1, 2. a) I асырда Колоседәки йыгнага ховп абанандыгыны ниреден билйәрис? б) Колоседәки месихчилере агзыбирлигини сакламага көмек этмек үчин нәхили маслахат берилди?

I АСЫРДА Колоседәки месихчилер йыгнагының агзыбирлигине ховп абанярды. Доганларың кәбири Мусаның канунына эермегиң ваҗыпдыгыны айдып, йыгнакда бөлүнишик дөредйәрдилер. Кәбирлери болса, дурмушдан леззет алып яшамагың нәдогрудыгыны айдып, ынсан философиясыны өңе сүрйәрдилер. Эмма Павлус ресул бу гарайышларың ховплудыгыны дуйдурып, Колоседәки месихчилере шейле сөзлери язды: «Әтияҗы элден бермәң! Месих билен дәл-де, адам дәплери ве дүнйә йөрелгелери боюнча дөрән философия, бош алдав билен бири сизи есир эдәймесин!» (Кол. 2:8).

² Эгер месх эдилен месихчилер үнсүни дүнйәдәки затлара гөнүкдирен болсалар, Ехованың огуллары болмак хорматыны йитирердилер (Кол. 2:20—23). Шол себәпли Павлус олара Худай билен гатнашыгыны гыммат саймага көмек этмек үчин: «Үнсүңизи ер йүзүндәки дәл-де, гөкдәки затлара гөнүкдириң» дийип маслахат берди (Кол. 3:2). Хава, шол месихчилер гөкде эбеди яшамак умыдыны ятдан чыкармалы дәлдилер (Кол. 1:4, 5).

3. a) Месх эдилен месихчилериң нәхили умыды бар? б) Биз шу макалада хайсы сораглара середерис?

 ³ Шу гүнлер хем месх эдилен месихчилер үнсүни Худайың гөкдәки Патышалыгына ве «Месихиң мирасдашлары» болмак умыдына гөнүкдирйәрлер (Рим. 8:14—17). Эмма ер йүзүнде яшамага умыт эдйәнлер барада нәме дийсе болар? Павлусың сөзлериниң олара нәхили дегишли ери бар? «Башга гоюнлар» нәдип үнсүни «гөкдәки затлара» гөнүкдирип билерлер? (Яхя 10:16). Кынчылыкларына гарамаздан, үнсүни гөкдәки затлара гөнүкдирен Ыбрайым ве Муса пыгамбер ялы Худая вепалы адамларың мысалындан нәме өвренип билерис?

4. Башга гоюнлар нәдип үнсүни гөкдәки затлара гөнүкдирип билерлер?

⁴ Башга гоюнлар гөкде яшамага умыт этмесе-де, үнсүни гөкдәки затлара гөнүкдирип билерлер. Нәдип? Мунуң үчин олар Ехова Худайы ве Патышалыгың бәхбитлерини дурмушында биринҗи орунда гоймалы (Лука 10:25—27). Биз бу бабатда Исадан гөрелде алып билерис (1 Пет. 2:21). I асырда яшан доган-уялар ялы, биз хем Шейтаның дүнйәсинде ялан таглыматлары, ынсан философиясыны ве байлыга ковалашмагы өңе сүрйән адамлара душ гелйәрис (2 Коринтослылар 10:5-и окаң). Биз Исаның гөрелдесине эерип, нәдогры гарайышларың тәсирине дүшмез ялы оя болмалы.

5. Биз мадды затлара болан гарайшымызы нәдип барлап билерис?

⁵ Бу дүнйәде байлыга ковалашян адамларың гарайшы бизе тәсир эдйәрми? Бизиң пикирлеримиз ве эдйән ишлеримиз нәмәни говы гөрйәндигимизи аян эдйәр. Иса: «Хазынаңыз ниреде болса, йүрегиңиз хем шол ерде болар» дийди (Мат. 6:21). Шол себәпли биз йүрегимизиң ягдайыны билмек үчин вагтал-вагтал өзүмизи чынлакай барламалы. Биз өзүмизе шейле сораглары берип билерис: «Мен мадды затлар барада ойланмага нәче вагт сарп эдйәрин? Говы кәр эдинмек, газанч этмек я-да аматлы шертлерде яшамак барада ченденаша аладаланярынмы? Я-да үнсүми рухы затлара гөнүкдирмәге чалышярын?» (Мат. 6:22). Иса бар үнсүни ер йүзүнде хазына йыгнамага гөнүкдирйән адамлара рухы тайдан ховп абаняндыгыны айтды (Мат. 6:19, 20, 24).

6. Биз гүнәли хөвеслеримизи нәдип еңип билерис?

⁶ Бизиң бикәмиллигимиз гүнәли хөвеслеримизи канагатландырмага итерйәр (Римлилер 7:21—25-нҗи аятлары окаң). Худайың мукаддес рухуның көмеги болмаса, биз «гараңкылыгың ишлери» болан «айшы-эшрет, серхошлык, азгынлык, ахлаксызлык» ялы ишлере баш гошарыс (Рим. 13:12, 13). Биз гүнәли хөвеслеримизе гаршы сөвешде еңиш газанмак үчин, үнсүмизи гөкдәки затлара гөнүкдирмели. Мунуң үчин болса тагалла этмели. Павлус ресул: «Теними хорлап, оны гул эдйәрин» дийди (1 Кор. 9:27). Шол себәпли биз хем өз хөвеслеримизе берк гаршы дурмалы. Гелиң, гечмишде яшан ики вепалы адамың Худайың гөвнүнден турмак үчин нәмелери эдендигини билелиң (Евр. 11:6).

7, 8. a) Ыбрайым билен Сарра нәхили кынчылыклара душ гелдилер? б) Ыбрайым үнсүни нәмә гөнүкдирди?

⁷ Ехова Ыбрайым пыгамбере машгаласы билен Кенган юрдуна гөчмелидигини айданда, ол оны деррев  ерине етирди. Ыбрайымың Худая иман эдйәндиги ве гулак асяндыгы үчин, Ехова онуң билен әхт баглашып: «Сенден бейик бир миллет ярадып, Мен сени ялкарын» дийди (Гел. чык. 12:2). Эмма энчеме йыл гечсе-де, Ыбрайым билен Сарраның чагасы болмаярды. Ехова Ыбрайыма берен вадасыны унутдымыка? Шейле-де Кенганда яшамак Ыбрайыма аңсат дәлди. Ол машгаласы билен Месопотамияның гүлләп өсйән Ур шәхеринде өйүни ве доган-гарындашларыны гоюп гайдыпды. Олар 1 600 км-ден говрак ёл йөрәп, Кенгана бардылар ве ол ерде чадырларда яшадылар, кәте ачлык чекдилер ве талаңчылара душдулар (Гел. чык. 12:5, 10; 13:18; 14:10—16). Эмма олар аматлы яшайшы болан Ур шәхерине доланмак барада асла пикирем этмейәрдилер (Еврейлер 11:8—12, 15-нҗи аятлары окаң).

⁸ Ыбрайым үнсүни ер йүзүндәки затлара гөнүкдирмән, Ехова «иман этди» (Гел. чык. 15:6). Ол үнсүни гөкдәки затлара, ягны Худайың берен вадаларына гөнүкдирди. Нетиҗеде, Ыбрайымың иманы сылагланды. Гудратыгүйчли Худай оңа шейле дийди: «Асмана серет. Сен шол гөрүнйән йылдызлары санап билсең санай. Сениң шонча-да несиллериң болар» (Гел. чык. 15:5). Бу сөзлер Ыбрайыма, гөр, нәхили теселли берендир! Ыбрайым хер гезек йылдызлы асманы сынланда, Ехованың неслини көпелтмек барада берен вадасыны ятландыр. Худайың вада бериши ялы, Онуң беллән вагтында Ыбрайым пыгамбериң оглы дүнйә инди (Гел. чык. 21:1, 2).

9. Биз нәдип Ыбрайым пыгамбериң гөрелдесине эерип билерис?

⁹ Ыбрайым пыгамбер ялы, биз хем Худайың вадаларының ерине етмегине гарашярыс (2 Пет. 3:13). Эгер биз үнсүмизи гөкдәки затлара гөнүкдирмесек, бу вадаларың ерине етмеги гиҗикйән ялы гөрнүп, бизиң рухы тайдан говшамагымыз мүмкин. Меселем, сен өң пионер болмак я-да Ехова көпрәк гуллук этмек үчин кәбир затлардан гечмели болдуңмы? Эгер шейле болса, онда сен өвгә мынасып. Эмма сен хәзир Худая гуллук этмек үчин нәме эдйәрсиң? Ядымызда болса, Ыбрайым пыгамбер «берк эсаслы шәхере гарашярды» (Евр. 11:10). Ол «Худая иман этди, бу оңа догрулык сайылды» (Рим. 4:3).

10. Муса пыгамбер нәхили шертлерде өнүп-өсди?

¹⁰ Үнсүни гөкдәки затлара гөнүкдирен адамларың ене бири — Муса пыгамбер. Оңа яш вагты «мүсүрлилериң әхли билимлеринден сапак берилди». Бу йөнекей билим дәлди. Шол дөвүрде Мүсүр иң гүйчли хөкүмдарлыкды. Муса фараоның машгаласында өнүп-өсди. Ол Мүсүрде алан ёкары билими аркалы «сөзлеринде, ишлеринде гүйчли» адам болды (Рес. иш. 7:22). Бу билим оңа Мүсүрде абрайлы адам болмага мүмкүнчилик берйәрди. Эмма Муса пыгамбер үнсүни хас ёкары затлара, ягны Худайың ислегини ерине етирмәге гөнүкдирди.

11, 12. Муса нәхили билими гыммат сайярды ве биз муны ниреден билйәрис?

¹¹ Муса чагака өз эҗеси Ёкебет оңа ехудыларың Худайы барада гүррүң берен болмалы. Муса Ехова барада алан билимини гыммат сайярды ве онуң ислендик байлыкдан ваҗыпдыгына дүшүнйәрди. Шол себәпли ол бай ве ыгтыярлы болмак мүмкинчилигинден йүз өвүрди (Еврейлер 11:24—27-нҗи аятлары окаң). Мусаның алан рухы билими ве Ехова  болан иманы үнсүни гөкдәки затлара гөнүкдирмәге көмек этди.

¹² Муса өз дөврүнде ёкары билим алса-да, оны Мүсүрде везипе ве ат-абрай газанмак я-да байлык топламак үчин уланмады. Муса «фараоның гызының оглы дийип таналмакдан иман аркалы боюн гачырды. Ол аз салым гүнәниң сапасыны сүрмекден, Худайың халкы билен биле хорлук гөрмеги говы гөрди». Гөршүмиз ялы, Муса алан рухы билимини Ехованың ниетини амала ашырмак үчин уланыпдыр.

13, 14. a) Муса Ехованың табшырыгыны берҗай этмәге нәдип тайярланды? б) Муса ялы биз хем нәме этмели?

¹³ Муса пыгамбер Ехова ве онуң халкы билен йүрекден гызыкланярды. Ол кырк яшындака, Худайың халкына Мүсүр гулчулыгындан азатлыга чыкмага көмек эдип билерин дийип пикир эдйәрди (Рес. иш. 7:23—25). Эмма Ехова Муса бу табшырыгы бермәнкә, ол кәбир затлары өвренмелиди. Муса кичигөвүнлилик, сабыр, юмшаклык ве өзүңе эрк этмеклик ялы хәсиетлери өсдүрмелиди (Сүл. тым. 15:33). Шейле-де оны өңүндәки сынаглара ве кынчылыклара тайярламалыды. Мусаның 40 йыллап чопанчылык этмеги оңа Худая ярамлы хәсиетлери өсдүрмәге көмек этди.

¹⁴ Муса чопанчылык эден дөврүнде дурмуш теҗрибесинден кәбир затлары өврендими? Элбетде, Мукаддес Язгыларда онуң «җуда кичигөвүнли адамдыгы, бейле адамың ер йүзүнде башга ёкдугы» айдыляр (Сан. 12:3). Мусаның кичигөвүнлилиги оңа дүрли хәсиетли адамлара ёлбашчылык этмәге ве оларың кынчылыкларыны сабырлылык билен чөзмәге көмек этди (Мүс. чык. 18:26). Шонуң ялы биз хем «агыр мушакгатдан» гечип, Ехованың вада берйән тәзе дүнйәсине гирип билер ялы, Худая ярамлы хәсиетлери өсдүрмели (Ылх. 7:14). Биз өйкелек я-да ынҗык хасаплаян адамларымыз билен хем оңшуклы яшап билйәрисми? Мунуң үчин Петрус ресулың: «Хеммелери сылаң, доганлары сөйүң» диен маслахатына эерсек пейдалы болар (1 Пет. 2:17).

15, 16. a) Биз нәме үчин үнсүмизи гөкдәки затлара гөнүкдирмели? б) Месихчилериң говы эдим-гылымлы болмагы нәме үчин ваҗып?

¹⁵ Биз «кын пурсатларда» яшаярыс (2 Тим. 3:1). Шол себәпли рухы тайдан оя болмак үчин, үнсүмизи гөкдәки затлара гөнүкдирмели (1 Сел. 5:6—9). Гелиң, муны этмегиң үч усулына середелиң.

¹⁶ Өзүмизи алып баршымыз. Петрус ресул өзүңи эдепли алып бармагың ваҗыпдыгына дүшүнйәрди. Ол: «Оңат ишлериңизи гөрүп... Худайы шөхратландырмалары үчин миллетлер арасында оңат эдим-гылымлы болуң» дийди (1 Пет. 2:12). Шол себәпли биз ниреде болсак-да: өйде, ишде, мекдепде, дынч аланымызда я-да вагызда говы эдим-гылымымыз билен Ехованы шөхратландырҗак болуп җан этмели. Элбетде, бикәмил боланымыз үчин, бизиң әхлимиз ялңышярыс (Рим. 3:23). Эмма «иманың оңат гөрешини алып барсак», бикәмиллигимизе гаршы сөвешде еңиш газанып билерис (1 Тим. 6:12).

17. Биз Иса Месихиң гарайшыны нәдип өсдүрип билерис? (Макаланың башындакы сурата середиң).

¹⁷ Гарайшымыз. Говы эдим-гылымлы болмак үчин догры гарайшы өсдүрмели. Павлус ресул: «Месих Исада болан бу пикир сизде-де болсун» дийди (Флп. 2:5). Исаның гарайшы нәхилиди? Ол кичигөвүнлиди. Шол  себәпли ол җан аяман Худая гуллук этди. Онуң үчин иң ваҗып зат — адамлара Худайың Патышалыгы барада хош хабары вагыз этмекди (Мар. 1:38; 13:10). Иса Худайың Сөзүне эсасы гөркезме хөкмүнде гараярды (Яхя 7:16; 8:28). Ол Мукаддес Язгылары чуңңур өзлешдирени үчин, көпленч оңа салгыланярды, оны гораярды ве дүшүндирйәрди. Бизем вагыз гуллугында кичигөвүнли ве ыхласлы болсак хем-де ызыгидерли шахсы окувыны гечирсек, Иса Месихиң гарайшыны өсдүрип билерис.

18. Биз Ехованың ишини нәдип голдап билерис?

¹⁸ Эдйән тагаллаларымыз. Ехова «гөкдәкилериң, ердәкилериң ве ер астындакыларың бары Исаның адының хатырасына дыз эпмегини» ислейәр (Флп. 2:9—11). Исаның хәкимиетде ваҗып орны болса-да, ол кичигөвүнлилик билен Атасына табын боляр. Шол себәпли биз хем онуң гөрелдесине эермели (1 Кор. 15:28). Нәдип? Биз «бүтин миллетлери шәгирт этмек» табшырыгыны ерине етирмек үчин бар гүйҗүмиз билен тагалла этмели (Мат. 28:19). Шейле-де биз якынымыза ве доган-уялара көмек этсек, «хеммелере... ягшылык этдигимиз» болар (Гал. 6:10).

19. Биз нәме этмеги йүрегимизе дүвмели?

¹⁹ Биз Ехованың үнсүмизи гөкдәки затлара гөнүкдирмелидигимизи ятладяндыгына өрән миннетдар! Шол себәпли биз «өңүмизде гойлан ярышда сабырлы ылгамалы» (Евр. 12:1). Гелиң, әхлимиз «Реб үчин йүрекден ишләлиң»! Шонда гөкдәки Атамыз бизиң ак йүрекден эдйән тагаллаларымызы сылаглар (Кол. 3:23, 24).