Tshwanelo ya go Nna le Leina

MOTHO mongwe le mongwe o na le tshwanelo ya go nna le leina. Kwa Tahiti, tota le lesea le le latlhilweng le go sa itsiweng gore batsadi ba lone ke bomang le tewa leina. Ba ba dirang kwa diofising tsa puso tse go kwadisiwang batho kwa go tsone ba naya ngwana yo o latlhilweng yoo leina le sefane.

Le fa go ntse jalo, go na le motho mongwe yo re ka reng o timilwe tshwanelo eno e batho botlhe ba nang le yone. Go a gakgamatsa gore motho yoo ke ‘Rara yo lelapa lengwe le lengwe kwa legodimong le mo lefatsheng le bidiwang ka ene’! (Baefeso 3:14, 15) Batho ba bantsi ba gana go dirisa leina la Mmopi le le kwadilweng mo Baebeleng. Ba tlhopha gore ba le emisetse ka direto tse di jaaka “Modimo,” “Morena,” kana “wa Bosakhutleng.” Leina la gagwe ke mang? Mopesalema o araba potso eo: “Wena, yo leina la gago e leng Jehofa, wena o le esi o Mogodimodimo yo o okametseng lefatshe lotlhe.”—Pesalema 83:18.

Mo sephatlong sa ntlha sa lekgolo la bo19 la dingwaga, fa barongwa ba London Missionary Society ba ne ba goroga kwa Tahiti, batho ba Polynesia ba ne ba obamela medimo e le mmalwa. Mongwe le mongwe wa medimo eo o ne o na le leina, mme e megolo e ne e le Oro le Taaroa. Fa barongwa bao ba ne ba farologanya Modimo yo o kwadileng Baebele le medimo e mengwe, ba ne ba dirisa leina la Modimo thata, le le ranolwang go twe Iehova ka puo ya Setahiti.

Leina leo le ne la simolola go itsiwe mme le ne le dirisiwa mo metlotlong letsatsi le letsatsi le mo makwalong. Kgosi Pomare II wa kwa Tahiti, yo o neng a busa kwa tshimologong ya lekgolo la bo19 la dingwaga, o ne a le dirisa thata mo makwalong a a neng a a kwala. Bosupi jwa seo bo bonwa mo lekwalong le le bontshitsweng fano. Lekwalo leno, le le kwadilweng ka Seesemane, le beilwe kwa Musiamong wa Tahiti le Ditlhaketlhake Tsa Yone. Le bontsha gore ka nako eo batho ba ne ba dirisa leina la Modimo. Gape, leina la Modimo le tlhaga gantsintsi mo thanolong ya ntlha ya Baebele ya Setahiti, e e weditsweng go ranolwa ka 1835.

[Setshwantsho mo go tsebe 32]

Kgosi Pomare II

[Motswedi wa Setshwantsho mo go tsebe 32]

King and letter: Collection du Musée de Tahiti et de ses Îles, Punaauia, Tahiti