1—3. Maşgalada nähili kynçylyklar bolýar? (Makalanyň başyndaky surata serediň).

OTUZ SEKIZ ýyldan bäri bagtly maşgalada ýaşaýan bir dogan: «Maşgalaňy bagtly etmek üçin, ýürekden tagalla edeniňde, Ýehowanyň bereketlerini alýarsyň» diýýär. Är-aýal gowy günlerinde bagtly bolşy ýaly, kyn günlerinde-de bir-birini goldap bilýär (Sül. tym. 18:22).

² Elbetde, maşgalada «muşakgat» hem bolýar (1 Kor. 7:28). Näme üçin? Gündeki aladalar sebäpli maşgalada kynçylyk döreýär. Iň gowy maşgalada hem bikämillik sebäpli öýke-kine we düşünişmezlik bolup bilýär (Ýakup 3:2, 5, 8). Är-aýallaryň köpüsine hem işlemek, hem çagalarynyň aladasyny etmek kyn bolýar. Käbir är-aýallar gaýgy-alada we ýadawlyk sebäpli maşgalasyny berkitmek üçin bir-birine wagt tapmaýarlar. Pul ýetmezçiligi, keselçilik we başga-da kynçylyklar sebäpli, är-aýalyň biri-birine bolan söýgüsi sowaşýar, hormaty gaçýar. Agzybir bolup görünýän maşgalalar hem zynahorluk, azgynlyk, ýigrenç, gahar, dawa-jenjel we gabanjaňlyk ýaly «ten işleri» sebäpli bozulýar (Gal. 5:19—21).

 ³ Şu «soňky günlerde» Hudaýa ynanmaýan we diňe özüni bilip ýaşaýan adamlaryň garaýşy maşgalany zäherleýär (2 Tim. 3:1—4). Şeýle-de maşgalalar zalym duşmana garşy göreşmeli bolýar. Petrus resul: «Ýagyňyz bolan iblis arlaýjy arslan kimin aýlanyp, ýuwutjagyny agtaryp ýörendir» diýip duýdurdy (1 Pet. 5:8; Ylh. 12:12).

4. Maşgalany nädip agzybir we bagtly edip bolýar?

⁴ Ýaponiýaly dogan şeýle gürrüň berýär: «Men pul ýetmezçiligi sebäpli biynjalyk bolýardym. Aýalym bilen gürrüňdeş bolmaýandygym üçin, ol hem ruhdan düşýärdi. Şeýle-de ol ýaňy-ýakynda agyr keselläpdi. Käwagt bu gaýgy-aladalar sebäpli aramyzda agzalalyk döreýärdi». Her bir maşgalada kynçylyklar bolsa-da, olaryň hötdesinden gelip bolýar. Maşgalalar Ýehowanyň kömegi bilen agzybir we bagtly bolup bilerler (Zebur 127:1-i okaň). Geliň, maşgalany haýsy bäş usul bilen agzybir we bagtly edip bolýandygyna seredeliň. Soňra maşgalanyň agzybir bolmagyna söýginiň nädip kömek edýändigini bileris.

5, 6. Maşgalaňyzda Ýehowanyň bolmagy üçin näme edip bilersiňiz?

⁵ Maşgalanyň bagtly bolmagy üçin är-aýal, esasanam, maşgalany döreden Hudaýa tabyn bolup, oňa wepaly gulluk etmeli (Wagyz kitaby 4:12-ni okaň) *. Şeýle-de olar maşgalasynda Ýehowanyň bolmagy üçin, onuň söýgi bilen berýän görkezmesine eýermeli. Mukaddes Ýazgylarda Hudaýyň gadymy gullukçylaryna: «Saga, sola öwrüleniňizde, yzyňyzdan: „Ýol budur, şundan ýöräň“ diýen sesi eşidersiňiz» diýilýär (Iş. 30:20, 21). Şu günler Ýehowanyň sesini «eşitmek» üçin, är-aýal Mukaddes Ýazgylary bile okamaly (Zeb. 1:1—3). Galyberse-de, olar maşgala okuwyny yzygiderli geçirseler, birek-birege ýakynlaşarlar we ruhy taýdan berkärler. Şeýle-de olar her gün bile doga etseler, Şeýtanyň zalym dünýäsine garşy durup bilerler.

⁶ Germaniýaly Gerhard dogan şeýle diýýär: «Käte kynçylyk we düşünişmezlik sebäpli, keýpimiz bolmasa-da, Mukaddes Ýazgylardaky maslahatlar bize sabyrly we geçirimli bolmaga kömek edýär. Bu häsiýetler maşgalanyň bagtly bolmagy üçin örän wajypdyr». Är-aýal bilelikde Ýehowa sežde etse, Hudaýa ýakynlaşyp, agzybir we bagtly ýaşar.

7. Erkek adam aýalyna nähili garamaly?

⁷ Eger maşgalabaşy gowy baştutanlyk etse, maşgalasy agzybir we bagtly bolar. Mukaddes Ýazgylarda: «Her erkegiň baýary Mesih, aýalyň baýary erkek» diýilýär (1 Kor. 11:3). Bu nämäni aňladýar? Är aýalyna Isa Mesihiň şägirtlerine garaýşy ýaly garamaly. Isa hiç haçan zalym we gödek däldi. Ol hemişe mähirli, paýhasly, ýumşak, kiçigöwünlidi we adamlara söýgi bildirýärdi (Mat. 11:28—30).

8. Erkek adam nädip aýalynyň söýgüsini we hormatyny gazanyp biler?

⁸ Erkek adam Isanyň göreldesine  eýerse, aýalynyň hemişe oňa hormat goýmagyny talap etmez. Gaýtam, ol «aýalynyň özünden ejizdigini bilip, ony sylar» (1 Pet. 3:7). Ol ýekelikde-de, başgalaryň ýanynda-da aýaly bilen sylaşykly gepleşer we oňa duýgudaşlyk bildirip, gadyryny bilýändigini görkezer (Sül. tym. 31:28). Maşgalabaşy söýgi bilen baştutanlyk edip, aýalynyň söýgüsini we hormatyny gazanar hem-de Ýehowanyň berekedini alar.

9. Aýal pesgöwünlilik bilen tabyn bolýandygyny nädip görkezip biler?

⁹ Biz Ýehowany ýürekden söýýändigimiz üçin, «Onuň güýçli elleri astynda pällerimizi pes tutýarys» (1 Pet. 5:6). Pesgöwünli aýal ýanýoldaşyny goldap, Ýehowanyň häkimiýetine hormat goýýandygyny görkezýär. Mukaddes Ýazgylarda: «Eý aýallar, Rebde ýaraşykly bolşy ýaly, äriňize tabyn boluň» diýilýär (Kol. 3:18). Käwagt äriniň gelýän karary bilen aýalynyň ylalaşmazlygy mümkin. Emma onuň gelen karary Hudaýyň kanunyna garşy gelmeýän bolsa, aýaly oňa tabyn bolup, höwes bilen goldar (1 Pet. 3:1).

10. Aýalyň ýanýoldaşyna höwes bilen tabyn bolmagy näme üçin wajyp?

¹⁰ Maşgalada aýal ärine «ýanýoldaş» bolup, Ýehowanyň ynanan hormatyna eýe bolýar (Mal. 2:14). Aýaldan ärine tabyn bolmak talap edilse-de, maşgalada bir karara gelnende, ol pikirini we duýgusyny sylaşykly aýdyp biler. Şonda ýoldaşy aýalynyň pikirini ünsli diňläp, paýhaslydygyny görkezer (Sül. tym. 31:10—31). Eger aýal ýanýoldaşyna höwes bilen tabyn bolsa, maşgalasynyň agzybir we bagtly bolmagyna goşandyny goşar. Şeýle-de olar  Hudaýy razy edip ýaşaýandygyna begenerler (Efes. 5:22).

11. Bagyşlamak näme üçin wajyp?

¹¹ Maşgalanyň dargamazlygy üçin, är-aýal bir-birini ýürekden bagyşlamagy öwrenmeli. Olar «biri-birine sabyr-takatly bolup... birek-biregi bagyşlasa», arasyna tow düşmez (Kol. 3:13). Emma olar ýanýoldaşynyň eden ýalňyşyny bagyşlaman, ýene-de könäni ýatlap, etmişini ýüzüne basyp dursa, maşgalasy bozular. Çat açan jaýyň berk bolmaýşy ýaly, är-aýal hem ýüreginde öýke-kine saklasa we gaharlanyp ýörse, bir-biriniň ýalňyşyny bagyşlamak kyn bolar. Emma olar Ýehowanyň bagyşlaýşy ýaly bir-biriniň günäsini bagyşlasa, agzybir ýaşarlar (Mika 7:18, 19).

12. Söýgi nädip «köp günäleri basyrýar»?

¹² Hakyky söýgi «içinde hylt saklaýan däldir», ol «köp günäleri basyrýandyr» (1 Kor. 13:4, 5; 1 Petrus 4:8-i okaň). Biz birini söýýän bolsak, ony näçe gezek bagyşlaýandygymyzy sanamaýarys. Petrus resul Isadan adamy näçe gezek bagyşlamalydygyny soranda, ol: «Ýetmiş ýola ýedi gezek» diýip jogap berdi (Mat. 18:21, 22). Şeýle diýmek bilen, Isa biziň näçe gezek bagyşlaýandygymyzy sanamaly däldigimizi düşündirdi (Sül. tym. 10:12) *.

13. Bize bagyşlamak kyn bolsa näme etmeli?

¹³ Anetta uýa şeýle diýýär: «Är-aýal bir-birini bagyşlamak islemese, onda öýke-kine we ynanmazçylyk sebäpli olaryň arasyna tow düşýär. Emma olar bir-birini bagyşlasalar, agzybir ýaşarlar we söýgüsi sowaşmaz». Eger size ýanýoldaşyňyzy bagyşlamak kyn bolýan bolsa, onda onuň ýagşy işleriniň gadyryny bilip, minnetdarlygyňyzy bildiriň. Şeýle-de ony ýürekden öwmäge çalşyň (Kol. 3:15). Siz bagyşlamagy başarsaňyz, kalbyňyzda rahatlyk bolar, agzybir ýaşarsyňyz we Hudaýyň bereketlerini alarsyňyz (Rim. 14:19).

14, 15. Altyn düzgün näme we maşgalada oňa eýermegiň nähili peýdasy bar?

¹⁴ Elbetde, her bir adam gadyrynyň bilinmegini we hormat goýulmagyny isleýär. Adamlar bizi ünsli diňlänlerinde we duýgularymyzy göz öňünde tutanlarynda begenýäris. Siz käwagt adamlaryň kimdir birine gaty gahary gelip: «Edişime bir seret!» diýýänini eşidýänsiňiz. Emma Mukaddes Ýazgylarda: «„Maňa näme eden bolsa, menem şony ederin, etmişine görä gaýtararyn“ diýme» diýilýär (Sül. tym. 24:29). Isa şeýle kyn ýagdaýy çözmegiň iň gowy usulyny aýtdy. Ol: «Adamlaryň özüňize näme etmegini isleýän bolsaňyz, siz-de olara şeýle ediň» diýdi. Muňa köplenç altyn düzgün diýilýär (Luka 6:31). Isa adamlaryň özümize näme etmegini isleýän bolsak, biziň hem olara şony etmelidigimizi aýtdy. Biz ýamanlyga ýamanlyk bilen jogap bermeli däl. Biz maşgalada-da şol düzgüne eýerjek bolmaly.

 ¹⁵ Bir-biriniň duýgusyny göz öňünde tutýan är-aýal ýürekdeş bolýar. Günorta Afrikaly bir dogan şeýle diýýär: «Biz altyn düzgüne eýermäge jan edýäris. Käte keýpimiz bolmasa-da, özümize näme edilmegini isleýän bolsak, bir-birimize şony edýäris. Biz birek-biregiň gadyryny bilip, hormat goýmaga çalyşýarys».

16. Är-aýal nämeden gaça durmaly?

¹⁶ Ýanýoldaşyň kemçiligi barada başgalara gürrüň berip, zeýrenmek, hatda ol hakda degişmek hem nädogrudyr. Maşgalada ýanýoldaşyňa el galdyrmagyň, gygyrmagyň ýa-da awuly sözleri pürkmegiň ýerlikli däldigini unutmaň. Elbetde, bikämil adamlar käwagt bir-biriniň göwnüne degýärler. Emma är-aýal hiç haçan bir-birine gyjalat berip, kemsitmeli däl. Iň erbedi hem olar bir-biri bilen uruşmaly däl (Süleýmanyň tymsallary 17:27; 31:26-njy aýatlary okaň).

17. Ärler nädip altyn düzgüne eýerip biler?

¹⁷ Käbir medeniýetde är aýalyna el galdyrsa, ony sözüni ýöredip bilýän erkek kişi hasaplaýarlar. Emma Hudaýyň Sözünde: «Sabyrly adam güýçlülerden üstündir, özüne erk edýän şäheri basyp alandan üstündir» diýilýär (Sül. tym. 16:32). Isa Mesihiň göreldesine eýerip, özüňe erk etmek üçin tagalla etmeli. Aýalyňy urup-ýençmek batyrlyk däl-de, gowşaklykdyr. Şeýle adam, wagtyň geçmegi bilen, Ýehowa bilen dostlugyny hem ýitirer. Batyrgaý we edermen mezmurçy Dawut: «Gaharlanyp, günä galmaň siz; düşegiňizde oýlanyň, ümsüm boluň» diýdi (Zeb. 4:5, MK).

18. Söýgini ösdürmek näme üçin wajyp?

¹⁸ 1 Korintoslylar 13:4—7-nji aýatlary okaň. Söýgi — maşgalada iň gerekli häsiýet. Şol sebäpli biz «rehimdarlyk ýüregini, ýagşylygy, kiçigöwünliligi, ýumşaklygy we sabry geýmeli. Bularyň hemmesiniň üstünden-de kämil birligiň bagy bolan söýgini geýmeli» (Kol. 3:12, 14). Är-aýal Isanyň göreldesine eýerip, janaýamaz söýgini bildirmeli. Är-aýalyň arasynda şeýle söýgi höküm sürse, maşgalasynda keselçilik, pul ýetmezçiligi we dogan-garyndaşlary sebäpli kynçylyklar dörese-de ýa-da bir-biriniň kemçiliklerine gaharlansalar-da, maşgalasy berk bolar.

19, 20. a) Maşgalasynyň agzybir we bagtly bolmagy üçin är-aýal näme etmeli? b) Biz indiki makalada nämä serederis?

¹⁹ Maşgalasynyň bagtly bolmagy üçin, är-aýal bir-birini söýüp, wepaly bolmaly we ýürekden tagalla etmeli. Olar kynçylyk dörände, ýanýoldaşyny taşlamaly däl, gaýtam, ony goldamaly. «Söýgi asla tükenmeýär», şol sebäpli Ýehowany we bir-birini söýýän är-aýal kynçylyklaryny bile çözmegi berk ýüregine düwmeli (1 Kor. 13:8; Mat. 19:5, 6; Ýew. 13:4).

²⁰ Şu «soňky kyn pursatlarda» maşgalany agzybir we bagtly etmek aňsat bolmasa-da, muny Ýehowanyň kömegi bilen edip bolýar (2 Tim. 3:1). Bu azgyn dünýäde är-aýallar özüni ahlaksyzlykdan goramaly bolýar. Biz indiki makalada är-aýalyň maşgalasyny ruhy taýdan goramak üçin näme etmelidigi barada gürrüň ederis.