«Perişdeler» diýlende, adamlardan has güýçli we ukyply şahsyýetler döz öňünde tutulýar (2 Petrus 2:11). Olar gökde ýa-da biziň planetamyzyň daşynda ruhy sferada ýaşaýarlar (1 Patyşalar 8:27; Ýahýa 6:38). Olara ruhy şahsyýetler hem diýilýär (1 Patyşalar 22:21; Zebur 18:10).

Perişdeler nädip peýda boldy?

 Hudaý perişdeleri Isa pygamber arkaly ýaratdy. Ýazgylarda oňa: «Ähli ýaradylan zatlaryň ilkinjisi» diýilýär. Hudaýyň ähli zatlary we şol sanda perişdeleri Isa arkaly ýaradandygy barada Mukaddes Kitapda şeýle diýilýär: «Ähli zatlar, ýagny gökde ýa ýerde bolsun, görünýän we görünmeýän zatlar... ol (Isa) arkaly ýaradyldy» (Koloslylar 1:13—17). Perişdeler durmuş gurmaýarlar we çaga dogurmaýarlar (Markus 12:25). Hudaýyň ogullary diýip atlandyrylýan perişdeleriň her biri aýratynlykda ýaradylan (Eýýup 1:6).

 Perişdeler ýer şary döredilmezinden has öň ýaradyldy. Hudaý ýer ýüzüni ýaradanda, perişdeler «begenjinden gygyryşdylar» (Eýýup 38:4—7).

Perişdeleriň sany näçe?

 Mukaddes Kitapda olaryň anyk sany aýdylmaýar. Ýöne olaryň juda köpdügini bilse bolýar. Meselem, Ýahýa resul görnüşde millionlarça perişdeleri görýär (Ylham 5:11).

Perişdeleriň ady barmy?

 Hawa. Mukaddes Kitapda iki perişdäniň ady agzalýar: Mikaýyl we Jebraýyl (Danyýar 12:1; Luka 1:26) a. Beýleki perişdeleriň hem atlary bar, emma olar öz adyny aýan etmediler (1 Musa 32:29; Serdarlar 13:17, 18).

 Her perişdäniň özüne mahsus häsiýeti bar. Olar bir-biri bilen gatnaşyk saklaýarlar (1 Korinfliler 13:1). Şeýle-de olaryň pikirlenmek we Hudaýy şöhratlandyrmak ukyby bar (Luka 2:13, 14). Mundan başga-da ýagşy bilen ýamany özleri çözüp biler ýaly, olarda erkinlik bar. Muny Hudaýa garşy pitne turzan Şeýtan Iblisiň tarapyna geçen perişdeleriň mysalyndan hem görse bolýar (Matta 25:41; 2 Petrus 2:4).

Perişdeleriň arasynda wezipe tapawudy barmy?

 Hawa. Güýji we ygtyýary bolan baş perişde Mikaýyl iň uly perişde hasaplanýar (Ýahuda 9; Ylham 12:7). Ýehowanyň tagtynyň golaýynda durýan «seraflar» ýokary wezipäni eýeleýärler (Işaýa 6:2, 6). Perişdeleriň başga bir görnüşi bolan «keruplar» hem ýokary wezipäni eýeleýärler we aýratyn borçlary ýerine ýetirýärler. Meselem, Adam ata bilen How ene Jennetden kowlanda, Erem bagyny goramak üçin keruplar bellenipdi (1 Musa 3:23, 24).

Perişdeler adamlara kömek edýärmi?

 Hawa. Hudaý şu günler adamlara kömek etmek üçin wepaly perişdelerini ulanýar.

•   Perişdeler arkaly Hudaý Patyşalyk baradaky hoş habary wagyz eder ýaly, gullukçylaryna görkezme berýär (Ylham 14:6, 7). Bu wagyzçylara-da, hoş habara seslenýän adamlara-da peýda berýär (Resullar 8:26, 27).

•   Perişdeler mesihçiler ýygnagyny zalym adamlaryň erbet täsirinden goraýar (Matta 13:49).

•   Perişdeler Hudaýyň wepaly gullukçylaryna görkezme berýär we goraýar (Zebur 34:7; 91:10, 11; Ýewreýler 1:7, 14).

•   Perişdeler tizden Isa Mesihiň ýolbaşçylygynda ähli zalymlygyň soňuna çykyp, bütin adamzada gutulyş getirerler (2 Selanikliler 1:6—8).

Her birimizi aýratynlykda goraýan perişde barmy?

 Perişdeler Hudaýyň gullukçylarynyň ruhy abadançylygy hakda alada etseler-de, bu Hudaýyň bizi goramak üçin her birimize aýratynlykda bir perişde belländigini aňlatmaýar b (Matta 18:10). Perişdeler Hudaýyň gullukçylaryny her bir kynçylykdan ýa-da synagdan goramaýar. Mukaddes Kitapda synaglarda çydap biler ýaly, Hudaýyň köplenç bize akyldarlyk we güýç berýändigi hem-de «çykalga açýandygy» aýdylýar (1 Korinfliler 10:12, 13; Ýakup 1:2—5).

Perişdeler baradaky nädogry düşünjeler

 Nädogry düşünje: Biz perişdelerden kömek sorap, doga edip bilýäris.

 Delil: Doga Hudaýa edýän seždämiziň bir bölegi hasaplanýar. Şol sebäpli biz diňe Ýehowa Hudaýa doga etmeli (Ylham 19:10). Ýöne muny Isanyň ady bilen etmeli (Ýahýa 14:6).