22-NJI MAKALA
15-NJI AÝDYM Ýehowanyň Nowbaharyna alkyş aýdyň
Isa Ýehowanyň adyny nädip aklady?
«Men olara adyňy tanatdym, ýene-de tanadaryn» (Ýah. 17:26).
ESASY PIKIR
Isa Atasynyň adyny tanadyp, Ýehowanyň mukaddes Hudaýdygyny we Şeýtanyň ýalançydygyny subut etdi.
1, 2. a) Isa ölüminiň öň ýanyndaky gije näme etdi? b) Makalada haýsy soraglaryň jogabyny bileris?
B. E. 33-NJI ýylynyň nisan aýynyň 14-ne dördünji gün agşam Isa resullary bilen Ýatlama agşamyny belleýär. Ol tizden özüniň tussag ediljegini, pürse çüýlenip öldüriljegini bilýärdi. Agşamlyk naharyndan soň Isa şägirtlerini ruhlandyrýar. Soňra resullary bilen soňky gezek Hudaýa doga edýär. Isanyň eden dogasy Ýahýa 17-nji bapda ýazylan.
2 Biz Isanyň resullary bilen eden soňky dogasyndan köp zat öwrenip bilýäris. Makalada şu soraglaryň jogabyny bileris: Isa ölmänkä nämäni alada etdi? Onuň üçin iň wajyp zat nämedi? Muny Isanyň durmuşy nädip görkezýär?
«MEN OLARA ADYŇY TANATDYM»
3. Isanyň: «Men olara adyňy tanatdym» diýen sözleri nämäni aňladýar? (Ýahýa 17:6, 26).
3 Isa dogasynda: «Men olara adyňy tanatdym» diýdi. Ol şägirtlerine Ýehowanyň adyny tanadandygyny iki gezek nygtaýar (Ýahýa 17:6, 26-njy aýatlary okaň). Eýsem Isanyň şägirtleri Hudaýyň adynyň Ýehowadygyny bilmeýärdimi? Isa näme diýjek boldy? Isanyň şägirtleri ýehudydy. Olar hak Hudaýyň adynyň Ýehowadygyny bilýärdi. Töwratda hem Ýehowa ady müňlerçe sapar agzalýar. Diýmek, Isa «men olara adyňy tanatdym» diýende, şägirtlerine Ýehowany has gowy tanamaga kömek edendigini aýdýar. Ol şägirtlerine Ýehowanyň niýetleri, gudratly işleri we häsiýetleri hakda öwretdi. Sebäbi hiç kim Ýehowany Isa ýaly gowy tanamaýardy.
4, 5. a) Biz adamy haçan has gowy tanap bileris? Mysal getiriň. b) Isanyň şägirtleri Ýehowany nädip has gowy tanadylar?
4 Aýdaly, ýygnak ýaşulusy Dawut hassahanada hirurg bolup işleýär. Siz ony köp ýyldan bäri tanaýarsyňyz. Günlerde bir gün ýol heläkçiligine uçraýarsyňyz we sizi operasiýa etmeli bolýar. Şonda kime ýüz tutarsyňyz? Elbetde, siz bir minudyňyzy hem ýitirmän Dawut dogandan kömek sorarsyňyz. Ol hem sizi operasiýa edip, janyňyzy halas eder. Indi siz Dawut doganyň adyny eşideniňizde, diňe bir ýygnak ýaşulusy däl-de, janyňyzy halas eden hirurg hem göz öňüňize geler.
5 Isanyň şägirtleri Hudaýyň adynyň Ýehowadygyny bilýärdiler. Ýöne olar Isanyň beren gürrüňinden we eden işlerinden Ýehowany has gowy tanadylar. Sebäbi Isa Atasynyň göreldesine doly eýerýärdi. Şeýlelikde, resullar Isanyň gürrüňlerini diňläp, adamlara eden ýagşylygyny synlap, Ýehowanyň mähirli we rehimdar Hudaýdygyna has-da göz ýetirdiler (Ýah. 14:9; 17:3).
«ÖZ ADYŇ, MAŇA BEREN ADYŇ HATYRASYNA OLARY GORA»
6. Isa Atasyna «maňa beren adyň» diýende nämäni göz öňünde tutdy? (Ýahýa 17:11, 12).
6 Isa Atasyna şägirtleri üçin doga edende: «Öz adyň, maňa beren adyň hatyrasyna olary gora» diýdi (Ýahýa 17:11, 12-nji aýatlary okaň). Onda biz Isa pygambere Ýehowa diýip ýüzlenmelimi? Elbetde, ýok! Isa dogasynda: «Öz adyň... hatyrasyna olary gora» hem diýipdi. Isa Hudaýa «maňa beren adyň hatyrasyna» diýende nämäni göz öňünde tutupdy? Isa Ýehowanyň wekilidi, onuň adyndan gepleýärdi. Ol Atasynyň adyndan ýere gelipdi we Onuň ady arkaly gudratlary görkezipdi (Ýah. 5:43; 10:25). Şeýle-de Ýehowa diýen at Isanyň ady bilen hem baglanyşyklydy. Isa diýmek ýewreýçe «Ýehowa halas edýär» diýmegi aňladýar.
7. Isanyň Ýehowanyň adyndan gepländigini haýsy mysal arkaly düşündirerdiňiz?
7 Isanyň Ýehowanyň adyndan gepleýändigine düşünmek üçin bir mysala seredeliň. Adatça, prezident daşary ýurtlara ilçilerini iberýär. Olar hem baran ýurdunda öz prezidentiniň adyndan gepleýär we hereket edýär. Edil şonuň ýaly, Ýehowa-da Isany ýer ýüzüne ilçi edip iberdi. Isa-da ýere gelende Ýehowanyň adyndan gepledi we hereket etdi (Mat. 21:9; Luka 13:35).
8. Isa pygamber ýer ýüzüne gelmänkä Ýehowa näme üçin oňa «adymy göterýär» diýdi? (2 Musa 23:20, 21).
8 Mukaddes Kitapda Isa «Söz» diýilýär. Ýehowa perişdeler we adamlar bilen Isa arkaly gepleşýärdi hem-de olara görkezme berýärdi (Ýah. 1:1—3). Ýehowa ysraýyllary Müsürden çykaranda perişdesi arkaly ýol görkezdi. Şonda Ýehowa halkyna perişdä gulak asmagy tabşyrdy, sebäbi Ýehowa: «Ol meniň adymy göterýär» diýdi a (2 Musa 23:20, 21-nji aýatlary okaň). Diýmek, şol perişde Isa bolmaly. Hawa, Isa Ýehowanyň adyny göterýärdi. Ol Ýehowanyň wekilidi we onuň adyny aklap, mukaddes etjek ýeke-täk şahsyýetdi.
«ATAM, ADYŇY ŞÖHRATLANDYR»
9. Isanyň Ýehowanyň adyny götermegi hormat hasaplaýandygyny nireden bilýäris?
9 Isa gökde ýaşaýarka Ýehowanyň adyny götermegi uly hormat hasaplaýardy. Ol ýere gelende-de, Ýehowanyň adyny beýgeltmek üçin elinde baryny etdi. Isa ýerdäki ömrüniň ahyrynda: «Atam, adyňy şöhratlandyr» diýdi. Ýehowa-da oňa şol bada: «Men adymy şöhratlandyrdym, ýene-de şöhratlandyraryn» diýip jogap berdi (Ýah. 12:28).
10, 11. a) Isa Ýehowanyň adyny nädip şöhratlandyrdy? (Surata serediň). b) Ýehowanyň ady nädip aklanmalydy?
10 Isa diňe bir: «Atam, adyňy şöhratlandyr» diýip doga etmän, eýsem aýdan sözlerine görä ýaşady. Ol adamlara Atasynyň ajaýyp häsiýetleri we gudratly işleri hakda gürrüň berdi. Şeýle-de ol Ýehowanyň adyny aklap, mukaddes etmelidi b. Isa muny şeýle bir wajyp hasaplaýardy welin, şägirtlerine öwreden nusgalyk dogasynda: «Eý gökdäki Atamyz, adyň mukaddes bolsun!» diýdi (Mat. 6:9).
11 Ýehowanyň ady näme üçin aklanmalydy? Erem bagynda Şeýtan Ýehowa töhmet atdy. Ol: «Ýehowa ýalançy, Adam ata bilen How eneden gowy zady gizleýär» diýdi (1 Mus. 3:1—5). Şeýle-de ol: «Ýehowa gowy hökümdar däl» diýip, Onuň adyny garalajak boldy. Eýýubyň günlerinde Şeýtan hudaýhon adamlara töhmet atdy. Ol: «Hiç bir adam Ýehowany söýmeýär, oňa öz bähbitleri üçin gulluk edýärler. Eger olaryň başyna kynçylyk düşse, Ýehowadan ýüz öwrerler» diýdi (Eýp. 1:9—11; 2:4). «Wagt görkezer» diýlişi ýaly, Ýehowanyňmy ýa-da Şeýtanyň ýalançydygyny bilmek üçin wagt gerekdi.
Isa şägirtlerine Ýehowanyň adyny aklamagyň wajypdygyny düşündirýär (10-njy abzasa serediň).
«MEN JANYMY GURBAN EDÝÄRIN»
12. Isa Atasynyň adyny aklamak üçin nämä taýyndy?
12 Isa Ýehowany söýýärdi, ol Atasynyň adynyň aklanmagy üçin islendik zada taýyndy. Ol: «Men janymy gurban edýärin» diýdi (Ýah. 10:17, 18). Dogrudan-da, Isa Atasynyň ady üçin ölmäge-de taýyndy c. Ilkinji kämil ynsanlar Adam ata bilen How ene Ýehowadan ýüz öwrüp, Şeýtanyň tarapyna geçdiler. Isa bolsa, öz islegi bilen ýer ýüzüne gelip, Ýehowany söýýändigini subut etdi. Şeýle-de ol Atasyna doly gulak asdy, hiç hili günä etmedi (Ýew. 4:15; 5:7—10). Isa jebir pürsündäki ölüme döz gelip, soňky demine çenli Ýehowa wepaly boldy (Ýew. 12:2).
13. Isa näme üçin Şeýtanyň ýalançydygyny subut edip biljek ýeke-täk şahsyýetdi? (Surata serediň).
13 Isa bütin ömrüne Ýehowanyň däl-de, Şeýtanyň ýalançydygyny subut etdi (Ýah. 8:44). Eger Şeýtanyň Ýehowa hakda aýdan zatlarynyň ýekejesi dogry bolan bolsa, onda Isa muny bilerdi. Sebäbi hiç bir perişde, hiç bir adam Ýehowany Isadan gowy tanamaýardy. Şonuň üçin Isa Atasynyň adyny aklamagy ýüregine düwdi. Hatda Ýehowa Isadan goragyny aýranda-da, ol Atasyna wepaly bolmagy saýlady. Isa üçin Atasyndan ýüz öwreninden öleni gowudy (Mat. 27:46) d.
Isa bütin ömrüne Şeýtanyň ýalançydygyny subut etdi (13-nji abzasa serediň).
«MAŇA TABŞYRAN IŞIŇI TAMAMLADYM»
14. Ýehowa Isa nähili sylag berdi?
14 Isa ölmeziniň öň ýanyndaky gije, Ýehowa doga edip arassa ynsap bilen: «Maňa tabşyran işiňi tamamladym» diýdi. Isa Ýehowa wepaly bolsa sylag aljakdygyna asla şübhelenmeýärdi (Ýah. 17:4, 5). Ýehowa-da Isanyň tamasyny ödedi. Ol Oglunyň mazarda çüýremegine ýol bermedi (Res. 2:23, 24). Ýehowa Isany direldip, gökde has ýokary orny berdi (Flp. 2:8, 9). Soňra Ýehowa Isany Patyşalygynyň Patyşasy edip belledi. Hudaýyň Patyşalygy nähili işleri eder? Isa nusgalyk dogasynda şeýle diýdi: «Patyşalygyň gelsin, gökde bolşy ýaly, ýerde-de (Ýehowanyň) islegi amala aşsyn!» (Mat. 6:10).
15. Isa tizden nämeleri eder?
15 Tizden Armageddon söweşi başlar. Isa Hudaýyň duşmanlarynyň ýoguna ýanar (Ylh. 16:14, 16; 19:11—16). Soňra Şeýtany «düýpsüz çuňluga zyňar», Şeýtan 1 000 ýyllap tussaglykda bolar (Ylh. 20:1—3). Soňra Isa ýer ýüzünde parahatlygy dikelder, adamlary kämillige ýetirer, ölen adamlary direlder. Bütin ýer ýüzüni bolsa Jennete öwrer. Şeýdip, Ýehowanyň niýeti doly amala aşar (Ylh. 21:1—4).
16. Isanyň Müňýyllyk hökümdarlygynyň soňunda näme bolar?
16 Isanyň Müňýyllyk hökümdarlygynyň soňunda adamlar günäden doly azat bolar. Indi olara günäsini ýuwmak üçin töleg gurbany ýa-da Hudaý bilen ýaraşdyrýan araçy gerek bolmaz. Şeýle-de «soňky duşman ölüm hem ýok ediler». Ölen adamlar direler, mazarlar boşap galar, ähli adamlar kämil bolar (1 Kor. 15:25, 26).
17, 18. a) Müňýyllyk hökümdarlygyň soňunda näme bolar? b) Şonda Isa näme eder? (1 Korinfliler 15:24, 28; surata serediň).
17 Isanyň Müňýyllyk hökümdarlygynyň soňunda jedelli mesele ahyry çözüler. Ýehowanyň ady doly aklanar. Şeýtan Erem bagynda: «Ýehowa ýalançy, ol gowy hökümdar däl» diýip töhmet atdy. Şondan bäri hudaýhon adamlar Ýehowanyň adyny gaýta-gaýta akladylar. Isanyň Müňýyllyk hökümdarlygynyň soňunda Ýehowanyň aladaçyl we mähirli Atadygy hemmä mälim bolar.
18 Şeýtanyň ýalançydygy bütin äleme jar bolar. Isa Müňýyllyk hökümdarlygynyň soňunda näme eder? Ol Hudaýa garşy çykyp, Şeýtan ýaly özi hökümdarlyk etmek islärmi? Elbetde, ýok! (1 Korinfliler 15:24, 28-nji aýatlary okaň). Isa Patyşalygy Atasyna gaýtaryp berer, özi hem Oňa tabyn bolar. Isa Ýehowany şeýle bir söýýär welin, Onuň üçin diňe bir häkimiýetden däl-de, eýsem janyndan geçmäge-de taýyndy.
Müňýyllyk hökümdarlygynyň soňunda Isa Patyşalygy Atasyna gaýtaryp berýär (18-nji abzasa serediň).
19. Isanyň Ýehowanyň adyny şöhratlandyrmagy wajyp hasaplaýandygyny nireden bilýäris?
19 Ýehowa adyny Isa Mesihe ýöne ýere bermedi. Sebäbi ol Atasynyň ynamyny doly ödedi. Isa wekil hökmünde Atasynyň adyndan beýik işleri etdi. Ol Ýehowanyň adyny şöhratlandyrmagy ähli zatdan wajyp hasaplaýardy. Isa munuň üçin ölmäge-de taýyndy, ol Müňýyllyk hökümdarlygynyň soňunda Patyşalygy Atasyna gaýtaryp berer. Biz Isadan nädip görelde alyp bileris? Indiki makalada şu soragyň jogabyny bileris.
16-NJY AÝDYM Ogluny saýlan Ýahy wasp edeliň
a Köplenç perişdeler Ýehowanyň habaryny aýtmaly bolanda, onuň adyndan gepleýärdiler. Şonuň üçin Mukaddes Kitapda Ýehowanyň adyndan perişde geplese-de, Ýehowa gepleşdi diýilýär (1 Mus. 18:1—33). Mukaddes Kitapda Ýehowanyň Musa pygambere kanun berendigi aýdylýar. Ýöne beýleki aýatlarda aýdylyşy ýaly, Ýehowa Musa pygambere kanuny perişdesi arkaly beripdir (3 Mus. 27:34; Res. 7:38, 53; Gal. 3:19; Ýew. 2:2—4).
b DÜŞÜNDIRILIŞ: «mukaddes etmek» çuňňur hormat goýmagy we şöhratlandyrmagy aňladýar. «Aklamak» biriniň abraýyny goramagy, atylan töhmetiň ýalandygyny we onuň günäsizdigini subut etmegi aňladýar.
c Isa janyny gurban berip, adamzada ebedi ýaşamaga hem ýol açdy.
d «Okyjylaryň sowallaryny» okap bilersiňiz (w21.04 sah. 30, 31).
