HUNYO 28, 2024
RUSSIA

Hinatulan ang Tatlong Sister sa Republic of Kalmykia, Russia

I-PLAY

Noong Hunyo 24, 2024, hinatulan ng Elista City Court of the Republic of Kalmykia sina Sister Tsagan Khalgaeva, Yekaterina Menkova, at Kishta Tutinova. Sina Tsagan at Yekatarina ay tumanggap ng dalawang-taóng suspended prison sentence. Si Kishta naman ay tumanggap ng tatlong-taóng suspended prison sentence. Hindi sila makukulong sa ngayon.

Profile

Tsagan Khalgaeva

Ipinanganak: 1978 (Lagan, Republic of Kalmykia)

Maikling Impormasyon: Isang mananahi

Nagsaliksik siya sa iba’t ibang relihiyon para malaman ang sagot sa mga tanong niya. Nakipag-aral siya sa mga Saksi ni Jehova at nasumpungan niya ang kasiya-siyang mga sagot sa Bibliya

Nabautismuhan noong 2004

Personal na mga Komento

Ano ang pinakanakatulong sa iyo sa mahirap na panahong ito?

Nagpapasalamat ako sa mga panalangin ng mga kapatid para sa akin. Kapag pinanghihinaan ako ng loob, wala akong magawa kundi umiyak at manalangin kay Jehova. Hindi ko alam kung ano ang sasabihin ko sa kaniya. Pero alam kong ipinapanalangin din ako ng iba, at nakikita ko kung paano sinasagot ni Jehova ang mga panalanging ito. Napakilos ako nito na ipanalangin din nang espesipiko ang iba. Talagang nakagiginhawa ang suporta na maibibigay natin sa isa’t isa, at ipinapaalala sa akin nito na magkakasama tayo sa pagharap ng mga problema natin.

Yekaterina Menkova

Ipinanganak: 1982 (Tavn-Gashun, Republic of Kalmykia)

Maikling Impormasyon: Isang laboratory assistant

Nag-asawa noong 2009. Mayroong isang anak na lalaki

Hangang-hanga siyang makita ang mga Saksi ni Jehova na namumuhay ayon sa itinuturo ng Bibliya at kung paano nakatulong sa buhay niya ang pagsunod sa mga prinsipyo sa Bibliya. Nabautismuhan siya noong 2017

Personal na mga Komento

Anong mga teksto sa Bibliya ang nagpatibay ng pagtitiwala mo kay Jehova?

Napapalakas ako ng Awit 8:3, 4: “Kapag tinitingnan ko ang iyong langit, ang mga gawa ng iyong kamay, ang buwan at ang mga bituin na inihanda mo, ano ang hamak na tao para alalahanin mo, at ang anak ng tao para pangalagaan mo?” Sinasabi dito na ginawa ni Jehova ang napakalawak na uniberso at ang lahat ng bagay sa pamamagitan ng kaniyang kamay. Kapag pinag-iisipan ko iyan, naaalala ko na wala akong dapat ikatakot dahil napakamakapangyarihan ni Jehova.

Kishta Tutinova

Ipinanganak: 1961 (Novolesnoy, Astrakhan Region)

Maikling Impormasyon: Isang mananahi. Pinalaki bilang nagsosolong magulang ang dalawa niyang anak na lalaki

Budista ang pamilya nila. Isang Saksi ni Jehova na kostumer niya ang tumulong sa kaniya na matuto tungkol sa itinuturo ng Bibliya. Masaya si Kishta na malaman kung paano sasambahin ang Diyos nang walang mga tradisyon at pamahiin. Nabautismuhan siya noong 2003

Personal na mga Komento

Ano ang nakatulong sa iyo na manatiling masaya?

Noong ma-house arrest ako, hindi ako puwedeng lumabas ng bahay sa loob ng mahigit apat na buwan. Ang hirap nito, kasi nakatira ako sa apartment na mayroon lang isang kuwarto kasama ng anak kong lalaki at ang pamilya niya. Pito kaming lahat sa isang kuwarto. Napakahirap n’on para sa akin at sa aking kalusugan. Hindi ako makaalis ng bahay. Pero nakatulong sa akin ang pagbubulay-bulay sa Kawikaan 24:10. Sinasabi nito: “Kapag nanghihina ang loob mo sa panahon ng problema, mababawasan din ang lakas mo.” Napag-isip-isip ko na kailangan kong pumili kung magpopokus ako sa mga problema ko o sa mabubuting bagay na nangyayari sa akin. Naalala ko ang halimbawa ni Jose. Nang mabilanggo siya, hindi niya hinayaang madaig siya ng galit. Kaya nagpokus ako sa magagandang bagay sa buhay ko, at nanatili akong masaya.

Pinahahalagahan natin ang makabagong-panahong mga halimbawang ito ng pananampalataya. At nagpapasalamat tayo na nakikita ni Jehova ang lahat ng ating pagsubok at gagantimpalaan niya ang ating katapatan.—Awit 37:18.

Time Line

Pebrero 16, 2023

Sinampahan ng kasong kriminal si Kishta
Pebrero 28, 2023

Hinalughog ang mga bahay. Dinala si Kishta sa isang temporary detention facility
Marso 1, 2023

Nawalan ng trabaho si Tsagan dahil maraming tao ang nakakaalam na akusado siya bilang isang kriminal. Pinalaya si Kishta mula sa temporary detention pero hindi pinayagang umalis ng bahay
Hulyo 21, 2023

Pinalaya si Kishta mula sa house arrest
Disyembre 19, 2023

Sinampahan ng kasong kriminal sina Yekaterina at Tsagan. Pareho silang pinagbawalang umalis ng kanilang lugar
Pebrero 9, 2024

Pinagbawalang umalis ng kanilang lugar si Kishta
Abril 1, 2024

Nagsimula ang paglilitis
Hunyo 24, 2024

Nahatulan ng suspended prison sentence

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE