Ko Peteli, ko he igoa Epelu, ko tona uiga ko “te fale o te Atua.” (Kenehe 28:17, 19) E fetaui te igoa mo nā fale iēnei e fakatū e Molimau a Ieova i te lalolagi kātoa mo te fakatonu ma fakalagolago atu ki ei te galuega tālaki. E kaukauna atu te Vaega Pule i te ofiha ulu i te lalolagi i te hetete o Niu Ioka, U.S.A. (Iunaite Hetete o Amelika), ma taukikila mai i kinā te galuega e fai i nā ofiha lālā i te lahiga o nā fenua. I te kavea o ki latou ma he vaega, ko ki latou e kaukauna atu i nā fale iēnei e takua ko ni kāiga Peteli. E vē ko he kāiga, e nonofo ma galulue fakatahi ki latou, e kakai fakatahi nā meakai, ma hukehuke fakatahi te Tuhi Paia ma kaufakatahi.​—Halamo 133:1.

He nofoaga fakapitoa, ko nā tino e galulue i ei e vē he kāiga, ma fakataulagaina foki ki latou. I nā fale Peteli uma, e i ei nā tāne ma fafine Kelihiano e tuku atu ki te fai o te finagalo o te Atua ma kaukauna atu ki nā fiafiaga o te Mālō fakataimi kātoa. (Mataio 6:33) E hē maua e ki latou he totogi, kae e maua ai e ki latou te meakai, he nofoaga, ma he tamā tupe e fehoahoani ki te fakatau ai o ni mea totino. E tofu nā tino uma i Peteli ma nā galuega, e tuha pe i te ofiha, te umukuka, pe ko te potu kaiga. Ko iē tahi e galulue i te fale lolomi tuhi pe ko te fale e tuku fakatahi ai nā tuhi, pe teufale, fai tagamea, tauhi fale, pe ko iē tahi mea.

He nofoaga e pihi i te lagolago atu ki te tālakiga o te Mālō. Ko te hini kautū o nā Peteli uma ko te taumafai ke fakaavanoa atu te kupu moni faka-Tuhi Paia ki nā tino kātoa. Ko te tamā tuhi tēnei ko he fakatakitakiga o te mea tēnā. Na tuhi i lalo o te taukikilaga a te Vaega Pule, na lafo atu i te initeneti ki te fia helau o nā kau fakaliliu i te lalolagi kātoa, ma lolomi i ni mahini lolomi tuhi e haohaoa lele i iē tahi Peteli e lomituhi, ma lafo atu i ni vaka ki te hili atu o te 110,000 o fakapotopotoga. I nā vaega uma o te lomituhi, e kavatu e nā kāiga Peteli te fakalagolago tāua ki te galuega e hili atu te fakavave​—te tālakiga o te tala lelei.​—Maleko 13:10.

• Ko ai e kaukauna atu i Peteli, ma e tauhi vēhea ki latou?

• He ā te galuega fakavave e lagolago atu e te galuega o nā Peteli takitahi?