Maʻuhala: Ko e ʻuhinga ʻoku ʻikai kātoangaʻi ai ʻe he Kau Fakamoʻoni ʻa Sihová ʻa e Kilisimasí koeʻuhí ʻoku ʻikai ke nau tui kia Sīsū.

 Moʻoní: Ko e kau Kalisitiane kimautolu. ʻOku mau tui ko e fakamoʻuí ʻoku fakafou pē ia ʻia Sīsū Kalaisi.—Ngāue 4:12.

 Maʻuhala: ʻOku mou fakamavahevaheʻi ʻa e ngaahi fāmilí ʻaki hono akoʻi ki he kakaí ke ʻoua ʻe kātoangaʻi ʻa e Kilisimasí.

 Moʻoní: ʻOku mau tokanga lahi fekauʻaki mo e ngaahi fāmilí pea ʻoku mau ngāueʻaki ʻa e Tohi Tapú ke fakaivimālohiʻiʻaki ʻa e ngaahi fāmilí.

 Maʻuhala: ʻOku mou tō mei he “laumālie ʻo e Kilisimasí” ko e nima-homo, melino ʻi he māmaní mo e anga-lelei ki he kakaí.

 Moʻoní: ʻOku mau feinga ke nima-homo mo nofo melino ʻi he ʻaho kotoa pē. (Palōveepi 11:25; Loma 12:18) Ko e fakatātaá, ko e founga ʻoku mau fai ai ʻemau fakatahá mo e malangá ʻoku fehoanaki ia mo e fakahinohino ʻa Sīsū: “Kuo mou maʻu taʻetotongi, foaki taʻetotongi.” (Mātiu 10:8) Tānaki atu ki aí, ʻoku mau taki ʻa e tokangá ki he Puleʻanga ʻo e ʻOtuá ko e ʻamanaki moʻoni ia ki he melino ʻi he māmaní.—Mātiu 10:7.

•   Naʻe tuʻutuʻuni ʻe Sīsū ke tau kātoangaʻi ʻene pekiá, kae ʻikai ko hono ʻaloʻí.—Luke 22:19, 20.

•   Ko e kau ʻapositolo mo e muʻaki kau ākonga ʻa Sīsuú naʻe ʻikai ke nau kātoangaʻi ʻa e Kilisimasí. ʻOku pehē ʻe he New Catholic Encyclopedia “ko hono kātoangaʻi ʻo e ʻAloʻi ʻo Sīsuú naʻe toki fai ia ki mui ʻi he 243 [T.S.],” laka hake he senituli hili e mate ʻa e ʻapositolo fakamuimuí.

•   ʻOku ʻikai ha fakamoʻoni naʻe ʻaloʻi ʻa Sīsū ʻi Tīsema 25; ko hono ʻaho ʻaloʻí ʻoku ʻikai lēkooti ia ʻi he Tohi Tapú.

•   ʻOku mau tui ʻoku ʻikai fakahōifua ki he ʻOtuá ʻa e Kilisimasí koeʻuhí ʻoku makatuʻunga ia ʻi he ngaahi anga mo e ngaahi ouau fakapangani.—2 Kolinitō 6:17.

 ʻOku kei kātoangaʻi pē ʻe he tokolahi ʻa e Kilisimasí neongo ʻoku nau ʻiloʻi hono tupuʻanga fakapanganí pea ʻikai poupouʻi ʻe he Tohi Tapú. ʻE lava ke ʻeke hifo ʻe ha taha pehē: Ko e hā ʻoku totonu ai ki he kau Kalisitiané ke tuʻu ʻi ha ʻalunga taʻemanakoa pehē? Ko e hā ko ha ʻīsiu ai iá?

 ʻOku fakalototoʻaʻi kimautolu ʻe he Tohi Tapú ke fakakaukau maʻa kimautolu, ʻo ngāueʻaki ʻemau “mafai fakaefakaʻuhingá.” (Loma 12:1, 2) ʻOku akoʻi ai kimautolu ke fakamahuʻingaʻi ʻa e moʻoní. (Sione 4:23, 24) Ko ia lolotonga ʻoku mau mahuʻingaʻia ʻi he anga ʻo e vakai mai ʻa e niʻihi kehé, ʻoku mau pipiki ki he ngaahi tefitoʻi moʻoni Fakatohitapú naʻa mo ʻene ʻuhinga ia te mau hoko ai ʻo taʻemanakoa.

 Neongo ʻoku mau fili ke ʻoua ʻe kātoangaʻi ʻa e Kilisimasí, ʻoku mau fakaʻapaʻapaʻi ʻa e totonu ʻa e tokotaha taki taha ke fai ʻene fili ʻi he meʻá ni. ʻOku ʻikai ke mau kaunoa ʻi he kātoanga Kilisimasi ʻa e niʻihi kehé.