“Fakaʻosí, fanga tokoua, ʻilonga ʻa e ngaahi meʻa ʻoku moʻoní, ʻilonga ʻa e ngaahi meʻa ʻoku mafatukitukí, ʻilonga ʻa e ngaahi meʻa ʻoku māʻoniʻoní, ʻilonga ʻa e ngaahi meʻa ʻoku maʻá, ʻilonga ʻa e ngaahi meʻa ʻoku ʻofeiná, ʻilonga ʻa e ngaahi meʻa ʻoku lauʻi leleí, ʻilonga ʻa e ngaahi meʻa ʻoku leleí, pea ʻilonga ʻa e ngaahi meʻa ʻoku taau ke fakahīkihikiʻí, hokohoko atu ʻa e tokanga ki he ngaahi meʻá ni.”​—Filipai 4:8, Liliu Tohi Tapu Māmani Foʻoú.

 “Ko ʻeku lea fakaʻosi, kainga. ʻIlonga ʻa e ngaahi meʻa ʻoku moʻoni. ʻilonga ʻa e ngaahi meʻa ʻoku tāu, ʻilonga ʻa e ngaahi meʻa ʻoku totonu, ʻilonga ʻa e ngaahi meʻa ʻoku maʻa, ʻilonga ʻa e ngaahi meʻa ʻoku fakaʻofoʻofa, ʻilonga ʻa e ngaahi meʻa ʻoku ongoongolelei, ʻio, ka ai ha ʻulungaanga lelei, pea ka ai ha meʻa ʻoku fakamaloʻia, ko e ngaahi meʻa ia ke mou tokanga ki ai.”​—Filipai 4:8, Paaki Foʻou.

 ʻOku mahuʻingaʻia ʻa e ʻOtuá ʻi he meʻa ʻoku fakakaukau ki ai ʻa e faʻahinga ʻo e tangatá, koeʻuhí ʻoku tākiekina ʻe heʻetau fakakaukaú ʻa e meʻa ʻoku tau faí. (Saame 19:14; Maʻake 7:20-23) Ko ia ai, ko e kakai ʻoku nau fakaʻamu ke fakahōifuaʻi ʻa e ʻOtuá ʻoku nau siʻaki ʻa e ngaahi fakakaukau ʻoku kovi ʻi heʻene vakaí pea ʻi hono kehé ʻoku nau fakakaukau ki he ngaahi meʻa ʻokú ne hōifua ki aí.

 ʻOku lave ʻa e veesi ko ení ki he ngaahi meʻa lelei ʻe valu ʻoku totonu ki he kau Kalisitiané ke nau “hokohoko atu ʻa e tokanga” ki aí, ʻa ia, ke nau angaʻaki ʻa e fakakaukau ʻo kau ki aí.

•   “Moʻoní.” Ko e foʻi lea ko ení ʻokú ne fakamatalaʻi ʻa e ngaahi meʻa ʻoku totonu mo falalaʻanga, hangē ko e fakamatala ʻoku maʻu ʻi he Folofola ʻa e ʻOtuá, ʻa e Tohi Tapú.​—1 Tīmote 6:20.

•   “Mafatukitukí.” Ko e foʻi lea ko ení ʻoku ʻuhinga ia ki he ngaahi meʻa ʻoku mahuʻinga moʻoni. ʻOku ʻikai ko ha ngaahi meʻa ia ke fakasiʻia, fakamaʻamaʻaʻi pe taʻemahuʻinga. ʻI hono kehé, ʻoku tokoni ia ke fakaivimālohiʻi ʻa e fakapapau ʻa ha Kalisitiane ke fai ʻa e meʻa ʻoku totonú.​—Taitusi 2:6-8.

•   “Māʻoniʻoní.” Ko e foʻi lea ko ení ʻoku ʻuhinga ia ki he ngaahi palani mo e ngāue ʻoku fehoanaki mo e tuʻunga ʻa e ʻOtuá ki he tonú kae ʻikai makatuʻunga ʻi he poto fakangatangata ʻo e tangatá.​—Palōveepi 3:5, 6; 14:12.

•   “Maʻá.” Ko e foʻi lea ko ení ʻoku ʻuhinga ia ki he ngaahi fakakaukau mo e fakaueʻiloto ʻoku maʻa mo toputapu, ʻo ʻikai ʻi he fekauʻaki pē mo e fehokotaki fakasinó, ka ʻi he meʻa kotoa.​—2 Kolinitō 11:3.

•   “ʻOfeiná.” Ko e foʻi lea ko ení ʻoku ʻuhinga ia ki he ngaahi meʻa ʻoku fakafiefia, ʻokú ne langaʻi ʻa e ngaahi ongoʻi ʻo e ʻofá kae ʻikai ko e tāufehiʻa, loto-kona pe taʻefelotoi.​—1 Pita 4:8.

•   “Lauʻi leleí.” Ko e kupuʻi lea ko ení ʻoku ʻuhinga ia ki he ngaahi meʻa ʻe tānaki atu ki he ongoongo lelei ʻo ha taha pea ko e kakai ʻoku nau fakaʻapaʻapa ki he ʻOtuá te nau tali ia.​—Palōveepi 22:1.

•   “Leleí.” Ko e foʻi lea ko ení ʻoku ʻuhinga ia ki he ngaahi tuʻunga fakaeʻulungaanga ʻoku lelei ʻo fakatatau ki he ngaahi tuʻunga ʻa e ʻOtuá. ʻOku lelei fakaʻaufuli ia.​—2 Pita 1:5, 9.

•   “Taau ke fakahīkihikiʻí.” Ko e kupuʻi lea ko ení ʻoku ʻuhinga ia ki he meʻa ʻoku taau ke fakaongoongoleleiʻi, tautefito ʻi he vakai ʻa e ʻOtuá. ʻOku kau foki ki ai ʻa e ngaahi ngāue ʻa e ʻOtuá ʻoku taau ke fakahīkihikiʻí, ʻa ia ʻoku lelei ke fakakaukau ki ai ʻa e faʻahinga ʻo e tangatá.​—Saame 78:4.

 Naʻe tuku pōpula ʻa e ʻapositolo ko Paulá ʻi ha fale ʻi Loma ʻi he taimi naʻá ne hiki ai ʻene tohi ki he kau Kalisitiane ʻi Filipaí. Neongo ia, ko e kau ʻanalaiso Tohi Tapú ʻoku nau fakamatalaʻi ʻene tohí “ko ha tohi ʻo e fiefia” koeʻuhí ko e laumālie fiefia ʻo e tohí mo hono ngaahi kupuʻi lea fakalotomāfana mo anga-ʻofá.​—Filipai 1:3, 4, 7, 8, 18; 3:1; 4:1, 4, 10.

 Naʻe ʻofa ʻa Paula ʻi hono fanga tokoua mo e fanga tuofāfine fakalaumālie ʻi Filipaí, pea naʻá ne loto ke nau maʻu ʻa e fiefia mo e nonga ʻo hangē ko ia naʻá ne maʻú. (Filipai 2:17, 18) Ko ia ʻi he konga fakaʻosi ʻene tohí, naʻá ne fakalototoʻaʻi kinautolu ke fakatupulekina ha laumālie fiefia, hoko ʻo fakakaukau lelei, falala maʻu pē ki he ʻOtuá ʻi he lotu, pea fakahangataha honau ʻatamaí ki he ngaahi meʻa ʻokú ne pouaki ʻa e nonga ʻi lotó pea pehē ki he melino mo e ʻOtuá.​—Filipai 4:4-9.

 Sio ʻi he vitiō nounou ko ení ke maʻu ha vakai fakalūkufua ki he tohi ʻa Filipaí.