Hindi. Ipinakikita ng Bibliya na sa Diyos lang tayo dapat manalangin, sa pangalan ni Jesus. Sinabi ni Jesus sa kaniyang mga alagad: “Ganito kayo manalangin: Ama naming nasa Langit, sambahin ang Ngalan mo.” (Mateo 6:9, Biblia ng Sambayanang Pilipino) Hindi niya kailanman tinuruan ang kaniyang mga alagad na manalangin sa mga santo, anghel, o sa kaninuman maliban sa Diyos.

 Sinabi rin ni Jesus sa kaniyang mga tagasunod: “Ako ang daan, ang katotohanan, at ang buhay. Walang sinumang nakalalapit sa Ama liban sa pamamagitan ko.” (Juan 14:6, BSP) Si Jesus lang ang binigyan ng Diyos ng awtoridad na mamagitan para sa atin.—Hebreo 7:25.

Paano kung mananalangin ako sa Diyos pero mananalangin din sa mga santo?

 Sa isang bahagi ng Sampung Utos, sinabi ng Diyos: “Akong PANGINOON mong Dios ay Dios na mapanibughuin.” (Exodo 20:5, Ang Biblia—Bagong Salin sa Pilipino) Bakit masasabing “mapanibughuin” ang Diyos? Makikita sa talababa ng New American Bible na ang salitang “mapanibughuin” ay nangangahulugang “humihingi ng bukod-tanging katapatan.” Ayaw ng Diyos na magkaroon ng kaagaw sa ating gawa ng katapatan o pagsamba sa kaniya. Kaya sa kaniya lang tayo dapat manalangin.—Isaias 48:11.

 Nasasaktan ang Diyos kapag nananalangin tayo sa iba, kahit pa sa mga santo o sa mga banal na anghel. Nang tangkain ni apostol Juan na sambahin ang isang anghel, pinigilan siya nito at sinabi: “Huwag! Isa lamang akong lingkod na gaya mo at ng mga kapatid mong taglay ang pagpapatotoo ni Jesus. . . . Diyos ang dapat mong sambahin.”—Pagbubunyag [o, Apocalipsis] 19:10, BSP.