1991-НҖИ ЙЫЛДА Руссияда Ехованың Шаятларының гурамасы кануны тайдан ресмилешдирилди. Оларың вагыз иши көп вагтлап дөвлет тарапындан гадаган эдилипди. Муңа гарамаздан, Ехованың Шаятларының саны он эссе көпелди. Хәзир Руссияда 170 мүң саны вагызчы бар! Дашары юртдан гелен Патышалыгың ыхласлы вагызчылары хем хасыл йыгымына көмек эдйәрлер (Мат. 9:37, 38). Гелиң, оларың кәбири билен таныш болалың!

Руссияда Ехованың Шаятларының гурамасының ресмилешдирилен дөврүнде 28 яшлы Мэтью Бейик Британияда яшаярды. Шол йыл гечирилен конгресде Гүнорта Европа юртларында рухы хасыл йыгымына ишчи герекдиги ыглан эдилди. Меселем, Руссияның Санкт-Петербург шәхеринде йыгнак душушыкларыны гечирер ялы, яшулы доган ёкды, диңе бир йыгнак хызматчысы барды. Муңа гарамаздан, йүзлерче Мукаддес Язгылар окувы гечирилйәрди. Мэтью шейле гүррүң берйәр: «Мен Руссия барада эшиденимде, Ехова дога эдип, ол ерде гуллук этмек ислейәндигими айтдым. Бу пикир мениң хакыдамдан чыкмады!» Ол Руссия гитмек үчин көп задыны сатып, пул йыгнаяр ве 1992-нҗи йылда ол ере гөчйәр. Мэтью нәхили кынчылыклара душ гелйәр?

Ол: «Маңа рус дилини өвренмек ве рухы затлар барада гүррүң этмек аңсат болмады» диййәр. Шейле-де оңа кирейине җай тапмак кын боляр. Ол шейле гүррүң берйәр: «Гөчүп-гонуп йөрмеклик мениң көп вагтымы алярды. Өй эеси бирки гүнден җайы бошатмагы талап эдйәрди. Йөне мен Руссия гелениме өкүнмедим. Бу ерде гуллук этмеклик маңа Ехова хас-да көп бил багламага ве голдавыны дуймага көмек этди». Вагтың гечмеги билен, Мэтью йыгнак яшулусы боляр ве йөрите пионер гуллугына башлаяр. Хәзир ол Санкт-Петербург шәхериниң четинде ерлешйән филиалда гуллук эдйәр.

 1999-нҗы йылда 25 яшлы Хиро Япониядакы Пионерлер мекдебинде окаяр, шонда мугаллымларың бири оны дашары юртда гуллук этмәге хөвеслендирйәр. Хиро Руссияда вагызчыларың етмейәндигини эшидип, рус дилини өвренип башлаяр. Ол окгунлы херекет эдйәр. Хиро шейле гүррүң берйәр: «Мен Руссияның аязлы гышына өвренишмек үчин ноябрь айында ол ере гөчдүм ве алты айлап яшадым». Ол гыш паслы геченден соңра Япония доланяр ве сада яшап, бираз пул топлаяр. Шейлеликде, Хиро Руссияда хемишелик гуллук этмек үчин юрдундан гөчүп гайдяр.

Хиро 12 йыл бәри Руссияда яшаяр ве бирнәче йыгнаклар билен хызматдашлык эдйәр. Кәте ол 100-ден говрак вагызчысы болан йыгнакда еке өзи яшулы болуп гуллук эдйәрди. Хиро хер хепде Вагыз мекдебини, Гуллук душушыгыны, «Гаравул диңи» ве бәш саны Китап өвренилйән (өңки ады) йыгнак душушыгыны гечирйәрди. Шейле-де ол чопанчылык идегини эдйәрди. Хиро гечен гүнлерини ятлап: «Мен доган-уяларың рухы тайдан өсмегине көмек эдип, көп шатлык тапдым» диййәр. Ол вагызчыларың аз еринде гуллук эдип нәхили берекетлер аляр? Хиро: «Мен Руссия гелмезимден өң яшулы ве пионер болуп гуллук эдйәрдим. Инди мен Ехова билен достлугымы тәзеден беркиден ялы дуйярын ве әхли затда оңа бил баглаярын» диййәр. 2005-нҗи йылда Хиро Светлана атлы уя өйленйәр ве олар пионер болуп гуллук эдйәрлер.

Канадалы 34 яшлы Мэтью билен онуң 28 яшлы иниси Майкл Руссия баранларында, йыгнак душушыкларыны бары-ёгы бирнәче доганың гечирйәндигине ве көп гызыкланян адамларың гелйәндигине хайран галярлар. Мэтью шейле гүррүң берйәр: «Йыгнак душушыкларына 200 адам гелйәрди. Әхли душушыклары гарташан йыгнак яшулусының ве яш йыгнак хызматчысының гечирйәндигини гөрүп, мен олара көмек этмек иследим». Мэтью 2002-нҗи йылда Руссия гөчйәр.

Мундан дөрт йыл геченден соң Майкл хем Руссия гөчйәр ве ол ерде доганларың етмейәндигине гөз етирйәр. Ол йыгнак хызматчысы хөкмүнде йыгнагың чыкдайҗыларына, эдебиятларына ве мейданчаларына гөзегчилик этмәге белленилйәр. Шейле-де ондан йыгнагың кәтиби болмагы, җемагат нутугы билен чыкыш этмеги, конгреслериң гурамачылыклы гечирилмегине ве Патышалык залларының гурлушык ишлерине көмек этмеги хайыш эдйәрлер. Элбетде, шу гүнлерем йыгнаклара шейле көмек герек боляр. Майкл җогапкәрчиликли юмушлары ерине етирип, яшулы болуп гуллук эдйәр. Ол: «Мен доганлара көмек этмекден шатлык тапярын. Ол гүнлер ятдан чыкмаҗак гүнлер!» диййәр.

Мэтью Марина, Майкл болса Ольга өйленйәр. Олар доган-уялар билен йыгнакларың өсмегине ыхласлы көмек эдйәрлер.

1994-нҗи йылда Чехия Республикасындан, Польшадан ве Словакиядан 6 саны пионер уя Украина вагыз этмәге гелйәр. Оларың баран йыгнагында 16 яшлы Татьяна атлы уя гуллук эдйәрди. Татьяна шейле ятлаяр: «Пионер уялар песгөвүнли, мәхирли ве Мукаддес Язгылара говы дүшүнйәрдилер». Шейле-де ол уяларың җанаямазлык билен эдйән гуллугына Ехованың ак пата берйәндигини гөрүп: «Мениңем олара меңзәсим гелйәр» диййәр.

Татьяна пионер уяларың гөрелдесине эерип, каникул гүнлери доган-уялар билен Украинаның хем-де Беларуссияның вагыз эдилмедик ве узакда ерлешйән этрапларына гуллук этмәге гидйәр. Ол вагыз этмекден көп шатлык тапяр ве көпрәк гуллук этмек үчин Руссия гидйәр. Ол  Руссияда дашары юртлы уяның өйүнде яшаяр ве пионер болуп гуллук этмек үчин иш гөзлейәр. Соңра ол 2000-нҗи йылда ымыклы Руссия гөчйәр. Татьяна нәхили кынчылыклара душ гелйәр?

Ол шейле гүррүң берйәр: «Мен җай сатын алянчам, бир отагда кирейине яшадым. Яшайыш шертлериниң кындыгы үчин кәте өе гидесим гелйәрди. Йөне мен гуллугымы довам этсем, Ехованың көп берекетлери берҗекдигине ынанярдым». Хәзир Татьяна Руссияда миссионер болуп гуллук эдйәр. Ол шейле ятлаяр: «Мен энчеме йыл Руссияда гуллук эдип, көп доган-уялар билен достлашдым. Көп гызыклы вакалары башдан гечирдим. Шейле-де мен Ехова болан иманымың беркәндигини дуйярын».

Япониялы 50 яшларындакы Масако бүтин өмрүни миссионер гуллугына багыш этмек ислейәрди. Эмма саглык ягдайы себәпли ол арзувына етип билмейәрди. Ол саглыгы говулашан бадына, хасыл йыгымына көмек этмек үчин Руссия гөчйәр. Масако аматлы җай ве иш тапмак кынды. Шол себәпли ол япон дилини өвредйәрди ве тәмизчи болуп ишлейәрди. Шейдип, ол пионер болуп гуллук эдйәр. Оңа чыдамлы болмага нәме көмек эдйәр?

Масако 14 йыл Руссияда гуллук эден дөври барада шейле диййәр: «Мен вагыз ишинден көп шатлык тапярдым. Бу маңа кынчылыклара дөз гелмәге көмек эдйәрди. Патышалыгың вагызчыларының етмейән еринде гуллук этмек мениң дурмушымы манылы эдйәрди. Ехова мени иймит, эгин-эшик ве җай билен үпҗүн эдйәрди. Бу дийсең тәсин!» Масако диңе бир Руссияда дәл, эйсем, Гыргызыстанда-да хасыл йыгымына көмек эдйәр. Галыберсе-де, ол иңлис, хытай ве уйгур дилинде геплейән топарлары хем голдаяр. Хәзир Масако Санкт-Петербургда пионер болуп гуллук эдйәр.

Көп адамлар ыкдысады кынчылыклар себәпли машгаласыны эклемек үчин дашары юрда гөчйәрлер. Эмма кәбир машгалалар Ыбрайым  пыгамбер билен аялы Саррадан гөрелде алып, дашары юрда гуллук этмәге гидйәрлер (Гел. чык. 12:1—9). Меселем, 2003-нҗи йылда украиналы Михаил билен аялы Инга Руссия гөчйәр. Тизден олар хак Худайы гөзлейән адамлара душярлар.

Михаил шейле гүррүң берйәр: «Бир гезек биз Ехованың Шаятларының вагыз этмедик еринде өйден-өе гуллук этдик. Шонда бир яшулы бизи гөренден: „Сиз вагызчылармы?“ дийип сорады. Биз „Хава!“ дийип җогап беренимизде, ол: „Мен сизиң хачанам болса бир гүн гелҗегиңизи билйәрдим — соңра ол Матта 24:14-дәки сөзлери айдып — Исаның сөзлери ерине етмән галмаз ахырын!“ дийди. Шейле-де биз баптист динине уйян 10-а голай аяла душ гелдик. Хак Худайы гөзлейән акйүрекли аяллар „Эбеди яшайша элтйән билим“ атлы китапдан хер хепде окув гечйәрдилер. Биз оларың сорагларына җогап берйәрдик, олар билен Патышалык айдымларыны айдярдык ве агшамлык нахарыны эдинйәрдик. Ол гүнлери ятладыгыңча ятласың гелйәр». Михаил билен Инга вагызчыларың етмейән еринде гуллук эдип, Ехова билен якындан достлашдылар, адамлара болан сөйгүсини артдырдылар ве энчеме берекетлериң эеси болдулар. Хәзир Михаил этрап гөзегчиси болуп гуллук эдйәр.

2007-нҗи йылда Украинада яшаян 35 яшларындакы Юрий билен аялы Оксана ве 13 яшлы оглы Алексей Руссиядакы филиала мыхманчылыга барярлар. Шонда олара картадан вагыз иши үчин белленмедик территориялары гөркезйәрлер. Оксана шейле диййәр: «Картаны гөренимизде, биз Руссияда Патышалыгың вагызчыларының герекдигине дүшүндик ве ол ере гөчмели диен карара гелдик». Соңра олар нәме эдйәрлер? Юрий шейле диййәр: «Биз „Сиз дашары юртда гуллук эдип билермисиңиз?“ диен макалалары окадык *. Биз Руссиядакы филиалың гөркезмеси боюнча белленен территория барып, җай ве иш гөзләп башладык» диййәр. Олар 2008-нҗи йылда Руссия гөчйәрлер.

Илкибада, олара иш тапмак ве гөчүп-гонуп йөрмек кын болярды. Юрий шейле диййәр: «Биз рухдан дүшмезлик үчин дога эдип, хемише вагыз эдйәрдик ве Ехова бил баглап, Патышалыгы биринҗи орунда гойярдык. Биз Ехованың аладамызы эдйәндигине бирнәче гезек гөз етирдик. Бу гуллук бизиң машгала гатнашыкларымызы беркитди» (Мат. 6:22, 33). Вагызчыларың етмейән еринде гуллук этмек Алексее нәхили тәсир этди? Оксана шейле диййәр: «Бу оны бүтинлей өзгертди. Алексей 9 яшында Ехова өзүни багыш эдип, сувда чокундырылды. Ол мекдеп ругсадына чыканда хөвес билен көмекчи пионер болуп гуллук эдйәр. Биз онуң гуллуга болан сөйгүсини ве ыхласыны гөренимизде, өзүмизи багтлы дуйярыс». Юрий билен Оксана хәзир йөрите пионер болуп гуллук эдйәрлер.

Доган-уяларың берен гүррүңинден вагызчыларың етмейән еринде гуллук этмек үчин Ехова бил багламалыдыгыны гөрсе боляр. Дашары юртда гуллук эдйән доган-уялар көп кынчылыклара душ гелселер-де, энчеме берекет алдылар. Патышалыгың вагызчыларының аз еринде хасыл йыгымына гатнашасыңыз гелйәрми? Эгер сизем вагызчыларың етмейән еринде гуллук этмек ислейән болсаңыз, онда Юриниң: «Вах... муны өң эден болсадым!» диен сөзлерине гошуларсыңыз.