28-нҗи хекая

Яңы доглан Муса нәдип халас болды?

СЕРЕТСЕНЕ, огланҗык гызың бармагындан тутуп аглаяр. Ол огланҗык Муса. Овадан гызың кимдигини билйәңми? Ол ша гызы, ягны Мүсүр патышасы фараоның гызы.

Мусаның эҗеси оглуны үч айлык болянча гизледи, себәби оны мүсүрлилериң өлдүрмеги мүмкинди. Йөне Мусаның тапылҗагыны биленде, оны халас этмегиң угруна чыкды.

Ол бир себет алды-да, сув гечмез ялы эдип беҗерди. Соңра Мусаны себеде салды-да, Нил дерясының кенарындакы гамышлыгың ичинде гойды. Мусаның уясы Меръеме болса, себеде серетмеги табшырды.

Басым фараоның гызы деря сува дүшмәге гелди. Бирден ол гамышлыгың ичинде дуран себеди гөрди. Хызматкәрини чагырып: «Гит-де шол себеди гетир» дийди. Ша гызы себеди ачанда, бир эйҗеҗик чаганы гөрди. Кичиҗик Мусаның аглайшыны гөрүп, ша гызының йүреги авады. Ол огланҗыгы өлдүртмек ислемеди.

Шол вагт Меръем гелди. Сен оны суратда гөрйәнсиң. Меръем фараоның гызына: «Гидип, ысрайыллы аяллардан саңа энеке чагырайынмы?» дийди.

Ша гызы: «Гит-де чагырып геләй» дийди.

Меръем ылгап гитди-де, бар зады эҗесине гүррүң берди. Мусаның эҗеси ша гызының янына геленде: «Бу огланҗыгы ал-да, мениң үчин эмдир, мен саңа пулуны төләрин» дийип, ша гызы буюрды.

Шейдип Мусаның эҗеси өз оглуның аладасыны этди. Муса улаланда болса, фараоның гызына элтип берди. Ша гызы Мусаны огуллыга алды. Ине, шейдип Муса фараоның өйүнде улалды.

Чыкыш 2:1—10.