Vahe 5

Tauʻatāina ʻOku Maʻu ʻe he Kau Lotu kia Sihová

1, 2. (a) Ko e hā ʻa e faʻahinga tauʻatāina naʻe ʻoange ʻe he ʻOtuá ki he ʻuluaki ongo mātuʻá? (e) Lave ki he niʻihi ʻo e ngaahi lao naʻá ne puleʻi ʻa ʻena ngaahi ngāué.

 ʻI HONO fakatupu ʻe Sihova ʻa e ʻuluaki ongo mātuʻá, naʻá na maʻu ʻa e tauʻatāina naʻe taumamaʻo ange ia ʻi ha tauʻatāina ʻoku maʻu ʻe he faʻahinga ʻo e tangatá he ʻahó ni. Ko hona ʻapí ko e Palataisi. Naʻe ʻikai ha mahaki te ne fakameleʻi ʻa ʻena fiefia ʻi he moʻuí. Naʻe ʻikai te na fakatuʻotuʻa atu ki he maté. Ka ko hono tokaʻi ʻa e ngaahi lao ʻa e ʻOtuá ko e meʻa mahuʻinga ia ke hokohoko atu ai ʻa ʻena maʻu ʻa e tauʻatāina pehe ní.

² Naʻe ʻikai ke fakahā nai ʻi ha ngaahi lea ʻa e niʻihi ʻo e ngaahi lao ko iá, ka naʻe ngaohi ʻa ʻĀtama mo ʻIvi ʻi ha founga ʻa ia ke fakaenatula pē kiate kinaua ʻa ʻena tauhi ʻa e ngaahi lao ko iá. Ko ia ai, naʻe fakahaaʻi ʻe he fiekaiá ʻa e fiemaʻu ke kai; ko e fieinuá ʻa e fiemaʻu ke inu. Ko e tō ʻa e laʻaá naʻá ne ueʻi ai kinaua ke mālōlō mo mohe. Naʻe folofola foki ʻa Sihova kiate kinaua mo ʻoange kiate kinaua ha ngāue ke na fai. Ko hono moʻoní ko e ngāue ko iá ko ha lao, koeʻuhi he te ne puleʻi ʻa e meʻa te na faí. Ka ko ha toki lao anga-ʻofa mo ʻaonga lahi ē! Naʻe ʻoange ʻe he lao ko ení kiate kinaua ʻa e ngāue ʻe hoko ʻo na fiemālie fakaʻaufuli ai, ʻo na malava ai ke ngāueʻaki ʻa ʻena ngaahi malavá ki he kakato tahá ʻi ha ngaahi founga ʻaonga. Ko e taumuʻa ke na maʻu ai ʻa e fānau, pule ki he ngaahi meʻa moʻui ʻi he māmaní pea faifai atu pē mo hono fakalahi ʻo e Palataisí kaeʻoua kuo pehē ʻa e foʻi kolopé kotoa. (Sēn. 1:28; 2:15) Naʻe ʻikai ke fakakavengaʻi kinaua ʻe he ʻOtuá ʻaki ha ngaahi meʻa fakaikiiki taʻeʻaonga. Naʻe fakaʻatā feʻunga pē kiate kinaua ke fai ʻena ngaahi filí. Ko e hā ʻe toe fiemaʻu ʻe ha taha?

3. Ko e hā naʻá ne mei tokoniʻi ʻa ʻĀtama ke ngāuefakapotopotoʻaki ʻa ʻene tauʻatāina ke fai ʻene ngaahi filí?

 ³ Ko hono moʻoní, ʻi hono tuku ʻa e faingamālie kia ʻĀtama ke fai ai ʻene ngaahi filí, naʻe ʻikai ke ʻuhinga ia ʻe iku ki he ngaahi ola lelei ha faʻahinga fili pē te ne fai, ʻo tatau ai pē pe ko e hā ʻa e fili ko iá. Naʻe fakafekauʻaki ʻa ʻene tauʻatāina ke fai ʻa e ngaahi filí mo e fua fatongia. Naʻe malava ke ne ako ʻo ʻilo ʻaki ʻene fanongo ki heʻene Tamai fakahēvaní mo vakai ki Heʻene ngaahi ngāué. Naʻe ʻoange foki ʻe he ʻOtuá kia ʻĀtama ʻa e poto ke ne malava ai ke ngāueʻaki ʻa e meʻa kuó ne akó. Koeʻuhi naʻe ngaohi ʻa ʻĀtama “ʻi he imisi ʻo e ʻOtua,” ko ʻene hehema fakaenatulá ke fakahā ʻa e ngaahi anga fakaʻotuá ʻi he taimi ʻoku fai ai ʻene ngaahi filí. Ko hono moʻoní kapau naʻá ne houngaʻia moʻoni ʻi he meʻa naʻe fai ʻe he ʻOtuá maʻaná mo ne fie fakahōifua ki he ʻOtuá naʻá ne tokanga ke fai ʻa e meʻa ko iá.​—Sēn. 1:26, 27; fehoanaki mo Sione 8:29.

4. (a) Naʻe toʻo ʻe he fekau fakangatangata naʻe tuku kia ʻĀtamá ʻa ʻene tauʻatāiná? (e) Ko e hā naʻe feʻungamālie ai pē ʻa e fiemaʻu ko iá?

⁴ Ko ha fakamanatu ki he fakafalala ʻa e tangatá ki hono Tokotaha-Fakatupú mo e Tokotaha-Foaki-Moʻuí, naʻe tuku ai ʻe Sihova ʻa e fekau ko ení kiate ia: “ʻE lelei ʻaupito hoʻo kai mei he ngahi ʻakau kehekehe ʻo e ngoue; ka ko e ʻAkau ʻo e ʻIlo-ʻo-e-lelei-mo-e-kovi ʻe ʻikai te ke kai mei ai: he ko e ʻaho te ke kai mei ai kuo pau te ke mate.” (Sēn. 2:16, 17) Naʻe toʻo ʻe he lao ko iá ʻa e tauʻatāiná mei he tangatá? ʻIkai ʻaupito. Naʻe tauʻatāina ʻa ʻĀtama ke talangofua pe talangataʻa. Naʻe ʻikai fakakavenga ʻa e tapui ko ení. Naʻe hulu atu ʻa e meʻa ke kaí kaeʻoua te ne ala ki he fuʻu ʻakau pē ko ení ʻe taha. Kaekehe, naʻe feʻungamālie pē ke ne ʻilo ko e māmani ko ia ʻokú ne nofo aí ʻoku ʻa e ʻOtuá ia, pea ʻi hono tuʻunga ko e Tokotaha-Fakatupú, ko e ʻOtuá ko e Pule totonu ia ki heʻene fakatupú.​—Sāme 24:1, 10.

5. (a) Naʻe anga-fēfē ʻa e mole meia ʻĀtama mo ʻIvi ʻa e tauʻatāina lāngilangiʻia naʻá na maʻú? (e) Ko e hā naʻe hoko ʻo ne fetongi iá, pea kuo anga-fēfē ʻa ʻene uesia kitautolú?

⁵ Ka ko e hā ʻa e meʻa naʻe hokó? ʻI hono ueʻi ʻe he holi siokita mālohi, ne kākaaʻi ai ʻe ha ʻāngelo ʻa ʻIvi ʻaki ʻene fakangalingali ko ha tataki moʻoni, ʻo fakapapauʻi kia ʻIvi ha meʻa ʻoku kehe ʻaupito ia mei he finangalo ʻo e ʻOtuá. ʻI he ʻikai ke talangofua ʻa ʻĀtama ki heʻene Tamaí naʻe kau ia mo ʻIvi ʻi he laka halá. ʻI heʻena havala ki he meʻa naʻe ʻikai ko  haʻana meʻá, naʻe mole ai meia ʻĀtama mo ʻIvi ʻa e tauʻatāina lāngilangiʻia naʻá na maʻú. Naʻe hoko leva ʻa e angahalá ko ha pule kiate kinaua, pea hangē ko ia naʻe fakatokanga ki ai ʻa e ʻOtuá, naʻe pau leva ke na fehangahangai mo e maté. Ko e hā leva ʻa e meʻa naʻá na tukufakaholo mai ki heʻena fānaú? Ko e angahala, ʻa ia ʻoku hā ʻi ha hehema ʻoku fanauʻi pē mo kita ke te faihala, pea ʻi he ngaahi vaivaiʻanga ko ia ʻokú ne ʻai kita ke te moʻuangofua ki ha mahaki pea faifai atu ʻo aʻu ki he hoholo ʻi he fakaʻau ke motuʻá. Pea toe pehē foki ki he maté. Ko e hehema tukufakaholo ke faihalá, ʻa ia ʻoku fakaʻāsili hono koví ʻe he tākiekina faka-Sētané, kuó ne ʻomai ki he kakaí ha moʻui kuo fakatuʻutāmaki ki he tokotaha kotoa pē. Ko ha faikehekehe lahi ē mo e tauʻatāina ko ia naʻe ʻoange ʻe he ʻOtuá ki he faʻahinga ʻo e tangatá ʻi he kamataʻangá!​—Loma 5:12; Siope 14:1; Fkh. 12:9.

Tuʻunga ʻOku Maʻu mei Ai ʻa e Tauʻatāiná

6. (a) ʻOku malava ke maʻu mei fē ʻa e tauʻatāina moʻoní? (e) Ko e hā ʻa e faʻahinga tauʻatāina naʻe lave ki ai ʻa Sīsū ʻia Sione 8:31, 32?

⁶ Koeʻuhi ko e ngaahi tuʻunga ʻo e ʻaho ní, ʻoku ʻikai ha ofo ʻi he fakaʻamu ʻa e kakaí ki ha tauʻatāina lahi ange. Ka ʻoku malava ke maʻu mei fē ʻa e tauʻatāina moʻoní? Naʻe pehē ʻe Sīsū Kalaisi: “Kapau te mou nofo maʻu ʻi heʻeku akonaki, ko ʻeku kau ako moʻoni kimoutolu; pea ʻe faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni.” (Sione 8:31, 32) ʻOku ʻikai ko e faʻahinga tauʻatāina fakangatangata eni ʻa ia ʻoku ʻamanekina ʻe he tangatá ʻi he taimi ʻoku nau siʻaki ai ha pule fakapolitikale ʻe taha pe ko ha founga-pule ka nau fili ha taha kehe. Ka, ko e tauʻatāina ia ko ení ʻoku aʻu tonu ki he tefito ʻo e ngaahi palopalema ʻo e faʻahinga ʻo e tangatá. Ko e meʻa naʻe lave ki ai ʻa Sīsuú ia ko e tauʻatāina mei he angahalá, ko e nofo hopoate ki he angahalá. (Vakai kia Sione 8:24, 34-36.) Ko ia kapau ʻe hoko ha taha ko ha ākonga moʻoni ʻa Sīsū Kalaisi, ʻe hoko ha liliu hā mahino ʻi heʻene moʻuí, ko ha fakatauʻatāina.

7. (a) Ko ia, ʻi he founga fē ʻoku malava ai ke tau tauʻatāina mei he angahalá he taimí ni? (e) Ko e hā ʻa e meʻa kuo pau ke tau faí kae maʻu ʻa e tauʻatāina ko iá?

⁷ ʻOku ʻikai ʻuhinga eni ia ʻo pehē heʻikai ke kei ongoʻi ʻe he kau Kalisitiane moʻoní he taimí ni ʻa e ngaahi nunuʻa ʻo e hehema ko ia ki he ʻulungaanga angahalá naʻe fanauʻi pē mo  kitá. Ko hono kehe ʻaupitó, te nau fekuki koeʻuhi ko e meʻa ko iá. (Loma 7:21-25) Ka ʻo kapau ʻe moʻui moʻoni ha taha ʻo fehoanakimālie mo e ngaahi akonaki ʻa Sīsuú, heʻikai te ne kei hoko ko ha pōpula māʻulalo ki he angahalá. ʻE ʻikai ke kei hoko kiate ia ʻa e angahalá ʻo hangē ha tuʻi ʻa ia ʻokú ne ʻoatu ha ngaahi tuʻutuʻuni ke ne talangofua ki ai. ʻE ʻikai ke kei ʻefihia ia ʻi ha founga moʻui ʻoku ʻikai ke ʻi ai hano taumuʻa pea mo tuku kiate ia ha konisēnisi hohaʻa. Te ne maʻu ha konisēnisi maʻa ʻi he ʻao ʻo e ʻOtuá koeʻuhi kuo fakamolemoleʻi ʻa ʻene ngaahi angahala ki muʻá ʻo fakatuʻunga ʻi heʻene tui ki he feilaulau ʻa Kalaisí. ʻE kei feinga pē nai ʻa e ngaahi hehema angahalá ke tutui atu, ka ʻi heʻene fakafisi ke ngāue ʻo fakatatau ki aí koeʻuhi ko ʻene manatuʻi ʻa e ngaahi akonaki maʻa ʻa Kalaisí te ne fakahāhā ai ʻoku ʻikai ko ha pule ʻa e angahalá kiate ia.​—Loma 6:12-17.

8. (a) Ko e hā ʻa e tauʻatāina lahi ange ʻoku ʻomai kiate kitautolu ʻe he lotu faka-Kalisitiane moʻoní? (e) Ko e hā ʻa e kaunga ʻa e meʻá ni ki he anga ʻo ʻetau fakakaukau ki he kau pule fakaemāmaní?

⁸ ʻI heʻetau hoko ko ha kau Kalisitiané ʻoku tau maʻu ai ʻa e tauʻatāina lahi. Kuo fakatauʻatāinaʻi ai kitautolu mei he ngaahi nunuʻa ʻo e ngaahi akonaki loi, mei he haʻisia ki he manavahē taʻeʻuhinga mo e nofo pōpula ki he angahalá. Kuo fakatauʻatāinaʻi ai ʻa kitautolu ʻe he ngaahi moʻoni maʻongoʻonga ʻo fekauʻaki mo e tuʻunga ʻo e maté pea mo e toetuʻú mei he manavahē taʻefaituʻunga ki he mate ʻi ha founga fakamālohi ʻa ia ʻokú ne ʻai ʻa e tangatá ke ne lōmekina hono konisēnisí. ʻI hono ʻiloʻi ʻe fetongi ʻe he Puleʻanga māʻoniʻoni ʻo e ʻOtuá ʻa e ngaahi founga-pule fakaetangata taʻehaohaoá ʻokú ne fakatauʻatāinaʻi ai kitautolu mei he ongoʻi ʻoku ʻikai toe ʻi ai ha ʻamanakí. Ka ʻoku ʻikai ke fakatonuhiaʻi ʻe he faʻahinga tauʻatāina peheé ke tau taʻetokaʻi ai ʻa e laó pe taʻe fakaʻapaʻapaʻi ʻa e kau ʻofisa fakapuleʻangá koeʻuhi ko e pehē ʻe vavé ni ke mole atu ʻa e fokotuʻutuʻu motuʻá ni.​—1 Pita 2:16, 17; Tai. 3:1, 2.

9. (a) ʻOku anga-fēfē ʻa hono tokoniʻi anga-ʻofa kitautolu ʻe Sihova ke tau maʻu ʻa e tuʻunga tauʻatāina lahi taha ʻoku malava ke maʻu ʻe he faʻahinga ʻo e tangatá he taimí ni? (e) ʻI hono fai ha ngaahi fili, ʻoku malava fēfē ke tau fakahāhā ʻoku mahino lelei kiate kitautolu ʻa e nunuʻa ʻo hono ngāuehalaʻaki ʻe ʻĀtama ʻa ʻene tauʻatāiná?

⁹ ʻOku ʻikai ke tuku mai ʻe Sihova kiate kitautolu ke tau ʻahiʻahiʻi ʻa e ngaahi founga kehekehe ʻo fakafuofuaʻi pē pe ko fē ʻa e founga lelei taha ke moʻuiʻakí. ʻOkú ne ʻafioʻi ʻa e anga  ʻo hotau faʻungá, ʻa e meʻa te ne ʻomai kiate kitautolu ʻa e fiemālie moʻoní pea mo e ongoʻi ʻo e ngeia fakaekitá, pea mo e meʻa ʻe hoko ʻo ʻaonga tuʻuloa lahi taha kiate kitautolú. ʻOkú ne toe ʻafioʻi ʻa ʻene taimi pē ʻaʻana kuó ne kotofa ke fakahoko ai ʻa ʻene taumuʻá, pea mo e ngaahi meʻa foki ʻoku ʻaonga lahi taha kiate kitautolu ke tau faí. ʻOkú ne toe lāuʻilo foki ki he ngaahi fakakaukau mo e tōʻonga ʻa ia ʻoku malava ke ne fakamāʻulaloʻi ha taha pe maumauʻi ʻa hono vā mo e niʻihi kehé, ʻo aʻu ʻo taʻofi ai ia mei hono maʻu ʻa e ngaahi tāpuaki ʻa e Puleʻanga ʻo e ʻOtuá. ʻOkú ne fakahā anga-ʻofa mai kiate kitautolu ʻa e ngaahi meʻá ni ʻo fakafou mai ʻi he Tohitapú pea pehē ki heʻene kautaha hā maí. (Kal. 5:19-23; Mk. 13:10; fehoanaki mo 1 Tīmote 1:12, 13.) Ko ia ko e faʻiteliha pē ia ʻa kitautolu ke fili pe ko e hā ʻa e meʻa te tau fai ʻi hono ngāueʻaki ʻa e tauʻatāina kuo foaki mai ʻe hotau ʻOtuá. Kapau kuo tau tukulotoʻi ʻa e meʻa ʻoku tala mai kiate kitautolu ʻe he Tohitapú ʻo fekauʻaki mo e founga naʻe mole ai meia ʻĀtama ʻa e tauʻatāina naʻe foaki ki he faʻahinga ʻo e tangatá ʻi he kamataʻangá, te tau fai fakapotopoto leva ʻa e ngaahi fili ko iá. Te tau fakahāhā leva ko e meʻa ʻoku tau tokanga tefito ki ai ʻi heʻetau moʻuí ko ha vahaʻangatae lelei mo Sihova.

Ko e Mātuʻaki Holi ki ha Faʻahinga Tauʻatāina ʻe Taha

10. Ko e hā ʻa e faʻahinga tauʻatāina kuo kakapa atu ki ai ʻa e faʻahinga ʻe niʻihi ʻoku nau taukaveʻi ko e kau Kalisitiane ʻa kinautolu?

¹⁰ ʻI he taimi ʻe niʻihi ʻoku kamata nai ke fiemaʻu ha faʻahinga tauʻatāina ʻe taha ʻe he kau talavou ʻe niʻihi naʻe tupu hake ko e Kau Fakamoʻoni ʻa Sihová, pea toe pehē pē ki he niʻihi ʻoku ʻikai te nau kei taʻu siʻí. ʻOku hā ngali fakaholomamata nai ʻa e māmaní kiate kinautolu, pea ko e lahi ange ʻa ʻenau fakakaukau ki aí ko e mālohi ange ia ʻa ʻenau holi ke fai ʻa e ngaahi meʻa ʻoku fai ʻe he kakai ʻo e māmaní. ʻOku ʻikai nai te nau taumuʻa ke fakafiemālieʻi honau lotó ʻaki ʻa e faitoʻo kona tapú, ke inu ʻo fuʻu lahi pe ke fai feʻauaki. Ka ʻoku kamata ke nau fakamoleki ha taimi ʻi he hili ʻa e akó pe ko e ngāué mo e kaungāmeʻa fakamāmaní. Ko hono moʻoní ʻoku nau saiʻia ke tali lelei kinautolu ʻe honau kaungāmeʻa foʻoú, ko ia ʻoku kamata ke nau faʻifaʻitaki ki heʻenau leá mo honau ʻulungaangá.​—3 Sione 11.

11. ʻOku hoko mei fē ʻi he taimi ʻe niʻihi ʻa e fakatauele ke fai ʻa e meʻá ni?

 ¹¹ ʻI he taimi ʻe niʻihi ʻoku hoko mai ʻa e fakatauele ke fai ʻa e ʻulungaanga anga-fakamāmaní mei ha tokotaha ʻoku taukaveʻi ʻokú ne tauhi ʻa Sihova. Ko e meʻa ia naʻe hoko ʻi ʻĪteni ʻi he taimi naʻe kākaaʻi ai ʻe Sētane ʻa ʻIví, pea mo e taimi naʻe fakaʻaiʻai ai ʻe ʻIvi ʻa ʻĀtama ke ne kau mo iá. Naʻe toe hoko ia ʻi he lotolotonga ʻo e muʻaki kau Kalisitiané, pea ʻoku hoko ʻa e meʻa tatau pē ʻi hotau ʻahó ni. ʻOku faʻa saiʻia ʻa e faʻahinga peheé ki he fiemālié pea ʻoku nau mātuʻaki holi ki he ngaahi meʻa ʻokú ne ʻomai ʻa e fiefia lahi ʻaupito. ʻOku nau fakaʻaiʻai ʻa e niʻihi kehé ke nau “kiʻi laka.” ʻOku nau ‘talaʻofa kiate kinautolu ha tauʻatāina, ʻosi ko e koto pōpula kinautolu ki he ʻauha.’​—2 Pita 2:18, 19.

12. (a) Ko e hā ʻa e ngaahi nunuʻa fakamamahi ʻo e ʻulungaanga fakamāmaní? (e) Kapau ʻoku ʻilo ʻe he faʻahinga ʻoku nau kau ki aí ʻa e ikuʻangá, ko e hā ʻoku nau kīvoi ai ʻi hono fai ʻa e ngaahi meʻa pehe ní?

¹² ʻOku ʻikai lelei ʻa e fua ʻoku maʻu mei aí. ʻOku hoko ʻa e hohaʻa fakaeongo ʻi hono fai noaʻia pē ʻa e fehokotaki fakasinó. ʻOku toe iku nai foki ia ki ha mahaki, hoko ai mo e feitama ʻoku ʻikai fiemaʻu pea malava ai ke movete ha nofo mali. (Pal. 6:32-35; 1 Kol.1Ko 6:18; 1 Tes. 4:3-8) ʻOku malava ke fakatupu ʻi hono ngāuehalaʻaki ʻa e faitoʻo kona tapú ʻa e ʻitangofua, heheu ʻa e leá, nenefu ʻa e sió, ninimo, mānavatāmaki, ko e sio ʻoku fotu mai ha meʻa ka ʻoku ʻikai moʻoni, pea mo e maté foki. (Fehoanaki mo Palōvepi 23:29-35.) ʻOku malava ke ne maʻu kita, ʻo ne taki nai ai kita ki he faihia koeʻuhi ke tokoniʻiʻaki ʻa hono fai ʻo e tōʻonga ko iá. Ko e faʻahinga ko ia ʻoku nau kau ki he ʻulungaanga peheé ʻoku nau faʻa ʻilo ʻa e meʻa ʻoku malava ke hoko mei aí. Ka ʻi heʻenau mātuʻaki holi ki he fiefiá mo fakafiemālieʻi ʻenau ngaahi holi fakaekakanó ʻoku ueʻi ai kinautolu ke ʻoua te nau fakakaukau ki he ngaahi nunuʻa ʻe malava ke hokó. ʻOku nau pehē kiate kinautolu pē ko e tauʻatāiná ia, ka ʻoku nau toki ʻilo, ʻo fuʻu tōmui, kuo nau hoko ko e kau pōpula ki he angahala, pea ko ha toki pule anga-fakamamahi ē ka ko e angahalá! ʻI ha fakakaukau lahi ki he meʻa ko iá he taimí ni ʻoku malava ke tokoni ia kiate kitautolu ke maluʻi kitautolu mei ha meʻa pehē.​—Kal. 6:7, 8.

 Ko e Tupuʻanga ʻo e Ngaahi Palopalemá

13. (a) ʻOku anga-fēfē ʻa hono faʻa fakalanga hake ʻa e ngaahi holi ko ia ʻoku taki atu ki he ngaahi palopalema ko ení? (e) Ke mahino pe ko hai ʻa e “kaungāmeʻa kovi,” ko e fakakaukau ʻa hai ʻoku fiemaʻu kiate kitautolú? (f) ʻI hoʻo tali ʻa e ngaahi fehuʻi ʻi he ngataʻanga ʻo e palakalafí, fakamamafaʻi ʻa e anga ʻo e vakai ʻa Sihová. Tali tahataha ʻa e ngaahi fehuʻí ni.

¹³ Kiʻi fakakaukau ange ʻo kau ki he tupuʻanga ʻoku faʻa hoko mei ai ʻa e ngaahi palopalema ko ení. ʻOku fakamatala ʻa e Tohitapú: “Ka ʻoku ʻahiʻahiʻi ʻa e tangata taki taha he tohoaki ia ʻe heʻene holi aʻana, mo taki ʻaki ha mounu. Faifai pea tuʻituʻia ʻa e holi ko ia, ʻo ne fanauʻi ha angahala: pea ko e angahala ko ia, ʻo ka kakato, ʻoku ne faʻeleʻi ʻa e mate.” (Sēm. 1:14, 15) Ka ʻoku anga-fēfē ʻa hono fakalanga hake ʻo e ngaahi holi ko iá? ʻAki ʻa e meʻa ʻoku ʻalu ki he fakakaukaú, pea ko e meʻa ia ʻoku faʻa hoko ʻi he feohi mo e kakai ʻoku ʻikai te nau ngāueʻaki ʻa e ngaahi tefitoʻi moʻoni faka-Tohitapú. Ko hono moʻoní, ʻoku tau ʻilo kotoa ʻoku totonu ke tau fakaʻehiʻehi mei he “kaungāmeʻa kovi.” Ka ko e fehuʻí, Ko fē ʻa e ngaahi kaungāmeʻa ʻoku koví? Ko e hā ʻa e vakai ʻa Sihova ki he meʻa ko iá? ʻI he fakakaukau lahi ki he ngaahi fehuʻi mo e ngaahi konga Tohitapu ʻoku hā ʻi laló te ne tokoniʻi kitautolu ke tau aʻu ki he ngaahi fakamulituku totonú.

ʻOku ʻuhinga ʻa e hā ngali ʻulungaanga lelei ʻa ha kakai ʻe niʻihi, te nau hoko ko ha ngaahi kaungāmeʻa lelei? (Fehoanaki mo Sēnesi 34:1, 2, 18, 19, PM.)

ʻOku malava ʻe heʻenau fetalanoaʻakí, mo ʻenau ngaahi fakakatá nai, ke fakahāhā pe ʻoku totonu ke tau kau ki ha feohi vāofi mo kinautolu? (ʻEf. 5:1-3 [ʻEf. 5:3, 4, PM])

ʻOku ʻi ai ha ʻuhinga ke tau hohaʻa ʻo kapau ʻoku ʻikai te nau tui ki he ngaahi meʻa tatau mo ia ʻoku tau tui ki ai ʻo fekauʻaki mo e taumuʻa ʻa e ʻOtuá? (Fehoanaki mo 1 Kolinitō 15:12, 32, 33.)

ʻE fēfē ʻa e ongoʻi ʻa Sihová ʻo kapau ʻoku tau fili ke feohi mo e kakai ʻa ia ʻoku ʻikai te nau ʻofa kiate iá? (Fehoanaki mo 2 Kalonikali 19:1, 2.)

Neongo ʻoku tau ngāue fakataha nai mo e kau taʻetuí pe ako fakataha mo kinautolu, ʻe malava fēfē ke tau fakahāhā ʻoku ʻikai te tau fili ke feohi mo kinautolu? (1 Pita 4:3, 4)

Ko e mamata ki he televīsoné pea mo hono lau ʻo e ngaahi tohí, ngaahi makasiní mo e ngaahi nusipepá ko ha toe ngaahi founga ia ʻo e feohi mo e niʻihi kehé. Ko e hā ʻa e faʻahinga meʻa mei he ngaahi meʻá ni ʻoku ʻi ai ʻa e fiemaʻu makehe ke tau fakaʻehiʻehi mei ai ʻi he ngaahi ʻaho ko ení? (Pal. 3:31; ʻAi. 8:19; ʻEf. 4:17-19)

 ʻOku fakahā kia Sihova ʻe heʻetau fili ki he kaungāmeʻá ko e faʻahinga fēfē kitautolu? (Sāme 26:1, 4, 5; 97:10)

14. Ko e hā ʻa e tauʻatāina maʻongoʻonga ʻoku ʻi muʻa ʻi he faʻahinga ʻoku nau ngāueangatonuʻaki ʻa e akonaki ʻa e Folofola ʻa e ʻOtuá he taimí ni?

¹⁴ ʻI muʻa ʻiate kitautolu ʻoku fotu mai ai ʻa e Fokotuʻutuʻu Foʻou ʻa e ʻOtuá. ʻE fakatauʻatāinaʻi ʻe Hono Puleʻangá ʻa e faʻahinga ʻo e tangatá mei he nofo pōpula ki he tākiekina ʻa Sētané mo e ngaahi meʻa kotoa ʻo ʻene fokotuʻutuʻu anga-fulikivanú. ʻE faifai atu pē ʻo toʻo kotoa ʻa e ngaahi nunuʻa ʻo e angahalá mei he faʻahinga ʻo e tangatá. ʻE ʻi muʻa leva ʻiate kinautolu ʻa e moʻui taʻengata ʻi he Palataisí. ʻE faifai atu pē ʻo maʻu ʻe he ngaahi meʻa moʻui fakatupu kotoa pē ʻa e tauʻatāina kakato ko ia ʻoku fehoanaki-mālie mo e “laumālie ʻo Sihova.” (2 Kol.2Ko 3:17, NW) ʻE ʻuhinga lelei nai ke tau ʻai kitautolu ki he tuʻunga ʻe malava ke mole kotoa ai ʻa e ngaahi meʻa ko iá koeʻuhi ko ʻetau fakamaʻamaʻaʻi ʻa e akonaki ʻa e Folofola ʻa e ʻOtuá he taimí ni? ʻOfa ke tau fakahāhā mahino ʻi he founga ʻoku tau ngāueʻi ai ʻa ʻetau tauʻatāina faka-Kalisitiané he ʻahó ni ko e meʻa ʻoku tau mātuʻaki fiemaʻú ko e “tauʻataina fakalangi ʻa e fanau ʻa e ʻOtua.”​—Loma 8:21.

Fetalanoaʻaki ʻo Fakamanatu

● Ko e hā ʻa e faʻahinga tauʻatāina naʻe maʻu ʻe he ʻuluaki ongo mātuʻá? Ko e hā hono faikehekehe mei he meʻa ʻoku aʻusia ʻe he faʻahinga ʻo e tangatá he taimí ni?

● ʻI hono faikehekehe mo e māmaní, ko e hā ʻa e tauʻatāina ʻoku maʻu ʻe he kau Kalisitiane moʻoní? ʻOku malava fēfē ke maʻu ia?

● Ko e hā ʻa e nunuʻa ʻoku maʻu ʻe he faʻahinga ʻoku nau fekumi ki he faʻahinga tauʻatāina ʻoku maʻu ʻe he māmaní?

● Ko e hā ʻoku mātuʻaki mahuʻinga ai ke fakaʻehiʻehi mei he “kaungāmeʻa kovi”? Ke kehe meia ʻĀtama, ko e ngaahi fili ʻa hai ʻoku totonu ke tau tali ʻo fekauʻaki mo e meʻa ʻoku koví?

[Fehuʻi ki he Ako]