1. Адамлар айыпсызлыга нәхили гараярлар?

ШУ ГҮНЛЕР адамларың айыпсызлыгы ваҗып саймаяндыгы айдың гөрүнйәр. Көп юртларда зына этмеклиге ве эркек билен эркегиң җынсы гатнашыгына адаты зат хөкмүнде гараярлар. Рекламалар ве гөвүн ачмагың кәбир гөрнүшлери ахлаксыз ишлери этмәге хөвеслендирйәр (Зеб. 12:8). Шол себәпли сиз: «Айыпсыз галып болармыка?» диййәнсиңиз. Хава, месихчи Ехованың көмеги билен айыпсыз галып билер (1 Селаниклилер 4:3—5-нҗи аятлары окаң).

2, 3. a) Эрбет хөвеслере гаршы гөрешмек нәме үчин ваҗып? б) Биз шу макалада нәме барада гүррүң эдерис?

² Биз ахлаксыз хөвеслере гаршы дурсак айыпсыз галып билерис. Меселем, чеңңекдәки гурчугың балыгы өзүне чекиши ялы, ахлаксыз пикирлер ве азгын хөвеслер месихчини тора салып билер. Эгер биз шейле затлар барада ойланып башласак, тен хөвеслерини оярарыс. Шейдип, эрбет хөвеслер өзүне чекип, гүнә ишлере итерер. Сынаг дөрәнде болса, Ехованың гуллукчысы-да гүнә эдип билер. Хава, «хөвес богаз болуп, гүнәни догуряндыр» (Якуп 1:14, 15-нҗи аятлары окаң).

 ³ Аз вагтлык хөвесиң гүнәли ишлере итерйәндиги барада ойланмаклык айыпсыз галмага көмек эдйәр. Эмма эрбет хөвеслери йүрегимизден согруп ташламасак, ахлаксызлыкдан ве онуң эрбет нетиҗесинден гача дуруп билмерис (Гал. 5:16). Гелиң, эрбет хөвеслере гаршы гөрешмәге көмек эдйән үч зат: Ехова билен достлашмак, Худайың Сөзүндәки маслахатлар ве рухы тайдан өсен месихчилериң көмеги барада гүррүң эделиң.

4. Ехова билен достлашмак нәме үчин ваҗып?

⁴ Мукаддес Язгыларда Худай билен достлашмак ислейәнлериң әхлисине: «Элиңизи арассалаң... йүрегиңизи саплаң» дийип маслахат берилйәр (Якуп 4:8). Биз Ехова билен достлугымызы гыммат сайсак, онда пикиримизде ве әхли затда Онуң гөвнүнден турмага җан эдерис. Эгер биз арасса, ваҗып ве өвгә мынасып затлар хакында ойлансак, «йүрегимизи сап» саклап билерис (Зеб. 24:3, 4; 51:6; Флп. 4:8). Элбетде, Ехова бизиң бикәмилдигимизи ве эрбет пикирлере йыкгындыгымызы билйәр. Эмма биз гөрешмегиң дерегине, йүрегимизде эрбет пикирлери өсдүрсек Худайы гынандырарыс (Гел. чык. 6:5, 6). Шейле затлар барада чуңңур ойланмаклык пикиримизи арассаламага көмек эдер.

5, 6. Дога эрбет пикирлере гаршы гөрешмәге нәдип көмек эдйәр?

⁵ Биз нәдогры пикирлере гаршы дурмак ве Ехова долы бил багламак үчин дога этмели. Шонда биз Ехова якынлашарыс, ол хем бизе якынлашар. Биз айыпсыз галмак үчин ахлаксыз пикирлере гаршы гөрешсек, Ехова җомартлык билен мукаддес рухуны берер. Шейле-де догамызда Худайы йүрекден разы этмек ислейәндигимизи айтмалы (Зеб. 19:14). Гүнә итерйән «эрбет ёл», ягны нәдогры хөвес дөрәнде, биз кичигөвүнлилик билен Худайдан өзүмизи барламагыны дилейәрисми? (Зеб. 139:23, 24). Сынага дүшенимизде айыпсыз галмак үчин Алладан хемише көмек сораярысмы? (Мат. 6:13).

⁶ Адамың алан тербиеси я-да дурмушы Ехованың халаян ишлерини этмәге пәсгел берип билер. Эмма Худай бизе герекли өзгеришлери эдип, мынасып гуллукчысы болмага көмек эдйәр. Давут патыша Батшеба билен зына эденде, Худайың голдав берйәндигини билип: «Менде тәмиз йүрек ярат... ичиме тәзеден дурнуклы рух бер» дийип ялбарды (Зеб. 51:10, 12). Хава, гүнәли хөвеслер бизе тәсир этсе-де, Ехова өзүне гулак асмага көмек эдйәр. Белки, эрбет хөвеслер йүрегимизде көк уруп, арасса пикирлери богяндыр. Эмма Ехова бизе гөркезме берйәр ве канунына гөрә яшамага көмек эдйәр. Гелиң, Аллатагаланың голдавы билен гүнәниң агалык этмегине ёл бермәлиң! (Зеб. 119:133).

7. Мукаддес Язгылар эрбет пикирлере гаршы гөрешмәге нәдип көмек эдйәр?

⁷ Ехова бизиң догаларымыза Мукаддес Язгылар аркалы җогап берйәр. Худайың Сөзүндәки акылдарлык, «илки билен, сап» боляндыр (Якуп 3:17). Мукаддес Язгылары хер гүн окасак ве окан затларымыз барада ойлансак, ахлаксыз пикирлере гаршы гөрешмәге көмек  эдер (Зеб. 19:7, 11; 119:9, 11). Шейле-де пикиримизи арасса сакламак үчин Мукаддес Язгыларда герекли маслахатлар ве айдың мысаллар берилйәр.

8, 9. a) Яш йигит ахлаксыз аяла нәдип саташды? б) Биз Сүлейманың тымсаллары 7-нҗи бапдан нәхили сапак эдинип билерис?

⁸ Сүлейманың тымсаллары 5:8-де: «Ёлуңы ол (ахлаксыз) аялдан узаклашдыр, өйүниң гапысына голай барма» дийип дуйдурыляр. Сүлейманың тымсаллары 7-нҗи бапда болса, бу маслахата эермедик бир яш йигит барада гүррүң берилйәр. Агшам дүшүпди. Йигит ахлаксыз аялың өйүниң деңинден гечип, көчәниң чатрыгына етенде, ярым-ялаңач ахлаксыз аял онуң янына баряр. Ол йигиди гуҗаклап огшаяр. Ол мәхирли сөзлери билен онда гүйчли хөвес дөредйәр велин, йигит өзүне эрк эдип билмерин өйдйәр. Шейлеликде, ол ахлаксызлыга баш гошяр. Белки-де, яш йигит ёла дүшенде ол аялың янына бармак барада пикирем эден дәлдир. Ол яш боланы үчин пайхассыз херекет этди. Нәхили болаянда-да, ол эден этмишиниң мивесини ормалыды. Яш йигит шол көчә совулмадык болса, ховплы ягдая учрамазды! (Сүл. тым. 7:6—27).

 ⁹ Яш йигит ялы бизем пайхассызлык эдип, эрбет хөвеслериң торуна дүшүп билерисми? Меселем, телевизорың кәбир каналларында гиҗелерине ахлаксыз затлар гөркезилйәр. Биз каналлары эйләк-бейләк гечирип дурсак нәме болар? Я-да биз Интернетде гүйменип отурсак, хат язышылян, хабарлашылян сайтларында ве сахыпаларында чыкян ахлаксыз суратларың, теклиплериң үстүнден барсак нәме? Олар бизде эрбет хөвеслери дөретсе, айыпсыз галып билерисми?

10. Нәз-керешме этмек нәме үчин ховплы? (Макаланың башындакы сурата середиң).

¹⁰ Мукаддес Язгыларда башга җынслы адам билен өзүңи нәдип алып бармалыдыгы барада маслахат берилйәр (1 Тимотеос 5:2-ни окаң). Бу маслахата эерйән адам нәз-керешме этмейәр. Эмма кәбирлери нәзли бакышың, сөзлериң ве херекетлериң хич хили зыяны ёкдур өйдйәрлер. Шейле адамлар җынсы гатнашык этмейәрис дийип өзүни аклаярлар. Йөне нәз-керешме ахлаксыз пикирлере ве гүнә ишлере итерйәр. Шейле ягдай гечмишде-де, шу гүнлерем болды.

11. Юсуп нәхили гөрелде галдырды?

¹¹ Юсуп пайхаслы болмакда говы гөрелде галдырды. Потыпарың аялы Юсуба нәз-керешме эдип, онуң билен җынсы гатнашык этмек иследи. Юсуп оңа гаршы дурса-да, аял ниетинден дәнмеди. Ол хер гүн Юсубы өзи билен ятмага ырҗак болярды (Гел. чык. 39:7, 8, 10). Бир алым: «Потыпарың аялы Юсуба: „Гел, бир салым билеҗе отуралы“ дийип, онда җынсы хөвеси оярҗак болды» диййәр. Эмма Юсуп гелеңсизлик эдип, онуң теклибине гулак габартмады. Ол аялың нәз-керешмесине җогап бермеди. Шол себәпли эрбет пикирлер онуң йүрегинде көк урмады. Потыпарың аялы онуң эшигинден тутанда, Юсуп айгытлы херекет эдип, «эшигини онуң элинде галдырып, гачып дашары чыкды» (Гел. чык. 39:12).

12. Гөрйән задымызың йүрегимизе тәсир эдйәндигини ниреден билйәрис?

¹² Мукаддес Язгыларда гөрйән задымызың йүрегимизе тәсир эдип, эрбет ишлере итерйәндиги барада айдыляр. Эгер гөрйән задымыза үнсли болмасак, бизде ахлаксыз хөвесиң дөремеги я-да гүйҗемеги мүмкин. Иса: «Бир аяла азгын небис билен бакан адам өз йүрегинде эййәм онуң билен зына эдендир» дийди (Мат. 5:28). Давут патыша билен болан ваканы ядымыза салалың. Ол «көшгүң үчегине чыканда... сува дүшүнип дуран бир аяла... гөзи дүшди» (2 Шам. 11:2). Шонда ол гөзүни башга тарапа совмагың дерегине, эрбет хөвесиң дөремегине ёл берди. Шейлеликде, Давут патыша башга бириниң аялына гөз гыздырып, онуң билен зына этди.

13. Биз нәме үчин ве нәдип гөзүмиз билен әхт баглашмалы?

¹³ Биз Эйюп пыгамбер ялы гөзүмиз билен әхт баглашып, ахлаксыз пикирлере гаршы гөрешмели (Эйюп 31:1, 7, 9). Гелиң, ахлаксыз затлара серетмезлиги ве башга кишә нәз-керешме этмезлиги йүрегимизе дүвелиң! Шонда биз компьютердәки, рекламалардакы, газет-журналлардакы я-да башга ерлердәки ахлаксыз шекиллере серетмерис.

14. Айыпсыз галмак үчин нәме этмели?

¹⁴ Эгер сиз ёкарда агзалан кәбир  затларың үстүнде ишлемели болсаңыз, онда айгытлы херекет эдиң. Гүнә итерйән ишлерден гача дурмак ве айыпсыз галмак үчин Худайың Сөзүндәки маслахаты хөвес билен кабул эдиң (Якуп 1:21—25-нҗи аятлары окаң).

15. Биз нәме үчин көмек сорамалы?

¹⁵ Имандашларымыз бизе ахлаксыз пикирлере гаршы гөрешмәге көмек эдип билер. Элбетде, бирине дуйгуларыңы айтмак аңсат дәл. Эмма биз ынамдар, рухы тайдан өсен месихчә йүрегимизи дөксек, эрбет хөвеслери еңип билерис (Сүл. тым. 18:1; Евр. 3:12, 13). Ол бизиң билмейән задымыза дүшүнмәге көмек эдер. Шонда биз герекли өзгеришлери эдип, Ехованың сөйгүсинде галып билерис.

16, 17. a) Яшулулар нәдип көмек эдйәрлер? б) Порнографияның дузагына дүшенлер нәме үчин деррев көмек сорамалы?

¹⁶ Ехова бизе көмек этмек үчин йөрите йыгнак яшулуларыны белледи (Якуп 5:13—15-нҗи аятлары окаң). Бразилиялы бир яш йигит бирнәче йыллап эрбет хөвеслери билен гөрешйәрди. Ол шейле диййәр: «Мен пикирлеримиң Ехованы гынандыряндыгына дүшүнйәрдим, йөне башгалара дуйгуларымы айтмага утанярдым». Бир гүни йыгнак яшулусы онуң билен гүррүңдеш болуп, яшулулара йүз тутмага хөвеслендирйәр. Ол шейле гүррүң берйәр: «Мен яшулуларың эден аладасына, мәхирли гүррүңдешлигине ве дуйгуларыма дүшүнйәндигине өрән хайран галдым. Мен бейле зада гарашмандым. Олар мени үнсли диңләп, Ехованың маңа болан сөйгүсине ынандырмак үчин Мукаддес Язгылардан аятлары окадылар ве мениң биле дога этдилер. Шол себәпли маңа оларың Мукаддес Язгыларың эсасында берен маслахатыны кабул этмек кын болмады». Арадан бирнәче йыл гечйәр, ол рухы тайдан өсен месихчи болуп етишйәр. Ол: «Инди йүки еке гөтермегиң дерегине, көмек сорамагың ваҗыпдыгына гөз етирдим» диййәр.

¹⁷ Порнография ахлаксыз хөвеслери ояряр. Оны гөрйән адам рухы көмеге хас-да мәтәч боляр. Эгер шейле адам вагтында көмек сорамаса, онуң хөвеси «богаз болуп, гүнәни дограр», доган-гарындашларының йүрегине яра салар ве Ехованың адына ыснат гетирер. Ехованы разы эдип, онуң халкының агзасы болмак ислейән месихчилериң хер бири сөйги билен берлен көмеги кабул эдйәрлер (Якуп 1:15; Зеб. 141:5; Евр. 12:5, 6).

18. Сиз нәме этмеги йүрегиңизе дүвдүңиз?

¹⁸ Шейтаның залым дүнйәсиниң ахлак кадалары гүн-гүнден песе дүшйәр. Эмма Ехованың гуллукчылары пикирини арасса сакламага ве ёкары ахлак кадаларына эермәге җан эдйәрлер. Алла оларың эдйән тагалласына гуваняр. Гелиң, Ехованың Сөзүнде ве гурамасында берилйән гөркезмелере эерип, Онуң билен достлугымызы беркиделиң! Биз айыпсыз галсак, калбымызда рахатлык тапарыс ве дурмушымыз манылы болар (Зеб. 119:5, 6). Шейтан ёк эдиленде, бүтин дүнйә онуң азгын тәсиринден азат болар. Шонда биз арасса дүнйәде эбеди яшарыс!