“Ko ia ai, mou fakatōkilaloʻi kimoutolu ʻi he malumalu ʻo e toʻukupu māfimafi ʻo e ʻOtuá, koeʻuhí ke ne hakeakiʻi kimoutolu ʻi hono taimi totonú, lolotonga ia hoʻomou lī atu ʻa e kotoa hoʻomou loto-moʻuá kiate ia, koeʻuhí he ʻokú ne tokanga mai kiate kimoutolu.”​—1 Pita 5:6, 7, Liliu Tohi Tapu Māmani Foʻoú.

 “Koia ke fakavaivai akimoutolu i he lalo nima mafimafi oe Otua, ka ne hakeakiʻi akimoutolu i he aho totonu:  O tuku hoo mou tokaga kotoabe kiate ia; he oku ne kau kiate kimoutolu.”​—1 Pita 5:6, 7, Paaki Motuʻa.

 ʻI he ngaahi lea ko ení, ʻoku fakapapauʻi ʻe he ʻapositolo ko Pitá ki he kau Kalisitiané ʻe lava ke nau lotu ʻi he falala pau ki he ʻOtuá fekauʻaki mo ʻenau ngaahi palopalemá mo e hohaʻá. ʻOku leleiʻia ʻa e ʻOtuá ʻi he faʻahinga ʻoku nau anga-fakatōkilaló, pea te ne fakapaleʻi lahi kinautolu.

 “Mou fakatōkilaloʻi kimoutolu ʻi he malumalu ʻo e toʻukupu māfimafi ʻo e ʻOtuá.” ʻI he Tohi Tapú, ko e toʻukupu ʻo e ʻOtuá ʻoku faʻa ʻuhinga ia ki hono mālohi faifakahaofí mo maluʻí. (ʻEkisoto 3:19; Teutalōnome 26:8; ʻĒsela 8:22) Ko e kau Kalisitiané ʻoku nau fakatōkilaloʻi kinautolu ʻi he malumalu ʻo e toʻukupu ʻo e ʻOtuá ʻi he taimi ʻoku nau falala ai kiate iá. ʻOku nau ʻiloʻi honau ngaahi ngātangá pea ʻiloʻi ʻoku ʻikai lava ke nau ikuʻi ʻa e ngaahi ʻahiʻahí ʻiate kinautolu pē. (Palōveepi 3:5, 6; Filipai 4:13) ʻOku nau falala pau ʻoku maʻu ʻe he ʻOtuá ʻa e mālohi ke ne tokoniʻi kinautolu ʻi he taimi totonú pea mo e founga lelei taha ʻoku ala lavá.​—ʻAisea 41:10.

 “Koeʻuhí ke ne hakeakiʻi kimoutolu ʻi hono taimi totonú.” Ko e faʻahinga ʻoku nau kātekina anga-kātaki ʻa e ngaahi ʻahiʻahí ʻe lava ke nau falala pau ʻe faai atu pē ʻo hakeakiʻi pe fakapaleʻi kinautolu ʻe he ʻOtuá. Heʻikai ke ne fakaʻatā ʻene kau lotú ke ʻahiʻahiʻi taʻetuku kinautolu pe fakalaka atu ʻi he meʻa ʻoku malava ke nau kātekiná. (1 Kolinitō 10:13) ʻI hono kehé, kapau te nau hanganaki fai ʻa e meʻa ʻoku leleí, ʻe fakapaleʻi moʻoni kinautolu ʻe he ʻOtuá “ʻi hono taimi totonú.”​—Kalētia 6:9.

 “Lolotonga ia hoʻomou lī atu ʻa e kotoa hoʻomou loto-moʻuá kiate ia, koeʻuhí he ʻokú ne tokanga mai kiate kimoutolu.” Ko e kau Kalisitiané ʻe lava ke nau lī atu honau ngaahi loto-moʻuá kotoa ki he ʻOtuá ʻaki ʻa e lotu anga-fakatōkilalo kiate ia. ʻOku fakamatalaʻi ʻe he maʻuʻanga fakamatala ʻe taha: “Ko e foʻi veape ke lī atu ʻoku ʻuhinga iá ke feinga mālohi ke tolongi atu ha meʻa meiate kitautolu. ʻOkú ne fakamatalaʻi ha ngāue ʻosi fakakaukauʻi.” ʻI hano lī atu ʻe ha Kalisitiané hono ngaahi loto-moʻuá ki he ʻOtuá, ʻe siʻisiʻi ai ʻene hohaʻá pea hokosia ʻa e meʻa ʻoku ui ʻe he Tohi Tapú ko e “nonga ʻa e ʻOtuá.” (Filipai 4:6, 7) ʻOku lava ke ne fakapapauʻi ʻoku loto ʻa e ʻOtuá ke ne tokoniʻi ia koeʻuhí ʻokú ne ʻilo ʻoku tokanga mai ʻa e ʻOtuá kiate ia pea ʻe lava ke ne ngāueʻaki Hono fuʻu mālohí ke poupouʻi ia.​—Saame 37:5; 55:22.

 Ko e vahe 5 ʻoku fakaʻosiʻaki ʻa e ʻuluaki tohi naʻe hiki ʻe he ʻapositolo ko Pitá ki he kau Kalisitiané. (1 Pita 1:1) Ko e kau muimui ʻo Kalaisi ʻi he taimi ko iá, ʻo hangē pē ko e taimi ní, naʻa nau fehangahangai mo e ngaahi ʻahiʻahi naʻe ʻahiʻahiʻi ai ʻenau tuí pea naʻe mei lava ke ne ʻai ke nau loto-moʻua. (1 Pita 1:6, 7) ʻI he lāuʻilo ki heʻenau faingataʻaʻiá, naʻe hiki ʻe Pita ha tohi fakalotomāfana mo fakalototoʻa ʻi he 62-64 T.S. nai.​—1 Pita 5:12.

 ʻOku fakaʻosiʻaki ʻe Pita ʻene tohí ha fakamanatu fakalototoʻa ki he faʻahinga ʻoku nau fehangahangai mo e ngaahi ʻahiʻahí koeʻuhí ko ʻenau tuí. Kapau te nau nofoʻaki anga-fakatōkilalo mo falala ki he ʻOtuá, ʻe lava ke nau falala pau ʻe tokoniʻi kinautolu ʻe he ʻOtuá ke nau tuʻu maʻu. (1 Pita 5:5-10) Ko e ngaahi lea ʻa Pitá ʻe lava ke ne fakalototoʻaʻi foki ʻa e kau Kalisitiane ʻoku fakatangaʻi ʻi he ʻaho ní.

 Sio ʻi he vitiō nounou ko ení ke maʻu ha vakai fakalūkufua ki he tohi ʻa 1 Pitá.