ʻIo, ʻoku ʻomai ʻe he Tohi Tapú ha fakamoʻoni pau ʻoku ʻi ai ha ʻOtua. ʻOku fakalototoʻaʻi kitautolu ke fakatupulekina ʻa e tui ki he ʻOtuá, kae ʻikai ko e tui pē ki he ngaahi meʻa ʻoku akoʻi ʻe he ngaahi lotú, ka ʻi hono kehé ngāueʻaki ʻetau “mafai fakaefakaʻuhingá” mo e “malava fakaeʻatamai.” (Loma 12:1; 1 Sione 5:20, fakamatala ʻi lalo) Fakakaukau ki he ngaahi ʻuhinga ko ení mei he Tohi Tapú:

•   Ko e ʻi ai ʻo e ʻuniveesi fokotuʻutuʻu māú mo e ngaahi meʻamoʻuí ʻoku fakahaaʻi ai ʻoku ʻi ai ha Tokotaha-Fakatupu. ʻOku pehē ʻe he Tohi Tapú: “Ko e moʻoni, ko e fale kotoa pē ʻoku langa ia ʻe ha taha, ka ko e tokotaha naʻá ne ngaohi ʻa e ngaahi meʻa kotoa pē ko e ʻOtuá.” (Hepelū 3:4) Neongo ko ha fakaʻuhinga faingofua eni, ko e kau mataotao tokolahi ʻoku nau pehē ko ha fakaʻuhinga mohu ʻuhinga ia. a

•   ʻI he tuʻunga ko ha tangatá, ʻoku fakanatula ke tau holi ke mahinoʻi ʻa e ʻuhinga mo e taumuʻa ʻo e moʻuí. Ko ha fiemaʻu ia ʻoku tau vivili ki ai neongo kuo fakalato ʻetau ngaahi fiemaʻu fakaesinó. Ko e meʻa eni ʻoku lave ki ai ʻa e Tohi Tapú ko ʻetau fiemaʻu fakalaumālié ʻa ia ʻoku kau ki ai ʻetau fiemaʻu ke ʻiloʻi ʻa e ʻOtuá pea lotu kiate ia. (Mātiu 5:3; Fakahā 4:11) ʻOku ʻomai ʻe he fiemaʻu fakalaumālie ko ení ʻa e fakamoʻoni ʻoku ʻi ai ha ʻOtua pea toe fakahaaʻi foki ko ha Tokotaha-Fakatupu anga-ʻofa ia pea ʻokú ne loto ke fakalato ʻa e ngaahi fiemaʻu ko iá.​—Mātiu 4:4.

•   Ko e ngaahi kikite fakaikiiki ʻi he Tohi Tapú, ʻa ia naʻe tomuʻa tala ʻi he ngaahi laui senituli ki muʻá, naʻe fakahoko ia ʻo fakatatau ki he meʻa tofu pē naʻe kikiteʻi. ʻOku fakahuʻunga ko e tonu mo e fakaikiiki ko ia ʻo e ngaahi kikite ko ení, naʻe haʻu ia mei ha matavai ʻoku mahulu atu ia ʻi he poto fakaetangatá.​—2 Pita 1:21.

•   Ko e faʻahinga naʻa nau hiki ʻa e Tohi Tapú naʻa nau maʻu ʻa e ʻilo fakasaienisi naʻe mahulu atu ia ʻi he mahino ʻa honau toʻutangatá. Ko e fakatātā, ʻi he kuonga muʻá naʻe tui ʻa e tokolahi ko e foʻi māmaní naʻe hili ia ʻi ʻolunga ʻi ha manu, hangē nai ko ha ʻelefānite pe ko ha puaka kaivao pe ko ha pulu. ʻI hono kehé, ʻoku pehē ʻe he Tohi Tapú ʻoku ‘tautau ʻe he ʻOtuá ʻa e māmaní ki he halaʻataá.’ (Siope 26:7) Pehē foki, ʻoku tonu mo hono fakamatalaʻi ʻe he Tohi Tapú ʻa e fuo ʻo e foʻi māmaní ʻoku takatakai pe fuopotopoto. (ʻAisea 40:22, fakamatala ʻi lalo) ʻOku tui ʻa e tokolahi ko e founga naʻe maʻu ʻe he kau hiki Tohi Tapú ʻa e ʻilo loloto ko iá, koeʻuhí naʻa nau maʻu ʻa e ngaahi fakaikiiki ko iá mei he ʻOtuá.

•   ʻOku maʻu ʻi he Tohi Tapú ʻa e ngaahi tali ki he ngaahi fehuʻi faingataʻa. Ko e ngaahi fehuʻi eni ʻi he ʻikai ke fakalató ʻe taki atu ha taha ke fakaʻikaiʻi-ʻOtua. Ko e fakatātā: Kapau ko e ʻOtuá ʻoku ʻofa mo mālohi, ko e hā ʻoku lahi fau ai ʻa e koví mo e faingataʻaʻia ʻi he māmaní? Ko e hā ʻoku faʻa fakatupunga ai ʻe he ngaahi lotú ʻa e koví kae ʻikai ko e lelei?​​—Taitusi 1:16.