Dipotso Tse di Tswang Kwa Babading

Fa motho a tshwenngwa ke madimona, ke eng se a ka se dirang gore a mo tlogele?

Lefoko la Modimo le bontsha gore batho ba ba tshwenngwang ke madimona ba ka kgona go gololesega mo go one. Go botlhokwa gore ba rapele gore ba kgone go gololesega mo go one. (Mareko 9:25-29) Le fa go ntse jalo, go na le sengwe gape se motho yo o tshwenngwang ke madimona a tshwanetseng go se dira. Dilo dingwe tse di neng tsa dirwa ke Bakeresete ba lekgolo la ntlha la dingwaga di a bontsha gore ke eng gape se motho a ka se dirang.

Pele batho bangwe kwa Efeso wa bogologolo e nna balatedi ba ga Keresete, ba ne ba dirisana le madimona. Le fa go ntse jalo, fa ba sena go dira tshwetso ya gore ba batla go direla Modimo, “bao ba neng ba dira ditiro tsa maselamose ba ne ba phutha dibuka tsa bone ba bo ba di ja ka molelo fa pele ga mongwe le mongwe.” (Ditiro 19:19) Ka go senya dibuka tsa bodimona tse ba neng ba na le tsone, badumedi bano ba basha ba kwa Efeso ba ne ba tlhomela batho botlhe sekao ba ba batlang gore madimona a se a ka tlhola a ba tshwenya gompieno. Go botlhokwa gore ba ba tshwenngwang ke madimona ba senye dilo tsotlhe tse di amanang le one madimona. Dilo tseno di akaretsa dibuka, dimakasine, difilimi, tshedimosetso e e tlang ka khomputara, mmino o o buang ka dilo tsa bodimona, mmogo le megala e batho ba ipofang ka yone kgotsa dilo tse dingwe tse ba reng ba di dirisetsa go “itshireletsa” kgotsa tse di amanang le go dirisana le madimona.—Duteronome 7:25, 26; 1 Bakorintha 10:21.

Dingwaga di le mmalwa morago ga Bakeresete bao ba kwa Efeso ba sena go senya dibuka tseo tsa dilo tsa maselamose, moaposetoloi Paulo o ne a kwala jaana: “Re lwa . . . le mephato ya meya e e boikepo.” (Baefeso 6:12) Paulo o ne a kgothatsa Bakeresete jaana: “Aparang diaparo tse di feletseng tsa tlhabano tse di tswang kwa Modimong gore lo tle lo kgone go ema lo nitame kgatlhanong le maano a boferefere a ga Diabolo.” (Baefeso 6:11) Kgakololo eo e sa ntse e dira le gompieno. Bakeresete ba tshwanetse go inonotsha semoyeng gore ba se ka ba fenngwa ke meya e e boikepo. Paulo o ile a gatelela jaana: “Mo godimo ga dilo tsotlhe, tsayang thebe e kgolo ya tumelo, e lo tla kgonang go tima dibetsa tsotlhe tse di konopiwang tse di fisang tsa yo o boikepo ka yone.” (Baefeso 6:16) Motho o nonotsha tumelo ya gagwe ka go ithuta Baebele. (Baroma 10:17; Bakolosa 2:6, 7) Ka jalo, go ithuta Baebele ka metlha go re thusa go nna le tumelo e e tla re sireletsang gore re se ka ra tlhotlhelediwa ke meya e e boikepo.—Pesalema 91:41; 1 Johane 5:5.

Bakeresete bao ba kwa Efeso, ba ne ba sa ntse ba tshwanelwa ke go tsaya kgato e nngwe gape e e botlhokwa. Paulo o ne a ba raya a re: “Ka mofuta mongwe le mongwe wa thapelo le mokokotlelo lo tswelela lo rapela ka lobaka longwe le longwe.” (Baefeso 6:18) Ee, ba ba batlang gore ba se ka ba tlhola ba tshwenngwa ke madimona gompieno, go botlhokwa gore ba rapele Jehofa ka tlhoafalo gore a ba sireletse. (Diane 18:10; Mathaio 6:13;1 Johane 5:18, 19) Go a tshwanela go bo Baebele e re: “Ipeyeng mo taolong ya Modimo; ganetsang Diabolo, mme o tla lo tshaba.”—Jakobe 4:7.

Le mororo motho yo o tshwenngwang ke madimona a tshwanetse go rapela ka tlhoafalo, Bakeresete ba bangwe ba boammaaruri le bone ba ka rapelela motho yo o eletsang go direla Jehofa yo o lekang ka natla go kgaogana le meya e e boikepo. Ba ka nna ba kopa Jehofa gore a nonotshe motho yono yo o tshwenngwang ke madimona semoyeng. E re ka Lefoko la Modimo le re “mokokotlelo wa motho yo o siameng, fa o dira, o na le maatla a magolo,” dithapelo tse di rapelwang ke batlhanka ba Modimo ruri di tla solegela molemo ba ba tshwenngwang ke madimona, ba ba itekang ka natla go ‘ganetsa Diabolo.’—Jakobe 5:16.

[Setshwantsho mo go tsebe 31]

Badumedi ba kwa Efeso ba ne ba senya dibuka tsa bone tsa maselamose