Ysraýyllaryň Müsürden çykanyna iki aý töweregi bolupdy. Olar Sinaý dagynyň golaýynda çadyrlaryny gurup, ýaşap başladylar. Bir gün Ýehowa Musa: «Sinaý dagyna çyk, saňa aýtjak zatlarym bar» diýdi. Musa hem daga çykdy. Ýehowa: «Men ysraýyllary halas etdim. Eger olar maňa gulak assa, kanunlarymy berjaý etse, halkym bolar» diýdi. Musa dagdan düşüp, adamlara Ýehowanyň aýdanlaryny gürrüň berdi. Şonda halk näme diýdi? Olar: «Biz Ýehowanyň hemişe aýdanyny ederis» diýdiler.

Musa ýene daga çykdy. Ýehowa: «Iki günden seniň bilen gepleşerin. Hiç kim daga çykmasyn» diýdi. Musa adamlara: «Iki günden Ýehowa bilen gepleşerin, sizem diňläp duruň» diýdi.

Üçünji gün diýlende, ysraýyllar dagyň ýanyna bardylar. Dagyň depesine gara bulut geldi. Gök gürläp, ýyldyrym çakdy. Surnaýyň sesi güýçli ýaňlanýardy. Dagyň depesi tüssedi. Adamlar şol zatlary görüp gorkdular. Birdenem ýer titräp, surnaýyň sesi hasam gataldy. Şonda Ýehowa: «Men Ýehowa, menden başga Hudaýa sežde etmäň!» diýdi.

Soň Musa daga çykyp, Ýehowa bilen gepleşdi. Ýehowa ysraýyllara kanun berdi. Kanunda Hudaýa nädip sežde etmelidigi we nähili ýaşamalydygy aýdylýar. Musa kanuny ýazyp aldy. Soň ysraýyllara okap berdi. Olar: «Ýehowanyň kanunyna gulak asarys» diýip söz berdiler. Olar sözünde durdumy?