ʻOKU fai ʻe Sihova ʻi he taimi ʻe niʻihi ha ngaahi meʻa ʻi ha founga fakaofo ke maluʻi ai ʻa kinautolu ʻoku kei siʻi pea ʻoku ʻikai lava ke nau maluʻi kinautolú. Kapau te ke luelue ʻi he feituʻu ʻutá, te ke sio nai ai ki ha founga ʻe taha ʻoku fai ai eni ʻe Sihová. Ka, ʻe ʻikai nai te ke mahinoʻi lelei ʻa e meʻa ʻoku hokó ʻi he ʻuluaki taimí.

ʻOkú ke sio ki ha foʻi manupuna ʻoku tō hifo ʻi he kelekelé ʻo ofi atu kia koe. ʻOku hā ngali lavea ia. ʻOkú ne toho ʻa e taha ʻo hono kapakaú pea ʻunuʻunu mamaʻo ʻi hoʻo feinga ke fakaofiofi ki aí. ʻI hoʻo muimui ʻi he foʻi manupuná, ʻokú ne fakamamaʻo maʻu pē meia koe. Pea fakafokifā pē, ʻoku puna ʻa e foʻi manupuná ia. Naʻe ʻikai ʻaupito ke lavea ʻa hono kapakaú! ʻOkú ke ʻilo ʻa e meʻa naʻe fai ʻe he foʻi manupuná?—

Sai, ʻi he ofi ki he feituʻu naʻe tō hifo ai ʻa e foʻi manupuná ʻo ofi kia koé, naʻe fufū ai ʻa hono ʻuhikí ʻi he vaó. Naʻe ilifia ʻa e faʻē ʻa e fanga manupuná naʻa faifai ka ke maʻu kinautolu ʻo fakamamahiʻi. Ko ia, naʻá ne fakangalingali pē ʻoku lavea ʻo ne taki mamaʻo koe. ʻOkú ke ʻilo ko hai ʻe lava ke ne maluʻi kitaua ʻo hangē ko hono maluʻi ʻe ha faʻē manupuna ʻa hono ʻuhikí?— ʻI he Tohitapú, ʻoku fakatatau ai ʻa Sihova ki he manupuna ʻoku ui ko ha ʻīkale, ʻa ia ʻokú ne tokoniʻi ʻa hono ʻuhikí.—Teutalonome 32:​11, 12.

 Ko e tama mahuʻinga taha ʻa Sihová ko hono ʻAlo ʻofaʻanga ko Sīsuú. ʻI he taimi naʻe ʻi hēvani ai ʻa Sīsuú, ko ha tokotaha laumālie mālohi ia ʻo hangē ko ʻene Tamaí. Naʻe malava ke ne tokangaʻi pē ʻe ia ia. Ka ʻi he taimi naʻe fāʻeleʻi mai ai ʻa Sīsū ko ha pēpē ʻi he māmaní, naʻe ʻikai te ne toe lava ha meʻa. Naʻá ne fiemaʻu ha maluʻi.

Ke fakahoko ʻa e finangalo ʻo e ʻOtuá kiate ia ʻi he māmaní, naʻe pau ke tupu hake ʻa Sīsū ʻo hoko ko ha tangata lahi haohaoa. Kae kehe, naʻe feinga ʻa Sētane ke tāmateʻi ʻa Sīsū ki muʻa ke hoko ʻa e meʻa ko iá. Ko e ngaahi feinga ke tāmateʻi ʻa Sīsū ʻi heʻene kei siʻí mo e ngaahi founga naʻe maluʻi ai ia ʻe Sihová ko ha talanoa mālie ia. Te ke fie fanongo ki ai?—

ʻI he taimi nounou mei hono fāʻeleʻi ʻo Sīsuú, ʻoku ʻai ʻe Sētane ha meʻa ʻoku hā ko ha fetuʻu ke ulo ʻi he langí ʻi he feituʻu Hahaké. Ko e kau tangata ʻoku ui ko e kau ʻasitalolosia, ʻa ia ʻoku nau ako ʻa e ngaahi fetuʻú, ʻoku nau muimuiʻi mamaʻo ʻa e fetuʻú ki Selusalema. ʻOku nau ʻeke ai ʻa e feituʻu ʻe fāʻeleʻi ai ʻa e tokotaha ʻe hoko ko e tuʻi ʻo e kau Siú. ʻI hono ʻeke ki he kau tangata ʻa ia ʻoku nau ʻiloʻi ʻa e meʻa ʻoku leaʻaki ʻe he Tohitapú ʻo fekauʻaki mo e meʻa ko ení, ʻoku nau tali: “ʻI Petelihema.”—Mātiu 2:​1-6.

 ʻI he hili ʻa e fanongo ʻa Hēlota, ko e tuʻi kovi ʻi Selusalemá, ʻo fekauʻaki mo e tuʻi foʻou ko eni naʻe toki fāʻeleʻi ʻi he kolo ofi mai ko Pētelihemá, ʻokú ne tala ki he kau ʻasitalolosiá: ‘Kumi ke ʻilo ʻa e tamá, pea mou foki mai ʻo fakahā kiate au.’ ʻOkú ke ʻilo ʻa e ʻuhinga ʻoku loto ai ʻa Hēlota ke ʻilo ʻa e feituʻu ʻoku ʻi ai ʻa Sīsuú?— Koeʻuhí he ʻoku loto-kovi ʻa Hēlota pea ʻokú ne loto ke tāmateʻi ia!

ʻOku anga-fēfē hono maluʻi ʻe he ʻOtuá ʻa hono ʻAló?— Sai, ʻi he ʻilo ʻe he kau ʻasitalolosiá ʻa Sīsuú, ʻoku nau foaki kiate ia ha ngaahi meʻaʻofa. Ki mui ai, ʻoku fai ʻe he ʻOtuá ha fakatokanga ki he kau ʻasitalolosiá ʻi ha misi ke ʻoua te nau toe foki kia Hēlota. Ko ia, ʻoku nau foki ki honau fonuá ʻi ha hala kehe ʻo ʻikai toe foki ki Selusalema. ʻI he ʻiloʻi ʻe Hēlota kuo mavahe ʻa e kau ʻasitalolosiá, ʻokú ne ʻita lahi ʻaupito. ʻI ha feinga ke tāmateʻi ʻa Sīsuú, ʻoku ʻai ai ʻe Hēlota ke tāmateʻi ʻa e tamaiki tangata kotoa pē ʻi Pētelihema ʻoku siʻi hifo honau taʻú ʻi he taʻu uá! Ka ʻi he taimi ko iá, kuo ʻosi mavahe ʻa Sīsū ia.

ʻOkú ke ʻilo ʻa e founga ʻoku hola ai ʻa Sīsuú?— ʻI he hili ʻa e mavahe ʻa e kau ʻasitalolosiá ke foki ki honau fonuá, ʻoku fai ʻe Sihova ha fakatokanga ki he husepāniti ʻo Melé, ʻa Siosefa, ke tuʻu hake ʻo hola mamaʻo ki ʻIsipite. ʻOku malu ai ʻa Sīsū meia Hēlota kovi. ʻI ha ngaahi taʻu ki mui ai, ʻi he foki mai ʻa Mele mo Siosefa mei ʻIsipite fakataha mo Sīsuú, ʻoku toe fai ʻe he ʻOtuá ha fakatokanga kia Siosefa. ʻOkú ne tala kiate ia ʻi ha misi ke hiki ki Nasaleti, ʻa ia ʻe malu ai ʻa Sīsū.—Mātiu 2:​7-23.

ʻOkú ke sio ki he founga naʻe maluʻi ai ʻe Sihova ʻa hono ʻAló?— Ko hai te ke pehē ʻoku hangē ko e fanga kiʻi foʻi manupuna naʻe fufū ʻe heʻenau faʻeé ʻi he vaó pe hangē ko Sīsū ʻi he taimi naʻá ne kei siʻi aí? ʻIkai  ʻokú ke hangē ko kinautolú?— ʻOku ʻi ai foki ʻa e faʻahinga ʻoku nau loto ke fakamamahiʻi koe. ʻOkú ke ʻilo ko hai ia?—

ʻOku pehē ʻe he Tohitapú ʻoku hangē ʻa Sētane ha laione ngungulú ʻo ne fiemaʻu ke kai kitaua. Pea ʻi he hangē ko e faʻa filiʻi ʻe he fanga laioné ʻa e fanga manu īkí, ʻoku faʻa filiʻi ʻe Sētane mo ʻene kau tēmenioó ʻa e fānaú. (1 Pita 5:⁠8) Ka ʻoku mālohi ange ʻa Sihova ia ʻia Sētane. ʻOku malava ʻe Sihova ke maluʻi ʻa ʻene fānaú pe toʻo ha kovi pē ʻoku fai ʻe Sētane kia kinautolu.

ʻOkú ke manatuʻi mei he Vahe 10 ʻo e tohi ko ení ʻa e meʻa ʻoku feinga ʻa e Tēvoló mo ʻene kau tēmenioó ke ʻai kitaua ke ta faí?— ʻIo, ʻoku nau feinga ke ʻai kitaua ke ta fai ʻa e faʻahinga fehokotaki fakasino ʻoku pehē ʻe he ʻOtuá ʻoku halá. Ka ko hai pē ʻoku totonu ke ne fai ʻa e fehokotaki fakasinó?— ʻIo, ko ha ongo meʻa lalahi ʻe toko ua ʻa ia ko ha tangata mo ha fefine ʻokú na ʻosi mali.

Kae kehe, ʻoku fakamamahí, he ko e kakai lalahi ʻe niʻihi ʻoku nau saiʻia kinautolu ke fehokotaki fakasino mo e fānaú. ʻI heʻenau fai iá, ʻoku kamata nai ke fai ʻe he tamaiki tangatá mo e tamaiki fefiné ʻa e ngaahi meʻa kovi ʻa ia kuo nau ako mei he kakai lalahi ko ení. ʻOku kamata foki ke nau ngāueʻaki honau ngaahi konga ki he fehokotaki fakasinó ʻi ha founga hala. Ko e meʻa ia naʻe hoko ʻi ha taimi fuoloa ki muʻa ʻi he kolo ko Sōtomá. ʻOku pehē ʻe he Tohitapú ko e kakai aí, “mei he talavou ki he motuʻa,” naʻa nau feinga ke fehokotaki fakasino mo e ongo tangata naʻá na haʻu ke ʻaʻahi kia Loté.—Fakaʻītali ʻamautolu; Senesi 19:​4, 5.

Ko ia, hangē pē ko hono fiemaʻu ʻe Sīsū ha maluʻí, ʻoku fiemaʻu foki ke maluʻi koe mei he kakai lalahí—pea naʻa mo e fānau kehe—ʻa ia te nau feinga nai ke fai ha fehokotaki fakasino mo koe. Ko e kakai ko ení te nau faʻa fakangalingali pē ko ho ngaahi kaumeʻa. ʻE aʻu nai ʻo nau ʻoatu ha meʻaʻofa kia koe kapau te ke palōmesi ange ke ʻoua ʻe tala ki he niʻihi kehé ʻa e meʻa ʻoku nau loto ke fai kia koé. Ka ko e kakaí ni ʻoku nau siokita ʻo hangē pē ko Sētane mo ʻene kau tēmenioó, pea ko ʻenau fiemaʻú pē ke maʻu ai ʻenau fiefiá. Pea ʻoku nau feinga ke maʻu ʻa e fiefia ko ení ʻaki ʻa e fehokotaki fakasino mo e fānaú. ʻOku hala ʻaupito ʻa e meʻá ni!

 ʻOkú ke ʻilo ʻa e meʻa te nau fai nai ke maʻu ai ʻenau fiefiá?— Sai, te nau feinga nai ke ngaahi ho ngaahi konga fakaefehokotaki fakasinó. Pe ʻe aʻu nai ʻo nau ʻai ke pā atu honau ngaahi konga fakaefehokotaki fakasinó kia koe. Ka ʻoku ʻikai ʻaupito totonu ke ke fakaʻatā ha taha ke vaʻinga mo ho fakatangatá pe fakafefiné. ʻO aʻu ki ho tokouá, tuofefiné pe tuongaʻané pe ko hoʻo faʻeé pe tamaí. Ko e ngaahi konga ko eni ʻo ho sinó ʻoku taʻofi ia mei ha taha kehe.

ʻE lava fēfē ke ke maluʻi ho sinó mei he kakai ʻoku nau fai ʻa e ngaahi meʻa kovi hangē ko ení?— ʻUluakí, ʻoua ʻe tuku ha taha ke vaʻinga ʻi ho ngaahi konga fakaefehokotaki fakasinó. Kapau ʻe feinga ha taha ke fai eni, lea mālohi mo leʻo-lahi: “Tuku ia! Te u tala koe!” Pea kapau ʻe pehē ʻe he tokotaha ko iá ko e meʻa naʻe hokó ko e hala ia ʻaʻau, ʻoua te ke tui ki ai. ʻOku ʻikai ke moʻoni ia. ʻAlu pē koe ʻo tala ia ʻo tatau ai pē pe ko hai! ʻOku totonu ke ke fai pehē neongo kapau te ne pehē ko e meʻa ʻokú mo faí ko ha fakapulipuli pē ia ʻa kimoua. Neongo kapau ʻe palōmesi atu ʻe he tokotaha ko iá ke ʻoatu ha ngaahi meʻaʻofa lelei pe fai ha ngaahi fakamanamana fakailifia, ʻoku totonu ke ke hola mei ai pea tala ia.

ʻOku ʻikai fiemaʻu ke ke ilifia, ka ʻoku fiemaʻu ke ke tokanga. ʻI he taimi ʻoku fakatokanga atu ai ʻa hoʻo ongo mātuʻá kia koe ʻo fekauʻaki mo e kakai pe ngaahi feituʻu ʻe lava ke hoko ai ha fakatuʻutāmaki kia koé, ʻoku fiemaʻu ke ke fanongo kia kinaua. Kapau te ke fai ia, ʻokú ke taʻofi ai ʻa e faingamālie ʻo ha tokotaha kovi ke ne fakamamahiʻi koe.