʻe fai ai ʻa e ngaahi meʻa naʻe kovi ko e konga ʻo e fakafiefiá. Ko ia, ko e hā haʻo lau ki he meʻa ʻoku tala mai ʻe he ʻOtuá kia kitaua ʻo fekauʻaki mo e ngaahi paati faiʻahó? ʻOku fiemaʻu mai ʻe he ʻOtuá ke ta fakamanatu ʻa e ngaahi ʻaho fāʻeleʻí?—

Ko e moʻoni ʻi he ngaahi paati peheé he ʻahó ni, ʻoku ʻikai ke tuʻusi ai ʻe he kakaí ha ʻulu ʻo ha taha. Ka ko e foʻi fakakaukau ʻo hono fakamanatu ʻa e ngaahi ʻaho fāʻeleʻí naʻe kamata ia ʻe he kakai naʻe ʻikai te nau lotu ki he ʻOtua moʻoní. ʻOku pehē ʻe he The Catholic Encyclopedia ʻo fekauʻaki mo e ongo kātoanga faiʻaho ʻoku lave ki ai ʻi he Tohitapú: “Ko e kau angahalá pē . . . ʻoku nau fai ʻa e fakafiefia lahi ʻi he ʻaho naʻe fāʻeleʻi ai kinautolú.” ʻOkú ta loto ke hangē ko kinautolú?—

Fēfē ʻa e Faiako Lahí? Naʻá ne fakamanatu ʻa hono ʻaho fāʻeleʻí?— ʻIkai, ʻoku ʻikai ke leaʻaki ʻe he Tohitapú ha meʻa ʻo fekauʻaki mo ha paati faiʻaho ʻo Sīsū. Ko hono moʻoní, ko e ʻuluaki kau muimui ʻo Sīsuú naʻe ʻikai te nau fakamanatu ʻa hono ʻaho fāʻeleʻí. ʻOkú ke ʻilo ʻa e ʻuhinga naʻe fili ai ki mui ʻe he kakaí ke fakamanatu ʻa e ʻaho fāʻeleʻi ʻo Sīsuú ʻi he ʻaho 25 ʻo Tīsemá?—

Naʻe fili ʻa e ʻaho ko iá koeʻuhí, fakatatau ki he lau ʻa e The World Book Encyclopedia, “naʻe ʻosi tauhi ia ʻe he kakai ʻo Lomá ko e Kātoanga ʻo Sātuna, ʻo fakamanatu ai ʻa e ʻaho fāʻeleʻi ʻo e laʻaá.” Ko ia, naʻe fili ʻe he kakaí ke fakamanatu ʻa e ʻaho fāʻeleʻi ʻo Sīsuú ʻi ha ʻaho naʻe ʻosi hoko ko ha ʻaho mālōlō ʻo e kau panganí!

ʻOkú ke ʻilo ʻa e ʻuhinga naʻe ʻikai lava ai ke fāʻeleʻi ʻa Sīsū ʻi Tīsemá?— Koeʻuhí he ʻoku pehē ʻe he Tohitapú ʻi he taimi naʻe fāʻeleʻi ai ʻa Sīsuú, naʻe kei ʻi he ngoué pē ʻa e kau tauhi-sipí ʻi he poʻulí. (Luke 2:​8-12) Pea naʻe ʻikai ke nau mei ʻi tuʻa ai ʻi he māhina momoko mo ʻuhoʻuha ko Tīsemá.

 ʻOku ʻiloʻi ʻe he kakai tokolahi ko e Kilisimasí ʻoku ʻikai ko e ʻaho fāʻeleʻi ia ʻo Sīsuú. ʻOku aʻu ʻo nau ʻiloʻi ko e ʻaho ko iá naʻe fai ai ʻe he kau panganí ha fakafiefia naʻe ʻikai ke leleiʻia ai ʻa e ʻOtuá. Ka neongo ia, ʻoku kei fakamanatu pē ʻe he tokolahi ia ʻa e Kilisimasí. ʻOku nau tokanga lahi ange fekauʻaki mo hono fai ha pātí ʻi he fekumi ki he anga ʻo e fakakaukau moʻoni ki ai ʻa e ʻOtuá. Ka ʻokú ta loto ke ʻai ke fiefia ʻa Sihova, ʻikai ko ia?—

Ko ia, ʻi heʻeta fai ha ngaahi paati, ʻokú ta loto ke fakapapauʻi ko e ngaahi paati lelei ia ʻi he vakai mai ʻa Sihová. ʻE lava ke ta fai ia ʻi ha faʻahinga taimi pē ʻi he lolotonga ʻo e taʻú. ʻOku ʻikai fiemaʻu ke ta tali ki ha foʻi ʻaho makehe. ʻE malava ke ta kai ha meʻakai makehe mo fiefia ʻi he vaʻingá. Te ke fie fai ʻa e meʻa ko iá?— Mahalo pē ʻe lava ke ke talanoa mo hoʻo ongo mātuʻá pea fokotuʻutuʻu ha paati ʻaki ʻena tokoní. ʻE hoko ko ha meʻa lelei ia, ʻikai ko ia?— Ka ki muʻa ke ke fai ʻa e ngaahi fokotuʻutuʻu ki ha pātí, ʻoku fiemaʻu ke ke fakapapauʻi ko e meʻa ia ʻe leleiʻia ai ʻa e ʻOtuá.