ʻOKÚ KE ongoʻi loto-mamahi mo taʻelata ʻi ha taimi?— ʻOkú ke fifili nai ʻi ha taimi pe ʻoku ʻofa ha taha ʻia koe?— ʻOku pehē ʻa e fānau ʻe niʻihi. Ka ʻoku palōmesi mai ʻa e ʻOtuá: ‘ʻE ʻikai ngalo koe ʻiate au.’ (Aisea 49:15) ʻIkai ko ha meʻa lelei ia ke fakakaukau ki ai?— ʻIo, ʻoku ʻofa moʻoni ʻa Sihova ko e ʻOtuá ʻia kitaua!

Naʻe pehē ʻe ha tokotaha-tohi Tohitapu ʻe taha: “Neongo ʻe liʻaki au ʻe heʻeku tamai mo ʻeku faʻe, ʻe fakahoko au ʻe Sihova kiate ia pe.” (Sāme 27:10) Ko hono ʻiloʻi ʻa e meʻa ko iá ʻe lava ke hoko ia ko ha fakafiemālie moʻoni kia kitaua, ʻikai ko ia?— ʻIo, ʻoku tala mai kia kitaua ʻe Sihova: ‘ʻOua ʻe manavahē, he ʻoku ou ʻiate koe ʻe au. . . . Te u mātuʻaki tokoniʻi koe.’—Aisea 41:⁠10.

Neongo ia, ʻi he taimi ʻe niʻihi ʻoku fakaʻatā ai ʻe Sihova ʻa Sētane ke ne fakatupu ha palopalema kia kitaua. ʻOku aʻu ʻo fakaʻatā ʻe Sihova ʻa Sētane ke ne ʻahiʻahiʻi ʻa ʻEne kau sevānití. ʻI he taimi ʻe taha naʻe ʻai ai ʻe he Tēvoló ʻa Sīsū ke ne faingataʻaʻia lahi ʻo kalanga ai ʻa Sīsū kia Sihova: ‘ʻE hoku ʻOtua, ʻe hoku ʻOtua, ko e hā kuó ke liʻaki ai aú?’ (Mātiu 27:46) Neongo naʻe faingataʻaʻia ʻa Sīsū, naʻá ne kei ʻiloʻi pē naʻe ʻofa ʻa Sihova ʻiate ia. (Sione 10:17) Ka naʻe toe ʻiloʻi ʻe Sīsū ʻoku tuku ʻe he ʻOtuá kia Sētane ke ne ʻahiʻahiʻi ʻa ʻEne kau sevānití pea fakaʻatā ʻa Sētane ke ne ʻai kinautolu ke nau faingataʻaʻia. ʻI ha vahe kehe ʻe taha, ʻe fakamatala ai ki he ʻuhinga ʻoku fakaʻatā ai ʻe he ʻOtuá ʻa Sētane ke ne fai ʻa e meʻa ko ení.

ʻI he taimi ʻoku tau kei siʻi aí, ʻoku tau hehema ke ilifia ʻi he taimi ʻe niʻihi. Ko e fakatātaá, kuó ke mole nai ʻi ha taimi?— Naʻá ke manavahē?— Ko e fānau tokolahi te nau manavahē. Naʻe fai ʻe he Faiako Lahí ʻi he taimi ʻe taha ha talanoa ʻo fekauʻaki mo ha hoko ʻo mole. Ka naʻe ʻikai ko ha kiʻi tama naʻe molé. Ko ha sipi.

 ʻI he ngaahi founga ʻe niʻihi ʻokú ke hangē ai ha sipí. ʻOku anga-fēfē ia? Sai, ko e fanga sipí ʻoku ʻikai te nau lalahi pe mālohi. Pea ʻoku nau fiemaʻu ha taha ke ne tokangaʻi kinautolu pea mo maluʻi kinautolu. Ko e tangata ʻokú ne tokangaʻi ʻa e fanga sipí ʻoku ui ia ko ha tauhi-sipi.

ʻI heʻene talanoá naʻe fakamatala ai ʻa Sīsū ʻo fekauʻaki mo ha tauhi-sipi ʻa ia naʻe ʻi ai ʻene fanga sipi ʻe toko teau. Ka naʻe mole ha taha ʻo e fanga sipí. Naʻe fiemaʻu nai ʻe he sipí ke sio pe ko e hā ʻa e meʻa naʻe ʻi he tafaʻaki moʻunga ʻe tahá. Ka naʻe ʻikai ke fuoloa, kuo mamaʻo ʻaupito ʻa e sipi ko iá mei he fanga sipi kehé. ʻE lava ke ke fakakaukauloto atu ki he ongoʻi ʻa e sipi ko iá ʻi he taimi naʻá ne sio holo ai ʻo vakai ʻokú ne tokotahá?—

Ko e hā ʻe fai ʻe he tauhi-sipí ʻi heʻene ʻiloʻi naʻe mole ʻa e sipi ʻe tahá? Te ne pehē nai ko e kovi ʻataʻatā pē eni ia ʻa e sipí, ko ia ʻe ʻikai ai ke tokanga ia ki ai? Pe te ne tuku ʻa e fanga sipi ʻe toko 99 ʻi ha feituʻu ʻoku malú pea ʻalu ʻo kumi ki he sipi pē ko ia ʻe tahá? ʻE taau ʻa e sipi ʻe tahá mo e feinga lahi ko iá?— Kapau naʻa ko koe ʻa e sipi mole ko iá, te ke loto ke kumi koe ʻe he tauhi-sipí?—

Naʻe ʻofa lahi ʻaupito ʻa e tauhi-sipí ʻi heʻene fanga sipí kotoa, naʻa mo e taha naʻe molé. Ko ia, naʻá ne ʻalu ʻo kumi ʻa e sipi naʻe molé. Fakakaukau atu ki he fiefia ʻa e sipi mole ko iá ʻi heʻene sio ki he ʻalu atu ʻa e tauhi-sipí! Pea naʻe pehē ʻe Sīsū naʻe fiefia ʻa e  tauhi-sipí ʻi heʻene maʻu ʻa ʻene sipí. Naʻe lahi ange ʻene fiefia aí ʻi heʻene fiefia ʻi he fanga sipi ʻe toko 99 naʻe ʻikai molé. Sai, ko hai ʻoku hangē ko e tauhi-sipi ko ia ʻi he talanoa ʻa Sīsuú? Ko hai ʻokú ne tokanga mai kia kitaua ʻo hangē ko e tokanga naʻe fai ʻe he tauhi-sipí ki heʻene sipí?— Naʻe pehē ʻe Sīsū ko ʻene Tamai ʻi he langí. Pea ko ʻene Tamaí ko Sihova.

Ko Sihova ko e ʻOtuá ko e Tauhi Lahi ia ʻo hono kakaí. ʻOkú ne ʻofa ʻi he faʻahinga kotoa ʻoku nau tauhi iá, ʻo kau ai ʻa e fānau iiki hangē ko koé. ʻOku ʻikai te ne loto ke lavea pe ʻauha ha taha ʻia kitaua. Ko e moʻoni, ʻoku fakafiemālie ke ʻiloʻi ʻoku tokanga lahi pehē mai ʻa e ʻOtuá kia kitaua!—Mātiu 18:​12-14.

ʻOkú ke tui moʻoni kia Sihova ko e ʻOtuá?— Ko ha tokotaha moʻoni ia kia koe?— Ko e moʻoni ʻoku ʻikai lava ke ta sio kia Sihova. ʻOku hoko ení koeʻuhí ko ha Laumālie ia. ʻOkú ne maʻu ha sino ʻoku taʻehāmai ki hota matá. Ka ko ha tokotaha moʻoni ia, pea ʻoku malava ke ne sio mai kia kitaua. ʻOkú ne ʻiloʻi ʻa e taimi ʻokú ta fiemaʻu ai ha tokoní. Pea ʻoku malava ke ta talanoa kiate ia ʻi he lotu, hangē pē ko ʻeta talanoa ki ha tokotaha kehe ʻi he māmaní. ʻOku fiemaʻu mai ʻe Sihova ke ta fai ʻa e meʻa ko ení.

 Ko ia, kapau ʻe ʻi ai ha taimi ʻokú ke ongoʻi loto-mamahi ai pe taʻelata, ko e hā ʻoku totonu ke ke faí?— Talanoa kia Sihova. ʻUnuʻunu ofi kiate ia, pea te ne fakafiemālieʻi mo tokoniʻi koe. Manatuʻi ʻoku ʻofa ʻa Sihova ʻia koe, naʻa mo e taimi ʻokú ke ongoʻi ai ʻo hangē ʻokú ke tokotahá. Ta sio angé ki heʻeta Tohitapú. ʻI he Sāme 23, ʻoku tala mai ai kia kitaua, ʻo kamata ʻi he veesi 1: “Ko hoku tauhi ʻa Sihova; ʻe ʻikai te u masiva. ʻOku ne fakatokoto au he ngaahi toafa lau mukomuka; ʻoku ne taki au ki he ngaahi vai fakanonga.”

Fakatokangaʻi ʻa e meʻa ʻoku tānaki mai ʻe he tokotaha tohí, ʻi he veesi 4: “ʻIo, neongo ʻete ʻalu pe ʻi he teleʻa ʻoku maluʻaki ai ʻa Mate, ʻe ʻikai te u manavahe ki ha kovi; he ko koe ʻoku ma feohi: ko siʻo tokotoko mo ʻakau, ʻoku na fakafiemalieʻi au.” Ko e anga ia ʻo e ongoʻi ʻa e kakaí kapau ko honau ʻOtuá ʻa Sihova. ʻOku nau maʻu ʻa e fakafiemālie ʻi he taimi ʻoku nau faingataʻaʻia aí. ʻOku pehē ʻa e anga ʻo hoʻo ongoʻí?—

Hangē ko hono tokangaʻi ʻe ha tauhi-sipi ʻofa ʻa ʻene tākangá, ʻoku pehē ʻa e tokangaʻi lelei ʻe Sihova ʻa ʻene kakaí. ʻOkú ne fakahā kia kinautolu ʻa e hala totonu ke nau fou aí, pea ʻoku nau muimui fiefia ʻiate ia. Naʻa mo e taimi ʻoku takatakaiʻi ai kinautolu ʻe he faingataʻá, ʻoku ʻikai fiemaʻu ke nau ilifia. ʻOku ngāueʻaki ʻe ha tauhi-sipi ʻa ʻene tokotokó pe vaʻakaú ke maluʻi ʻa e fanga sipí mei he fanga monumanu te ne kai nai kinautolú. ʻOku fakamatala ʻa e Tohitapú ʻo kau ki he anga ʻo hono maluʻi ʻe he tauhi-sipi kei siʻi ko Tēvitá ʻa ʻene fanga sipí mei ha laione mo ha pea. (1 Samiuela 17:​34-36)  Pea ʻoku ʻiloʻi ʻe he kakai ʻa e ʻOtuá ʻe maluʻi foki kinautolu ʻe Sihova. ʻOku malava ke nau ongoʻi malu he ʻoku kau ʻa e ʻOtuá mo kinautolu.

ʻOku ʻofa moʻoni ʻa Sihova ʻi heʻene fanga sipí, pea ʻokú ne tokanga ʻofa kia kinautolu. ʻOku pehē ʻe he Tohitapú: ‘Te ne tataki ʻene fanga sipí ʻo hangē ha tauhi-sipí. Te ne tānaki fakataha ʻa e ʻuhikí ʻaki hono nimá.’—Aisea 40:⁠11.

ʻIkai ʻoku ʻai koe ke ke ongoʻi fiefia ʻi he ʻiloʻi ʻoku pehē ʻa Sihová?— ʻOkú ke loto ke hoko ko ha taha ʻo ʻene fanga sipí?— Ko e fanga sipí ʻoku nau fanongo ki he leʻo ʻa honau tauhí. ʻOku nau nofo ofi kiate ia. ʻOkú ke fanongo kia Sihova?— ʻOkú ke nofo ofi kiate ia?— Tā ʻoku ʻikai ʻaupito leva fiemaʻu ke ke ilifia. ʻE kau ʻa Sihova mo koe.