‘I HE fekau‘aki mo e lotú, ‘oku tokangataha ‘a e ngaahi talatukufakaholo lahi ki he ngaahi tafa‘aki fakamatelie ‘o e lotú, hangē ko e anga e hu‘u ‘o e sinó, anga hono fakaleá, pea mo e ouau lotú. Neongo ia, ‘oku tokoni‘i kitautolu ‘e he Tohi Tapú ke tuku ki he tafa‘akí ‘a e ngaahi me‘a ko iá pea tokangataha ki he ngaahi tafa‘aki mahu‘inga ange ‘o e fehu‘i, “‘Oku totonu ke fēfē ‘etau lotú?”

‘Oku fakahaa‘i ‘i he Tohi Tapú ko e kau sevāniti faitōnunga ‘a e ‘Otuá na‘a nau lotu ‘i he ngaahi feitu‘u kehekehe pea na‘e kehekehe foki mo e anga e hu‘u honau sinó ‘i he taimi na‘a nau lotu aí. Na‘a nau lotu fakalongolongo pe lotu le‘o-lahi ‘o fakatatau pē ki he tu‘ungá. Na‘a nau lotu lolotonga ‘enau hanga ki ‘olunga ki he langí pe lolotonga ‘enau punou hifó. Na‘e ‘ikai ke nau ngāue‘aki ‘a e ngaahi ‘īmisí, kahoá pe ngaahi tohi lotú ke tokoni‘i kinautolu ke lotu, ‘i hono kehé na‘a nau lotu pē mei honau lotó ‘o ngāue‘aki ‘enau leá tonu. Ko e hā na‘á ne ‘ai ‘enau ngaahi lotú ke fakahōifua ki he ‘Otuá?

Hangē ko ia na‘e lave ki ai ‘i he kupu ki mu‘á, na‘a nau fakahanga ‘enau lotú ki he ‘Otua pē ‘e taha​—‘a Sihova. ‘Oku ‘i ai mo ha toe tafa‘aki mahu‘inga ‘e taha. ‘Oku tau lau ‘i he 1 Sione 5:​14: “‘Oku tau falala kiate ia he ‘ilonga ha me‘a ‘oku tau kole ‘o fakatatau ki hono finangaló, ‘okú ne fanongo mai kiate kitautolu.” Ko ‘etau ngaahi lotú ‘oku fiema‘u ke fehoanaki mo e finangalo ‘o e ‘Otuá. ‘Oku ‘uhinga ia ki he hā?

Ke lotu ‘o fehoanaki mo e finangalo ‘o e ‘Otuá, ‘oku fiema‘u ia ke tau ‘ilo‘i pe ko e hā hono finangaló. Ko ia ai ko hono ako ‘a e Tohi Tapú, ‘oku mātu‘aki mahu‘inga ia ki he lotú. ‘Oku ‘uhinga ení he‘ikai ke fanongo mai ‘a e ‘Otuá ia kae ‘oua kuo tau ‘ilo‘i ‘a e me‘a kotoa ‘i he Tohi Tapu? ‘Ikai, ka ‘oku ‘amanekina mai ‘e he ‘Otuá ke tau ako fekau‘aki mo hono finangaló, feinga ke mahino‘i ia pea fai ia. (Mātiu 7:​21-​23) ‘Oku fiema‘u ke tau lotu ‘o fehoanaki mo e me‘a ‘oku tau akó.

‘I he‘etau ako fekau‘aki mo Sihova mo hono finangaló, ‘oku tau tupulekina ai ‘i he tuí​—ko ha toe tafa‘aki mahu‘inga ia ‘i he lotú. Na‘e pehē ‘e Sīsū: “Pea ko e me‘a kotoa ‘oku mou lotu ‘o kolé, ‘i hono ma‘u ‘a e tuí, te mou ma‘u ia.” (Mātiu 21:22) Ko e tuí ‘oku ‘ikai ‘uhinga ia ke tui ki ha me‘a ‘oku ‘ikai ha fakamo‘oni ki ai. ‘I hono kehé, ‘oku ‘uhinga iá ke tui ki ha me‘a ‘oku ‘i ai ha fakamo‘oni mālohi ki ai, neongo ‘oku ‘ikai ke tau lava ‘o sio ki ai. (Hepelū 11:1) ‘Oku fonu ‘a e Tohi Tapú ‘i he fakamo‘oni ko Sihová, ‘a ia ‘oku ‘ikai lava ke tau sio ki aí, ‘okú ne ‘i ai mo‘oni, ‘okú ne falala‘anga, pea ‘okú ne loto-lelei ke tali ‘a e ngaahi lotu ‘a e fa‘ahinga ‘oku tui kiate iá. ‘Ikai ko ia pē, ‘oku lava ke tau kole ma‘u pē ki ha tui lahi ange, pea ko Sihová ‘okú ne sai‘ia ke ‘omai kiate kitautolu ‘a e me‘a ‘oku tau fiema‘ú.​​—Luke 17:5; Sēmisi 1:​17.

Ko e tafa‘aki mātu‘aki mahu‘inga eni ‘e taha ki he founga ke lotu aí. Na‘e pehē ‘e Sīsū: “‘Oku ‘ikai ha‘u ha taha ki he Tamaí ka ‘i he‘ene fou pē ‘iate au.” (Sione 14:6) Ko ia ko Sīsū pē ‘a e founga ‘e lava ke tau fakaofiofi ai ki he Tamaí, ‘a Sihova. Ko e ‘uhinga ia na‘e tala ange ai ‘e Sīsū ki he‘ene kau muimuí ke nau lotu ‘i hono hingoá. (Sione 14:13; 15:16) ‘Oku ‘ikai ‘uhinga ia ‘oku totonu ke tau lotu kia Sīsū. ‘I hono kehé, ‘oku tau lotu ‘i he hingoa ‘o Sīsuú, ‘o manatu‘i ko Sīsū ‘a e ‘uhinga ‘oku malava ai ke tau fakaofiofi ki he‘etau Tamai haohaoa mo mā‘oni‘oní.

‘I ha taimi ‘e taha na‘e ‘eke ange ‘e he kau muimui ‘a Sīsuú kiate ia: “‘Eiki, ako‘i kimautolu ki he founga ke lotu aí.” (Luke 11:1) ‘Oku hā mahino, na‘e ‘ikai ke nau ‘eke fekau‘aki mo e ngaahi me‘a tefito ‘a ia na‘a tau toki lāulea ki aí. Na‘a nau fiema‘u mo‘oni ke ‘ilo‘i ‘a e me‘a ke fakakau ‘i he‘enau lotú​—‘o hangē pē ia ha‘anau ‘eke ange, ‘Ko e hā ‘oku totonu ke mau lotu fekau‘aki mo iá?’