‘OKU ‘omai nai ‘e he lotú ha lelei kiate kitautolu? ‘Oku tala mai ‘e he Tohi Tapú ‘io, ‘oku ‘aonga mo‘oni ‘a e ngaahi lotu ‘a e kau sevāniti faitōnunga ‘o e ‘Otuá kiate kinautolu. (Luke 22:40; Sēmisi 5:​13) Ko hono mo‘oní, ko e lotú ‘e lava ke ne tokoni‘i kitautolu fakalaumālie, fakaeongo pea na‘a mo e fakaesino. Anga-fēfē?

Tau pehē pē ‘oku ‘i ai hao ki‘i tama ‘okú ne ma‘u ha me‘a‘ofa. Te ke ako‘i ange kiate ia ‘oku fe‘unga pē ke ongo‘i hounga‘ia? Pe te ke ako‘i ia ke ne fakahaa‘i ‘ene hounga‘iá? ‘I he taimi ‘oku tau fakahaa‘i ai ‘etau ngaahi ongo‘i mahu‘ingá, ‘oku tau tokangataha ai ki he ngaahi ongo‘i ko iá pea a‘u ‘o tau ongo‘i lahi ange ‘a e ngaahi ongo‘i ko iá. ‘Oku tatau eni mo e taimi ‘oku tau talanoa ai ki he ‘Otuá? ‘Aupito! Fakakaukau ki ha ngaahi fakatātā ‘e ni‘ihi.

Ngaahi lotu fakamālō. ‘I he‘etau fakamālō ki he‘etau Tamaí koe‘uhi ko e ngaahi me‘a lelei ‘oku tau ma‘ú, ‘oku tau tokangataha ai ki hotau ngaahi tāpuakí. Ko hono olá, te tau ongo‘i hounga‘ia lahi ange, fiefia lahi ange pea ongo‘i lelei lahi ange.​​—Filipai 4:6.

Fakatātaá: Na‘e fakahaa‘i ‘e Sīsū ‘a e hounga‘ia ki he founga na‘e fanongo mo tali ai ‘e he‘ene Tamaí ‘ene ngaahi lotú.​​—Sione 11:41.

Ngaahi lotu ki he fakamolemole. ‘I he‘etau kole ha fakamolemole ki he ‘Otuá, ‘oku tau fakaivimālohi‘i ai hotau konisēnisí, fakaloloto‘i ‘etau fakatomalá, pea fakalahi ‘etau lāu‘ilo ki he mafatukituki ko ia ‘o e angahalá. ‘Oku tau toe ma‘u foki mo e fakafiemālie koe‘uhi ko e mafasia ‘i he angahalá.

Fakatātaá: Na‘e lotu ‘a Tēvita ‘o fakahaa‘i ‘ene fakatomala mo ‘ene mamahi ‘i he me‘a na‘á ne faí.​​—Saame 51.

Ngaahi lotu ki ha tataki mo e poto. Ko e kole ko ia kia Sihova ke ne tataki kitautolu pe ‘omai ‘a e poto ‘oku tau fiema‘ú ke fai ‘aki ‘a e ngaahi fili leleí ‘e lava ke ne tokoni‘i kitautolu ke tau hoko ‘o anga-fakatōkilalo mo‘oni. ‘E lava ke fakamanatu mai ai kiate kitautolu hotau ngaahi fakangatangatá pea tokoni‘i kitautolu ke langa hake ‘etau falala ki he‘etau Tamai fakahēvaní.​​—Palōveepi 3:​5, 6.

Fakatātaá: Na‘e kole anga-fakatōkilalo ‘a Solomone ki ha tataki mo e poto ke pule‘i ‘aki ‘a ‘Isileli.​​—1 Tu‘i 3:​5-​12.

Ngaahi lotu ‘o e mamahi. Kapau te tau hua‘i atu hotau lotó ki he ‘Otuá ‘i he taimi ‘oku tau ongo‘i loto-mamahi aí, te tau ongo‘i fiemālie pea te tau falala ai kia Sihova kae ‘ikai kiate kitautolu.​​—Saame 62:8.

Fakatātaá: Na‘e lotu ‘a Tu‘i ‘Asa ‘i he‘ene fehangahangai mo ha fili fakatu‘utāmaki.​​—2 Kalonikali 14:11.

Ngaahi lotu ma‘á e ni‘ihi kehé. Ko e ngaahi lotu peheé ‘e tokoni‘i ai kitautolu ke faitau mo e siokitá pea tupulekina ‘i he manava‘ofa mo e kaungāongo‘i.

Fakatātaá: Na‘e lotu ‘a Sīsū ma‘a hono kau muimuí.​​—Sione 17:​9-​17.

Ngaahi lotu fakahīkihiki. ‘I he‘etau fakahīkihiki‘i ‘a Sihova ki he‘ene ngaahi ngāue fakaofó mo hono ngaahi ‘ulungāngá, ‘e tupulaki ‘etau faka‘apa‘apa mo e hounga‘ia kiate iá. ‘E tokoni‘i kitautolu ‘e he ngaahi lotu peheé ke ‘unu‘unu ofi ange ki hotau ‘Otuá mo e Tamaí.

Fakatātaá: Na‘e fakahīkihiki‘i loto-māfana ‘e Tēvita ‘a e ‘Otuá ki he‘ene fakatupú.​​—Saame 8.

Ko e toe tāpuaki ‘e taha ‘oku felāve‘i mo e lotú “ko e nonga ‘a e ‘Otuá ‘a ia ‘oku fakalaka atu ‘i he mahino kotoa pē.” (Filipai 4:7) Ko hono ma‘u ‘a e nonga ‘i he māmani fonu palopalema ko ení ko ha tāpuaki hāhāmolofia mo‘oni. ‘Oku toe ‘i ai foki mo hono ngaahi ‘aonga fakaesino. (Palōveepi 14:30) Ka te tau ma‘u ia ‘i he‘etau ngaahi feinga pē ‘atautolú? Pe ‘oku kaunga ki ai ha me‘a mahu‘inga ange?