Fakatatau ki ha savea ʻe taha, ʻoku lotu ʻa e pēseti ʻe 80 ʻo e toʻutupu ʻi ʻAmeliká, ka ko e vaeua pē ai ʻoku nau lotu ʻi he ʻaho kotoa pē. ʻOku ʻikai ha veiveiua ko e niʻihi ʻo kinautolu ʻoku nau fifili: ‘Ko e lotú ko ha meʻa pē ia ʻokú ne ʻai ke u ongoʻi lelei pe ʻoku ʻi ai ha meʻa lahi ange?’

•  Ko e hā ʻa e lotu?

•  ʻOku fanongo mai ʻa e ʻOtuá?

•  Ko e hā ke u lotu fekauʻaki mo iá?

•  Meʻa ʻoku leaʻaki ʻe ho toʻumeʻá

 Ko e lotú ko ha fetuʻutaki moʻoni ia mo e Tokotaha-Fakatupu ʻo e meʻa kotoa pē. Fakakaukau angé ki hono ʻuhingá! Ko Sihova ʻoku māʻolunga ange ia ʻi he faʻahinga ʻo e tangatá ʻi he founga kotoa pē, neongo ia “ʻoku ʻikai te ne mamaʻo mei ha taha ʻo kitautolu.” (Ngāue 17:27) Ko hono moʻoní, ʻoku maʻu ʻi he Tohi Tapú ha fakaafe fakaofo: “ʻUnuʻunu ofi ki he ʻOtuá, pea te ne ʻunuʻunu ofi mai kiate kimoutolu.”​—Sēmisi 4:8.

 ʻE lava fēfē ke ke ʻunuʻunu ofi ki he ʻOtuá?

•   Fakafou ʻi he lotú​—ko e founga ia ʻokú ke talanoa ai ki he ʻOtuá.

•   Ko e toe founga ʻe taha ko hono ako ʻo e Tohi Tapú​—ko e founga ia ʻoku “talanoa” mai ai ʻa e ʻOtuá kiate koé.

 Ko e fetuʻutaki peheé​—ʻa e lotú mo hono ako ʻo e Tohi Tapú​—te ne tokoniʻi koe ke langa ha vahaʻangatae mālohi mo e ʻOtuá.

 “Ko e talanoa mo Sihová​—ʻo fetuʻutaki mo e Fungani Māʻolungá​—ko e taha ia ʻo e monū lahi taha ʻe lava ke maʻu ʻe he faʻahinga ʻo e tangatá.”​—Jeremy.

 “Ko e vahevahe mo Sihova ʻeku ngaahi ongoʻi lolotó fakafou ʻi he lotú ʻokú ne ʻai au ke u ongoʻi ofi ange kiate ia.”​—Miranda.

 Neongo kapau ʻokú ke tui ki he ʻOtuá​—pea neongo kapau ʻokú ke lotu ki ai​—ʻe faingataʻa nai ke tali ʻa e fakakaukau ʻokú ne fanongo moʻoni mai. Kae kehe ʻoku ui ʻe he Tohi Tapú ʻa Sihova ko e “Tokotaha-Fanongo ki he lotú.” (Saame 65:2) ʻOkú ne toe fakaafe mai ke “lī atu ʻa e kotoa hoʻomou loto-moʻuá kiate ia.” Ko e hā hono ʻuhingá? “Koeʻuhí he ʻokú ne tokanga mai kiate kimoutolu.”​—1 Pita 5:7.

 Ke fakakaukau ki ai: ʻOku ke vaheʻi ha taimi ke talanoa maʻu pē mo ho ngaahi kaumeʻa ofí? ʻE lava ke ke fai ʻa e meʻa tatau ki he ʻOtuá. Talanoa maʻu pē ki ai ʻi he lotu, pea ngāueʻaki hono huafá, ko Sihova. (Saame 86:​5-7; 88:9) ʻIo, ʻoku fakaafeʻi koe ʻe he Tohi Tapú ke “lotu maʻu pē.”​—1 Tesalonaika 5:​17.

 “Ko e lotú ko ʻeku fetalanoaʻaki ia mo ʻeku Tamai fakahēvaní, ʻa e tokotaha ʻoku ou huaʻi atu ki ai hoku lotó kotoa.”​—Moises.

 “ʻOku ou talanoa kia Sihova fekauʻaki mo e ngaahi meʻa ʻi hoku lotó, ʻo hangē ko ia te u talanoa ki heʻeku faʻeé pe ki hoku kaumeʻa ofi tahá.”​—Karen.

 ʻOku pehē ʻe he Tohi Tapú: “ʻI he meʻa kotoa pē mou ʻai ke ʻilo hoʻomou ngaahi kolé ʻe he ʻOtuá.”​—Filipai 4:6.

 ʻOku ʻuhinga iá ʻoku sai pē ke lotu fekauʻaki mo hoʻo ngaahi palopalemá? ʻIo! Ko hono moʻoní, ʻoku pehē ʻe he Tohi Tapú: “Lī hoʻo kavengá kia Sihova, pea te ne tokoniʻi koe.”​—Saame 55:22.

 Ko e moʻoni, ʻi hoʻo ngaahi lotu ki he ʻOtuá, ʻoku lahi ʻa e ngaahi meʻa ke ke talanoa ki ai ka ʻoku ʻikai ko hoʻo ngaahi palopalemá pē. “Heʻikai te u hoko ko ha kaumeʻa lelei kapau ʻoku ou kole tokoni maʻu pē kia Sihova,” ko e lau ia ʻa ha finemui ko Chantelle. “ʻOku ou ongoʻi ʻoku tonu ke muʻomuʻa ʻeku fakamāloó, pea ko e lisi ʻo e ngaahi meʻa ke u fakamālōʻiá ʻoku lahi.”

 Ke fakakaukau ki ai: Ko e hā ʻa e ngaahi meʻa ʻi hoʻo moʻuí ʻokú ke fakamālōʻia ʻi hono maʻú? ʻE lava ke ke fakakaukau ki ha meʻa ʻe tolu ke ke fakamālō ai kia Sihova he ʻahó ni?

 “Naʻa mo e meʻa faingofua pē, hangē ko hano fakamahuʻingaʻi ha matalaʻiʻakau fakaʻofoʻofa, ʻe lava ke ne ueʻi kitautolu ke ʻoatu ha lotu fakamālō kia Sihová.”​—Anita.

 “Fakalaulauloto ki ha meʻa ʻi he fakatupú ʻoku maongo kiate koe pe ko ha veesi Tohi Tapu ʻoku aʻu moʻoni ki ho lotó, pea fakamālō kia Sihova.”​—Brian.