KO E HĀ ko ha fehuʻi mahuʻinga ai ʻa e, Ko hai ho ʻOtuá?— Koeʻuhí he ʻoku lotu ʻa e kakaí ki he ngaahi ʻotua tokolahi. (1 Kolinito 8:⁠5) ʻI he taimi naʻe maʻu ai ʻe he ʻapositolo ko Paulá ʻa e mālohi meia Sihova ke fakamoʻui ha tangata ʻa ia naʻe ʻikai ʻaupito lava ke ne ʻalu ki muʻá, naʻe kaila ʻa e kakaí: ‘Kuo maliu hifo ʻa e ngaahi ʻotuá kiate kitautolu ʻi he anga ʻo e tangatá.’ Naʻe loto ʻa e kakaí ke lotu kia Paula mo hono kaungāmeʻa ko Panepasá. Naʻa nau ui ʻa Paula ko Hēmesi pea ui ʻa Panepasa ko Siusi, ʻa ia ko e hingoa ia ʻo e ongo ʻotua loi.

Ka naʻe ʻikai ke tuku ʻe Paula mo Panepasa ʻa e kakaí ke nau lotu ange kia kinaua. Naʻá na ʻoho atu ki he kakaí ʻo na pehē: “Tafoki mei he ngaahi ʻotua noa ni ki he ʻOtua Moʻui.” (Ngāue 14:​8-15) Ko hai ʻa e “ʻOtua Moʻui,” ʻa ia naʻá ne fakatupu ʻa e ngaahi meʻa kotoa peé?— ʻIo, ko Sihova, ‘ko e Fungani Māʻolunga ʻi māmani kotoa pē.’ Naʻe ui ʻe Sīsū ʻa Sihova “ko e Otua moʻonia pe taha.” Ko ia leva, ko hai tokotaha pē ʻoku taau ke fai ki ai ʻa e lotú?— Ko Sihova pē!—Sāme 83:​18, PM; Sione 17:3; Fakahā 4:⁠11.

Ko e tokolahi taha ʻo e kakaí ʻoku nau lotu ki he ngaahi ʻotua kehe mei he “Otua moʻonia pe taha.” ʻOku nau faʻa lotu ki he ngaahi meʻa ʻoku nau ngaohi mei he ʻakaú, maká, pe mētalé. (Ekisoto 32:​4-7; Livitiko 26:1; Aisea 44:​14-17) Naʻa mo e kau tangata mo e kau fefine ʻoku nau hoko ʻo ongoongoá ʻoku faʻa ui kinautolu ʻi he taimi ʻe niʻihi ko e ngaahi ʻotua, kau sitā, pe ngaahi ʻaitoli. ʻOku tonu ke fakalāngilangiʻi kinautolu?—

ʻI he hili ʻa e hoko ʻa Saula ko e ʻapositolo ko Paulá, naʻá ne tohi: “Kuo fakakui ʻe he ʻotua ʻo e tuʻu ko eni ʻa e ʻatamai ʻo e kau taʻetui.” (2 Kolinito 4:⁠4) Ko hai ʻa e ʻotua ko ení?— ʻIo, ko Sētane ko e Tēvoló! Kuo malava ʻe Sētane ke ʻai ʻa e kakaí ke nau lotu ki he kakai tokolahi mo e ngaahi meʻa lahi.

 ʻI he taimi naʻe feinga ai ʻa Sētane ke ʻai ʻa Sīsū ke punou ange ʻo lotu kiate iá, ko e hā naʻe tala ʻe Sīsū kia Sētané?— “Ko Sihova ko ho ʻOtuá kuo pau ke ke lotu ki aí, pea ko ia pē tokotaha kuo pau ke ke fai ki ai hoʻo ngāue toputapú.” (Mātiu 4:​10, NW) Ko ia, naʻe ʻai ʻe Sīsū ke mahino ko e lotú ko e meʻa pē ia ʻa Sihova. Ta lau angé ʻo fekauʻaki mo ha kau talavou naʻa nau ʻilo eni. Ko honau hingoá ko Setaleki, Mēsake mo ʻApitenikō.

Ko e kau talavou Hepelū ko ení naʻa nau kau ʻi he puleʻanga ʻo e ʻOtuá ko ʻIsilelí pea naʻe taki pōpula kinautolu ki he fonua ko Pāpiloné. Ko ha tuʻi ʻi ai ko hono hingoá ko Nepukanesa naʻá ne langa ha fuʻu ʻīmisi koula lahi ʻaupito. ʻI he ʻaho ʻe taha, naʻá ne tuʻutuʻuni ʻo pehē ko e taimi ʻe tā ai ʻa e fasí, ko e tokotaha kotoa pē ʻoku totonu ke punou ki he ʻīmisí. ‘ʻIlonga ʻa ia ʻe ʻikai punou ʻo lotú ʻe lī ia ki he loto tafuʻanga afi kakahá,’ ko ʻene fakatokangá ia. Ko e hā naʻá ke mei faí?—

 Ko Setaleki, Mēsake mo ʻApitenikō naʻa nau faʻa fai maʻu pē ʻa e meʻa kotoa naʻe tuʻutuʻuni ʻe he tuʻí. Ka naʻa nau fakafisi ke fai ʻa e meʻa ko ení. ʻOkú ke ʻilo ʻa hono ʻuhingá?— Koeʻuhí he naʻe pehē ʻe he lao ʻa e ʻOtuá: ‘ʻOua naʻa ai hao ʻotua kehe meiate au. ʻOua te ke ngaohi maʻau ha ʻīmisi kuo tongi peá ke punou ki ai.’ (Ekisoto 20:​3-5) Ko ia ai, naʻe talangofua ʻa Setaleki, Mēsake mo ʻApitenikō ki he lao ʻa Sihová kae ʻikai ko e tuʻutuʻuni ʻa e tuʻí.

Naʻe ʻita lahi ʻaupito ʻa e tuʻí, ko ia ʻi he taimi pē ko iá naʻá ne fekau ke ʻomi ki hono ʻaó ʻa e kau talavou Hepelū ʻe toko tolú. Naʻá ne ʻeke: ‘Ko e moʻoni ʻoku ʻikai te mou tauhi hoku ngaahi ʻotuá? Te u ʻoatu hamou faingamālie. ʻI hoʻomou fanongo leva ki he fasí, mou foʻohifo ʻo lotu ki he ʻīmisi kuó u ngaohí. Ka ʻikai, ʻe lī kimoutolu ki he loto tafuʻanga afi kakahá. Pea ko hai ia ʻa e ʻotua te ne fakahaofi kimoutolu mei hoku nimá?’

Ko e hā leva ʻe fai he taimí ni ʻe he kau talavoú? Ko e hā naʻá ke mei faí?— Naʻa nau pehē ki he tuʻí: ‘Ko e ʻOtua ʻoku mau tauhi ki aí ʻoku malava ke ne fakahaofi kimautolu. Ka neongo kapau ʻe ʻikai te ne fai pehē, ʻe ʻikai te mau tauhi ki ho ngaahi ʻotuá. ʻE ʻikai te mau punou ki hoʻo ʻīmisi koulá.’

Naʻe ʻita lahi ʻaupito ʻa e tuʻí. Naʻá ne tuʻutuʻuni: ‘Tafu ʻa e tafuʻanga  afí ke liunga fitu ʻa ʻene velá ʻi heʻene faʻa vela ki muʻá!’ Naʻá ne fekau atu leva ki heʻene kau tangata mālohí ke haʻi ʻa Setaleki, Mēsake mo ʻApitenikō pea lī kinautolu ki he loto tafuʻanga afí! Naʻe fuʻu vela ʻaupito ʻa e tafuʻanga afí ʻo mate ʻa e kau tangata ʻa e tuʻí ʻi he ulo ʻa e afí! Fēfē ʻa e kau Hepelū ʻe toko tolú?

Naʻe tō tonu ʻa Setaleki, Mēsake mo ʻApitenikō ki he loto afí. Ka neongo ia, naʻa nau tuʻu hake! Naʻe ʻikai te nau vela. Pea naʻe ʻikai ke kei haʻi kinautolu. Naʻe malava fēfē ʻa e meʻá ni?— Naʻe vakai atu ʻa e tuʻí ki he loto tafuʻanga afí, pea ko e meʻa naʻá ne sio ki aí naʻe ʻai ai ia ke ne ilifia. ‘ʻIkai naʻa tau lī ʻa e kau tangata ʻe toko tolu ki he loto afí?’ ko ʻene ʻeké ia. Naʻe tali ʻe heʻene kau sevānití: ‘ʻIo, ʻe tuʻi.’

Naʻe pehē leva ʻe he tuʻí: ‘Vakai ʻoku ou mamata ki he toko fā ʻoku nau lue holo ai, pea ʻoku ʻikai vela ha taha ʻo kinautolu.’ ʻOkú ke ʻilo ʻa e tokotaha naʻe toko fā ʻakí?— Ko ha ʻāngelo ia ʻa Sihova. Naʻá ne maluʻi ʻa e kau Hepelū ʻe toko tolú mei haʻanau vela.

Sai, ʻi he mamata ki he meʻa ko ení, naʻe haʻu ʻa e tuʻí ki he matapā ʻo e tafuʻanga afí ʻo ne kaila atu: “Setaleki, Mesake,  mo Apeteniko, ʻa e kau tamaioʻeiki ʻa e ʻOtua Taupotu, mou hu mai, pea haʻu ki heni.” ʻI heʻenau hū mai ki tuʻá, naʻe malava ke sio ʻa e tokotaha kotoa naʻe ʻikai te nau vela. Naʻe aʻu ʻo ʻikai haʻanau namu-ʻohuafi. Naʻe pehē atu leva ʻe he tuʻí: ‘Ke mālōʻia ʻa e ʻOtua ʻo Setaleki, Mēsake mo ʻApitenikō, ʻa ia kuó ne fekau ha ʻāngelo ke fakahaofi ʻa ʻene kau sevānití koeʻuhi naʻe ʻikai te nau lotu ki ha toe ʻotua kehe ka ko honau ʻOtuá pē.’—Taniela, vahe 3.

ʻE lava ke ta ako ha lēsoni mei he meʻa ko eni naʻe hokó. Naʻa mo e ʻahó ni ʻoku fokotuʻu ʻe he tangatá ha ngaahi ʻīmisi, pe ngaahi ʻaitoli ki he lotú. ʻOku pehē ʻe he The Encyclopedia Americana: “Ko e fuká, ʻi he hangē ko e kolosí, ʻoku toputapu.” Ko e ngaahi ʻīmisí ʻoku malava ke ngaohi ia mei he ʻakaú, maká, mētalé, pe tupenú. Ko e kau ākonga ki muʻa ʻa Sīsuú naʻe ʻikai te nau fai ha tōʻonga lotu ki he ʻemipola Lomá, ʻa ia naʻe pehē ʻe he faihisitōlia ko Daniel P. Mannix ʻoku lava ke fakahoa ia ki he “fakafisi ke fakaʻapaʻapa ki he fuká pe lau ʻa e fakapapau ʻo e tukupaá.”

Ko ia, ʻokú ke fakakaukau ʻoku mahuʻinga ki he ʻOtuá kapau ʻoku ngaohi ha ʻīmisi fakalotu mei he tupenú, ʻakaú, maká pe mētalé?— ʻE tonu ki ha sevāniti ʻa Sihova ke fai ha tōʻonga lotu ʻi muʻa ʻi ha ʻīmisi pehē?— Naʻe ʻikai ke fai ia ʻe Setaleki, Mēsake mo ʻApitenikō, pea naʻe leleiʻia ʻa Sihova ʻia kinautolu. ʻE lava fēfē ke ke faʻifaʻitaki ki heʻenau faʻifaʻitakiʻangá?—