1—3. Ехованың аладамызы эдйәндигини хайсы вака гөркезйәр?

2012-НҖИ йылың томус гүни Германияда Лана билен ятдан чыкмаҗак вака болды. Шол гүн Ехова уяның эден ики догасына деррев җогап берйәр. Биринҗиден, уя аэропорта бармак үчин отлуда узак ёлы гечмели боланда, Еховадан вагыз этмәге мүмкинчилик дөретмегини хайыш эдйәр. Икинҗиден, ол учмалы вагтының эртире гечирилендигини биленде, дога эдип Еховадан көмек сораяр. Себәби Лананың пулы азды, мыхманчылыга барара ери хем ёкды.

² Лана догасыны тамамламанка: «Салам! Сени гөрмегем бар экен!» диен сеси эшидйәр. Ол Лананың сынпдашыды. Оны мамасы билен эҗеси Элке Гүнорта Африка угратмага гелипди. Элке Лананың дүшен ягдайыны билип, оны мыхман аляр. Олар Лана долы вагтлы гуллугы ве иманы барада көп сораглары берйәрлер.

³ Эртирлик нахарындан соңра олар ене-де Лана билен Мукаддес Язгылар барада гүррүң эдйәрлер. Уя Элкениң салгысыны алып, икиленч идег этмегиң аладасыны эдйәр. Умумы пионер болуп гуллук эдйән Лана саг-аман өйүне баряр. Ол «догалары эшидйән» Худайың хемише көмек эдйәндигине гөз етирйәр (Зеб. 65:2).

4. Биз шу макалада нәхили сорагларың җогабыны билерис?

⁴ Биз кынчылыга дучар боланымызда Еховадан көмек сорамалы. Себәби Аллатагала вепалы гуллукчыларының эдйән догаларына хөвес билен җогап берйәр (Зеб. 34:15; Сүл. тым. 15:8). Исаның өвреден догасында башга-да ваҗып затлар барада агзаляр. Меселем, рухы зерурлыкларымыз бабатда нәдип дога этмели? Гүнделик чөрек барада эдйән догамыза гөрә нәдип яшамалы? Шу макалада бу сорагларың җогабыны билерис (Матта 6:11—13-нҗи аятлары окаң).

5, 6. Биз нәме үчин гүнделик чөрегимиз барада дилег этмели?

⁵ Үнс берен болсаңыз, биз «чөрегим» дәл-де, «чөрегимиз» дийип дога этмели. Африкада этрап гөзегчиси болуп гуллук эдйән Виктор шейле гүррүң берйәр: «Мен аялым билен эртир нәме иерис, ниреде ятарыс дийип алада этмейәрис. Мунуң үчин Ехова хемише догамда миннетдарлык билдирйәрин. Доган-уялар бизиң йүрекден аладамызы эдйәрлер, менем өз гезегимде оларың душ гелйән ыкдысады кынчылыкларына дөз гелмеклери үчин Ехова дога эдйәрин».

⁶ Белки, биз иймит барада алада эдйән дәлдирис. Эмма тебигы бетбагтчылыга учран ве мәтәч доган-уялар барада ойланың. Биз олар үчин дога эдип, догамыза гөрә херекет этмели. Меселем, биз мәтәчлик чекйән доган-уялара элимизден гелен көмек эдип билерис. Мундан башга-да, бүтиндүнйә вагыз ишини голдамак үчин пул көмегини берип билерис. Себәби берилйән садакалар ягшы ишлере сарп эдилйәр (1 Яхя 3:17).

7. «Эртириң гайгысыны» этмели дәлдигини хайсы мысал гөркезйәр?

⁷ Исаның гүнделик чөрек барада дога этмели диен сөзлери яшайша герекли затлар барада дога этмелидигини гөркезйәр. Меселем, бир гезек Иса Худайың мейдан отларыны гейиндирйәндигини айдып: «Худай (сизи) шейле гейиндирмезми, эй иманы азлар? „Нәме геерис?“ дийип... эртириң гайгысыны этмезлик» барада маслахат берйәр (Мат. 6:30—34). Биз байлыга ковалашмагың дерегине, җай, иш ве саглык барада пайхаслы алада этмели. Шейдип, биз диңе шу гүнүмиз хакында ойланяндыгымызы гөркезерис. Эмма диңе мадды затлар барада дога этмек нәдогры болар. Себәби адамың рухы зерурлыклары хас ваҗып.

8. Иса гүнделик чөрегиңиз диенде нәмәни гөз өңүне тутды? (Макаланың башындакы сурата середиң).

⁸ Иса гүнделик чөрегимиз барада дилег эденде, рухы иймити-де гөз өңүне тутды. Бейик Мугаллым: «Адам диңе бир чөрек билен дәл, эйсем Худайың агзындан чыкан хер бир сөз билен хем яшаяндыр» дийди (Мат. 4:4). Шол себәпли биз Ехованың вагтлы-вагтында рухы иймити бермеги үчин дога этмели.

9. Биз нәме үчин Худайың өңүнде «языклы»?

⁹ Иса нәме үчин бир догасында «гү нәмизиң» дәл-де, «языгымызың» гечилмеги барада айтды? (Мат. 6:12; Лука 11:4). Такмынан 60 йыл мундан өң «Гаравул диңи» журналында шейле дүшүндирилипди: «Биз гүнә эденимизде Худая бергидар болярыс... Себәби Худай гүнәкәри яшайышдан махрум эдип билйәр... Ол калбымыздакы рахатлыгы ве өзи билен достлуклы гатнашыгымызы бозуп билйәр... Биз Худая гулак асып, сөйгимизи гөркезмели; Худая гаршы гүнә эденимизде, биз оңа сөйгимизи гөркезмейәрис, шол себәпли-де бергидар (языклы) болярыс» (1 Яхя 5:3).

10. Ехова бизи нәмәниң эсасында багышлаяр ве биз муңа нәхили гарамалы?

¹⁰ Аллатагала Исаның төлег гурбанының эсасында языкларымызы багышлаяр. Бу төлег ики мүң йыл мундан озал берилди. Эмма биз «төлег гурбаныны... гыммат» саймалы ве оңа шу гүн берлен совгат хөкмүнде гарамалы. Бикәмил адамларың хич бири шейле совгады берип билмейәр (Зебур 49:7—9; 1 Петрус 1:18, 19-нҗы аятлары окаң). Биз Ехованың берен гымматлы совгадына хемише миннетдар болмалы. Иса «языгымы» дәл-де, «языкларымызы» геч дийип дога этмеги өвретди. Бу сөзлер Ехованың гуллукчыларының әхлисиниң төлег гурбанына мәтәчдигини гөркезйәр. Аллатагала бизиң диңе өзүмизиң дәл-де, әхли адамларың, хатда бизе гаршы гүнә эдйәнлериң хем рухы саглыгы барада алада этмегимизи ислейәр. Адатча, адамларың бизе гаршы эдйән гүнәси уҗыпсыз боляр. Биз олары хөвес билен багышласак, Еховадан гөрелде аляндыгымызы ве доган-уялары йүрекден сөййәндигимизи гөркезерис (Кол. 3:13).

11. Биз нәме үчин адамлары багышламалы?

¹¹ Биз бикәмил боландыгымыз үчин кәте бирек-бирекден өйке-кине эдйәрис (Лев. 19:18). Биз өйке-кинәмиз барада башга доган-уялара гүррүң берсек, олар хем бизиң тарапымызы тутмагы мүмкин. Шейдип, биз йыгнагың агзыбирлигини бозарыс. Биз шейле ягдайың өңүни алмасак, Ехованың рехимдарлыгының ве Исаның берен төлег гурбанының гадырыны билмейәндигимиз аян болар. Гөкдәки Атамыз адамлары багышламак ислемейәндигимизи гөрүп, бизи-де Исаның төлег гурбанының эсасында багышламаз (Мат. 18:35). Иса дога этмеги өвреденсоң, муны ене-де ныгтап гечди (Матта 6:14, 15-нҗи аятлары окаң). Ехованың языкларымызы гечмеги үчин агыр гүнәлерден гача дурмалы. Бу бабатда җан этсек, «сынагларда» берк галмага көмек эдер (1 Яхя 3:4, 6).

12, 13. a) Иса сувда чокундырыландан соң нәме болды? б) Адам сынага дүшенде нәме этмели? в) Иса нәмәни субут этди?

¹² Иса билен чөлде болан вака бизе «сынага салма» диен җүмләниң манысына дүшүнмәге көмек эдйәр. Иса сувда чокундырыландан соңра мукаддес рух оны чөле әкидйәр. Нәме үчин? Себәби Иблис Исаны «сынамалыды» (Мат. 4:1; 6:13). Бу бизи гең галдырмаяр! Себәби Адам ата билен Хов эне Худайың хөкүмдарлыгына гаршы чыканда, җеделли меселәниң орта атыландыгыны билйәрис. Худай муны чөзмек үчин Оглуны ере иберди. Аллатагала адамы биркемсиз яратдымы? Кәмил адам «залым» перишдәниң тәсирине гаршы дуруп, Худайың хөкүмдарлыгыны голдап билерми? Адам Худая гулак асмаса-да, говы яшап билерми? (Гел. чык. 3:4, 5). Җеделли меселе билен баглы сорагларың җогабыны билмек үчин вагт герекди. Шонда Ехованың адалатлы Хөкүмдардыгына адамларам, перишделерем гөз етирерлер.

¹³ Ехова Худай мукаддес боландыгы үчин адамы эрбетлик билен сынамаяр. Мукаддес Язгыларда «Сынагчының» Иблисдиги айдыляр (Мат. 4:3). Иблис адамы гүнә ишлере хөвеслендирсе-де, олары этдирип билмейәр. Адам тен хөвеслерини канагатландырмак үчин, гүнә этмелими я-да этмели дәлдигини өзи чөзйәр (Якуп 1:13—15-нҗи аятлары окаң). Иса Месих сынага дүшенде, Шейтаның теклибини инкәр эдип, Мукаддес Язгылар эсасында җогап берйәр. Шейдип, ол Худайың хөкүм сүрмәге хаклыдыгыны субут эдйәр. Эмма Шейтан сынамагыны бес этмейәр. Ол хас аматлы пурсата гарашяр (Лука 4:13). Шейтан нәче җан этсе-де, Иса Месих әхли сынагларда айыпсыз галяр. Ол Ехованың хөкүмдарлыгыны голдап, кәмил адамың ёвуз сынаглара гарамаздан, Худая вепалы галып билҗекдигини субут эдйәр. Инди Шейтан Исаның шәгиртлерине ве сизе хүҗүм эдйәр.

14. Худая вепалы галмак үчин нәме этмели?

¹⁴ Ехова җеделли меселе себәпли Шейтаның сынамагына ёл берсе-де, Онуң өзи бизи хич хачан сынамаяр. Аллатагала бизиң вепалы галҗакдыгымыза ынаняр ве бизе көмек этмек ислейәр. Биз эркин эдип ярадылдык. Ехова эркинлигимизе хормат гойяндыгы үчин әхли сынаглардан горамаяр. Худая вепалы галмак үчин рухы тайдан оя болмалы ве ызыгидерли дога этмели. Ехова догаларымыза нәдип җогап берйәр?

15, 16. a) Биз нәхили сынаглара гаршы дурмалы? б) Бизиң гүнә этмегимизе ким гүнәкәр?

¹⁵ Алла бизе сынагларда көмек этмек үчин мукаддес рухуны берйәр. Шейле-де Ехова Сөзи ве йыгнак душушыклары аркалы ваҗып дәл затлара вагтыңы, серишдәңи ве гүйҗүңи сарп этмели дәлдиги барада дуйдуряр. Европаның бай юрдунда яшаян Эспен билен Янна көп йыллап вагызчыларың аз еринде умумы пионер болуп гуллук этдилер. Олар илкинҗи чагасы дүнйә иненде, долы вагтлы гуллугыны гойдулар. Соңра оларың икинҗи чагасы болды. Эспен шейле диййәр: «Биз өңки ялы көп гуллук этмәнсоң, сынагларда вепалы галар ялы Ехова көп дога эдйәрис. Биз рухы тайдан берк галмагымыз ве гуллукда ыхласлы болмагымыз үчин Еховадан көмек сораярыс».

¹⁶ Адам порнография себәпли-де сынага учраяр. Порнографияны гөрйән адам Шейтаны гүнәкәрлемели дәл. Нәме үчин? Себәби Шейтан ве онуң дүнйәси бизе меҗбурлык билен гүнә ишлери этдирип билмейәр. Кәбирлери ахлаксыз пикирлере ёл берип гүнә эдйәр. Эмма мүңлерче доган-уялар Худая вепалы гуллук эдйәрлер. Биз хем олардан гөрелде алып билерис (1 Кор. 10:12, 13).

17. a) Биз «Иблисден халас эт» диен догамыза гөрә нәдип яшамалы? б) Тизден биз нәмеден азат боларыс?

¹⁷ Биз «Иблисден халас эт» диен догамыза гөрә яшамак үчин бу «дүнйәден болман», «дүнйәни, дүнйәдәки затлары сөймели» дәл (Яхя 15:19; 1 Яхя 2:15—17). Хава, Иблиси еңмек үчин хемише гөрешмели! Тизден Ехова догамыза җогап берип, Шейтаны ве онуң дүнйәсини ёк эдер. Шейтансыз дүнйәде яшамак нәхили аҗайып! Ол гөкден ере зыңыланда вагтының аздыгыны билип, гахар-газаба мүнйәр ве бизи айыпсыз галдырмаҗак болуп җан эдйәр. Шол себәпли биз эрҗеллик билен дога этсек, еңиш газанарыс (Ылх. 12:12, 17).

18. Халас болмак үчин нәме этмели?

¹⁸ Сиз тәзе дүнйә сабырсызлык билен гарашярсыңызмы? Онда Худайың Патышалыгының гелмеги, адының мукаддес болмагы ве ислегиниң гөкде болшы ялы, ерде-де амала ашмагы барада дога эдиң. Сиз Ехованың рухы ве мадды тайдан аладаңызы этҗекдигине шүбхеленмәң. Гелиң, әхлимиз Исаның өвреден догасына гөрә яшамага җан эделиң!