PEHĒ eni naʻe ʻoatu ʻe ha taha kia koe ha meʻaʻofa makehe ʻaupito. Ko e hā hoʻo ongoʻi ki aí?— Te ke lea fakamālō pē pea fakangaloʻi ʻaupito leva ʻa e tokotaha ia naʻá ne ʻoatu ia kia koé? Pe te ke manatuʻi ia mo e meʻa naʻá ne fai maʻaú?—

Naʻe foaki mai ʻe Sihova ko e ʻOtuá kia kitaua ha meʻaʻofa makehe ʻaupito. Naʻá ne fekau hifo hono ʻAló ki he māmaní ke pekia maʻataua. ʻOkú ke ʻilo ʻa e ʻuhinga naʻe pau ai ke pekia ʻa Sīsū maʻatauá?— Ko ha meʻa mātuʻaki mahuʻinga eni ʻoku totonu ke ta mahinoʻi.

Hangē ko ia naʻá ta ako ʻi he Vahe 23, naʻe faiangahala ʻa ʻĀtama ʻi he taimi naʻá ne maumauʻi ai ʻa e lao haohaoa ʻa e ʻOtuá. Pea naʻá ta maʻu ʻa e angahalá meia ʻĀtama, ko e tamai kia kitautolu kotoa. Ko ia, ko e hā ʻokú ke fakakaukau ʻokú ta fiemaʻú?— ʻOkú ta fiemaʻu, ʻo hangē ia ha tamai foʻoú, ha tokotaha naʻá ne moʻuiʻaki ha moʻui haohaoa ʻi he māmaní. Ko hai ʻokú ke fakakaukau ʻe lava ke hoko ko e tamai ko iá kia kitauá?— Ko Sīsū.

Naʻe fekau hifo ʻe Sihova ʻa Sīsū ki he māmaní koeʻuhi ke ne hoko ʻo hangē ha tamaí kia kitaua kae ʻikai ko ʻĀtama. ʻOku pehē ʻe he Tohitapú: “Naʻe hoko ʻa e ʻuluaki tangata, ʻa Atama, ko e kakano moʻui; naʻe hoko ʻa e Atama ki mui, ko e laumalie fakamoʻui.” Ko hai ʻa e ʻuluaki ʻĀtamá?— ʻIo, ko e tokotaha naʻe fakatupu ʻe he ʻOtuá mei he kelekele ʻo e māmaní. Ko hai ʻa e ʻĀtama hono uá?— Ko Sīsū. ʻOku fakahaaʻi eni ʻe he Tohitapú ʻi heʻene pehē: “Ko e ʻuluaki Tangata [ʻĀtama] ko e tupu fakaemamani, ko ha meʻa-efu pe: ko hono ua ʻo e Tangata [Sīsū] ko e tupufakalangi.”—Fakaʻītali ʻamautolu; 1 Kolinito 15:​45, 47; Senesi 2:⁠7.

Koeʻuhi naʻe toʻo ʻe he ʻOtuá ʻa e moʻui ʻa Sīsuú mei hēvani pea ʻai ia ki loto ki he fefine ko Melé, naʻe ʻikai ai ke maʻu ʻe Sīsū ia ha angahala  meia ʻĀtama. Ko e ʻuhinga ia naʻe hoko ai ʻa Sīsū ko ha tangata haohaoá. (Luke 1:​30-35) Ko e toe ʻuhinga ia naʻe pehē ai ʻe ha ʻāngelo ki he kau tauhi-sipí ʻi he taimi naʻe fāʻeleʻi ai ʻa Sīsuú: ‘Naʻe ʻaloʻi kiate kimoutolu ʻanenai ha Fakamoʻui.’ (Luke 2:11) Ka ke hoko ko hota Fakamoʻuí, ko e hā naʻe fiemaʻu ke ʻuluaki fai ʻe he pēpē ko Sīsuú?— Naʻe fiemaʻu ke ne tupu hake ʻo hoko ko ha tangata lahi, hangē pē ko ʻĀtamá. Pea ʻe toki lava leva ai ke hoko ʻa Sīsū ‘ko e ʻĀtama hono uá.’

Ko Sīsū, ko hota Fakamoʻuí, ʻe toe hoko ko ʻeta “Tamai Taʻengata.” ʻOku ui ʻaki ia ʻa e hingoa ko iá ʻi he Tohitapú. (Aisea 9:​6, 7 [Ai 9:​5, 6, PM]) ʻIo, ko e tokotaha haohaoa ko Sīsuú ʻe lava ke hoko ko ʻeta tamaí kae ʻikai ko ʻĀtama, ʻa ia naʻá ne hoko ʻo taʻehaohaoa ʻi he taimi naʻá ne faiangahala aí. ʻI he founga ko iá, ʻe lava ai ke ta fili ʻa e ‘ʻĀtama hono uá’ ko ʻeta tamaí. Ko e moʻoni, ko Sīsū tonu ko ha ʻAlo ia ʻo Sihova ko e ʻOtuá.

ʻI he hoko ʻo ʻiloʻi ʻa Sīsuú, ʻe lava ke ta tali ia ko hota Fakamoʻuí. ʻOkú ke manatuʻi ʻa e meʻa ʻoku fiemaʻu ke fakahaofi kitaua mei aí?— ʻIo, mei he angahala mo e mate naʻá ta maʻu mai meia ʻĀtamá. Ko e moʻui haohaoa ʻi he tuʻunga ko ha tangata lahi naʻe feilaulauʻi, pe foaki, ʻe Sīsū maʻatauá ʻoku ui ia ko e huhuʻi. Naʻe ʻomai ʻe Sihova ʻa e huhuʻí koeʻuhi ke lava ai ʻo toʻo ʻeta angahalá.—Mātiu 20:28; Loma 5:8; 6:⁠23.

Ko e moʻoni, ʻoku ʻikai te ta loto ke fakangaloʻi ʻa e meʻa kuo fai ʻe he ʻOtuá mo hono ʻAló maʻatauá, ʻikai ko ia?— Naʻe fakahā ʻe Sīsū ki hono kau muimuí ha founga makehe ʻe lava ke tokoni  kia kitaua ke ta manatuʻi ai ʻa e meʻa naʻá ne faí. Ta talanoa angé ki aí.

Fakakaukauloto atu ʻokú ke ʻi he loki ʻi ʻolunga ʻo ha fale ʻi Selusalema. Ko e taimi poʻulí eni. ʻOku ʻi ha tēpile ʻa Sīsū mo ʻene kau ʻapositoló. ʻI he tēpilé, ʻoku ʻi ai ha lami tunu, ngaahi foʻi mā lafalafa, mo ha uaine kulokula. ʻOku nau fai ha kai makehe. ʻOkú ke ʻilo ʻa hono ʻuhingá?—

Ko e kai eni ke fakamanatu kia kinautolu ʻa e meʻa naʻe fai ʻe Sihova ʻi he taʻu ʻe laui teau ki muʻa ʻi he taimi naʻe nofo pōpula ai ʻa hono kakaí, ʻa e kau ʻIsilelí, ʻi ʻIsipité. ʻI he taimi ko iá, naʻe tala ʻe Sihova ki hono kakaí: ‘Tāmateʻi ha lami maʻá e fāmili taki taha, pea ʻai  hono totó ki he ngaahi pou matapā ʻo homou falé.’ Hili iá, naʻá ne pehē: ‘Hū ki loto ki homou ngaahi falé, pea kai ʻa e lamí.’

Naʻe fai ʻe he kau ʻIsilelí ʻa e meʻa ko iá. Pea ʻi he pō pē ko iá, naʻe laka atu ʻa e ʻāngelo ʻa e ʻOtuá ʻi he fonua ko ʻIsipité. ʻI he lahi taha ʻo e ngaahi falé, naʻe tāmateʻi ai ʻe he ʻāngeló ʻa e ʻuluaki tama naʻe fāʻeleʻí. Ka ʻi he taimi naʻe sio ai ʻa e ʻāngeló ki he toto ʻo e lamí ʻi he ngaahi pou matapaá, naʻá ne fakalaka atu ʻi he fale ko iá. ʻI he ngaahi fale ko iá, naʻe ʻikai ha fānau ai ʻe mate. Ko Felo, ʻa e tuʻi ʻo ʻIsipité, naʻá ne manavahē ʻi he meʻa naʻe fai ʻe he ʻāngelo ʻa Sihová. Ko ia, naʻe tala ʻe Felo ki he kau ʻIsilelí: ‘Kuo mou tauʻatāina ke mou ʻalu. Mou mavahe mei ʻIsipite!’ ʻI he meʻa ko iá, naʻa nau fakaheka ʻenau ʻū meʻá ki he fanga kāmelí mo e fanga ʻasí pea nau mavahe.

Naʻe ʻikai ke fiemaʻu ʻe Sihova ke ngalo ʻi hono kakaí ʻa e founga naʻá ne fakatauʻatāinaʻi ai kinautolú. Ko ia, naʻá ne pehē: ‘Kuo pau ke mou kai ʻo tuʻo taha ʻi he taʻu ha meʻakai ʻo hangē ko e meʻakai naʻa mou kai ʻi he pōní.’ Naʻa nau ui ʻa e kai makehe ko ení ko e Laka-Atu. ʻOkú ke ʻilo ʻa hono ʻuhingá?— Koeʻuhi ʻi he pō ko iá naʻe ‘fakalaka atu’ ʻa e ʻāngelo ʻa e ʻOtuá ʻi he ngaahi fale naʻe fakaʻilongaʻi ʻaki ʻa e totó.—Ekisoto 12:​1-13, 24-27, 31.

ʻOku fakakaukau ʻa Sīsū mo ʻene kau ʻapositoló ʻo fekauʻaki mo e meʻá ni ʻi heʻenau kai ʻa e meʻakai ʻo e Laka-Atú. Hili iá, ʻoku fai ʻe Sīsū ha meʻa mātuʻaki mahuʻinga. Kae kehe, ki muʻa ke ne fai iá, ʻokú ne fekau ke mavahe ʻa e ʻapositolo taʻefaitōnunga ko Siutasí. ʻOku toʻo hake leva ʻe Sīsū ha taha ʻo e ngaahi foʻi mā naʻe toé ʻo lotuʻi ia, pea pakipaki ʻo ne tufotufa ki heʻene kau ākongá. “Toʻo ʻo kai,” ko ʻene leá ia. ʻOkú ne tala leva kia kinautolu: ‘Ko e maá ni ʻokú ne fakafofongaʻi hoku sinó ʻa ia te u foaki ʻi heʻeku pekia maʻamoutolú.’

Hokó, ʻoku toʻo hake ʻe Sīsū ha ipu uaine kulokula. ʻI he hili ha toe lotu fakamālō, ʻokú ne tufa takai atu ia ʻo ne pehē: “Mou inu kotoa pe mei ai.” Pea ʻokú ne tala kia kinautolu: ‘Ko e uainé ni ʻokú ne fakafofongaʻi ʻa hoku totó. ʻOku vavé ni ke u lilingi ʻa hoku totó ke fakatauʻatāinaʻi kimoutolu mei hoʻomou ngaahi angahalá. Hokohoko fai ʻa e  meʻá ni ke fakamanatu kiate au.’—Mātiu 26:​26-28; 1 Kolinito 11:​23-26.

Naʻá ke fakatokangaʻi naʻe pehē ʻe Sīsū ʻoku totonu ke hokohoko fai eni ʻe he kau ākongá ke manatuʻi ai ia?— ʻE ʻikai te nau toe fai ʻa e kai ʻo e Laka-Atú. ʻI hono kehé, te nau fai ʻa e kai makehé ni ʻo tuʻo taha ʻi he taʻu taki taha ke manatuʻi ai ʻa Sīsū mo ʻene pekiá. Ko e kai ko ení ʻoku ui ko e Kai Efiafi ʻa e ʻEikí. ʻI he ʻahó ni, ʻoku tau faʻa ui ia ko e Fakamanatú. Ko e hā hono ʻuhingá?— Koeʻuhí he ʻokú ne fakamanatu mai ai kia kitaua ʻa e meʻa naʻe fai ʻe Sīsū mo ʻene Tamaí, ʻa Sihova ko e ʻOtuá, maʻatauá.

Ko e maá ʻoku totonu ke ne ʻai kitaua ke ta fakakaukau ki he sino ʻo Sīsuú. Naʻá ne loto-lelei ke foaki ʻa e sino ko iá koeʻuhi ke ta lava ai ʻo maʻu ʻa e moʻui taʻengatá. Pea fēfē ʻa e uaine kulokulá?— ʻOku totonu ke ne fakamanatu mai kia kitaua ʻa e mahuʻinga ʻo e toto ʻo Sīsuú. ʻOku mahuʻinga ange ia ʻi he toto ʻo e lami ʻo e Laka-Atu ʻi ʻIsipité. ʻOkú ke ʻilo ʻa hono ʻuhingá?— ʻOku pehē ʻe he Tohitapú ʻoku malava ke ʻomai ʻe he toto ʻo Sīsuú kia kitaua ʻa e fakamolemole ʻo e angahalá. Pea ʻi he taimi ʻe mole kotoa ai ʻeta angahalá, ʻe ʻikai ke ta toe puke, tupu ʻo motuʻa mo mate. ʻOku totonu ke ta fakakaukau ki he meʻa ko iá ʻi heʻeta kau ki he Fakamanatú.

ʻOku totonu ke kai ʻe he tokotaha kotoa ʻa e maá mo inu ʻa e uainé ʻi he Fakamanatú?— Sai, naʻe tala ange ʻe Sīsū ki he faʻahinga ʻoku nau kai mo inú: ‘Te mou kau ʻi hoku puleʻangá mo nofo ʻi ha ngaahi nofoʻanga ʻi hēvani mo au.’ (Luke 22:​19, 20, 30) ʻOku ʻuhinga ení te nau ō ki hēvani ke hoko ko e ngaahi tuʻi fakataha mo Sīsū. Ko ia, ko e faʻahinga pē ʻoku nau maʻu ʻa e ʻamanaki ʻo e pule fakataha mo Sīsū ʻi hēvaní ʻoku totonu ke nau kai ʻa e maá mo inu ʻa e uainé.

Ka naʻa mo e faʻahinga ʻoku ʻikai te nau kai ʻa e maá pe inu ʻa e uainé ʻoku totonu ke nau kau ʻi he Fakamanatú. ʻOkú ke ʻilo ʻa hono ʻuhingá?— Koeʻuhí he naʻe foaki ʻe Sīsū ʻa ʻene moʻuí foki maʻa kitautolu. ʻI he ʻalu ki he Fakamanatú, ʻokú ta fakahā ai ʻoku ʻikai ngalo ia ʻia kitaua. ʻOkú ta manatuʻi ʻa e meʻaʻofa makehe ʻa e ʻOtuá.