ʻI he 2005, naʻe mole ai ʻi he maté ʻa e husepāniti ʻofeina ʻo ha fefine mei ʻInitia ko Sowbhagya. Ki muʻa ke ne maté, naʻá ne tauhi lelei maʻu pē ʻa Sowbhagya mo ʻena kiʻi taʻahine taʻu tolu ko Meghana. Ka ʻi he taimi ní naʻe fāinga lahi ʻa Sowbhagya ke maʻu ha paʻanga feʻunga ke feau ʻena ngaahi fiemaʻú.

 Ko e toe kovi angé, naʻe talitekeʻi ʻe he niʻihi kehé ʻa Sowbhagya. Ko hono fāmilí tonu naʻa nau fakafeangai kiate ia mo ʻene kiʻi taʻahiné ʻo hangē ko ha ongo kolekole kinaua, pea naʻa nau toutou tala ange kiate ia ʻokú ne hoko ko ha kavenga kiate kinautolu. Pea ʻi he fekumi ki ha fakafiemālie, naʻe kamata ʻalu leva ʻa Sowbhagya ki ha siasi fakalotofonua, ka ko e kakai ʻi aí naʻa nau siolalo kiate ia koeʻuhí ko ʻene masivá. Ko ia naʻe kamata kumi ngāue ʻa Sowbhagya ke lava ke ne poupouʻi fakapaʻanga pē kinaua. Kae kehe, neongo ʻene feinga mālohí, naʻe ʻikai pē ke ne maʻu ha ngāue.

 ʻOku pehē ʻe Sowbhagya: “Naʻá ku ongoʻi naʻe siva ʻeku ʻamanakí, ko ia naʻá ku fili ke u taonakita. Ka, naʻá ku ʻiloʻi kapau te u mate, ʻe fehangahangai ʻeku kiʻi taʻahiné mo e ngaahi palopalema lahi. Ko ia naʻá ku fakakaukau ke fakangata fakatouʻosi ʻema moʻuí.” ʻI he ongoʻi taʻeʻaonga mo ʻikai ʻofaʻí, naʻe fononga leva ʻa Sowbhagya ke fakatau mai ha faitoʻo kona.

 Lolotonga ʻa e fononga foki ki ʻapi ʻa Sowbhagya ʻi ha lēlue, naʻe fakaofiofi atu kiate ia ha taha ʻo e Kau Fakamoʻoni ʻa Sihová ko Elizabeth ʻo ne kamata fakatalanoa kiate ia. Naʻe fakamatala ange ʻe Sowbhagya ʻoku ʻikai ke ʻi ai haʻane ngāue, ko ia naʻe tala ange anga-ʻofa ʻe Elizabeth te ne tokoniʻi ia ke maʻu haʻane ngāue. Naʻe toe tala ange foki ʻe Elizabeth ko ʻene ʻalú ke fai ha ako Tohi Tapu. Naʻe fakaʻohovale eni kia Sowbhagya koeʻuhí neongo naʻá ne ʻosi ʻaʻahi ki ha ngaahi siasi lahi, naʻe teʻeki ai ʻaupito ke ne fanongo fekauʻaki mo ha niʻihi ʻoku nau ako Tohi Tapu. Ko ia naʻe fakaafeʻi ʻe Elizabeth ʻa Sowbhagya ke ʻaʻahi ange kiate ia ke ako lahi ange fekauʻaki mo e polokalama ako Tohi Tapú.

 ʻI he aʻu atu ʻa Sowbhagya ki ʻapí, naʻá ne kei fakakaukau pē ke ne taonakita. Kae kehe, ʻi heʻene aʻu atú naʻe lolotonga ʻalu ha kāinga ia mo Meghana ʻo ʻeva, ko ia naʻe fakakaukau ʻa Sowbhagya ke tatali pē kae ʻoua ke foki mai ʻene kiʻi taʻahiné kae toki fakahoko ʻene palaní.

 ʻI he lolotonga iá, naʻá ne ʻaʻahi kia Elizabeth pea naʻe talitali loto-māfana ia ʻe Elizabeth. ʻI he ʻaʻahi ko ení, naʻe fakahaaʻi ange ʻe Elizabeth kiate ia ʻa e tohi Ko e Hā ʻOku Akoʻi Moʻoni ʻe he Tohi Tapú? Ko e vahe naʻe mahuʻingaʻia ai ʻa Sowbhagya naʻe fakakaveinga “ʻOku ʻi Fē ʻa e Kau Maté?” Naʻá ne mahuʻingaʻia ʻi he vahe ko ení koeʻuhí he naʻe toki mate pē hono husepānití. Pea ʻi he ʻaho pē ko iá, naʻe tali ai ʻe Sowbhagya ke ne ako ʻa e Tohi Tapú.

 Naʻe fakaafeʻi ʻe Elizabeth ʻa Sowbhagya ki ha fakataha-lahi ʻe fai ʻi he uike hono hokó, pea naʻe tali ia ʻe Sowbhagya. Naʻe maongo moʻoni kiate ia ʻa e polokalamá ʻo ne fakakaukau ai ʻokú ne loto ke hoko ko e taha ʻo e Kau Fakamoʻoni ʻa Sihová. Pea ʻi heʻene foki mei he fakataha-lahí, naʻe tuʻuaki ange kiate ia ha ngāue.

 Naʻe hokohoko atu ʻa e ako Tohi Tapu ʻa Sowbhagya. Pea ʻi he taimi ní, ʻi he ʻikai toe loto ke fakangata ʻene moʻuí, kuó ne maʻu ha ʻuhinga ke kei moʻui ai pē. Naʻá ne papitaiso, pea ki mui ai naʻe papitaiso foki mo ʻene taʻahiné, ʻa Meghana. ʻI he ahó ni, ʻokú na fakatou hoko ko ha tāimuʻa tuʻumaʻu, pea ko Meghana ʻokú ne ngāue pole ki he taha ʻo e ngaahi ʻōfisi liliu lea ʻi ʻInitiá.

 He fakamālō ē ko Sowbhagya mo Meghana kia Elizabeth, ki heʻene fakaofiofi ko ia kia Sowbhagya ʻi he lēlué, ʻo ne fakahāhā ʻa e mahuʻingaʻia loto-moʻoní pea vahevahe ange kiate ia ʻa e moʻoní! ʻOkú na toe mātuʻaki houngaʻia foki kia Sihova. ʻOku pehē ʻe Meghana: “Kapau naʻe ʻikai ke ma ako ʻa e moʻoní ʻi he ʻaho pē ko iá, pehení kuo ʻosi tanu fuoloa atu kimaua ʻi faʻitoka. ʻI he taimi ní, ʻokú ma fiefia lahi ʻaupito. ʻOkú ma fakatuʻotuʻa vēkeveke atu ki he taimi ʻe lava ke ma toe fāʻofua ai ki heʻeku tamaí, akoʻi ia fekauʻaki mo Sihova pea fakamatala ange ʻa e founga naʻe fakahaofi ai ʻe Sihova ʻema moʻuí.”