Vahe Fā

Ko e Tokotaha Naʻe Fai Fakamoʻoni ki Ai ʻa e Kau Palōfita Kotoa Pē

1. Ko e hā ʻoku hanga ʻe he ngaahi moʻoniʻi meʻa fekauʻaki mo e moʻui ki muʻa ʻa Sīsū peá ne toki tangatá ʻo fakahā fekauʻaki mo hono vahaʻangatae mo Sihová?

 “ʻOKU ʻofa ʻa e Tamai ki he ʻAlo, pea ʻoku ne fakahā ki ai ʻa e ngaahi meʻa kotoa pe ʻoku fai ʻe he ʻEne ʻAfio.” (Sione 5:20) He vahaʻangatae māfana moʻoni ē naʻe maʻu ʻe he ʻAló mo ʻene Tamaí, ʻa Sihova! Ko e ofi ʻo e vahaʻangatae ko iá naʻe kamata ia ʻi he taimi ʻo hono fakatupu iá, ʻa ia ko e ngaahi mileniume taʻefaʻalaua ki muʻa ʻi hono fanauʻi mai ia ko e tangatá. Ko e ʻAlo tofu-pē-taha-ne-fakatupu ia ʻo e ʻOtuá, ko e tokotaha pē taha naʻe fakatupu fakahangatonu ʻe Sihova tonu. Ko e ngaahi meʻa kehe kotoa pē ʻi hēvani mo ia ʻi māmaní naʻe fakatupu ia fakafou ʻi he ʻAlo ʻuluaki ne ʻofaʻi lahi ko iá. (Kolose 1:15, 16) Naʻá ne toe ngāue foki ko e Folofola ʻa e ʻOtuá, pe Tokotaha-Lea, ʻa e Tokotaha ʻa ia naʻe fakafetuʻutaki mai ai ʻa e finangalo fakaʻotuá ki he niʻihi kehé. Ko e tokotahá ni, ʻa e ʻAlo naʻe ʻofa tefito ai ʻa e ʻOtuá, naʻe hoko ko e tangata ko Sīsū Kalaisí.—Palovepi 8:22-​30; Sione 1:14, 18; 12:49, 50.

2. Ko e hā e lahi kuo lave ki ai ʻa e ngaahi kikite ʻo e Tohitapú fekauʻaki mo Sīsuú?

² Ki muʻa ʻi hono tuʻituʻia fakaemana mai ʻa e ʻAlo ʻuluaki ʻo e ʻOtuá ko ha tangatá, ʻoku lahi ʻa e ngaahi kikite fakamānavaʻi naʻe lēkooti fekauʻaki mo ia. Naʻe fakamoʻoni ʻa e ʻapositolo ko Pitá kia Koliniusi: “Oku fakamooni kiate ia ae kau balofita kotoabe.” (Ngāue 10:43, PM) Ko e ngafa ʻo Sīsuú naʻe fakahaaʻi ia ʻe he Tohitapú ʻo aʻu ki ha tuʻunga ne tala ai ʻe ha ʻāngelo ki he ʻapositolo ko Sioné: “Koe fakamooni  kia Jisu, koe laumalie ia oe kikite.” (Fakahā 19:10, PM) Ko e ngaahi kikite ko iá naʻa nau fakamahinoʻi māʻalaʻala ia ko e Mīsaiá. Naʻa nau tohoaki ʻa e tokangá ki he ngaahi ngafa kehekehe te ne fai ʻi hono fakahoko ʻa e ngaahi taumuʻa ʻa e ʻOtuá. ʻOku totonu ke hoko ʻo mātuʻaki fakatupu tokanga kotoa eni kiate kitautolu he ʻahó ni.

Meʻa ʻOku Fakaeʻa ʻe he Ngaahi Kikité

3. (a) ʻI he kikite he Senesi 3:15, ko hai ʻoku fakafofongaʻi ʻe he ngatá, ‘ko e fefiné,’ pea mo e ‘hako ʻo e ngatá’? (e) Ko e hā ka hoko ai ʻa e ‘laiki ʻo e ʻulu ʻo e ngatá’ ko ha meʻa mātuʻaki fakatupu tokanga ki he kau sevāniti ʻa Sihová?

³ Ko e ʻuluaki ʻi he ngaahi kikite peheé naʻe leaʻaki ia hili ʻa e angatuʻu ʻi ʻĪtení. Naʻe tala ʻe Sihova ki he ngatá: “Te u ʻai ke mo fetāufehiʻa ʻaki, ʻa koe mo e fefine, pea ko ho hako mo hono hako; ʻe laiki ʻe ia ho ʻulu, pea te ke laiki ʻe koe ʻa hono muivaʻe.” (Senesi 3:15) Ko e kikite ko iá naʻe fakahanga moʻoni ia kia Sētane, ʻa e tokotaha ʻoku fakafofongaʻi ʻe he ngatá. ‘Ko e fefiné’ ko e kautaha fakahēvani mateaki tonu ia ʻa Sihová, ʻa ia ʻoku hangē ha uaifi faitōnunga kiate iá. Ko e ‘hako ʻo e ngatá’ ʻoku kau ki ai ʻa e kau ʻāngelo mo e faʻahinga kotoa pē ʻo e tangatá ʻoku nau fakahāhā ʻa e laumālie ʻo Sētané, ʻa e faʻahinga ʻoku fakafepaki kia Sihova mo ʻEne kakaí. Ko e ‘laiki ʻo e ʻulu ʻo e ngatá’ ʻoku ʻuhinga ia ko hono fakaʻauha fakaʻosi ʻo e tokotaha angatuʻu ko Sētané, ʻa ia naʻá ne lauʻi kovi ʻa Sihova mo ʻomi ʻa e fakamamahi lahi ki he faʻahinga ʻo e tangatá. Ka ko e hā ʻa e ʻiloʻanga ʻo e konga tefito ʻo e ‘hakó’ ʻa ia te ne fai ʻa e laikí? ʻI he laui senituli, naʻe kei hoko ia ko ha “fakalilolilo toputapu.”​—Loma 16:20, 25, 26, NW.

4. Naʻe anga-fēfē tokoni ʻa e laine hohoko ʻo Sīsuú ke fakamahinoʻi ia ko e Hako naʻe talaʻofá?

⁴ Hili e taʻu nai ʻe 2,000 ʻo e hisitōlia ʻo e tangatá, naʻe tokonaki mai ʻe Sihova ha toe ngaahi fakaikiiki. Naʻá ne fakahā ko e Hakó ʻe hā ia ʻi he laine ʻo e fāmili ʻo ʻĒpalahamé. (Senesi 22:15-​18) Kae kehe, ko e laine ʻe hohoko mai ki he Hakó ʻe  makatuʻunga ia, ʻikai ʻi ha tukufakaholo fakaekakano, ka ʻi he fili ʻa e ʻOtuá. Neongo ʻa e ʻofa ʻa ʻĒpalahame ki hono foha ko ʻIsimeʻelí, ʻa ia naʻe fanauʻi ʻe Hekaʻaá, naʻe pehē ʻe Sihova: “Ko e fuakava mo au te u fakapapau ia mo Aisake, ʻa ia ʻe faʻeleʻi kiate koe ʻe Sela.” (Senesi 17:18-21) Ki mui mai, ko e fuakava ko iá naʻe fakapapauʻi, ʻo ʻikai ki he ʻuluaki fohá, ʻa ʻĪsoa, ka kia Sēkope, ʻa ia naʻe tukuʻau mei ai ʻa e matakali ʻe 12 ʻo ʻIsilelí. (Senesi 28:10-​14) ʻI he faai mai ʻa e taimí, naʻe fakahaaʻi ai ko e Hakó ʻe fanauʻi mai ia ʻi he matakali ʻo Siutá, ʻi he laine ʻo Tēvitá.​—Senesi 49:10; 1 Kalonikali 17:3, 4, 11-​14.

5. ʻI he taimi naʻe kamata ai ʻa e ngāue fakafaifekau ʻa Sīsū ʻi māmaní, ko e hā naʻá ne ʻai ke hā mahino ko ia ʻa e Mīsaiá?

⁵ Ko e hā ʻa e ngaahi fakamatala kehe naʻe ʻomai ko e ʻiloʻanga ia ʻo e Hakó? Laka hake he taʻu ʻe 700 ki muʻa, naʻe tala ʻe he Tohitapú ko Pētelihema ʻa e feituʻu ʻe fanauʻi fakaetangata ai ʻa e Hako ne talaʻofá. Naʻe toe fakaeʻa ai ko e Hakó naʻe ʻosi ʻi ai ia “mei he ngaahi ʻaho ʻo itaniti,” talu mei he taimi naʻe fakatupu ai ia ʻi hēvaní. (Maika 5:2) Ko e taimi tofu pē ko ia ʻo ʻene hā ʻi māmani ko e Mīsaiá naʻe toe tala ki muʻa mo ia, fakafou ʻi he palōfita ko Tanielá. (Taniela 9:24-​26) Pea ʻi he taimi naʻe pani ai ʻa Sīsū ʻaki ʻa e laumālie māʻoniʻoní, ʻo ne hoko moʻoni ai ko e Tokotaha Pani ʻa Sihová, ko e leʻo tonu ʻo Sihová mei hēvani naʻá ne fakamahinoʻi ia ko Hono ʻAló. (Mātiu 3:16, 17) Naʻe fakaeʻa ʻa e Hakó! Ko ia, naʻe malava ai ke lea ʻa Filipe ʻi he tuipau: “Ko e Toko Taha naʻe lea ki ai ʻa Mosese ʻi he Tohi Lao, mo e Kau Palofita, kuo mau ʻilo ia, ʻa Sīsū.”​—Sione 1:46 (Sione 1:45, PM).

6. (a) Fakatatau ki he Luke 24:27, ko e hā ʻa e meʻa naʻe hoko ʻo ʻilo ʻe he kau muimui ʻo Sīsuú? (e) Ko hai ʻa e konga tefito ʻo e ‘hako ʻo e fefiné,’ pea ko e hā ʻa e ʻuhinga ʻo ʻene laiki ʻa e ʻulu ʻo e ngatá?

⁶ Talu mei ai, mo e hoko ʻo ʻilo ʻe he kau muimui ʻo Sīsuú ko e ngaahi lave fakaekikite lahi moʻoni fekauʻaki mo iá kuo fakakau ia ʻi he ngaahi Konga Tohitapu fakamānavaʻí. (Luke 24:27) Naʻe hoko ʻo toe mahino ange ko Sīsū ʻa e konga tefito  ʻo e ‘hako ʻo e fefiné,’ ʻa e tokotaha te ne laiki ʻa e ʻulu ʻo e ngatá, ʻo laiki ʻa Sētane ke ʻoua ʻe toe ʻi ai. Fakafou ʻia Sīsū, ko e ngaahi talaʻofa kotoa ʻa e ʻOtuá ki he faʻahinga ʻo e tangatá, ʻa e ngaahi meʻa kotoa ʻoku tau mātuʻaki ʻunaloto ki aí, ʻe fakahoko ia.​—2 Kolinito 1:20.

7. Tānaki atu ki he ʻiloʻanga ʻo e Tokotaha ʻoku lave ki ai ʻi he ngaahi kikité, ko e hā ha toe meʻa ʻoku ʻaonga ke ʻiloʻi?

⁷ ʻOku totonu ke fēfē hono hanga ʻe he ʻiloʻi ʻo e meʻá ni ʻo ueʻi kitautolú? ʻOku talanoa ʻa e Tohitapú ki ha ʻiunoke ʻItiopea naʻá ne ʻosi lau ʻa e niʻihi ʻo e ngaahi kikite fekauʻaki mo e haʻu ʻa e Tokotaha Huhuʻí mo Mīsaiá. ʻI heʻene fifilí, naʻá ne ʻeke ange ki he ʻevangeliō ko Filipé: “Ko e lea ʻeni ʻa e palofita kia hai?” Naʻe ʻikai ke ngata pē ai ʻa e ʻiunoké ʻi he taimi naʻá ne maʻu ai ʻa e talí. Hili ʻene fanongo tokanga ki he fakamatala naʻe ʻoange ʻe Filipé, naʻe ʻiloʻi ʻe he tangatá ko hono mahinoʻi ʻa e kikite kuo fakahoko ko ení naʻe fiemaʻu ai ke fai ha ngāue mei heʻene tafaʻakí tonu. Naʻe mahino kiate ia naʻe fiemaʻu ke ne papitaiso. (Ngāue 8:32-​38; Aisea 53:3-9) ʻOku pehē ʻetau talí?

8. (a) Ko e hā naʻe tomuʻa fakatātaaʻi ʻe he feinga ko ia ʻa ʻĒpalahame ke feilaulauʻi ʻa ʻAisaké? (e) Ko e hā naʻe tala ai ʻe Sihova kia ʻĒpalahame ʻe tāpuekina ʻa e ngaahi puleʻanga kotoa pē kinautolu fakafou ʻi he Hakó, pea ʻoku fēfē hono ngāueʻaki eni kiate kitautolu he ʻaho ní?

⁸ Toe fakakaukau foki ki he fakamatala maongo ko ia ʻo e feinga ʻa ʻĒpalahame ke feilaulauʻi ʻa ʻAisaké, ʻa hono foha pē taha ʻia Selá. (Senesi 22:1-​18) Naʻe tomuʻa fakatātaaʻi ʻe he meʻa ko iá ʻa e meʻa ʻe fai ʻe Sihová ​—ʻa hono feilaulauʻi hono ʻAlo tofu-pē-taha-ne-fakatupú: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) ʻOku ʻomi ʻe he meʻá ni kiate kitautolu ha loto-falala he hangē pē ko ia ko hono foaki ʻe Sihova hono ʻAlo tofu-pē-taha-ne-fakatupú ke fakahoko ʻEne taumuʻá, te Ne toe “foaki mai  mo ia ʻa e meʻa kotoa pe.” (Loma 8:32) Ko e hā ʻoku fiemaʻu mei heʻetau tafaʻakí? Hangē ko ia ʻoku lēkooti ʻia Senesi 22:18, naʻe tala ʻe Sihova kia ʻĒpalahame ʻe tāpuekina ʻa e ngaahi puleʻanga kotoa pē kinautolu fakafou ʻi he Hakó, “koeʻuhia kuo . . . tuitala [ʻa ʻĒpalahame] ki he . . . lea [ʻa e ʻOtuá].” ʻOku fiemaʻu mo kitautolu foki ke tau fanongo kia Sihova mo hono ʻAló: “Ko ia ʻoku ne tui pikitai ki he ʻAlo ʻoku ne maʻu ʻa e moʻui taʻengata: ka ko ia ʻoku ʻikai te ne talangofua ki he ʻAlo ʻe ʻikai te ne mamata ia ki he moʻui; ka ʻoku nofo maʻu kiate ia ʻe he houhau ʻa e ʻOtua.”—Sione 3:36.

9. Kapau ʻoku tau houngaʻia ʻi he ʻamanaki ʻo e moʻui taʻengata ʻoku ʻai ʻo malava ʻe he feilaulau ʻa Sīsuú, ko e hā te tau faí?

 ⁹ Kapau ʻoku tau houngaʻia ʻi he ʻamanaki ʻo e moʻui taʻengata ʻoku ʻai ʻo malava ʻe he feilaulau ʻa Sīsuú, te tau loto ke fai ʻa e ngaahi meʻa ko ia kuo leaʻaki ʻe Sihova kiate kitautolu fakafou ʻia Sīsuú. ʻOku felāveʻi ʻa e ngaahi meʻá ni mo ʻetau ʻofa ko ia ki he ʻOtuá pea ki hotau kaungāʻapí. (Mātiu 22:37-​39) Naʻe fakahā ʻe Sīsū ko ʻetau ʻofa kia Sihová te ne ueʻi ai kitautolu ke akoʻi ʻa e niʻihi kehé “ke tauhi ʻa e ngāhi meʻa kotoa pe kuo . . . tuʻutuʻuni [ʻe Sīsū kiate kitautolú].” (Mātiu 28:19, 20) Pea ʻoku tau loto ke fevahevaheʻaki ʻa e ʻofa ko iá mo hotau ngaahi kaungā sevāniti ʻia Sihová ʻaki ʻa e “fakataha” maʻu pē mo kinautolu. (Hepelu 10:25; Kaletia 6:10) Pehē foki, ko e fanongo ki he ʻOtuá mo hono ʻAló, ʻoku totonu ke ʻoua te tau fakakaukau ʻokú na fiemaʻu ʻa e haohaoá meiate kitautolu. ʻOku pehē ʻe he Hepelu 4:15 (NW), ko Sīsuú, ʻi he tuʻunga ko hotau Taulaʻeiki Lahí, ʻoku lava ke ne “kaungā ongoʻi mo hotau ngaahi vaivaiʻangá.” He meʻa fakafiemālie moʻoni ko ia, tautefito ʻi he taimi ʻoku tau hanga ai ki he ʻOtuá ʻi he lotu fakafou ʻia Kalaisi ki ha tokoni ke ikuʻi hotau ngaahi vaivaiʻangá!​—Mātiu 6:12.

Fakahā ʻa e Tui kia Kalaisi

10. Ko e hā ʻoku ʻikai ai ha fakamoʻui tuku kehe ʻa Sīsū Kalaisi?

¹⁰ Hili hono fakahaaʻi ange ki he fakamaauʻanga māʻolunga faka-Siu ʻi Selusalemá ko e kikite ʻa e Tohitapú kuo fakahoko ia ʻia Sīsuú, naʻe fakaʻosi mālohi ʻe Pita: “ʻOku ʻikai ke tuʻu ʻi ha taha kehe ʻa e fakamoʻui; he talaʻehai ʻoku ʻi ai mo ha hingoa kehe ʻi he lalo langi kuo fokotuʻu ʻi he lotolotonga ʻo e kakai, ʻa ia kuo tuʻutuʻuni ke tau moʻui ai.” (Ngāue 4:12) Koeʻuhí ko e hako kotoa ʻo ʻĀtamá ko e kau angahala, ko ʻenau maté ʻe ʻikai hano mahuʻinga ʻona ʻe lava ke ngāueʻaki ko ha huhuʻi ki ha taha. Ka ko Sīsū ia naʻe haohaoa, pea ko ʻene moʻuí naʻe ʻi ai hono mahuʻinga fakaefeilaulau. (Sāme 49:6-9; Hepelu 2:9) Naʻá ne foaki ki he ʻOtuá  ha huhuʻi naʻe fehoanakimālie tofu pē hono mahuʻingá mo e moʻui haohaoa naʻe fakamoleki ʻe ʻĀtamá. (1 Timote 2:5, 6) Naʻe fakaava heni ʻa e hala kiate kitautolu ke maʻu ʻa e moʻui taʻengata ʻi he māmani foʻou ʻa e ʻOtuá.

11. Fakamatalaʻi pe ʻoku fēfē ʻa e malava ke ʻaonga lahi kiate kitautolu ʻa e feilaulau ʻa Sīsuú.

¹¹ ʻOku toe fakaava ʻe he huhuʻí ʻa e hala kiate kitautolu ke maʻu ʻa e ngaahi ʻaonga kehe, naʻa mo e taimí ni. Ko e fakatātaá, neongo ko e kau angahala kitautolu, ʻoku hanga ʻe he feilaulau ʻa Sīsuú ʻo ʻai ke malava ke tau maʻu ha konisēnisi maʻa koeʻuhí ko hono fakamolemoleʻi ʻo e angahalá. Ko e meʻa eni naʻe taumamaʻo fau ke faifai ange pea aʻusia ʻe he kau ʻIsilelí fou he ngaahi feilaulau monumanu naʻe fiemaʻu ʻe he Lao ʻa Mōsesé. (Ngāue 13:38, 39; Hepelu 9:13, 14; 10:22) Kae kehe, ko hono maʻu ha fakamolemole pehē ʻoku fiemaʻu ia ke tau ʻiloʻi totonu ʻoku tau fiemaʻu lahi ʻa e feilaulau ʻa Kalaisí: “Kapau ʻoku tau pehe ʻoku ʻikai haʻatau angahala, ta ʻoku tau kākāʻi ʻa kitautolu, pea ʻoku ʻikai ʻiate kitautolu ʻa e moʻoni. Kapau ʻoku tau vete ʻetau ngaahi angahala, ko ʻene anga fakamoʻoni talaʻofa, mo ʻene anga faitotonu, ʻoku na kau ke ne fakamolemole ʻetau ngaahi angahala, pea ke ne fakamaʻa ʻa kitautolu mei he faihala fulipe.”—1 Sione 1:8, 9.

12. Ko e hā ʻoku hoko ai ʻa e fakauku ʻi he vaí ko ha moʻoniʻi meʻa mahuʻinga ia ki hono maʻu ha konisēnisi lelei ʻi he ʻao ʻo e ʻOtuá?

¹² ʻE lava fēfē ke fakahaaʻi ʻe he kau angahalá ʻa e tui kia Kalaisi mo ʻene feilaulaú? ʻI he taimi naʻe hoko ai ʻa e kakai ʻi he ʻuluaki senitulí ko e kau tuí, naʻa nau fakahā fakahāhā ia. Anga-fēfē? Naʻa nau hoko ʻo papitaiso. Ko e hā hono ʻuhingá? Koeʻuhí naʻe tuʻutuʻuni ʻe Sīsū ke papitaiso ʻene kau ākongá kotoa. (Mātiu 28:19, 20; Ngāue 8:12; 18:8) ʻE ʻikai ke toupīkoi ha taha ʻi he taimi kuo ueʻi moʻoni ai hono lotó ʻe he tokonaki anga-ʻofa kuo fai ʻe Sihova fakafou ʻia Sīsuú. Te ne fai ha ngaahi fengaʻunuʻaki pē ʻe fiemaʻu ʻi heʻene moʻuí, ʻo fakatapui ia ki he ʻOtuá ʻi he lotu, pea fakahāhā ʻene fakatapuí ʻaki  ʻa e fakauku ʻi he vaí. Ko hono fakahāhā ia ʻa e tuí ʻi he founga ko ení ʻokú ne fai ai ʻa e ‘kole ki he ʻOtuá ki ha konisēnisi lelei.’​—1 Pita 3:21.

13. Kapau ʻoku tau ʻilo kuo tau fai ha angahala, ko e hā ʻoku totonu ke tau fai fekauʻaki mo iá, pea ko e hā hono ʻuhingá?

¹³ Ko e moʻoni, naʻa mo e hili ʻa e meʻá ni, ʻe kei hā pē ʻa e ngaahi tōʻonga angahalaʻia. Ko e hā leva ʻe faí? Naʻe pehē ʻe he ʻapositolo ko Sioné: “ʻOku ou tohi pehe atu koeʻuhi ke ʻoua te mou momoʻi angahala. Pea ka kuo fai ha angahala ʻe ha taha, ʻoku tau maʻu ha taukapo ki he Tamai, ko Sisu Kalaisi ko e faitotonu; pea ko e fakatupuhōifuaʻanga foki ia koeʻuhi ko ʻetau ngaahi hia.” (1 Sione 2:1, 2) ʻOku ʻuhinga ení ko e hā pē meʻa te tau faí, kapau te tau lotu ki he ʻOtuá ki ha fakamolemole, ʻe sai pē meʻa hono kotoa? ʻOku ʻikai pehē ia. Ko e kī ki he fakamolemolé ko e fakatomala moʻoni. ʻE toe fiemaʻu nai mo e tokoni mei he faʻahinga matuʻotuʻa ange mo taukei ange ʻi he fakatahaʻanga Kalisitiané. Kuo pau ke tau ʻiloʻi ʻa e hala ʻo e meʻa kuo faí pea ongoʻi fakaʻiseʻisa moʻoni ai koeʻuhí ka tau fai ha feinga fakamātoato ke fakaʻehiʻehi mei hano toe fai ia. (Ngāue 3:19; Semisi 5:13-​16) Kapau te tau fai eni, ʻe pau moʻoni ʻetau maʻu ʻa e tokoni ʻa Sīsuú mo hono toe fakafoki mai kiate kitautolu ʻa e hōifua ʻa Sihová.

14. (a) Fakamatalaʻi ha founga mahuʻinga kuo tau maʻu ʻaonga ai mei he feilaulau ʻa Sīsuú. (e) Kapau ʻoku tau maʻu moʻoni ʻa e tuí, ko e hā te tau faí?

¹⁴ Kuo hanga ʻe he feilaulau ʻa Sīsuú ʻo fakaava ʻa e hala ki he moʻui taʻengata ʻi hēvaní ki ha “fanga sipi toko siʻi,” ʻa e konga hono ua ʻo e hako ʻo e Senesi 3:15. (Luke 12:32; Kaletia 3:26-​29) Kuo toe fakaava ai mo e hala ki he moʻui taʻengata ʻi ha māmani palataisi ki he laui piliona ʻo e niʻihi kehe ʻo e faʻahinga ʻo e tangatá. (Sāme 37:29; Fakahā 20:11, 12; 21:3, 4) Ko e moʻui taʻengatá ko e “meaʻofa ʻa e ʻOtua . . . tuʻu ʻia Kalaisi Sisu ko hotau ʻEiki.” (Loma 6:23; Efeso 2:8-​10) Kapau ʻoku tau maʻu ha tui ki he meʻaʻofa ko iá pea houngaʻia ʻi he founga naʻe ʻai ai ia ke malavá, te tau ʻai ke eʻa eni. ʻI hono ʻiloʻi ʻa e  founga fakaofo kuo ngāueʻaki ai ʻe Sihova ʻa Sīsū ke fakahoko Hono finangaló mo e anga ʻene mātuʻaki mahuʻinga kiate kitautolu kotoa ke muimui ofi ʻi he vaʻe ʻo Sīsuú, te tau ʻai ʻa e ngāue fakafaifekau faka-Kalisitiané ko e taha ia ʻo e ngaahi ngāue mahuʻinga taha ʻi heʻetau moʻuí. Ko ʻetau tuí ʻe hā mahino ia mei he tuipau ʻoku tau tala ki he niʻihi kehé fekauʻaki mo e meʻaʻofa fisifisimuʻa ko eni mei he ʻOtuá.​—Ngāue 20:24.

15. ʻOku anga-fēfē maʻu ʻe he tui kia Sīsū Kalaisí ha ola fakafāʻūtahaʻi?

¹⁵ He ola lelei mo fakafāʻūtahaʻi ē ʻoku maʻu ʻe he tui peheé! Fakafou ai, ʻoku tohoaki ofi ai kitautolu kia Sihova, ki hono ʻAló, pea ki he tokotaha taki taha ʻo kitautolu ʻi he fakatahaʻanga faka-Kalisitiané. (1 Sione 3:23, 24) ʻOkú ne fakatupunga ai kitautolu ke fiefia he kuo foaki anga-ʻofa ʻe Sihova ki hono ʻAló “ha hingoa ʻoku maʻolunga ʻi he hingoa kotoa pe: [tuku kehe ʻa e huafa ʻo e ʻOtuá] koeʻuhi ke ʻilonga ha tui ʻi Langi mo Mamani mo Lolofonua pea peluki ʻi he huafa ʻo Sisu; pea ʻilonga ha ʻelelo, pea fakamoʻoni ko e ʻEiki ʻa Sisu Kalaisi—moʻo fakalangilangiʻi ʻa e ʻOtua ko e Tamai.”—Filipai 2:9-11.

Fetalanoaʻaki Fakamanatu

• ʻI he taimi naʻe hā ai ʻa e Mīsaiá, ko e hā naʻe māʻalaʻala ai hono ʻiloʻangá ki he faʻahinga ko ia naʻa nau tui moʻoni ki he Folofola ʻa e ʻOtuá?

• Ko e hā ʻa e niʻihi ʻo e ngaahi meʻa ʻoku totonu ke tau fai ke fakahaaʻiʻaki ʻetau houngaʻia ki he feilaulau ʻa Sīsuú?

• ʻI he ngaahi founga fē kuo tau ʻosi maʻu ʻaonga ai mei he feilaulau ʻa Sīsuú? ʻOku anga-fēfē hono tokoniʻi kitautolu ʻe he meʻá ni ʻi he taimi ʻoku tau lotu ai kia Sihova ki he fakamolemole ʻo ʻetau ngaahi angahalá?

[Fehuʻi ki he Ako]

[Fakatātā ʻi he peesi 36]

Naʻe tala ʻe Sīsū ki hono kau muimuí ʻoku totonu ke nau akoʻi ʻa e niʻihi kehé ke tauhi ʻa e ngaahi fekau ʻa e ʻOtuá