Luka 6:1—49
6 Bir gezek Isa şägirtleri bilen Sabat güni* bugdaýlygyň içinden geçip barýardy. Şägirtler bugdaý başlaryny ýolup+, elleriniň aýasynda arassalap iýýärdiler+.
2 Fariseýler olary görüp: «Siz näme üçin Sabat güni işläp, kanuny bozýarsyňyz?»+ diýdiler.
3 Isa: «Siz Dawut bilen ýoldaşlarynyň ajyganda näme edendigini okamadyňyzmy?+
4 Dawut Hudaýyň öýüne baryp, Hudaýa hödürlenen çöregi aldy-da, ýanyndakylar bilen iýdi. Emma kanun boýunça şol çöregi diňe ruhanylar iýip bilýärdi»+ diýdi.
5 Soňra Isa: «Ynsan ogly Sabat gününiň Hojaýyny»+ diýdi.
6 Başga bir Sabat güni+ Isa sinagoga baryp, adamlara öwredip başlady. Ol sag eli ysmaz* adamy gördi+.
7 Kanunçylar we fariseýler Isany günäkärlemek isleýärdiler. Olar Sabat güni ysmaz adamy sagaldarmyka diýip, Isadan gözüni aýyrman seredýärdiler.
8 Isa olaryň pikirini bilip+, eli ysmaz* adama: «Tur, orta çyk!» diýdi. Ol ýerinden turup, Isanyň ýanyna baryp durdy.
9 Isa olara: «Size soragym bar, Sabat güni ýagşylyk etmek dogrumy ýa-da ýamanlyk? Adamy halas etmek dogrumy ýa-da öldürmek?»+ diýdi.
10 Isa töweregindäkilere seredip, ýaňky adama: «Eliňi uzat!» diýdi. Ol uzadan badyna, eli sagaldy.
11 Olar gahar-gazaba münüp, Isa ýamanlyk etmegiň küýüne düşdüler.
12 Günlerde bir gün Isa doga-dileg etmek üçin daga gitdi+ we bütin gijäni Hudaýa doga edip geçirdi+.
13 Daň atanda, ol şägirtlerini ýanyna çagyryp, 12-sini saýlady. Şol şägirtlerine «resullar» diýip at goýdy+.
14 Ine olaryň ady: Simun, Isa oňa Petrus hem diýýärdi; Petrusyň dogany Andreas we Ýakup, Ýahýa, Filipus+, Bartolomeý,
15 Matta, Tomas+, Alfeýiň ogly Ýakup, yhlasly diýilýän Simun,
16 Ýakubyň ogly Ýahuda hem-de Isa dönüklik eden Iuda Iskariýot.
17 Isa şägirtleri bilen dagdan düşüp, düzlüge bardy. Isanyň köp şägirtleri we Ýahudadan, Iýerusalimden, Tir bilen Sidonyň kenarýakasyndan ençeme adamlar hem ýygnanypdy. Olar Isany diňlemäge we keselinden sagalmaga gelipdiler.
18 Şonda hatda jynly adamlar hem sagaldy.
19 Bütin märeke Isa elini degirjek bolýardy+, sebäbi Isadan çykýan güýç bilen hemmeler sagalýardy.
20 Ol şägirtlerine seredip, şeýle diýdi:
«Eý garyplar, siz bagtlysyňyz! Sebäbi Hudaýyň Patyşalygy siziňkidir+.
21 Ajygýanlar bagtlydyr, sebäbi olar doýarlar+.
Aglaýanlar bagtlydyr, sebäbi olar gülerler+.
22 Ynsan ogluna iman edýändigiňiz üçin adamlar sizi ýigrenende+, yzarlanda+, sögende we töhmet atanda bagtlysyňyz.
23 Şol gün şatlanyň, begeniň*, sebäbi gökde aljak sylagyňyz uludyr. Olaryň ata-babalary-da pygamberlere şeýle edipdiler+.
24 Eý baýlar, waý günüňize!+ Sebäbi siz özüňize gerek zady eýýäm aldyňyz+.
25 Doýup-ganýanlaryň waý gününe, sebäbi olar ajygarlar.
Şatlanýanlaryň* waý gününe, sebäbi olar hasrat çekip aglarlar+.
26 Adamlar sizi öwüp arşa çykarsa, waý günüňize!+ Sebäbi olaryň ata-babalary-da ýalan pygamberlere şeýle edipdiler.
27 Men bolsa size diýýärin, duşmanlaryňyzy söýüň, sizi ýigrenýänlere ýagşylyk ediň+.
28 Size gargaýanlara alkyş aýdyň, sögýän adamlar üçin doga-dileg ediň+.
29 Biri ýaňagyňa ursa, beýleki ýaňagyňy hem öwür. Biri donuňy alsa, köýnegiňi hem ber+.
30 Biri zat sorasa, oňa beriň+, ýöne yzyna soramaň.
31 Adamlaryň size näme etmegini isleýän bolsaňyz, siz hem olara şeýle ediň+.
32 Eger siz özüňizi söýýänleri söýýän bolsaňyz, onda başgalardan näme tapawudyňyz bar? Hatda günäkärler hem özüni söýýänleri söýýärler+.
33 Eger size ýagşylyk edýänlere ýagşylyk edýän bolsaňyz, onda başgalardan näme tapawudyňyz bar? Hatda günäkärler hem şeýle edýärler.
34 Eger siz yzyna almak üçin berýän bolsaňyz, onda başgalardan näme tapawudyňyz bar?+ Hatda günäkärler hem peýda görmek üçin biri-birine zat berýärler.
35 Siz bolsa duşmanlaryňyzy söýüň, olara ýagşylyk ediň, karz berseňiz-de yzyna garaşmaň+. Şonda size uly sylag bererler, Allatagalanyň ogly diýerler. Alla gadyr bilmeýänlere-de, zalymlara-da ýagşylyk edýär+.
36 Gökdäki Ataňyzyň rehimdar bolşy ýaly, siz hem rehimdar boluň+.
37 Adamlary ýazgarmaň, şonda sizi-de ýazgarmazlar+. Adamlary tankytlamaň, şonda sizi-de tankytlamazlar. Adamlary bagyşlaň, şonda Hudaý hem sizi bagyşlar+.
38 Beriň, şonda size-de bererler+. Gujagyňyzy doldurarlar, üstünden basyp-basyp, silkip-silkip bererler we püre-pür edip guýarlar. Nähili ölçeg bilen ölçäp berseňiz, size-de şeýle ölçeg bilen ölçäp bererler».
39 Isa ýene-de mysal getirip, şeýle diýdi: «Kör köri idip bilermi? Eger kör köri itse, ikisi-de çukura gaçmazmy?+
40 Şägirt halypasyndan beýik däldir, ýöne gowy öwrense, halypasy ýaly bolar.
41 Sen näme üçin doganyň gözündäki çöpi görýäň-de, öz gözüňdäki agajy görmeýäň?+
42 Öz gözüňde agaç barka: „Doganym, gel, gözüňdäki çöpi çykaraýyn“ diýip, nädip aýdyp bilýäň? Eý ikiýüzli! Ilki öz gözüňdäki agajy çykar, şonda doganyň gözünden çöpi çykaryp bilersiň.
43 Erbet agaç erbet* miwe berýär, gowy agaç gowy miwe berýär+.
44 Agaç miwesinden tanalýandyr+. Tikenekden injir, ýandakdan üzüm ýygylmaýar.
45 Ýagşy adam gowy zatlary gürrüň berýär, sebäbi ýüregi* ýagşylykdan doly. Erbet adam bolsa erbet zatlary aýdýar, sebäbi ýüregi erbetlikden doly. Adamyň ýüregindäki dilindedir+.
46 Siz: „Halypam! Halypam!“ diýip-de, aýdanlarymy näme üçin berjaý etmeýärsiňiz?+
47 Meniň sözlerimi diňleýän we berjaý edýän adamyň kime meňzeýändigini aýdaýyn+:
48 Ol ýeri çuň gazyp, jaýyň düýbüni berk tutan* adam ýalydyr. Sil gelip, derýa joşup, jaýa ursa-da, gymyldadyp hem bilmez, sebäbi jaý berk gurlupdyr+.
49 Meniň sözlerimi diňläp, ýöne berjaý etmedik adam+ jaýyň düýbüni tutman* çägäniň üstünde guran adam ýalydyr. Derýa joşup, jaýa ursa, ol şol bada ýumrular, ýer bilen ýegsan bolar».
Çykgytlar
^ Ýa-da: şel.
^ Ýa-da: şel.
^ Sözme-söz: şatlykdan ýaňa böküň.
^ Ýa-da: Gülýänleriň.
^ Sözme-söz: çüýrük.
^ Sözme-söz: hazynasy.
^ Sözme-söz: gaýanyň üstünde guran.
^ Sözme-söz: jaýy fundamentsiz.
